36 C
Phnom Penh

សិល្ប​ការិនី​ខ្មែរ បូនីតា ដាដេណា​ ចេញ​មុខ​ប្រកាស​គាំ​ទ្រ​គណ​បក្ស​សង្គ្រោះជាតិជាសាធារណៈ​

ដោយ ឌឹ ខេមបូឌា ដេលី

បទវិភាគ

សិល្ប​ការិនី​ខ្មែរ​ បូនីតា ដាដេណា បាន​អះ​អាង​កាលពី​ម្សិល​មិញ​ថា នាង​បាន​ប្រកាស​ជា​សាធារណៈ​នូវ​ការ​គាំ​ទ្រ​របស់​នាង​ចំពោះ​គណ​បក្ស​សង្គ្រោះ​ជាតិ​ ដែល​នេះ​ជា​ទង្វើ​មួយ​ដែល​អាច​​បង្កផល​ប៉ះ​ពាល់​ដល់​សន្តិ​សុខ​ និង​អាជីព​របស់​នាង​។

ជា​សិល្បការិនី​​ផ្នែក​សម្តែង​ភាព​យន្ត​ខ្មែរ​ នាង​ ដាដេណា ត្រូវ​គេ​មើល​ឃើញ​ជាលើក​ដំបូង​នៅ​ជាមួយ​គណ​បក្ស​សង្គ្រោះ​ជាតិ​ កាល​ ពី​ថ្ងៃ​សៅរ៍​ នៅ​ឯ​ទីកន្លែង​ធ្វើ​មហា​បាតុកម្ម​របស់​​​គណ​បក្ស​នេះ​ ធ្វើ​ឡើង​នៅ​ទីលាន​ប្រជា​​​ធិប​តេយ្យ​។

សិល្បការិនី​ ដែលសម្តែង​ជា​ស្ត្រី​ម្នាក់​ដែល​​តាម​​សង​សឹក​អ្នក​ចាប់​រំលោភ​នាង នៅ​ក្នុង​ខ្សែ​ភាព​យន្ត​ថ្មីៗ​របស់​នាង គឺរឿង​ “ នាង​អាប” នោះ បាន​ស្ថិត​នៅ​លើ​​វេទិ​កា​​ និង​បាន​ចែក​បូ ​អម​ដោយពាក្យ​ស្លោក​របស់​គណ​បក្ស​សង្គ្រោះ​ជាតិ​ឲ្យ​ដល់​ក្រុម​អ្នក​គាំ​ទ្រ​ ខណៈ​ដែល​នាង​ចង​មួយ​ខ្លួន​ឯង​។

កាល​ពីថ្ងៃ​អង្គារ នាង​ ដាដេណា បាន​ចូល​រួមដំណើរ​ជាមួយ ​​លោក សម រង្ស៊ី ខណៈ​ដែល​លោក​បាន​ចុះ​ទៅ​ផ្សារ​អូរឫស្សី​ក្នុង​រាជ​ធានី​ភ្នំពេញ ដើម្បី​ស្វាគមន៍​អ្នក​គាំ​ទ្រ​គណ​បក្ស​ប្រឆាំង​។ ក្នុង​ពេល​ដែល​វត្ត​មាន​របស់លោក​ សម រង្ស៊ី បាន​ទាក់​ទាញ​ប្រជាជន​រាប់​ពាន់​នាក់​ទៅ​ផ្សារ​នោះ​ នាង​ ដាដេណា ក៏​បាន​ទាក់​ទាញ​​ចំណា​ប់​​អារម្មណ៍​បាន​មួយ​ចំណែក​ធំ​​សម្រាប់​ខ្លួន​​ឯង​ផង​ដែរ។

សិល្ប​ការិនី​រូប​នេះ​បាន​លើកឡើង​​តាម​ទូរ​ស័ព្ទ​កាល​ពី​ម្សិល​មិញថា នាង​បាន​ចូលរួម​ក្នុង​បុព្វ​ហេតុរបស់​លោក សម រង្ស៊ី កាល​ពី​ថ្ងៃ​សុក្រ​ ពីព្រោះ​នាងចាប់​អារម្មណ៍​យ៉ាងខ្លាំង​ទៅ​លើ​​​គោល​នយោ​បាយ​របស់គណ​បក្ស​សង្គ្រោះ​ជាតិ​។

នាង​បាន​មាន​ប្រសាសន៍​ថា​ “ គាត់​គឺ​ជា​ជន​​គំរូ​ម្នាក់​នៅក្នុង​ចិត្ត​របស់​ខ្ញុំ​ជាយូរ​មក​ហើយ​។ គាត់​បាន​និង​កំពុង​តែ​តស៊ូ​ពុះ​ពារ​គ្រប់​ពេល​វេលា​ក្នុង​ការ​ប្រកួត​ប្រជែង​ផ្នែក​នយោ​បាយ​នេះ​ ដើម្បី​ប្រជា​ជន​ និង​ដើម្បី​ផល​ប្រយោ​ជន៍​​ជាតិ។ នេះជា​ពេល​ដែល​ខ្ញុំ​ត្រូវ​តែ​បញ្ចេញ​​មតិ និង​បង្ហាញ​ប្រាប់​ប្រជា​ពល​រដ្ឋ​ថា ខ្ញុំ​គាំ​ទ្រ​គាត់”។

ខណៈ​ដែល​មនុស្ស​ជា​ច្រើន​នៅក្នុង​ឧស្សា​ហកម្ម​សិល្បៈ​កម្សាន្ត​ខ្មែរ​បាន​បង្ហាញ​ការ​គាំទ្រ​ជា​សាធារណៈ​ចំពោះ​គណ​បក្ស​ប្រជា​ជន​កម្ពុជាកំពុង​​កាន់​អំណាច​ ស្ទើ​រតែ​គ្មាន​នរណា​ម្នាក់​សម្តែង​ការ​គាំទ្រ​របស់​ខ្លួន​ចំពោះ​គណ​បក្ស​សង្គ្រោះ​ជាតិ​ តែ​បែរ​ជា​​ គណ​បក្ស​សង្គ្រោះ​ជាតិ បានទទួល​សំឡេង​គាំទ្រ​យ៉ាង​ច្រើន​​ក្នុង​ការ​បោះ​ឆ្នោត​ថ្ងៃ​ទី​២៨ ខែ​កក្កដា។

នាង ដាដេណា បាន​មាន​ប្រសាសន៍ថា តាម​​រដ្ឋធម្ម​នុញ្ញ​នាង​គួរ​តែ​អាច​សម្តែង​ជា​ចំហនូវ​ការ​ពេញ​ចិត្ត​ខាង​នយោ​បាយ​របស់​នាង​ដោយ​គ្មាន​ការ​ភ័យ​ខ្លាច អំពី​ផល​វិបាក​ផ្ទាល់​ខ្លួន ឬអាជីព​ឡើយ។

នាង​បាន​លើកឡើង​បន្ត​ថា “ រដ្ឋ​ធម្ម​នុញ្ញ​កម្ពុជា និង​ច្បាប់​កម្ពុជា​ចូល​ជា​ធរមាន និង​ត្រូវ​បាន​អនុវត្ត​ដ៏​មាន​ប្រសិទ្ធិភាព​ហើយ​នោះ មិន​បាន​រារាំង​សិល្បករ សិល្បការិនី​ទាំង​ឡាយ​​មិន​ឲ្យ​ចូល​រួម​ និង​គាំទ្រ​បក្ស​ប្រឆាំង​ទេ”។

លោក ឡោ ស៊ី ដែល​ជាតារា​កំប្លែង​ដ៏​ល្បី និង​​គាំ​ទ្រ​គណ​បក្ស​ហ៊្វុនស៊ិន​ប៉ិច បាន​ទទួល​មរណ​​​ភាព​ក្នុង​ខែ​កញ្ញា ឆ្នាំ​២០១១​ក្នុង​គ្រោះ​ថ្នាក់​ចរាចរតាម​ផ្លូវ​។ មុនពេល​បាត់​បង់​ជីវិត​ លោក​បាន​បាន​លើក​ឡើង​ថា លោក​បាន​ជួប​ការ​លំបាកក្នុង​ការ​ស្វែង​រក​ការ​ងារ​សម្តែង​នៅ​តាម​ទូរទស្សន៍​ បន្ទាប់​ពី​លោក​បាន​ចូល​រួម​ក្នុង​យុទ្ធ​នាការ​ឃោស​នា​បោះ​ឆ្នោត​ជាតិ​ឆ្នាំ​២០០៣ សម្រាប់​​គណ​បក្ស​រាជា​និយម។

លោក ឡោ ស៊ី ដែល​​មាន​ឈ្មោះ​ពិត​ប្រាកដ​ថា ប៉ុក ថារ៉េត បាន​​​​ចាក​ចេញ​ពី​គណ​បក្ស​ហ៊្វុនស៊ិន​ប៉ិច ហើយ​​បាន​ចេញ​លិខិត​សុំ​ទោស​មួយច្បាប់​​ជូន​ចំពោះ​លោក​​នាយក​រដ្ឋ​មន្ត្រី ហ៊ុន សែន។ ក្រោយមក ​អាជីព​របស់​គាត់​ក៏​មាន​សកម្មភាព​ឡើងវិញ។

កញ្ញា ទូច ស្រីនិច ដែល​ជា​សិល្ប​ការិនី​គាំ​ទ្រ​គណបក្ស​ហ៊្វុនស៊ិន​ប៉ិចម្នាក់​ផ្សេង​ទៀត​​ដែល​ត្រូវ​គេ​បាញ់​ចំនួន​បីគ្រាប់​ ចេញ​ពី​ចំណុច​ជិតនាង​​ កាល​ពី​ថ្ងៃ​ទី​២២ ខែ​តុលា ឆ្នាំ​២០០៣។​ តារា​វ័យ​ក្មេង​រូបនេះ​កម្រើក​លែង​រួច​ដោយ​សារ​របួស​ចំឆ្អឹង​ខ្នង​ ហើយ​ម្តាយ​របស់​នាង​បាន​ស្លាប់​នៅក្នុង​ហេតុការណ៍វាយ​ប្រហារ​នោះ​។ កញ្ញា ស្រីនិច ដែល​គេ​ជឿ​ថា ត្រូវ​បាន​​កំណត់​ថា ជា​​គោល​ដៅ​មួយ​ដោយ​​​​សារតែ​នាង​​មាន​ការ​ពាក់​ព័ន្ធ​នឹង​រឿង​នយោ​បាយ ហើយ​បន្ទាប់​ពី​សម្តែង​ចម្រៀង​យុទ្ធនា​ការ​​មួយ​ចំនួន​​ឲ្យ​គណ​បក្ស​រាជា​និយម នាង​ត្រូវ​បាន​ផ្តល់​សិទ្ធិ​ជ្រក​កោន​នៅ​សហ​រដ្ឋ​អាមេរិក​។

នាង​ ដាដេណា បាន​មាន​ប្រសាសន៍ថា “ខ្ញុំ​ពិត​ជា​មិនបារម្ភ​អំពី​អាជីព​របស់​ខ្ញុំ​ទេ​ ក៏​ប៉ុន្តែ ខ្ញុំ​បារម្ភ​តិច​តួច​អំពី​សុវត្ថិ​ភាព​របស់ខ្ញុំ”។

លោកស្រី មូរ សុខហួរ អ្នក​តំណាង​រាស្ត្រ​របស់​គណ​បក្ស​សង្គ្រោះជាតិ​ប្រចាំខេត្ត​បាត់​ដំបង​បាន​លើក​ឡើងថា មាន​សិល្ប​ករ សិល្ប​ការិនី​ជា​ច្រើន ដែល​គាំ​ទ្រ​បក្ស​របស់​លោក​​ស្រី ក៏​ប៉ុន្តែ​ ពួក​គេត្រូវ​រក្សា​និន្នា​ការ​នយោ​បាយ​​របស់​ខ្លួន​ជា​សម្ងាត់​ ដោយ​សារ​តែ​ភ័យ​ខ្លាច។

លោក​ស្រី សុខហួរ បាន​មាន​ប្រសាសន៍​ថា “ ហេតុផល​មួយ​គឺថា ពួក​គេ​នឹង​បាត់​បង់​កិច្ច​សន្យា​របស់​ខ្លួន​ [ជា​មួយ​ស្ថានីយ​ទូរទស្សន៍​] ហើយ​ហេតុផល​ទី២ គឺ​ដោយ​សារ​តែ​ភ័យ​ខ្លាច។ អ្នក​ដែល​ចង់​រស់​នៅ​ក្រៅ​សេចក្តី​ភ័យ​ខ្លាច​ ត្រូវ​បាន​កត់​សម្គាល់​។ ខ្ញុំ​ចង់​បញ្ឈប់​វប្ប​ធម៌​នៃ​អំពើ​ហិង្សា​នេះ​”៕

(រាយការណ៍​បន្ថែមដោយ Dene-Hern Chen)

ប្រែ​សម្រួលដោយ ចេវ ប៊ុននី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស