កាលពីម្សិលមិញ អ្នកទស្សនាកម្មវិធីទូរទស្សន៍ក្នុងស្រុកមិនបានដឹងថា គណបក្សសង្គ្រោះជាតិជាគណបក្សប្រឆាំងកំពុងធ្វើមហាបាតុកម្មនោះទេ ដែលអំឡុងពេលនោះ មានការប៉ះទង្គិចដ៏ហិង្សាជាមួយនគរបាល ការបាញ់ទឹក និងឧស្ម័នបង្ហូរទឹកភ្នែក។
ផ្ទុយទៅវិញអ្នក ដែលបានបើកមើលកម្មវិធីរបស់ទូរទស្សន៍ជាតិកម្ពុជា ដែលគ្រប់គ្រងដោយរដ្ឋ ឬបណ្ដាញទូរទស្សន៍គាំទ្ររដ្ឋាភិបាលផ្សេងទៀត ដូចជា ទូរទស្សន៍ស៊ីធីអិន ស៊ីអិនស៊ីទូរទស្សន៍រាជធានីភ្នំពេញប៉ុស្ដិ៍លេខ៣ បាយ័ន ហង្សមាស និងទូរទស្សន៍អប្សរា នឹងបានទស្សនាកម្មវិធីពេលថ្ងៃជាធម្មតាមានល្ខោន ចម្រៀងខារ៉ាអូខេ និងកម្មវិធីប្រដាល់សេរី។
នេះមិនមែនជាលើកទី១ទេ ដែលបណ្ដាញទូរទស្សន៍នៅក្នុងប្រទេសនេះមិនបានចាក់ផ្សាយព័ត៌មានសំខាន់បំផុតនៅក្នុងប្រទេសនេះ។ នៅពេលលោក សម រង្ស៊ី មេដឹកនាំគណបក្សប្រឆាំងបានវិលត្រឡប់មកប្រទេសកម្ពុជាវិញកាលពីខែកក្កដា បន្ទាប់ពីស្ថិតនៅក្រៅប្រទេសជិតបួនឆ្នាំ ហើយត្រូវបានអ្នកគាំទ្រជាង១០០.០០០នាក់ ចេញមកស្វាគមន៍នោះ ប៉ុន្តែស្ថានីយទូរទស្សន៍ទាំងនេះមិនបានផ្សព្វផ្សាយពីព្រឹត្តិការណ៍នេះទេ។
ទូរទស្សន៍បាយ័ន ដែលគ្រប់គ្រងដោយកូនស្រីរបស់លោកនាយករដ្ឋមន្ត្រី ហ៊ុន សែន បានផ្សាយពាណិជ្ជកម្មជាច្រើនម៉ោង ដែលអួតសរសើរពីផលិតផលខ្មែរ។ ចំណែកឯទូរទស្សន៍ស៊ីធីអិនវិញបានផ្ដោតលើការចាក់ផ្សាយព័ត៌មានឡើងវិញ និងកម្មវិធីប្រដាល់។
មានតែទូរទស្សន៍ស៊ីអិនស៊ីមួយប៉ុណ្ណោះបានធ្វើសេចក្ដីរាយការណ៍ខ្លីអំពីការដាក់ពង្រាយកម្លាំងប្រដាប់អាវុធជាច្រើននាក់នៅក្នុងទីក្រុងភ្នំពេញ និងបង្ហាញពីរូបភាពរបស់ក្រុមបាតុករ ដើរនៅតាមបណ្ដាយតីរវិថីស៊ីសុវត្ថិ មុនពេលបន្តទៅព័ត៌មានអន្តរជាតិ។
នៅម៉ោងប្រហែលបួនរសៀល ការប៉ះទង្គិចបានផ្ទុះឡើងនៅបណ្ដោយតីរវិថីស៊ីសុវត្ថិក្បែរវត្តឧណ្ណាលោម ដោយនគរបាលបាញ់ឧស្ម័នបង្ហូរទឹកភ្នែកទៅលើក្រុមបាតុករ។ ភ្លាមៗនោះ ទូរទស្សន៍អប្សរាចាក់ផ្សាយបទសម្ភាសន៍ជាមួយអ្នកសម្ដែងសៀកព្រួសភ្លើងម្នាក់ ហើយទូរទស្សន៍ហង្សមាសវិញចាក់ផ្សាយវីដេអូចម្រៀងរបស់ក្រុមចម្រៀងខ្មែរមួយក្រុម។
លោក គឹម គុណវឌ្ឍ អគ្គនាយកទូរទស្សន៍ជាតិកម្ពុជា ដែលចាក់ផ្សាយព័ត៌មានចាស់ៗ និងល្ខោន អំឡុងពេលរសៀលនោះបានការពារកង្វះព័ត៌មានរបស់ស្ថានីយទូរទស្សន៍លោក ហើយបានមានប្រសាសន៍ថា លោកបានដាក់ពង្រាយក្រុមការងារទូទាំងទីក្រុង ដើម្បីរាយការណ៍ពីព្រឹត្តិការណ៍នេះ។
លោក គឹម គុណវឌ្ឍ បានមានប្រសាសន៍ថា “ព្រឹត្តិការណ៍នេះមិនទាន់បញ្ចប់នៅឡើយទេ ដូច្នេះយើងមិនអាចចាក់ផ្សាយព័ត៌មាននេះ “ភ្លាមៗបន្ទាប់ពីការផ្សព្វផ្សាយព័ត៌មាននោះទេ”។ នៅម៉ោងប្រាំបីយប់ទូរទស្សន៍ជាតិកម្ពុជាបានចាក់ផ្សាយបទសម្ភាសន៍ជាមួយលោក ជួន សុវណ្ណ ស្នងការនគរបាលរាជធានីភ្នំពេញ បន្ទាប់ពីមានការប៉ះទង្គិច។ ចំណុចសំខាន់នៅក្នុងបទសម្ភាសន៍របស់លោក ជួន សុវណ្ណ ជាមួយទូរទស្សន៍ជាតិកម្ពុជាគឺថា បាតុករមិនបានស្ថិតនៅសួនសេរីភាពដូចដែលអាជ្ញាធរបានណែនាំពួកគេនោះទេ ហើយបានដើរចុះតាមមាត់ទន្លេ ដើម្បីបង្កបញ្ហា។
លោក ជួន សុវណ្ណ បានថ្លែងក្នុងបទសម្ភាសន៍ជាមួយលោក គឹម គុណវឌ្ឍ ថា “ភារកិច្ចរបស់នគរបាលគឺរក្សាសន្ដិសុខសម្រាប់ប្រជាពលរដ្ឋ។ ប្រជាពលរដ្ឋ នឹងឃើញស្ថានភាពពិតដោយផ្ទាល់ភ្នែកចំពោះអ្វីដែលកំពុងកើតឡើងនេះ”៕
ប្រែសម្រួលដោយ អ៊ូច សូនី