លោក ជាម យៀប សមាជិកជាន់ខ្ពស់គណបក្សប្រជាជនកម្ពុជា បានឲ្យដឹងកាលពីម្សិលមិញថា ការរុះរើគណៈរដ្ឋមន្ត្រីនឹងត្រូវបានសម្រេចនៅសប្តាហ៍ក្រោយនេះមុនការបើកសម័យប្រជុំសភាតាមការគ្រោងទុកនៅថ្ងៃទី២៣ ខែកញ្ញា។
លោក ជាម យៀប បានបញ្ជាក់ថា គណបក្សកំពុងកាន់អំណាចនេះនឹងផ្លាស់ប្តូររដ្ឋមន្ត្រីមួយចំនួន ប៉ុន្តែថា គណបក្សនេះមិនទាន់បានសម្រេចថា តើនរណានឹងបាត់បង់តួនាទី និងទទួលបានតួនាទីថ្មីឡើយ។ លោកបានថ្លែងថា “រដ្ឋមន្ត្រីមួយចំនួននឹងត្រូវបានផ្លាស់ប្តូរ ប៉ុន្តែ ខ្ញុំនៅមិនទាន់ដឹងថា តើរដ្ឋមន្ត្រីមួយណានឹងត្រូវបានប្តូរទេ។ រឿងនេះនឹងដឹងច្បាស់នៅអំឡុងសប្តាហ៍ក្រោយ”។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានឲ្យដឹងថា លោកក៏មិនទាន់ដឹងច្បាស់ដែរថា តើរដ្ឋមន្ត្រីណាខ្លះរបស់គណបក្សប្រជាជនកម្ពុជា ដែលនឹងត្រូវផ្លាស់ប្តូរ ឬថា តើអាចនឹងមានការដំឡើងឋានៈរបស់សមាជិកវ័យក្មេងមួយចំនួនរបស់គណបក្សកាន់អំណាចឬយ៉ាងណានោះទេ។ លោកបានមានប្រសាសន៍ថា “មានតែនាយករដ្ឋមន្ត្រីប៉ុណ្ណោះ ដែលអាចជ្រើសរើសអ្នកណាម្នាក់មកធ្វើជារដ្ឋមន្ត្រី ដូច្នេះសម្រាប់ពេលនេះ គ្មានអ្នកណាដឹងទេ។ មានតែលោកនាយករដ្ឋមន្ត្រី និងលោក សាយ ឈុំ [អគ្គលេខាធិការគណបក្សប្រជាជនកម្ពុជា]ប៉ុណ្ណោះដែលអាចដឹង”។
ទោះជាយ៉ាងណា លោក ផៃ ស៊ីផាន បានបញ្ជាក់ថា សេចក្តីប្រកាសផ្លូវការអំពីការផ្លស់ប្តូររដ្ឋមន្ត្រីប្រហែលជាមិនចេញផ្សាយទេ គឺរហូតទាល់តែរដ្ឋសភាថ្មីត្រូវបានបង្កើតឡើងដោយពិតប្រាកដ។ លោកបានថ្លែងថា “នៅថ្ងៃទី២៣ ឬ២៤ [ខែកញ្ញា] អ្នកនឹងបានដឹងហើយ”។
កាលពីថ្ងៃច័ន្ទ មានការប្រកាសថា រដ្ឋមន្ត្រីចំនួន១៤រូប ក្នុងចំណោមរដ្ឋមន្ត្រីទាំង២៦រូប របស់រដ្ឋាភិបាល ស្ថិតនៅក្នុងចំណោមសមាជិកសភាគណបក្សប្រជាជនមួយក្រុមដែលលាលែងពីតួនាទីជាសមាជិកសភា ដើម្បីបើកផ្លូវឲ្យបេក្ខជនតំណាងរាស្ត្រដែលស្ថិតនៅលេខរៀងក្រោមគេក្នុងបញ្ជីឈ្មោះបេក្ខជន។
ក្រុមនេះរួមមានលោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម លោក ខៀវ កាញារីទ្ធរដ្ឋមន្ត្រីក្រសួងព័ត៌មាន លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ និងលោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ។ គណបក្សប្រឆាំងដែលទទួលបានសំឡេងឆ្នោតយ៉ាងច្រើនក្នុងការបោះឆ្នោត កាលពីថ្ងៃទី២៨ ខែកក្កដា បានដណ្តើមយកអាសនៈសភាជាច្រើនពីបក្សប្រជាជនកម្ពុជា ជាហេតុធ្វើឲ្យគណបក្សនេះបង្ខំចិត្តបែងចែកអាសនៈសភាឡើងវិញសម្រាប់សមាជិករបស់ខ្លួន។
លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា បានលើកឡើងថា ការរុះរើរដ្ឋមន្ត្រី ឬសូម្បីតែការដំឡើងឋានៈរបស់នរណាម្នាក់ គួរតែធ្វើឡើងដោយផ្អែកលើគុណសម្បត្តិ កុំឲ្យគេមើលឃើញថា ធ្វើឡើងផ្អែកលើបក្សពួកនិយម។ លោកបានសួរថា “តម្លាភាពមានសារៈសំខាន់ណាស់។ តើ [ការតែងតាំងរដ្ឋមន្ត្រី]ជំនាន់ថ្មីនេះផ្អែកលើអ្វីខ្លះ?”។
លោកបានបន្ថែមថា រដ្ឋាភិបាលក៏គួរតែពិចារណាពីការកាត់បន្ថយចំនួនរដ្ឋមន្ត្រីក្នុងការរុះរើនេះផងដែរ។ លោកបានមានប្រសាសន៍ថា “ចំនួនមន្ត្រី ដូចជា រដ្ឋមន្ត្រី និងរដ្ឋលេខាធិការជាដើម គឺវាច្រើនពេកស្រាប់ទៅហើយ។ប្រសិទ្ធភាពនៃការគ្រប់គ្រងរដ្ឋាភិបាលថ្មីក៏មានសារៈសំខាន់ណាស់ដែរ។ បើមិនដូច្នេះទេ បន្ទុកលើអ្នកបង់ពន្ធគឺធ្ងន់ណាស់ មិនអាចបង់ពន្ធឲ្យមន្ត្រីទាំងនោះរស់នៅក្នុងជីវភាពហ៊ឺហា ] លើគំនរទុក្ខរបស់ពួកគេ] បានទេ”៕
ប្រែសម្រួលដោយ ចេវ ប៊ុននី