មន្ត្រីគណបក្សសង្គ្រោះជាតិមួយរូបបានឲ្យដឹងថា លោកនាយករដ្ឋមន្ត្រី ហ៊ុន សែន បានយល់ព្រមផ្តល់ឲ្យវិញនូវប្រាក់ខែទាំងប៉ុន្មានដែលមិនបានបើកឲ្យសមាជិកសភាគណបក្សប្រឆាំងដែលត្រូវសភាដឹកនាំដោយគណបក្សប្រជាជនកម្ពុជាដកសមាជិកភាពកាលពីខែមិថុនា។
ការយល់ព្រមផ្តល់ប្រាក់ខែឲ្យសមាជិកសភាទាំង២៧រូបមកពីគណបក្ស សម រង្ស៊ី និងគណបក្សសិទ្ធិមនុស្សវិញនេះត្រូវបានសម្រេចអំឡុងកិច្ចចរចាថ្នាក់កំពូលថ្ងៃទី១ ដែលសំដៅទម្លាយភាពទាល់ច្រកក្រោយការបោះឆ្នោតរវាងគណបក្សប្រជាជនរបស់លោក ហ៊ុន សែន និងគណបក្សសង្គ្រោះជាតិ ។
លោក សុន ឆ័យ ប្រធានក្រុមតំណាងរាស្ត្ររបស់គណបក្សសង្គ្រោះជាតិ និងជាអតីតសមាជិកសភាគណបក្ស សម រង្ស៊ី ដែលស្ថិតនៅក្នុងចំណោមអ្នកដែលត្រូវបានដកសមាជិកភាពនោះបានឲ្យដឹងថា រូបលោកនឹងសហសេវិករបស់ខ្លួនទំនងជានឹងទទួលយកប្រាក់ខែនេះ ហើយបានលើកឡើងថា រឿងរ៉ាវទាំងប៉ុន្មាន គឺស្តែងឲ្យឃើញពីកង្វះឯករាជភាពនៃស្ថាប័ននីតិបញ្ញត្តិក្នុងប្រទេសកម្ពុជា។
លោកបានមានប្រសាសន៍ថា “[ ការផ្តល់ប្រាក់ខែឲ្យយើងវិញ] គឺជាអ្វីដែល [ គណបក្សប្រជាជន] ត្រូវធ្វើ ព្រោះពួកគេគឺជាអ្នកដែលបានរំលោភអំណាចរបស់ខ្លួន។ ប្រសិនបើពួកគេផ្តល់ប្រាក់ខែឲ្យយើងវិញ វាជារឿងធម្មតា គឺគ្មានអ្វីគួរឲ្យយើងរំភើបទេ”។
លោកបានមានប្រសាសន៍បន្តថា “នៅពេលយើងនិយាយជាមួយពួកគេ [ថ្នាក់ដឹកនាំគណបក្សប្រជាជន] ពួកគេនៅតែនិយាយថា រដ្ឋសភា គឺឯករាជ្យ ប៉ុន្តែក្នុងពេលជាមួយគ្នានោះពួកគេបែរជាប្រាប់សមាជិក [គណបក្សប្រជាជន] ឲ្យសងប្រាក់ខែ [ទៅសមាជិកសភាគណបក្សសង្គ្រោះជាតិ] ព្រោះវាត្រូវបានដកយកពីពួកយើងក្នុងរយៈពេលបីខែចុងក្រោយនេះទៅវិញ” ដោយលោកបានបន្ថែមថា “ការយល់ព្រមនេះ គឺធ្វើឡើងដោយលោក ហ៊ុន សែន ខ្លួនឯងផ្ទាល់តែម្តង”។
លោក ប្រាក់ សុខុន រដ្ឋលេខាធិការនៅទីស្តីការគណៈរដ្ឋមន្ត្រី ដែលបានចូលរួមក្នុងកិច្ចចរចានេះដែរនោះ បានបង្វែរសំណួរអំពីការយល់ព្រមរបស់លោក ហ៊ុន សែន ក្នុងការផ្តល់ប្រាក់ខែឲ្យសមាជិកសភាគណបក្សសង្គ្រោះជាតិវិញនេះទៅលោក ជាម យៀប សមាជិកសភាជាប់ឆ្នោតរបស់គណបក្សប្រជាជនកម្ពុជា ដែលបានអះអាងថា ខ្លួនមិនដឹងពីការយល់ព្រមនេះ។
លោក ជាម យៀប បានអះអាងថា “ខ្ញុំអត់ដឹងរឿងនេះទេ”។
លោក អ៊ូ ចាន់រិទ្ធ សមាជិកជាប់ឆ្នោតរបស់គណបក្សសង្គ្រោះជាតិ និងជាអតីតសមាជិកសភាគណបក្សសិទ្ធិមនុស្ស ដែលស្ថិតនៅក្នុងចំណោមអ្នកដែលត្រូវសភាដឹកនាំដោយគណបក្សប្រជាជនបណ្តេញចេញពីសភាកាលពីខែមិថុនា ដែរនោះ បានឲ្យដឹងថា សមាជិកសភាមានប្រាក់ខែមូលដ្ឋានប្រហែល១.០០០ដុល្លារ ប៉ុន្តែ អាចទទួលបានរហូតដល់ ២.៣០០ដុល្លារក្នុងមួយខែ ក្នុងនោះរាប់ទាំងប្រាក់ឧបត្ថម្ភសម្រាប់ការចំណាយលើថ្លៃសាំង ថ្លៃជួលរថយន្ត ជួលអ្នកបើកបររថយន្ត និងសម្រាប់ការចំណាយផ្សេងៗផង។
គិតចាប់ពីពេលដកសមាជិកភាពសភាអស់រយៈពេលជាងបីខែនេះមក វាមានន័យថា ប្រាក់ខែសរុបសម្រាប់សមាជិកសភាគណបក្សប្រឆាំងដែលត្រូវបានបណ្តេញចេញទាំង២៧រូបគឺមានចំនួន២០ម៉ឺនដុល្លារ។
ខណៈជំនាញការច្បាប់មានការយល់ឃើញខុសគ្នាពីធម្មនុញ្ញភាពក្នុងការបណ្តេញសមាជិកសភាគណបក្សប្រឆាំងនោះ សង្គមស៊ីវិល និងក្រសួងការបរទេសអាមេរិកបានរិះគន់ទង្វើនេះយ៉ាងខ្លាំង។
ក្រសួងការបរទេសអាមេរិកបានលើកឡើងតាមរយៈសេចក្តីថ្លែងការណ៍មួយចុះថ្ងៃទី៨ ខែមិថុនាថា “ការដកប្រាក់ខែ និងសមាជិកភាពសភារបស់តំណាងរាស្ត្រមកពីគណបក្សប្រឆាំង គឺស្មើនឹងការធ្វើឲ្យប្រជាពលរដ្ឋកម្ពុជាបាត់បង់សំឡេងរបស់ខ្លួន និងធ្វើឲ្យខូចដល់ដំណើរការប្រជាធិបតេយ្យនៅក្នុងប្រទេសកម្ពុជា”។
ការលើកឡើងបែបនេះបានបញ្ឆេះកំហឹងរបស់លោក ឈាង វុន អ្នកនាំពាក្យរដ្ឋសភាមកពីគណបក្សប្រជាជនកម្ពុជា ដែលបានថ្លែងក្នុងសន្និសីទសារព័ត៌មានមួយកាលពីថ្ងៃទី១១ ខែមិថុនាថា សហរដ្ឋអាមេរិកគួរលះបង់ “គំនិតអាណានិគម” របស់ខ្លួន ព្រោះថ្នាក់ដឹកនាំសភាមកពីគណបក្សប្រជាជនកម្ពុជាគ្រាន់តែអនុវត្តតាមច្បាប់កម្ពុជាប៉ុណ្ណោះ។
លោក ឈាង វុន បានថ្លែងនៅពេលនោះថា “រដ្ឋសភាជាតិមិនបានដកសមាជិកភាព [ របស់តំណាងរាស្ត្រគណបក្សប្រឆាំងទេ] គឺច្បាប់ទេដែលនាំឲ្យមានការដកនេះ។ ប្រសិនបើពួកគេមិនបានចូលរួមក្នុងគណបក្សសង្គ្រោះជាតិ ហើយធ្វើការប្រកាសនៅសភានោះ គឺប្រាកដជាគ្មានរឿងបែបនេះកើតឡើងទេ”។
លោក កែម ឡី អ្នកវិភាគនយោបាយឯករាជ្យបានលើកឡើងថា ការដែលថ្នាក់ដឹកនាំគណបក្សប្រជាជនកម្ពុជាធ្វើសេចក្តីសម្រេចបញ្ច្រាសវិញនេះ ស្តែងឲ្យឃើញពីការគិតគូរមិនបានវែងឆ្ងាយរបស់ពួកគេ។
លោកបានមានប្រសាសន៍ថា “ពួកគេគួរតែនិយាយថា សមាជិកសភាគណបក្សប្រឆាំងត្រូវ ឬក៏ខុសតាមច្បាប់សភាជាតិ។ នេះគឺជាសេចក្តីសម្រេច [បណ្តេញតំណាងរាស្ត្រគណបក្សប្រឆាំង] ហើយប្រសិនបើការសម្រេចចិត្តនោះត្រូវ ពួកគេគួរតែប្រកាន់តាមការសម្រេចចិត្តនោះ។ ប្រសិនបើពួកគេ [សមាជិកសភាគណបក្សប្រជាជនកម្ពុជាបានសម្រេចចិត្ត] ខុស ពួកគេគួរតែនិយាយជាសាធារណៈ”។
លោក សុក សំអឿន ជាមេធាវីដ៏លេចធ្លោមួយរូប និងជាសមាជិកក្រុមប្រឹក្សានាយកនៃគណៈកម្មាធិការដើម្បីបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បានលើកឡើងថា ការសន្យារបស់លោក ហ៊ុន សែន ក្នុងការផ្តល់ប្រាក់ខែដល់សមាជិកសភាគណបក្សប្រឆាំងវិញនេះ អាចត្រូវបានប្រើជាប្រយោជន៍សម្រាប់គណបក្សកាន់អំណាចនៅទីបំផុត។
លោកបានមានប្រសាសន៍ថា “គណបក្សប្រជាជនអាចទទួលបានផលចំណេញផ្នែកនយោបាយពីរឿងនេះ” ដោយលោកបានបន្ថែមថា ទង្វើនេះអាចកាត់បន្ថយភាពតានតឹងរវាងថ្នាក់ដឹកនាំគណបក្សទាំងពីរក្នុងកិច្ចចរចាក្រោយការបោះឆ្នោត និងអាចត្រូវបានប្រើដើម្បីធ្វើឲ្យខូចកេរ្តិ៍ឈ្មោះរបស់គណបក្សសង្គ្រោះជាតិ។ លោក សុក សំអឿន បានថ្លែងថា “វាអាចធ្វើឲ្យសាធារណជនយល់ឃើញថា គណបក្សសង្គ្រោះជាតិប្រហែលជាគិតតែរឿងលាភសក្ការៈប៉ុណ្ណោះ”៕
ប្រែសម្រួលដោយ ភួន ច័ន្ទសេរីវុធ