មុនពេលចរចារវាងគណបក្សទាំងពីរកាលពីព្រឹកមិញនេះ គណបក្សសង្គ្រោះជាតិកាលពីម្សិលមិញបានដាក់លក្ខខណ្ឌថ្មីមួយទៀត ដើម្បីបញ្ចប់ភាពជាប់គាំងផ្នែកនយោបាយរយៈពេលជិតពីរខែ ជុំវិញការបោះឆ្នោតជាតិ ដែលទាំងគណបក្សសង្គ្រោះជាតិ និងគណបក្សប្រជាជនកម្ពុជាដែលកំពុងកាន់អំណាចសុទ្ធតែអះអាងថាបានទទួលជ័យជម្នះរៀងៗខ្លួននោះ។
ឥឡូវនេះ គណបក្សប្រឆាំងកំពុងទាមទារឲ្យកែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប.) រៀបចំបញ្ជីឈ្មោះអ្នកបោះឆ្នោតជាថ្មី និងទាមទារបង្កើតស្ថានីយទូរទស្សន៍ផ្ទាល់ខ្លួន ដើម្បីឲ្យការចរចានេះដំណើរការទៅមុខ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានប្រកាសដល់ក្រុមអ្នកគំាទ្ររាប់ម៉ឺននាក់កាលពីម្សិលមិញ ដែលធ្វើការតវ៉ានៅក្នុងទីក្រុងភ្នំពេញ ប្រឆាំងនឹងលទ្ធផលផ្លូវការនៃការបោះឆ្នោតថ្ងៃទី២៨ ខែកក្កដា ដែលគណបក្សប្រជាជនកម្ពុជាទទួលបានជ័យជម្នះ បើទោះជារបាយការណ៍អំពីភាពមិនប្រក្រតីដ៏រាលដាលនៅថ្ងៃបោះឆ្នោត មិនទាន់ត្រូវបានដោះស្រាយរួចរាល់ក៏ដោយ។
លោក យឹម សុវណ្ណ បានថ្លែងទៅកាន់សំឡេងហ៊ោកងរំពងចេញពីក្រុមមនុស្សដ៏ច្រើនថា “សម្រាប់ជំនួបនៅថ្ងៃស្អែក [ថ្ងៃនេះ] ជាដំបូង យើងនឹងផ្ដោតលើគ.ជ.ប. ទី២លើការបង្កើតបញ្ជីឈ្មោះអ្នកបោះឆ្នោតថ្មី និងទីបីលើការបង្កើតស្ថានីយទូរទស្សន៍មួយ”។ លោកបានបន្ថែមថា “ស្ថានីយនេះគឺជាស្ថានីយទូរទស្សន៍របស់គណបក្សសង្គ្រោះជាតិ។ យើងនឹងផ្សព្វផ្សាយអ្វីដែលជាការពិត ហើយទុកឲ្យស្ថានីយ៍ទូរទស្សន៍ដទៃទៀតបំផ្លើសព័ត៌មានទៅចុះ”។
គណបក្សប្រឆាំង អង្គការសិទ្ធិមនុស្ស និងអ្នកឃ្លាំមើលការបោះឆ្នោតបានត្អូញត្អែរជាយូរមកហើយអំពីបណ្ដាញព័ត៌មានក្នុងស្រុក ដែលភាគច្រើនត្រូវបានកាន់កាប់ដោយគណបក្សប្រជាជនកម្ពុជា ឬអ្នកគំាទ្រគណបក្សនេះ ហើយជារឿយៗធ្វើមិនដឹងមិនឮ និយាយសម្រាល ឬធ្វើឲ្យល្អៀងព័ត៌មានស្ដីពីគណបក្សប្រឆាំង។
ក្រុមដដែលនេះក៏បានរិះគន់ គ.ជ.ប.ផងដែរ ដែលសម្បូរទៅដោយអតីតមន្ត្រីគណបក្សប្រជាជនកម្ពុជា ដោយសារតែងតែគំាទ្រគណបក្សកាន់អំណាច។ នៅមុនការបោះឆ្នោតកាលពីខែកក្កដា អ្នកសង្កេតការ ដែលធ្វើសវនកម្មលើបញ្ជីឈ្មោះអ្នកបោះឆ្នោតបាននិយាយថា បញ្ជីឈ្មោះអ្នកបោះឆ្នោតនេះមានបញ្ហាច្រើនជាងបញ្ជីឈ្មោះអ្នកបោះឆ្នោតកាលពីឆ្នាំ ២០០៨ទៅទៀត ហើយបានប៉ះពាល់សិទ្ធិបោះឆ្នោតរបស់ប្រជាពលរដ្ឋជាងមួយលាននាក់។
គណបក្សសង្គ្រោះជាតិបានអះអាងថា បញ្ហាទាំង៣នេះរួមមាន បណ្ដាញផ្សព្វផ្សាយព័ត៌មានគំាទ្រគណបក្សប្រជាជនកម្ពុជា គ.ជ.ប. មានភាព លម្អៀងនិងបញ្ជីឈ្មោះអ្នកបោះឆ្នោតមានគុណវិបត្តិ បណ្ដាលឲ្យគណបក្សសង្គ្រោះជាតិត្រូវគេប្លន់យកជ័យជម្នះដ៏ត្រឹមត្រូវនៅឆ្នាំនេះ។
លោក យឹម សុវណ្ណ បានមានប្រសាសន៍ថា “គណបក្សប្រជាជនកម្ពុជា នឹងចាញ់ប្រសិនបើគ.ជ.ប. មិនជួយពួកគេ”។ កាលពីម្សិលមិញ លោក យឹម សុវណ្ណ មិនបានលើកឡើងអំពីការទាមទារពីដំបូង និងដ៏អូសបន្លាយរបស់គណបក្សសង្គ្រោះជាតិឲ្យមានការស៊ើបអងេ្កតឯករាជ្យមួយលើការបោះឆ្នោតកាលពីខែកក្កដានោះទេ។ ប៉ុន្តែសមាជិកសភាគណបក្សប្រឆាំងមួយរូបទៀតលោកស្រី មួរ សុខហួរ បានធានាចំពោះមុខអ្នកគាំទ្រថា គណបក្សសង្គ្រោះជាតិនៅតែទាមទារឲ្យមានការរាប់សន្លឹកឆ្នោតឲ្យបានត្រឹមត្រូវ។
គណបក្សប្រឆាំងបានគំរាមធ្វើពហិការការប្រជុំសភាលើកដំបូង ដែលគ្រោងធ្វើនៅចុងខែនេះ ប្រសិនបើគ្មានការស៊ើបអង្កេតឯករាជ្យមួយជាលក្ខខណ្ឌ ដែលលោកស្រី មួរ សុខហួរ នៅតែប្រកាន់យក កាលពីម្សិលមិញ។ លោកស្រីបានប្រាប់ក្រុមអ្នកគាំទ្រថា “យើងមិនអាចទៅសភានៅថ្ងៃទី២៣ ខែកញ្ញានេះបានទេ លុះត្រាតែមានការរាប់សន្លឹកឆ្នោតឲ្យបានត្រឹមត្រូវសិន។ ខ្ញុំសូមស្បថចំពោះមុខអ្នកទាំងអស់គ្នាថា ខ្ញុំនឹងមិនធ្វើការជាមួយអ្នកដែលលួចសន្លឹកឆ្នោតរបស់យើងទេ ប៉ុន្តែខ្ញុំនឹងនៅជាមួយអ្នកទាំងអស់គ្នានៅសួនសេរីភាពនេះ ដើម្បីទាមទាររកដំណោះស្រាយ”។
អំឡុងជំនួបរយៈពេលខ្លីជាមួយព្រះមហាក្សត្រ នរោត្តម សីហមុនី នៅព្រះបរមរាជវាំងកាលពីថ្ងៃសៅរ៍ គណបក្សប្រជាជនកម្ពុជា និងគណបក្សសង្គ្រោះជាតិបានយល់ព្រមធ្វើការចរចានៅព្រឹកនេះ ដែលនឹងដឹកនាំដោយលោកនាយករដ្ឋមន្ត្រី ហ៊ុន សែន និងលោក សម រង្ស៊ី ប្រធានគណបក្សសង្គ្រោះជាតិ ហើយសំដៅស្វែងរកមធ្យោបាយ ដើម្បីចៀសវាងការធ្វើពហិការ។
លោក ឈាង វុន សមាជិកគណបក្សប្រជាជនកម្ពុជា និងជាអ្នកនាំពាក្យរដ្ឋសភាបានបដិសេធមិនធ្វើអត្ថាធិប្បាយស្ដីពីសំណើថ្មីបំផុតរបស់គណបក្សសង្គ្រោះជាតិទេ ខណៈពេលកាលពីថ្ងៃសៅរ៍លោក ស ខេង រដ្ឋមន្ត្រីក្រសួងមហាផ្ទៃបានសម្ដែងការខកចិត្ត ដែលគណបក្សសង្គ្រោះជាតិប្ដេជ្ញាបន្តការតវ៉ាបើទោះជាមានការចរចានៅថ្ងៃនេះក៏ដោយ៕
ប្រែសម្រួលដោយ អ៊ូច សូនី