មន្ត្រីខេត្តបាននិយាយកាលពីម្សិលមិញថា រឿងក្តីរបស់មន្ត្រីខេត្តបាត់ដំបងម្នាក់ដែលជាប់ចោទពីបទលួចបន្លំថវិការដ្ឋអស់ចំនួន២០០.០០០ដុល្លារនោះត្រូវបានបញ្ជូនទៅអង្គភាពប្រឆាំងអំពើពុករលួយនៅក្នុងរាជធានីភ្នំពេញ។
លោក ឡុង ហុកម៉េង ព្រះរាជអាជ្ញាតុលាការខេត្តបាត់ដំបងបានមានប្រសាសន៍ថា ការស៊ើបអង្កេតរយៈពេលពីរសប្តាហ៍លើរឿងក្តីប្រឆាំងលោក សេង រតនៈ អនុប្រធានការិយាល័យមន្ទីរកសិកម្មខេត្តបាត់ដំបង បានបង្ហាញពីសញ្ញនៃអំពើពុករលួយ។ លោក ហុកម៉េង បានមានប្រសាសន៍ថា “ចៅក្រមស៊ើបសួរបានបញ្ជូនរឿងក្តីនេះត្រឡប់មកឲ្យខ្ញុំវិញជាមួយព័ត៌មានថា មានជាប់ពាក់ព័ន្ធអំពើពុករលួយ ដូច្នេះ ខ្ញុំបានបញ្ជូនរឿងក្តីនេះទៅឲ្យអង្គភាពប្រឆាំងអំពើពុករលួយ កាលពីថ្ងៃច័ន្ទ។
បន្ទាប់ពីត្រូវបានចាប់ខ្លួនកាលពីថ្ងៃទី២ ខែកញ្ញា លោក សេង រតនៈ បានសារភាពប្រាប់នគរបាលថា គាត់បានលក់ជីរាប់ពាន់តោនដែលទីភ្នាក់ងារសហប្រតិបត្តិការអន្តរជាតិជប៉ុនបរិច្ចាគឲ្យនោះ ទៅឲ្យកសិករក្រីក្រក្នុងតម្លៃខ្ពស់ ហើយរក្សាទុកប្រាក់ចំណេញជាច្រើន ដែលប្រាក់ចំណេញនោះទុកសម្រាប់ក្រសួងកសិកម្ម។
យោងតាមលោក ហុកម៉េង បានឲ្យដឹងថា ប៉ុន្មានថ្ងៃបន្ទាប់ពីប្រាប់នគរបាលថា គាត់បានប្រព្រឹត្តបទល្មើសនេះតែម្នាក់ឯងនោះ លោក សេង រតន ក្រោយមកបានប្រាប់ចៅក្រមស៊ើបសួរថា មនុស្សបួននាក់ទៀតបានជាប់ពាក់ព័ន្ធនៅក្នុងរឿងអាស្រូវនេះដូចជាលោក ជាម ចាន់សុភ័ណ អភិបាលរងខេត្តបាត់ដំបងដែលជាកូនប្រុសរបស់លោក ជាម យៀប សមាជិកសភាគណបក្សប្រជាជនកម្ពុជា និងលោក ឈឹម វិជ្ជរ៉ា ប្រធានមន្ទីរកសិកម្មខេត្តបាត់ដំបង។
លោក ឈឹម វិជ្ជរ៉ា បានបដិសេធភ្លាមៗថា មិនបានជាប់ពាក់ព័ន្ធទេ រីឯលោក ចាន់សុភ័ណ បានអះអាងថា តាមពិតគាត់បានរាយការណ៍ប្រាប់នគរបាលទើបនាំឲ្យមានការចាប់ខ្លួនលោក រតនៈ បន្ទាប់ពីដឹងថា ជនជាប់ចោទរូបនេះបានយកលុយរដ្ឋដាក់ហោប៉ៅផ្ទាល់ខ្លួន។
ទោះបីជាលោក ហុកម៉េង មានប្រសាសន៍ថា មន្ត្រីខេត្តទាំងពីររូបស្ថិតក្នុងចំណោមអ្នកជាប់ពាក់ព័ន្ធទាំងនោះក៏ដោយ ក៏លោក អ៊ុក សុវណ្ណារិទ្ធ ចៅក្រមស៊ើបសួរបានបដិសេធថា រឿងនេះមិនពិតទេ ហើយនៅតែរក្សាគោលជំហរនេះដដែល។
លោក សុវណ្ណារិទ្ធ បានមានប្រសាសន៍ថា “មិនមានជនសង្ស័យផ្សេងទៀតនៅក្នុងរឿងក្តីនេះទេ ហើយខ្ញុំបានបញ្ជូនរឿងក្តីនេះទៅឲ្យព្រះរាជអាជ្ញារួចហើយ ដោយមានការផ្តល់យោបល់ឲ្យបញ្ជូនរឿងក្តី នេះទៅអង្គភាពប្រឆាំងអំពើពុករលួយ”។
អង្គការ JICA ជាទីភ្នាក់ងារផ្តល់ជំនួយអន្តរជាតិរបស់រដ្ឋាភិបាលជប៉ុន បានធ្វើការស៊ើបអង្កេតដោយខ្លួនឯងលើករណីនេះ បន្ទាប់ពីដឹងថា ប្រាក់ចំណេញពីការលក់ជី៤.៦៥០តោនរបស់គម្រោងមួយដែលមានបំណងបង្កើនផលិតកម្មស្បៀងអាហាររបស់កសិករនោះ ត្រូវបានមន្ត្រីរដ្ឋាភិបាលម្នាក់លួចបន្លំ។
ជាងនេះទៅទៀត លោក យូគីកូ គីតាហ្សាវ៉ា ប្រធានផ្នែកទំនាក់ទំនងសាធារណៈរបស់អង្គការ JICA បានមានប្រសាសន៍កាលពីថ្ងៃទី៩ ខែកញ្ញាថា ការឧបត្ថម្ភនាពេលអនាគតដល់គម្រោងនេះ អាស្រ័យលើការកែលម្អ ក្នុងការត្រួតពិនិត្យរបស់រដ្ឋាភិបាលលើគម្រោងបែបនេះ។ កាលពីម្សិលមិញមន្ត្រីអង្គការ JICA បានបដិសេធមិនធ្វើអត្ថាធិប្បាយអំពីរឿងក្តីនេះទេ៕
ប្រែសម្រួលដោយ មូល គឹមហឿន