31 C
Phnom Penh

គណ​បក្ស​សង្គ្រោះ​ជាតិ​ផ្ញើ​លិខិត​ធ្វើ​ពហិការថ្វាយព្រះ​មហាក្សត្រ

ដោយ ឌឹ ខេមបូឌា ដេលី

បទវិភាគ

គណ​បក្ស​សង្គ្រោះជាតិ​បាន​សរសេរ​លិខិត​ថ្វាយ​ព្រះ​មហាក្សត្រ នរោត្តម សីហមុនី កាល​​ពី​ម្សិល​មិញ ដើម្បី​ទូល​ថ្វាយ​ព្រះ​អង្គ​ជា​ផ្លូវ​ការ​​​​អំពីការ​គំរាម​ធ្វើ​ពហិការ​​របស់​ខ្លួន​ មិន​ចូល​រួម​សម័យ​ប្រជុំ​បើក​រដ្ឋ​សភា​ ដែល​គ្រោង​​ធ្វើ​នៅ​ថ្ងៃ​ច័ន្ទ​ ប្រសិន​បើ​មិន​មាន​កិច្ច​ព្រម​ព្រៀង​​ដែល​អាច​ទទួល​យ​ក​បាន​ជាមួយ​គណ​បក្ស​ប្រជា​ជន​កម្ពុជា​ទេនោះ។

លោក យឹម សុវណ្ណ​ អ្នក​នាំពាក្យ​គណបក្ស​សង្គ្រោះជាតិ​ បាន​បដិសេធ​មិន​ផ្តល់​ច្បាប់​ចម្លង​​​​នៃ​លិខិត​​ផ្ញើ​ទៅ​ព្រះ​បរម​រាជ​វាំង​នោះ​ទេ ប៉ុន្តែ លោក​បាន​មាន​ប្រសា​សន៍​ថា ​នៅ​ក្នុង​លិខិត​នោះ​យើង​បាន​ទូល​ព្រះមហាក្សត្រ​​​ថា គណ​បក្ស​ប្រឆាំង​នឹង​ធ្វើ​ពហិការ​សម័យ​​ប្រជុំ​បើក​រដ្ឋ​សភា​នៅ​ថ្ងៃ​ច័ន្ទ ប្រសិន​បើ​ការ​ចរចារ​ជាមួយ​គណ​បក្ស​ប្រជា​ជន​​កម្ពុជា​មិន​បាន​ជោគ​ជ័យ​ទេ​នោះ។

លោក យឹម សុវណ្ណ​ បាន​មាន​ប្រសាសន៍​ថា “ប្រសិន​បើ​យើង​មិន​អាច​រក​យុត្តិ​ធម៌​ជូន​ប្រជា​ពល​រដ្ឋ​ និងមិន​អាច​រក​ដំណោះ​ស្រាយ​បាន​ទេនោះ​យើង​នឹង​ធ្វើ​ពហិការ​សម័យ​ប្រជុំ​​​​​សភា​លើក​ដំបូង​នេះ​”។

គណ​បក្ស​សង្គ្រោះ​ជាតិ​ដែល​កំពុង​ជំទាស់​នឹង​ការ​ឈ្នះ​​ឆ្នោត​ជា​ផ្លូវ​ការ​របស់​គណ​បក្ស​ប្រជា​ជន​កម្ពុជា​ នៅ​ក្នុង​ការ​បោះ​ឆ្នោត​កាល​ពី​ថ្ងៃ​ទី២៨ ខែ​កក្កដា​េនះ​ បាន​ទទួល​ព្រះ​រាជ​សារ​មួយ​ពី​ព្រះ​មហាក្សត្រ កាល​ពី​ថ្ងៃ​ពុធ​ ដែល​​លិខិត​នោះ​ជំរុញ​ឲ្យ​​បេក្ខជន​សមាជិក​សភា​ជាប់​ឆ្នោត​ទាំង​៥៥​រូប​របស់គណ​បក្ស​ប្រឆាំង​ទទួល​យក​អាសនៈ​របស់​ខ្លួន​នៅ​ថ្ងៃ​ច័ន្ទ។ នេះ​គឺ​ជា​លិខិត​ទី២​របស់​ព្រះ​មហាក្សត្រ​ ដើម្បី​អញ្ជើញ​គណ​បក្ស​ប្រឆាំង​ឲ្យ​ចូល​រួម​សម័យ​ប្រជុំ​រដ្ឋ​សភា។ ទោះ​ជា​យ៉ាងណា លទ្ធ​ភាព​បែ​ប​នេះ​ ហាក់​ដូច​ជា​​នៅ​​វែង​ឆ្ងាយ​ណាស់​។

គណ​បក្ស​ទាំង​ពីរ​មិន​បាន​ជួប​ចរចាគ្នា​ទេ​ ចាប់​តាំង​ពី​ព្រឹក​ថ្ងៃ​អង្គារ​មក ហើយ​លោក យឹម សុវណ្ណ បាន​មាន​ប្រសាសន៍​ថា មិន​មាន​​ការ​រៀប​ចំ​គម្រោង​​ចរចា​ទៀត​ទេ​។ លោក​បាន​មាន​ប្រសាសន៍ថា “យើង​កំពុង​រង់​ចាំ​ការ​ឆ្លើយ​តប​ពី​គណ​បក្ស​ប្រជាជន​កម្ពុជា ពីព្រោះ​យើង​បាន​ប្រាប់​អ្វីៗ​គ្រប់​យ៉ាង​ដល់​គណបក្ស​ប្រជា​ជន​កម្ពុជា​រួច​ហើយ”។

ទោះ​ជា​យ៉ាង​ណា​ លោក ប្រាក់ សុខុន រដ្ឋ​លេខា​ធិការ​មក​ពី​គណបក្ស​ប្រជា​ជន​កម្ពុជា នៅ​ទី​ស្តីការ​គណៈ​រដ្ឋ​មន្ត្រី​ដែល​ចូល​រួម​នៅក្នុង​ការ​ចរចានេះ​ បាន​មាន​ប្រសាសន៍ថា ការ​​ទទួល​ខុស​ត្រូវ​សម្រាប់​ការ​ចរចា​ជាថ្មី​ គឺ​ស្ថិត​នៅ​លើ​គណបក្ស​ប្រឆាំង។ លោក​បាន​ថ្លែង​​​កាល​ពីម្សិល​មិញថា “ការ​ចរចា​នេះ​គឺ​អាស្រ័យ​​​​លើ​គណ​​​បក្ស​​​ប្រឆាំងនៅ​ពេល​នេះ”។

នៅ​ក្នុង​លិខិត​របស់​ខ្លួន​ផ្ញើ​ថ្វាយ​ព្រះ​មហា​ក្សត្រ​កាល​ពី​ម្សិល​មិញ​នេះ គណបក្ស​ប្រជា​ជន​កម្ពុជាបាន​លើក​ឡើង​សារ​ជា​ថ្មី​ពី​គម្រោង​របស់​ខ្លួន​ក្នុង​ការ​ចូល​រួម​សម័យ​ប្រជុំបើក​រដ្ឋ​សភា​ មិន​ថា​ មាន​បញ្ហា​អ្វី​ឡើយ​។

លោក ជាម យៀប សមាជិក​សភា​ជាន់​ខ្ពស់​គណបក្ស​ប្រជា​ជន​កម្ពុជា​បាន​មាន​ប្រសា​​​សន៍​ថា លិខិត​នោះ​កើត​ចេញ​ពី​កិច្ច​ប្រជុំ​នៅ​​​ព្រឹក​នោះ រវាង​លោក ហ៊ុន សែន និង​បេក្ខ​ជន​តំណាង​​រាស្ត្រ​ជាប់​ឆ្នោតទាំង​៦៨​ របស់​គណ​បក្ស​ប្រជា​ជន​កម្ពុជា។ លោក ជាម យៀប បាន​មាន​ប្រសាសន៍​ថា “សម្តេច​នាយក​រដ្ឋ​មន្ត្រី ហ៊ុន សែន បាន​ស្នើ​សុំ​ឲ្យ​សមាជិក​សភាជាប់​ឆ្នោត​ទាំង​អស់​កុំ​​​ធ្វើ​ដំណើរ​ទៅ​ណា​ ពីព្រោះ​ពួក​គេ​ត្រូវ​ចូល​រួម​កិច្ច​ប្រជុំ​សភា​នៅ​ថ្ងៃ​ច័ន្ទ”។ លោក​បាន​បន្ថែម​ថា ប្រសិន​បើ​គណ​បក្ស​ប្រឆាំង​ជា​ចុង​ក្រោយ​សម្រេច​មិន​ចូល​រួម​នោះ​ “ មានន័យ​ថា ពួក​គេ​មិន​គោរព​រដ្ឋ​ធម្ម​នុញ្ញ​ ហើយ​ពួក​គេ​មិន​ដង្ហែរ​តាម​ព្រះ​ករុណា”។

លោក យឹម សុវណ្ណ​ បាន​មាន​ប្រសាសន៍ ថា ឱកាស​នៃ​ការ​ធ្វើ​ពហិការ​ ឥឡូវ​នេះ​មាន​ប្រហែល​៨០​ភាគ​រយ។

លោក ហ៊ុន សែន បាន​ព្រមាន​គណ​បក្ស​ប្រឆាំង​ថា គណៈ​កម្មា​ធិការ​ជាតិ​រៀបចំ​ការ​បោះ​ឆ្នោត​ ដែល​គេ​ដឹង​ជា​ទូទៅ​ថា ​លម្អៀង​ទៅ​ខាង​​គណ​​បក្ស​ប្រជាជន​កម្ពុជា​​នោះ​ អាច​បែង​ចែក​អាសនៈ​ទាំង​៥៥​របស់​គណ​បក្ស​សង្គ្រោះជាតិ​មកឲ្យ​គណ​បក្ស​ប្រជា​ជន​កម្ពុជា។ ការ​គំរាម​បែប​នេះ​បង្ក​ឲ្យ​មាន​ភាព​ចលាចល​ ហើយអ្នក​វិភាគ​ និង​មេធាវី​បាន​បញ្ជាក់​ថា ទង្វើ​​បែប​នេះ​មិន​ស្រប​ច្បាប់​ទេ ហើយ​គ.ជ.ប. ​មិន​អាច​​ធ្វើ​ទង្វើ​ដ៏​តក់​ក្រហល់​បែប​នេះ​បាន​ទេ។

លោក ប្រាក់​ សុខុន ក៏​បានមាន​​​ប្រសាសន៍​​​ផង​​​ដែរថា ​លើក​ឡើង​សារ​​ជា​ថ្មី​អំពី​ការ​ព្រមាន​​​​របស់​នាយក​រដ្ឋ​មន្ត្រី​ អំពី​សិទ្ធិ​បែង​ចែក​អាសនៈ​របស់​គណបក្ស​ប្រឆាំង​។ លោក​បាន​មាន​ប្រសាសន៍ថា “ លោក​នាយក​រដ្ឋ​មន្ត្រី​ ហ៊ុន សែន បាន​លើក​ឡើង​ពីរ ចំណុច​។ ចំណុច​ទី​១ គឺ​ការ​ធ្វើ​ពហិការ និង​​​ចំណុច​​​មួយ​ទៀតគឺ​ ការ​បោះ​បង់​ចោល​អាសនៈ។ គណ​បក្ស​សង្គ្រោះជាតិ​គ្រាន់តែ​ធ្វើ​ពហិការ​ ដូច្នេះ​មិន​ចាំ​បាច់​មាន​ការ​បែង​ចែក​​​​អាសនៈ​នោះ​ទេ​”។

ច្បាប់​បោះ​ឆ្នោត​ចែង​ថា គ.ជ.ប. អាច​បែង​​​​ចែក​អាសនៈ​របស់​គណ​បក្សណាមួយ​ប៉ុន្តែ​លុះ​ត្រាតែ​គណបក្ស​នោះ​ “ប្រកាស​បោះ​​​បង់​” អាសនៈ​របស់​ខ្លួន​ ឬ​លុប​ឈ្មោះ​​របស់​ខ្លួន​​ចេញ​ពី​​បញ្ជី​ឈ្មោះគណ​បក្ស​ផ្លូវ​ការ​។ គណ​បក្ស​សង្គ្រោះ​ជាតិ​មិន​បាន​អនុវត្ត​​ចំណុច​ណា​មួយ​ក្នុង​ចំណោម​ចំណុច​ទាំង​ពី​រ​ទេ​។

លោក ជាម​ យៀប បាន​បញ្ជាក់​ថា គណ បក្សប្រជា​ជន​កម្ពុជា​នៅ​តែ​អាច​បង្កើត​រដ្ឋា​ភិបាល​ថ្មី​ជាមួយ​សមាជិក​សភា​ទាំង​៦៨​របស់​ខ្លួន​ ទោះ​បី​ជា​គណ​បក្ស​ប្រឆំាង​ធ្វើ​ពហិការ​​ក៏​​​ដោយ ប៉ុន្តែ មិន​បាន​ពន្យល់​ប្រាប់​ថា តើ​អាច​​បង្កើត​រដ្ឋា​ភិបាល​​ដោយ​របៀប​ណា​នោះ​ទេ។ រដ្ឋ​ធម្ម​នុញ្ញតម្រូវ​ឲ្យ​រដ្ឋ​សភា​​មាន​សមាជិក​យ៉ាង​តិច១២០​រូប៕

ប្រែ​សម្រួល​ដោយ មូល គឹម​ហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស