បើទោះបីជាគណបក្សសង្គ្រោះជាតិបានគំរាមមិនឈប់ថា ខ្លួននឹងធ្វើពហិការមិនចូលរួមក្នុងការបើកសម័យប្រជុំសភានៅថ្ងៃច័ន្ទសប្តាហ៍ក្រោយយ៉ាងណាក្តី ក៏រដ្ឋសភាជាតិបានប្រកាសជាផ្លូវការកាលពីម្សិលមិញថា ព្រះមហាក្សត្រ នរោត្តម សីហមុនី នឹងបើកសម័យប្រជុំសភានីតិកាលថ្មីលើកដំបូងតាមការគ្រោងទុកដែរ។
អគ្គលេខាធិការដ្ឋានរដ្ឋសភាបានចេញសេចក្តីប្រកាសថា “នៅថ្ងៃច័ន្ទ ទី២៣ ខែកញ្ញា វេលាម៉ោង៨ព្រឹក រដ្ឋសភាជាតិនីតិកាលទី៥នឹងបើកសម័យប្រជុំលើកដំបូងក្រោម ព្រះរាជអធិបតីភាពរបស់ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី”។
គួរបញ្ជាក់ថា រដ្ឋធម្មនុញ្ញតម្រូវឲ្យព្រះមហាក្សត្របើកសម័យប្រជុំសភាក្នុងអំឡុងពេល៦០ថ្ងៃ ក្រោយការបោះឆ្នោត។ ទោះជាយ៉ាងណា ក្រុមអ្នកវិភាគ និងអ្នកសង្កេតការណ៍បានលើកឡើងថា ព្រះមហាក្សត្រត្រូវប្រឈមនឹងជម្រើសដ៏លំបាក ប្រសិនបើគណបក្សប្រឆាំង និងសមាជិកសភាទាំង៥៥រូបរបស់ខ្លួនធ្វើពហិការដូចការដូចការគំរាមមែននោះ។
ពួកគេលើកឡើងថា គណបក្សសង្គ្រោះជាតិនៅមិនទាន់បានសម្រេចចិត្តដាច់ណាត់ថា នឹងមិនចូលរួមក្នុងការបើកសម័យប្រជុំសភាទេ ហើយកំពុងស្ថិតក្នុងដំណាក់កាលចរចាជាមួយនាយករដ្ឋមន្ត្រី ហ៊ុន សែន ក្នុងបំណងស្វែងរកដំណោះស្រាយដែលនឹងធ្វើឲ្យពួកគេបញ្ចៀសការធ្វើពហិការនេះ។ ប៉ុន្តែ ប្រសិនបើកិច្ចប្រឹងប្រែងបរាជ័យវិញនោះ សេចក្តីសម្រេចក្នុងការបន្តការបើកសម័យប្រជុំតាមការគ្រោងទុកអាចធ្វើឲ្យមជ្ឈដ្ឋានទូទៅមើលឃើញពីភាពលម្អៀង។
លោកស្រី ជា វណ្ណាត អ្នកវិភាគនយោ បាយបានមានប្រសាសន៍ថា “សាធារណជនប្រហែលជាមិនចង់ឃើញព្រះមហាក្សត្របើកសម័យប្រជុំនេះទេ លុះត្រាតែគណបក្សទាំងពីរព្រមព្រៀងគ្នាសិន។ វាមិនមែនជាសេណារីយ៉ូល្អទេ”។
លោក កែម ឡី អ្នកវិភាគនយោបាយ បានលើកឡើងថា សេចក្តីសម្រេចក្នុងការបើកសម័យប្រជុំសភាដោយគ្មានវត្តមានរបស់គណបក្សសង្គ្រោះជាតិទំនងជានឹងធ្វើឲ្យអ្នកបោះឆ្នោតដែលបានបោះឆ្នោតឲ្យគណបក្សប្រឆាំងកាលពីខែកក្កដា ខកចិត្តបំផុត។
លោកបានមានប្រសាសន៍ថា “វានឹងមានផលប៉ះពាល់ដ៏ធំមួយ…ប្រជាពលរដ្ឋដែលគាំទ្រគណបក្សសង្គ្រោះជាតិនឹងខកចិត្ត”។ សម្រាប់លោកផ្ទាល់ លោករំពឹងថា គណបក្សប្រជាជន និងគណបក្សសង្គ្រោះជាតិនឹងឈានដល់ការសម្រុះសម្រួលគ្នាមុនសម័យប្រជុំនៅថ្ងៃច័ន្ទ ដែលនឹងធ្វើឲ្យគណបក្សប្រឆាំងចូលរួម ហើយព្រះមហាក្សត្រក៏អាចបំពេញព្រះរាជកិច្ចស្របតាមរដ្ឋធម្មនុញ្ញ។
ប៉ុន្តែ ប្រសិនបើគ្មានការឈានទៅដល់កិច្ចព្រមព្រៀងទេនោះ លោក កែម ឡី បានព្យាករថា គណបក្សប្រជាជនកម្ពុជានឹងស្នើឲ្យមានការពន្យារពេល ដើម្បីឲ្យព្រះមហាក្សត្រដែលជាអង្គកំពូលនៃរដ្ឋធម្មនុញ្ញកម្ពុជា រួចផុតពីជម្រើសដ៏លំបាកនេះ។
លោក អ៊ូ រិទ្ធី ជាម្ចាស់គេហទំព័របញ្ចេញមតិផ្នែកនយោបាយវ័យក្មេងម្នាក់ ក៏បានលើកឡើងថា សេចក្តីសម្រេចក្នុងការបើកសម័យប្រជុំដោយគ្មានការចូលរួមពីគណបក្សទាំងពីរនឹងធ្វើឲ្យមានប្រតិកម្មយ៉ាងផុសផុលតាមរយៈបណ្តាញភ្ជាប់ទំនាក់ទំនងសង្គម និងក្នុងចំណោមប្រជាជនវ័យក្មេង ដែលស្ថិតនៅពីក្រោយជោគជ័យរបស់គណបក្សប្រឆាំងក្នុងការបោះឆ្នោតអាណត្តិនេះ។
លោក អ៊ុំ តារាវុធ សមាជិកព្រះរាជខុទ្ទកាល័យព្រះបរមរាជវាំង បានបដិសេធមិនធ្វើ អត្ថាធិប្បាយអំពីរឿងនេះទេ៕
ប្រែសម្រួលដោយ កង សុធា