27 C
Phnom Penh

សាលា​ដំបូង​រាជធានី​ភ្នំ​ពេញ​ផ្ដន្ទាទោស​​​បុរសម្នាក់​ដាក់​ពន្ធនាគារ​​អស់​មួយ​ជីវិត​ពី​បទមនុស្ស​​ឃាត

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​សាលាដំបូង​រាជធានី​ភ្នំពេញ បាន​រក​ឃើញ​ថា​​ បុរស​ម្នាក់​អាយុ​២២​ឆ្នាំ មាន​ពិរុទ្ធភាព​ដោយ​សារ​បាន​​កាប់​អ្នក​រត់​ម៉ូតូឌុប​​ម្នាក់​រហូត​ដល់​ស្លាប់​ និង​ផ្តន្ទា​ទោស​ជន​នេះ​ដាក់​ពន្ធនាគារ​អស់​មួយ​ជីវិត​។

ចៅក្រម​ជំនុំ​ជម្រះ​លោក ជា សុខឃាង មាន​ប្រសាសន៍​ថា “ តុលាការ​រក​ឃើញ​ថា ជន​​សង្ស័យ​ឈ្មោះ សុខ សម្ផស្ស មាន​ពិរុទ្ធ​ភាព​ពី​បទ​មនុស្ស​ឃាតគិតទុក​ជា​មុន​ ហើយ​ផ្តន្ទា​ទោស​ជន​នេះ​ឲ្យ​ជាប់​ពន្ធនាគារ​អស់​មួយ​ជីវិត និង​បង្គាប់​ឲ្យ​បង់​ប្រាក់​សំណង​​ចំនួន​៥.០០០​ដុល្លារ​ដល់​គ្រួសារ​ជន​រង​គ្រោះ​”។

លោក ជា សុខឃាង​ បន្ត​ថា កាលពី​ខែ​កញ្ញា​ ​ឆ្នាំ​មុន​ ជន​សង្ស័យ​ ឈ្មោះ​សុខ​ សម្ផស្ស​ បាន​សុំ​​ឲ្យ​ជន​រង​គ្រោះ​ឈ្មោះ ភាព ស៊ីណេត អាយុ​២៥ឆ្នាំ ឌុប​ខ្លួន​​ពី​ក្រុង​តាខ្មៅ​ ក្នុង​ខេត្ត​កណ្តាល​ទៅ​កាន់​សង្កាត់​ចោម​ចៅ ខណ្ឌ​ពោធិ៍សែន​ជ័យ​ ​រាជធានី​ភ្នំពេញ​ ដែល​នៅ​ទី​នោះ​ ជន​សង្ស័យ​ បាន​វាយ​ប្រហារ​ ភាព ស៊ីណេត​​​ ដោយ​កាប់​ជន​រងគ្រោះ​ត្រូវ​​ចំ​ទ្រូង​ ពោះ​ ដោយ​កាំបិត​ ហើយ​​ប្លន់​យក​ម៉ូតូ​ជន​រង​គ្រោះ​តែ​ម្ដង​​។

ព្រះ​រាជអាជ្ញា​រង​អម​សាលា​ដំបូង​រាជ​ធានី​ភ្នំពេញ លោក សឿ វន្នី​ ថ្លែងថា “ជន​​សង្ស័យ​​ឈ្មោះ សម្ផស្ស​ នេះ​បាន​កាប់​​ជន​រង​គ្រោះ​រហូត​ដល់​ស្លាប់​ ហើយ​បន្ទាប់​​មក​បាន​ទម្លាក់​សាកសព​ជន​រង​គ្រោះ​​ទៅ​ក្នុង​ស្រះ​ទឹក​មួយ”។​ លោក សឿ វន្នី មាន​ប្រសាសន៍​បន្ត​ថា ជន​សង្ស័យ​បាន​អះអាង​​ប្រាប់​តុលាការ​ក្នុង​ពេល​បើក​សវនាការ​ថា ខ្លួន​គ្មាន​កំហុសទេ​ ​ដោយ​ថា  មាន​ជន​មិន​ស្គាល់​អត្ត​សញ្ញាណ​បី​នាក់​បាន​
វាយ​ប្រហារ​ ភាព ស៊ីណេត។

ជន​សង្ស័យ​បន្ត​ថា “ខ្ញុំ​មិន​បាន​​សម្លាប់​ជន​រង​គ្រោះ​ទេ​ គឺ​មាន​ការ​វាយ​តប់​គ្នា​​មួយ​ ហើយ​​បន្ទាប់​​មក​សាក​សព​របស់​ជន​រង​គ្រោះ​ត្រូវ​បាន​​គេ​ប្រទះ​ឃើញ​នៅ​ក្នុង​ស្រះ​ទឹក​​មួយ”។

លោក​ស្រី​ ពង្ស យុកហៀប​ មេធាវី​ការពារ​ជន​សង្ស័យ​​បាន​មាន​ប្រសាសន៍​​ថា អ្នក​ស្រី​អាច​​ពិភាក្សា​ជាមួយ​ជន​សង្ស័យ​ដើម្បី​ប្តឹង​ឧទ្ធរណ៍​ប្រឆាំង​ នឹង​សាល​ក្រម​នេះ​៕

ប្រែសម្រួលដោយ ឃិន ណៃ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស