ប្រទេសភូមា និងប្រទេសកូរ៉េខាងត្បូងបានក្លាយជាប្រទេសថ្មីបំផុតដែលបានសរសេរលិខិត អបអរសាទរលោកនាយករដ្ឋមន្ត្រី ហ៊ុន សែន ចំពោះការទទួលបានជ័យជម្នះក្នុងការបោះឆ្នោតជ្រើសតាំងតំណាងរាស្ត្រកាលពីថ្ងៃទី២៨ ខែកក្កដា។
កាលពីសប្តាហ៍មុន គណៈកម្មាធិការជាតិរៀបចំការបោះឆ្នោតបានប្រកាសលទ្ធផលផ្លូវការថា គណបក្សប្រជាជនកម្ពុជារបស់លោក ហ៊ុន សែន ទទួលបាន៦៨អាសនៈក្នុងរដ្ឋសភា បើធៀបនឹងគណបក្សសង្គ្រោះជាតិដែលទទួលបាន៥៥អាសនៈ។
ក្នុងលិខិតចុះថ្ងៃទី២៨ ខែសីហា ដែលត្រូវបានបង្ហោះលើគេហទំព័ររបស់ក្រសួងការបរទេសកាលពីម្សិលមិញ លោក ឃិន អុង មីអីន (Khin Ahng Myint) ប្រធានសភាជាន់ខ្ពស់របស់ប្រទេសភូមា បានកោតសរសើរលោក ហ៊ុន សែន ចំពោះ “ការខិតខំតស៊ូកសាងសន្តិភាព ស្ថិរភាព និងលទ្ធិប្រជាធិបតេយ្យសម្រាប់ប្រទេសរបស់លោក”។
ក្នុងលិខិតទី២ ចុះថ្ងៃអង្គារ លោកស្រីប្រធានាធិបតីកូរ៉េខាងត្បូង ផាក ហ្គឺន យែ (Park Geun-hye) បានកោតសរសើរលោក ហ៊ុន សែន ចំពោះ “ការទទួលជំនឿទុកចិត្តជាថ្មីពីប្រជាពលរដ្ឋខ្មែរ។ ខ្ញុំជឿជាក់យ៉ាងមុតមាំថា ក្រោមការដឹកនាំដ៏ល្អរបស់ឯកឧត្តម ព្រះរាជាណាចក្រកម្ពុជានឹងបន្តទទួលបានស្ថិរភាពនយោបាយនិងការអភិវឌ្ឍសេដ្ឋកិច្ច។ ខ្ញុំប្រាកដណាស់ថា គតិបណ្ឌិតនិងការខិតខំប្រឹងប្រែងរបស់ឯកឧត្តម នឹងនំាកម្ពុជាឆ្ពោះទៅរកសម័យកាលថ្មីមួយ”។
លោកស្រី ផាក គឺជាមេដឹកនាំទី១ហើយរបស់ប្រទេសប្រជាធិបតេយ្យនៅក្រៅរង្វង់អាស៊ាន ដែលបានផ្ញើលិខិតអបអរសាទរលោក ហ៊ុន សែន។ ពាណិជ្ជកម្មទ្វេភាគីរវាងប្រទេសកម្ពុជា និងប្រទេសកូរ៉េខាងត្បូង មានតម្លៃជាទឹកប្រាក់ចំនួន៩៧០លានដុល្លារកាលពីឆ្នាំមុន គឺកើនពីប្រហែល៥៤០លានដុល្លារក្នុងឆ្នាំ២០១១៕
ប្រែសម្រួលដោយ ចេវ ប៊ុននី