យោងតាមទិន្នន័យចេញផ្សាយ កាលពីថ្ងៃអង្គារ ដោយសមាគមធានារ៉ាប់រងទូទៅកម្ពុជា(GIAC) បានបង្ហាញថា ប្រាក់ចំណូលដែលក្រុមហ៊ុនផ្តល់សេវាធានារ៉ាប់រងនៅក្នុងប្រទេសកម្ពុជាសម្រេចបាន បានកើនឡើង២៥ភាគរយ ដល់២២លានដុល្លារ សម្រាប់រយៈពេលប្រាំមួយខែដំបូងនៃឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។
សេវាធានារ៉ាប់រងផ្នែកវិស្វកម្មបានក្លាយជាឆ្អឹងខ្នងរបស់វិស័យនេះ ដោយសារតែប្រាក់បង់ថ្លៃសេវាធានារ៉ាប់រងបានកើនឡើង១០២ភាគរយ ដល់២,៤លានដុល្លារ ក្នុងចន្លោះពីខែមករា ដល់ខែកក្កដា ខណៈដែលផ្នែកបន្ទាប់ដែលបានកើនឡើងខ្លាំងផងដែរនោះគឺសេវាធានារ៉ាប់រងអគ្គិភ័យ ដែលបានកើនឡើង៣៥ភាគរយ ដល់ប្រហែល៧លានដុល្លារ។
គួរបញ្ជាក់ថា ថ្លៃសេវាកម្មសំដៅទៅលើចំនួនទឹកប្រាក់ដែលត្រូវបានគិតលើវិសាលភាពនៃសេវាធានារ៉ាប់រងជាក់លាក់ណាមួយ។ ប្រាក់បង់ថ្លៃសេវាធានារ៉ាប់រងផ្នែកសុខភាព និងយានជំនិះ បានកើនឡើងបន្តិចបន្តួចតែប៉ុណ្ណោះ ដោយបូកបញ្ចូលគ្នាបានកើនឡើង១១ភាគរយ ដល់៣,២២លានដុល្លារ សម្រាប់ផ្នែកសុខភាព និង៣,៨លានដុល្លារសម្រាប់ផ្នែកយានជំនិះ។
លោក អឿន ចាន់វិសុទ្ធ លេខាសមាគមGIAC បានលើកឡើងថា កំណើននៃបរិមាណតម្រូវការរោងចក្រ ផ្លូវថ្នល់ ស្ពាន និងទំនប់វារីអគ្គិសនី នៅក្នុងប្រទេសកម្ពុជា បានជួយជំរុញឲ្យវិស័យសំណង់ស្ទុះឡើង ជាហេតុបណ្តាលឲ្យប្រាក់បង់ថ្លៃសេវាធានារ៉ាប់រងផ្នែកវិស្វកម្មកើនឡើង។
លោកបានមានប្រសាសន៍ថា “ យើងបានចាប់ផ្តើមធ្វើការកាន់តែច្រើនឡើងៗជាមួយផ្នែកសំណង់ ដោយសារតែផ្នែកនេះកំពុងតែស្ទុះឡើង។ ឧទាហរណ៍ បន្ទាប់ពីក្រុមហ៊ុនមួយបញ្ចប់ការសាងសង់ទំនប់វារីអគ្គិសនី ក្រុមហ៊ុននោះនឹងដំឡើងម៉ាស៊ីនដែលត្រូវការសេវាធានារ៉ាប់រង”។
យោងតាមទិន្នន័យរបស់សមាគម GIAC បានបង្ហាញទៀតថា ស្របពេលដែលក្រុមហ៊ុនផ្តល់សេវាធានារ៉ាប់រងបានណែនាំឲ្យម្ចាស់អចលនទ្រព្យ និងរោងចក្រ បង្វែរស្មារតីយកចិត្តទុកដាក់ទៅលើការគ្រប់គ្រងហានិភ័យ ប្រាក់សំណងសម្រាប់ការធានារ៉ាប់រង ដែលត្រូវបានបង់ឲ្យអតិថិជន ក្នុងរយៈពេលប្រាំមួយខែដំបូងនៃឆ្នាំនេះ បានធ្លាក់ចុះ៦៣ភាគរយ មក៣,៤លានដុល្លារ ធៀបនឹងរយៈពេលដូចគ្នាកាលពីឆ្នាំមុន។
លោក ទី អាទិត្យ អនុប្រធានផ្នែកប្រតិបត្តិការក្រុមហ៊ុន ធានារ៉ាប់រងបន្តកម្ពុជា(Cambo-dian Reinsurance) មានប្រសាសន៍ថា “ ប្រសិនបើយើងធ្វើការប្រៀបធៀបឆ្នាំនេះ និងឆ្នាំមុន យើងមិនឃើញមានគ្រោះថ្នាក់ធំដុំ [ដែលបង្កឡើងដោយអគ្គិភ័យទេ]។ ម្ចាស់រោងចក្រដឹងពីរបៀប[បង្កាគ្រោះថ្នាក់ទាំងនេះ]តាមរយៈបច្ចេកទេសនៃការគ្រប់គ្រងហានិភ័យ”។
រយៈពេលជាច្រើនឆ្នាំកន្លងមកនេះក្រុមហ៊ុនធានារ៉ាប់រងនានា បានយល់ឃើញថា មានការលំបាកក្នុងការសម្រេចឲ្យបានជំហររឹងមាំនៅលើទីផ្សារ ដោយសារតែ ប្រជាជននៅតែមិនទាន់យល់ច្បាស់អំពីគំនិតនៃការមានសេវាធានារ៉ាប់រង។
លោក យុក ចំរើនរិទ្ធ អ្នកគ្រប់គ្រងទូទៅក្រុមហ៊ុនធានារ៉ាប់រង ហ្វ័រតេ អ៊ីនសួរេន (Forte Insurance) បានមានប្រសាសន៍ថា “ ទឹកប្រាក់បង់ថ្លៃសេវាធានារ៉ាប់រងនៅតែមានចំនួនតិចខ្លាំង ប្រសិនបើយើងធ្វើការប្រៀបធៀបជាមួយប្រទេសថៃ និងប្រទេសវៀតណាម។ យើងដឹងរួចទៅហើយថា អតិថិជនធានារ៉ាប់រងជិត៨៥ភាគរយ គឺជាជនបរទេស ដែលកំពុងដំណើរការអាជីវកម្មនៅក្នុងប្រទេសកម្ពុជា”។
អ្នកគ្រប់គ្រងក្រុមហ៊ុនផ្តល់សេវាធានារ៉ាប់រងរូបនេះ បានលើកឡើងបន្ថែមទៀតថា ប្រាក់ចំណូលពីការបង់ថ្លៃសេវាធានារ៉ាប់រងសរុប នៅក្នុងវិស័យធានារ៉ាប់រង បានកើនឡើង២០ទៅ២៥ភាគរយជារៀងរាល់ឆ្នាំដល់តែជាង៣០លានដុល្លារប៉ុណ្ណោះ បើគិតតាំងពីចំនួនទឹកប្រាក់នេះកាលពីឆ្នាំ២០០០ បើប្រៀបធៀបនឹងវិស័យធានារ៉ាប់រងនៅប្រទេសជិតខាង ដូចជាប្រទេសថៃ ទទួលបានប្រាក់ចំណូលពីប្រាក់បង់ថ្លៃសេវាធានារ៉ាប់រងចំនួន៧.០០០លានដុល្លារ ខណៈដែលប្រាក់ចំណូលទទួលបានពីថ្លៃបង់សេវាធានារ៉ាប់រងនៅប្រទេសវៀតណាមមាន២.០០០លានដុល្លារ៕
ប្រែសម្រួលដោយ កង សុធា