28 C
Phnom Penh

កាសែត​​ ឌឹ ណេសិន ឆ្លើយ​តប​នឹ​ងការ​ចោទ​ប្រកាន់​ពីរដ្ឋាភិបាល​​ពី​ភាព​​​​​លម្អៀង​

ដោយ ឌឹ ខេមបូឌា ដេលី

បទវិភាគ

កាសែតថៃ​​ ឌឹ ណេសិន (The Nation) ដែល​មាន​មូល​​ដ្ឋា​ននៅ​​​ទីក្រុង​បាង​កក ប្រទេស​​​ថៃ​បាន​បដិសេធ​​ការ​ចោទ​ប្រកាន់​របស់​អ្នក​នាំពាក្យ​​ក្រសួង​ការ​បរទេស​កម្ពុជា ​​ដែល​ថា ការ​បោះ​​​ពុម្ព​​​​ផ្សាយ​​​របស់​​កា​​សែត​​នេះ​មាន​ភាព​លម្អៀង​ ​​​និង​មាន​គេ​ជួល​ឲ្យ​រិះ​គន់​លោក​នាយ​ក​រដ្ឋ​មន្ត្រី ហ៊ុន សែន។

ក្នុង​បទ​វិចារណកថា​មួយ​ដែល​បាន​ចេញ​ផ្សាយ​កាល​ពីសប្តាហ៍​មុន​ កាសែត​ ឌឹ​ ណេសិន​ ​លើក​ឡើង​ថាលោក​  ហ៊ុន  សែន  អាច​ឈាន​​​​​​​ដល់​​ការ​​បញ្ចប់​អាជីព​នយោ​បាយ​របស់​ខ្លួន​​ ប្រសិន​បើ​មាន​អំពើ​ហិង្សា​ផ្ទុះឡើង ​ក្រោយ​​​​​​​​​​ការ​បោះឆ្នោត​ថ្ងៃ​ទី​២៨ ខែកក្កដា​។

លោក​ កុយ គួង​ អ្នក​នាំពាក្យ​​ក្រសួង​​ការ​បរទេស​បាន​បញ្ចេញ​ប្រតិកម្ម​យ៉ាង​ខ្លាំង​​តាម​​​រយៈ​លិខិត​មួយ​ច្បាប់​ផ្ញើ​ជូន​​កាសែត​នេះ ដោយ​​​បាន​លើកឡើង​​ថា អត្ថបទ​បញ្ចេញ​មតិ​នេះ​ គឺ “ពោរ​ពេញ​ទៅ​ដោយ​​ការ​ភូត​កុហក​ ​និង​ការ​បំប៉ោង​​”។ លិខិត​នេះ​ត្រូវ​​​បាន​ចុះ​ផ្សាយ​​​ក្នុង​ទំព័រ​កាសែត​ ឌឹ ណេ​សិន​ កាល​ពី​​​ថ្ងៃ​​​អាទិត្យ​​​។

ឆ្លើយ​តបទៅ​នឹង​លោក​ កុយ គួង​ កាល​ពី​​​ម្សិល​មិញ កាសែត​ ឌឹ  ណេសិន​ បាន​ចុះ​​​ផ្សាយ​​​​សារ​របស់​និពន្ធ​នា​យក​​ដែល​មាន​ខ្លឹមសារ​​ការពារ​បទ​វិចារណកថា​របស់​ខ្លួន​។

ឌឹ ណេសិនបាន​លើក​ឡើង​ថា “គ្មាន​មេដឹកនាំ​ណាម្នាក់​នៅ​ក្នុង​តំបន់​នេះ និង​តំបន់​ផ្សេង​ៗ​ទៀត​ដែល​គេចផុត​ពីការ​រិះគន់​តាម​​បណ្តាញ​ព័ត៌មាន​នោះ​ទេ​។ លោក​ ហ៊ុន សែន នាយក​រដ្ឋ​មន្ត្រី​​កម្ពុជា​ ​​មិនមែន​ជា​ករណី​លើក​​​លែង​ទេ​  ហើយ​ទង្វើ​ និង​សកម្ម​ភាព​នយោ​​​បាយ​របស់​គាត់​ត្រូវ​បាន​ចុះផ្សាយ​ជា​បន្ត​បន្ទាប់​ ចាប់​តាំង​ពី​គាត់​បាន​​លេចមុខ​ជា​ឥស្សរ​​​ជន​សាធារណៈ​​មួយ​រូប​នៅ​ក្នុង​​​​តំបន់​នេះ​កាលពី​​បី​ទសវត្សរ៍​មុន​​មក​​​”។

កាសែត​  ឌឹ   ណេសិន  ក៏​បាន​លើក​ឡើង​​ផង ដែរ​ថា ខ្លួន​ជា​កាសែត​ឯករាជ្យ​​​ដែល​មិន​​ធ្លាប់​មាន​​​ភាគី​ណាមួយ​​ជួល​ឲ្យ​រិះ​គន់​លោក​ ហ៊ុន សែន ក្នុង​រយៈ​ពេល​ជាង​៤០​ឆ្នាំ​​ចាប់​​​តាំង​​​​ពី​កាសែត​នេះ​ត្រូវ​បាន​បង្កើត​​ឡើង​មក​​​ឡើយ​។ កាសែត​​នេះ​លើក​ឡើង​ថា “យើង​មា​ន​សិទ្ធិ​សរសើរ​លោក​ ហ៊ុន សែន នៅ​​​ពេល​​គាត់​ធ្វើ​​​ល្អ​ ហើយ​ក៏​មាន​សិទ្ធិ​​រិះគន់​គាត់​​នៅ​ពេល​គាត់​ធ្វើខុស​ដែរ​​។​ អត្ថបទ​​​របស់​យើង​ផ្តោត​លើ​ព័ត៌មាន​​ដែល​មាន​ឯកសារ​ត្រឹមត្រូវ​ ​ហើយ​យើងមិន​ដែល​ធ្វើ​ការ​ចោទ​ប្រកាន់​​​លោក​ [ហ៊ុន សែន] ដោយ​គ្មាន​មូលដ្ឋាន​ ឬ​ដោយ​​បំផ្លើស​ទេ​​”។

ការរិះគន់​របស់​លោក កុយ​ គួង ចំពោះ​​កាសែត​ ឌឹ ណេសិន ក៏​បាន​ផ្តោត​លើ​ផ្នែក​មួយ​​​​នៃ​បទ​វិចារណ​កថា​​​ដែល​មាន​ការ​អះ​​​អាង​​ថា លោក ហ៊ុន សែន មាន “ប្រវត្តិ​​ប្រើ​កម្លាំង​បាយ​​បង្ក្រាប​អ្នកប្រឆាំង​” នោះ​ផងដែរ​។

លោក​ កុយ គួង​ បាន​សរសេរ​ថា “​​​កាសែត​ ​​​ឌឹ ណេសិន បាន​ធ្វើការ​អះអាង​​ដោយ​គ្មាន​ការ​ពិត​ និង​ភ័ស្តុតាង​ដើម្បី​គាំទ្រ​​អំណះ​​​អំណាង​​​​ខុស​ស្រឡះ​របស់​ខ្លួន​​​​​​។ ខ្ញុំ​សូម​ជំរុញ​ឲ្យ​​​​​​​​កាសែត​ ​​​ឌឹ ណេសិន បញ្ឈប់​​​​ជា​បន្ទាន់​នូវ​ការ​ពាក់ព័ន្ធ​​ក្នុង ​​​នយោ​បាយ​ដ៏​ខ្មៅ​កខ្វក់​ក្នុងការ​និយាយ​អាក្រក់​ពី​​សម្តេច​តេជោ​ ហ៊ុន សែន និង​ប្រទេស​​​​កម្ពុជា។ ខ្ញុំ​ឆ្ងល់​ណាស់​មិន​ដឹង​ថា តើអ្នក​ត្រូវ​បាន​គេ​ជួល​ឲ្យ​​ធ្វើ​ជា​អ្នក​រិះគន់​​មិន​សំចៃ​ចំពោះ​គាត់​និង​ប្រទេស​កម្ពុជា​ឬ​អត់​ទេ​​​​”៕

ប្រែសម្រួល​​ដោ​យ​​ចេវ ប៊ុននី​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស