29 C
Phnom Penh

ការ​រឹត​បន្តឹង​សន្តិសុខក្នុង​​​​ថ្ងៃ​បាតុកម្ម​បណ្តាល​ឲ្យស្ទះ​​​ចរាចរណ៍​​​​​

ដោយ ឌឹ ខេមបូឌា ដេលី

បទវិភាគ

ផ្នែក​នានា​នៃ​រាជធានី​ភ្នំ​ពេញ​​បាន​ជាប់​គាំង​​​​កាលពី​ម្សិល​មិញ ​ខណៈ​ដែល​កង​កម្លាំង​សន្តិ​​​សុខ​​​​​ បាន​បិទ​ផ្លូវ​សំខាន់ៗ និង ផ្លូវ​តូចៗ​មួយ​ចំនួន​​​​​​​ទៀត​​ដោយ​លួស​បន្លា​ និង រនាំង​​ដែក​ ហើយ​នៅ​ចំណុច​មួយ​នោះ​ថែមទាំងមិន​អនុញាត​ឲ្យ​ រថ​​​យន្ត​សង្គ្រោះ​បន្ទាន់​មួយ​គ្រឿង​​ឆ្លង​កាត់​ចូល​ទៅ​កាន់​មន្ទីរ​ពេទ្យ​កុមារនោះទេ។

វិធានការណ៍​រឹត​បន្តឹង​សន្តិសុខ​នេះ​ធ្វើ​​​ឡើង​សម្រាប់​​ថ្ងៃ​ទី​១​នៃ​​ការ​ធ្វើបាតុកម្ម របស់​គណបក្ស​សង្គ្រោះ​ជាតិ​ជា​គណបក្ស​ប្រ​ឆាំង​​​ដែល​គ្រោង​ធ្វើ​រយៈ​ពេល​​បី​ថ្ងៃ ប្រឆាំង​នឹង​លទ្ធផល​ឆ្នោត​។ រនាំង​ដែក​ត្រូវ​បាន​គេ​ដាក់​ពង្រាយ​នៅ​ទូទាំង​រាជធានី​ភ្នំ​ពេញ​ រួម​ទាំង​​នៅ​​​​តាម​បណ្តោយ​​តីរវិថី​ស៊ីសុវត្ថិ និង​​​មហាវិថី​ព្រះ​នរោត្តម ត្រូវ​បាន​គេ​ដាក់​រនាំង​ដែក​នេះ​ជា​ច្រើន​កន្លែង ព្រមទាំង​ផ្លូវ​នានាជុំវិញ​ព្រះ​បរម​រាជ​វាំង ផ្លូវ​នានា​ទៅ​កាន់​តំបន់​ជុំវិញ​វិមាន​​​​ឯករាជ្យ និង ផ្លូវ​ផ្សេងៗ​ទៀត​ដែល​ភ្ជាប់​ពី​ផ្លូវ​លេខ​៥១ ទៅ​មហាវិថី​ព្រះ​នរោត្តម​ផង​ដែរ​។

លោក​​​ ប៉ុល សំអូន មន្ត្រី​នគរបាល​ម្នាក់​​ឈរ​​​ជើង​នៅ​​ចំណុច​បិទ​ផ្លូវ​សំខាន់​មួយ​​នៅ​កាច់​ជ្រុង​រវាង​មហាវិថី​ព្រះ​នរោត្តម  និងផ្លូវ​លេខ ២៩៤​​បាន​មាន​ប្រ​សាសន៍​ថា បទ​បញ្ជា​ឲ្យ​ដាក់​រនាំង​បិទ​ផ្លូវ​នេះ គឺ​ដើម្បី​ជួយ​សម្រប​សម្រួល​ចរាចរណ៍​​សម្រាប់​ក្រុម​បាតុករ​ឲ្យ​ធ្វើ​ដំណើ​រ​ទៅ​កាន់​ទីលាន​ប្រជាធិបតេយ្យ​ ដែល​​​​គណបក្ស​សង្គ្រោះ​ជាតិ​​គ្រោង​បោះ​ជំរំរយៈ​​​ពេល​បី​ថ្ងៃ​នៅ​ទី​នោះ​។

លោកមាន​ប្រ​សាសន៍​បន្ត​ថា “យើង​បាន​បិទ​ផ្លូវ​នេះ ដើម្បី​បញ្ឈប់​ក្រុម​បាតុករ​​កុំឲ្យ​ឆ្លង​ទៅ​ផ្លូវ​ផ្សេងៗ​ទៀត​។​ ប្រ​សិន​បើ​យើង​បើក​ផ្លូវ​ទាំង​អស់​នោះ វា​អាច​មាន​ភាព​អនាធិប​​​តេយ្យ ដូច្នេះ​​ នេះ​ជា​មូលហេតុ​ដែល​យើង​បាន​បិទ​ផ្លូវ​បែប​នេះ វា​គឺ​ដើម្បី​ជួយ​ពួក​គេ​ឲ្យ​ទៅ​កាន់​ទីលាន​ប្រជាធិបតេយ្យ ដូច្នេះ​​ហើយ​មិន​មាន​ការ​កក​ស្ទះ​ចរាចរណ៍​ទេ”។

ប៉ុន្តែ ប្រ​ជា​ពល​រដ្ឋ​ជា​ច្រើន​​​នៅ​ទូទាំង​រាជ​ធា​នី​ភ្នំ​ពេញ បាន​និយាយ​កាល​ពី​ម្សិល​មិញ​ថា វិធានការ​បែប​នេះ មាន​ផល​ប៉ះ​ពាល់​​អវិជ្ជ​​​មាន​លើ​ចរាចរណ៍​ទៅ​វិញ​ទេ​ធ្វើ​ឲ្យ​ពួក​គាត់​​ជា​​​​ច្រើន​នាក់​ជាប់​គាំង​មិន​អាច​ទៅ​ផ្ទះ ទៅ​​សាលា​​​​​​​​​​រៀន និង​ទៅ​ការិយាល័យ​​បាន​ឡើយ​​​។

កញ្ញា សុខ អានី អាយុ ២៥​ឆ្នាំ ជា​និស្សិត​ភាសា​​​​អង់គ្លេស នៅ​សាកលវិទ្យាល័យបញ្ញា​សាស្ត្របាន​និយាយ​ថា  រូប​​​​នាង​បាន​ជាប់​នៅ​ចំ​​​កណ្ដាល​​​​​រាជធានីស្ទើរ​តែ​មួយ​ព្រឹក​​​ដើម្បី​រង់​​​ចាំ​ការ​បើក​ផ្លូវ​ទៅ​ផ្ទះ​។

កញ្ញា អានី បាន​និយាយបន្ត​ថា​​​ “​នៅ​ព្រឹក​​​មិញ​នេះវា​ងាយ​ស្រួល​​ក្នុង​ការ​ទៅកាន់​ទី​នោះ ខ្ញុំ​​​បាន​ចាក​ចេញ​ពី​ផ្ទះ​នៅ​ម៉ោង​៦​និង​៣០​នាទី​ព្រឹក​ ហើយទៅ​ដល់​ទី​នោះនៅ​ម៉ោង ​​​៧​និង​៣០​នាទី​ព្រឹក​ ប៉ុន្តែ ​សាលា​របស់​ខ្ញុំ​បាន​បិទ​ទ្វារ​។​ឥឡូវ​នេះ​គ្រប់​ផ្លូវ​ទាំង​អស់​ហាក់​ដូច​ជា​​ត្រូវ​បិទ​អស់​ហើយ​​​​ ហើយ​ខ្ញុំ​មិន​​អាច​ទៅ​ផ្ទះ​​ខ្ញុំ​ នៅ​ទួល​ទំពូង​បាន​ទេ​”។

ម៉ោងប្រហែល​​​១២និង៣០នាទី​រសៀល នៅ​មុខ​វត្តឧណ្ណាលោម​ ក្រុម​បាតុករ ដែល​ដើរ​​​​តាមមេដឹក​នាំ​គណបក្ស​ប្រឆាំង លោក សម រង្ស៊ី  និង​អនុ​ប្រធាន​របស់​លោក​គឺ​​លោក​ កឹម​​​ សុខា​​​​ បាន​ទម្លាយ​រនាំង​ដែកមួយ​ ដែល​បណ្តាល​ឲ្យ​នគរបាល​បង្ក្រាប​កុបកម្ម​​ដក​ថយ​ទៅ​​កន្លែង​សុវត្ថិភាព​នៅ​ជិត​​ផ្លូវលេខ​២៤០​​។

លោក នួន សាមុត មន្ត្រី​កង​រាជ​អាវុធ​ហត្ថ​បាននិយាយ​​ថា “ពួកគេ​​បាន​ដើរ​តាម​មាត់​ទន្លេ​ ហើយ​មក​លើក​​រនាំង​ដែក​តាម​ក្រោយ​។​ យើង​បាន​​​ព្យាយាម​បញ្ឈប់​ពួកគេ​  ប៉ុន្តែ ​យើង​មិន​អាច​បញ្ឈប់​ពួ​ក​គេ​បាន​ទេ​ ហើយ​ឥឡូវ​នេះ​រនាំង​ដែក​នោះ​បាក់​ខ្ទេច​ខ្ទី​អស់​”។

ខណៈ​ពេល​ដែល​កង​រាជអាវុធ​ហត្ថ​ធ្វើ​ការ​ជួសជុល​រនាំង​ដែក​នោះ​ឡើង​វិញ​ ក្រុម​បាតុករ​បាន​និយាយ​ឡកឡឺយ​ឲ្យ​នគរបាល។ បុរស​ម្នាក់​បាន​ស្រែក​ថា “អ្នក​[កង​រាជអាវុធ​ហត្ថ] ត្រូវ​តែ​យក​រថ​​​​យន្ត​មួយ​មក​ទីនេះ  ដើម្បី​បញ្ឈប់​ពួក​យើង​”។ ​​​ហើយបាតុករ​ម្នាក់​ទៀត​បានស្រែក​បន្ទរ​ថា “ពួកគេ​មិន​​អាច​​​​យក​រថយន្ត​មក​ទី​នេះ​បាន​ទេ​ ពីព្រោះ​វា​អាចនឹង​ឆេះ​ដូចនៅ​ស្ទឹង​មាន​ជ័យ​”​។

​មុន​នេះ​២​ម៉ោង​ មន្ត្រី​កង​រាជ​អាវុធ​ហត្ថ​ដែល​​​​ភ័យ​ស្លន់​ស្លោ​បាន​រត់​តាម​មាត់​ទន្លេ​ជា​តំបន់​​​​ទេស​​​ចរណ៍​ ហើយ​បង្គាប់​ឲ្យ​ម្ចាស់​ហាង​នានា​នៅ​តាម​មាត់​ទន្លេ​បិទ​ទ្វារ​ហាង​របស់​ខ្លួន​។​​ ម្ចាស់​ហាង​ម្នាក់​បាន​និយាយ​ថា “នេះ​គឺជា​បញ្ហា​មួយ​ដ៏​ធំ​ គ្មាន​​អតិថិ​ជន​ គឺ​គ្មាន​​លុយ”​។ ម្ចាស់​ហាង​នៅ​តាម​បណ្តោយ​ផ្លូវ​ព្រះ​​ស៊ីសុវត្ថិ​​​​បាន​ព្យាករពី​ការ​ខាត​បង់​នៅ​​​ក្នុ​ង​ថ្ងៃ​នោះ​ប្រហែល​២០០​ដុល្លារ​។ គាត់​បាន​ពន្យល់​ថា “ពួកគេ​​​បាន​រត់​មក​ប្រាប់​យើង​ថា​​​ ពួកគេ​មាន​ការ​ភ័យ​ខ្លាច​ថា អាច​​​​មាន​ចោរ​”។

នៅ​កំពង់​ចម្លង​អរិយក្សត្រ ដែល​ភ្ជាប់​ពី​ខេត្ត​កណ្តាល​មក​រាជ​ធានី​ភ្នំពេញ​ដែល​ស្ថិត​នៅ​ក្បែរ​កោះ​ពេជ្រ​ ក៏​ត្រូវ​បាន​បង្ខំ​ឲ្យ​បិទ​ផង​ដែរ​កាល​ពីម្សិល​មិញ ហើយ​សន្តិសុខ​ម្នាក់​ដែល​​ធ្វើ​ការ​នៅ​កំពង់​ចម្លង​នោះ​​បាន​និយាយ​ថា កំពង់​ចម្លង​នេះ​បាន​បិទ​តាំង​ពី​ម៉ោង​៦​​​ព្រឹកមក​​​​ម៉េ្លះ ហើយ​មិន​មាន​គម្រោង​ណាមួយ​បើក​ឡើង​វិញ​ទេ​នៅ​ពេល​នេះ។

ប្រជា​ពល​រដ្ឋ​មួយ​ក្រុម​ដែល​រង់ចាំ​នៅឯ​កំពង់​ចម្លង​នេះ​បាន​និយាយ​ថា ពួក​គាត់​សង្ឃឹម​​​​ថា អាច​ឆ្លង​ទៅ​ផ្ទះ​របស់​ខ្លួន​នៅ​ស្រុក​ស្វាយ​ជ្រុំ ក្នុ​ង​ខេត្ត​កណ្តាល​បាន​ ហើយ​ឥឡូវ​នេះ​ត្រូវ​​​​​ធ្វើ​ដំណើរ​​តាម​ស្ពាន​ជ្រោយ​ចង្វា​វិញ​។ ប៉ុន្តែ បុរស​ម្នាក់​អាយុ​៣៥​ឆ្នាំ​ ​គ្រាន់​តែ​ប្រាប់​​​​ថា​ឈ្មោះ សារ៉ន នោះ ​គ្មាន​សង្ឃឹម​អាច​វិល​ត្រឡប់​ទៅ​ផ្ទះ​បាន​​ទេ។ លោក​បាន​និយាយ​បន្ត​ថា “ខ្ញុំ​ចង់​ទៅ​ផ្ទះ​នៅ​ស្វាយ​ជ្រុំដែរ​ ប៉ុន្តែ ខ្ញុំ​មិន​ដឹង​ថា ត្រូវ​ធ្វើ​យ៉ាង​ណា​ទេ​។ ខ្ញុំ​បាន​ទៅ​តាម​ជ្រោយ​ចង្វារួច​ហើយ​ ​​​ប៉ុន្តែ ពួក​គេ​ក៏​បាន​បិទ​ផ្លូវ​នោះ​ផង​ដែរ។ វា​ធ្វើ​ឲ្យ​មាន​ការ​លំបាក​សម្រាប់​យើង​ធ្វើ​ដំណើរ​ទៅ​ផ្ទះ។​ខ្ញុំ​ប្រហែល​ជា​​ដេក​នៅ​កន្លែង​ធ្វើ​ការ​ហើយ​”។

អ្នក​ធ្វើ​ដំណើរ​ភាគច្រើន​ គឺមិន​ត្រឹម​តែ​ប្រជា​ពល​រដ្ឋ​​ប៉ុណ្ណោះ​ទេ​ដែល​រអ៊ូរ​ទាំ​​​​អំពី​​​ការ​​​​បិទ​ផ្លូវ​នេះ​ដែល​ធ្វើ​ឲ្យ​ពួកគេ​ខកខាន​មិន​បាន​ទៅ​ដល់​គោល​ដៅ​របស់​ខ្លួន​នោះ​។ រថយន្ត​សង្គ្រោះ​បន្ទាន់​មួយ​គ្រឿង​ដែល​ដឹក​ក្មេង​ៗ​ត្រូវ​បាន​គេ​បញ្ឈប់​នៅ​ចំណុច​បិទ​ផ្លូវ​មួយ​នៅ​ក្បែ​វត្ត​ឧណ្ណាលោម​ក្នុ​ងខណ្ឌ​ដូន​ពេញ​ អស់​រយៈ​ពេល​២០​នាទី​មុន​ពេល​ត្រឡប់​​​​ទៅ​ក្រោយ​វិញ​ឲ្យ​ទៅ​កាន់​មន្ទីរ​ពេទ្យ​ដែល​បាន​ដឹក​ក្មេង​នោះ​មក​។

លោក ដេនីស ឡូរ៉ង់​ ​ នាយក​មន្ទី​រ​ពេទ្យ​​គន្ធ​បុប្ផា​មាន​ប្រសាសន៍​ថា បុគ្គលិក​មន្ទីរពេទ្យ​បាន​ដឹក​កុមារ​មាន​ជំងឺ​ប្រហែល​៥០ទៅ​៦០​នាក់​ចេញ​ពី​មន្ទីរ​ពេទ្យ​​គន្ធបុប្ផា​២​នៅ​ជិត​វត្ត​ភ្នំ​ទៅ​កាន់​មន្ទីរ​ពេទ្យ​គន្ធ​បុប្ផា​៤​នៅ​​ខាង​ក្រោយ​ព្រះបរម​រាជវាំង​ដែល​នៅ​ទី​នោះ​មាន​គ្រែ​ចំនួន​​​២០០​បន្ថែម​ទៀត​។

លោក​មាន​ប្រសាសន៍​បន្ត​ទៀត​ថា “ថ្ងៃ​នេះ​យើង​បាន​ព្យាយាម​ផ្ទេរ​កុមារ​មាន​ជំងឺ​ពី​៦​ទៅ​៨​នាក់​ទៅ​កាន់​មន្ទីរពេទ្យ​គន្ធបុប្ផា២​ ប៉ុន្តែ មិន​អាច​ធ្វើ​បាន​ទេ​។ រថយន្ត​សង្គ្រោះ​បន្ទាន់​​ត្រូវ​បាន​គេ​បិទ​ផ្លូវ​​មិន​អនុញ្ញាត​ឲ្យ​ធ្វើ​ដំណើរ​ឆ្លង​កាត់​បាន​ទេ​ ហើយ​អ្នក​បើក​បរ​រថ​យន្ត​សង្គ្រោះ​បន្ទាន់​​បាន​សម្រេច​ត្រឡប់​មក​មន្ទី​រ​ពេទ្យ​គន្ធបុប្ផា៤​នៅ​ជិត​វត្ត​ភ្នំវិញ​”។​ លោក​មាន​ប្រសាសន៍​បន្ត​ថា “ពួកគេ​ឥឡូវ​នេះ​កំពុង​សំរាក​ព្យាបាល​នៅ​ទី​នោះ​។ សារៈ​សំខាន់​បំផុត​សម្រាប់​កុមារ​ទាំង​នោះ​ គឺ​ត្រូវ​ស្ថិត​នៅ​ក្នុង​មន្ទីរ​ពេទ្យ​”។

លោក​ ខេង​ ទីតូ​ អ្នក​នាំពាក្យ​កង​រាជ​អា​វុធ​ហត្ថ​មាន​ប្រសាសន៍​ថា រថយន្ត​សង្គ្រោះ​បន្ទាន់​​​​នោះ​ “មិន​បាន​​ចូល​ទៅ​​​” តំបន់​នោះ​ទេ ហើយ​បាន​បដិសេធ​ថា នគរ​បាល​ដែល​ល្បាត​​​​នៅ​ក្បែ​រនាំង​ដែកនោះ ​មិនបាន​រារាំង​រថ​​​យន្ត​​​​សង្គ្រោះ​នោះ​មិន​ឲ្យ​ធ្វើ​ដំណើរ​ឆ្លង​កាត់​នោះ​​​​ទេ។

លោក​បាន​មាន​ប្រសាសន៍​បន្ត​ថា “យើង​អនុញ្ញាត​ឲ្យ​ពួកគេ​ចូល​។ យើង​មិន​ដែល​បញ្ឈប់​​​​រថយន្ត​សង្គ្រោះ​បន្ទាន់​ទេ​ ពីព្រោះ​ពួកគេ​សំខាន់​ណាស់​។ រថយន្ត​សង្គ្រោះ​បាន​សម្រេច​មិន​ចូល​ដោយ​ខ្លួន​ឯង​ពួក​គេ​អាច​មាន​ការ​ភ័យ​ខ្លាច​ ហើយ​ពួកគេ​មិន​ចង់​ចូល​” ។

លោក​ ខេង ទីតូ បានមាន​ប្រសាសន៍​បន្ត​ថា រនាំង​ដែក​នេះ​អាច​រក្សា​ទុក​រហូត​ទាល់​តែ​បាតុ​កម្ម​បាន​បញ្ចប់​ ហើយ​ប្រជាពល​រដ្ឋ​រស់​នៅ​​ក្នុង​​សហ​គមន៍​ដែល​ធ្វើ​ដំណើរ​ទៅ​មក​ក្នុង​រាជ​ធានី​ភ្នំពេញ​ត្រូវ​តែ​យោគ​យល់​អំពី​សារៈ​សំខាន់​​នៃ​សន្តិសុខ​ និង​សណ្តាប់​ធ្នាប់​សា​ធារណៈ៕​​​​​​​​​​​​​​​​​​​

ប្រែសម្រួល​​​ដោយ​​​ ឃិន ណៃ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស