ព្រះសង្ឃប្រមាណ១០០អង្គដែលព្យាយាមប្រមូលផ្តុំនៅមុខព្រះបរមរាជវាំង កាលពីម្សិលមិញ ដើម្បីសុំឲ្យព្រះមហាក្សត្រព្រះតម្រិះឡើងវិញអំពីការសម្រេចព្រះទ័យយាងទៅធ្វើជាអធិបតីក្នុងសម័យប្រជុំសភាដំបូង ដែលនឹងធ្វើឡើងនៅថ្ងៃច័ន្ទនោះ ត្រូវនគរបាលបង្ក្រាបកុបកម្មដាក់របាំងការពារមិនឲ្យសម្រេចបំណងឡើយ។
នៅម៉ោងប្រហែល៤និង៣០នាទីរសៀល ព្រះសង្ឃបាននិមន្តទៅដល់កន្លែងដាក់របាំងមួយក្នុងចំណោមកន្លែងដាក់របាំងមួយចំនួននៅខាងមុខសាលមហោរស្រពចតុមុខ ដែលស្ថិតតាមតីរវិថីព្រះស៊ីសុវត្ថិ។ ដោយត្រូវបានរារាំងមិនឲ្យនិមន្តទៅកាន់ព្រះបរមរាជវាំង ព្រះសង្ឃបានគង់ចុះជាជួរ ហើយបានចាប់ផ្ដើមតាំងសមាធិនៅខាងមុខរបាំង។
ព្រះតេជគុណ ប៊ុត ប៊ុនទិញ ដែលមានសង្ឃដីកាថា ព្រះអង្គបានរៀបចំការធ្វើបាតុកម្មនេះ បានមានសង្ឃដីកាប្រាប់អ្នកយកព័ត៌មានថា ព្រះសង្ឃកំពុងបួងសួងសុំឲ្យព្រះមហាក្សត្រ នរោត្តម សីហមុនី ព្រះតម្រិះឡើងវិញ ចំពោះការសម្រេចព្រះទ័យយាងទៅធ្វើជាអធិបតីក្នុងសម័យប្រជុំដំបូងដែលនឹងធ្វើឡើងនៅបួនថ្ងៃខាងមុខ ខណៈភាពជាប់គាំងផ្នែកនយោបាយសព្វថ្ងៃនៅមិនទាន់ដោះស្រាយនៅឡើយ ដោយទុកឲ្យប្រទេសមានការបែកបាក់។
ព្រះតេជគុណបានមានសង្ឃដីកាថា “ព្រះមហាក្សត្រមានសិទ្ធិនិងព្រះរាជតួនាទី នៅក្នុងការព្រះតម្រិះអំពីការឯកភាព និងនិរន្តភាពជាតិ” ។ ព្រះតេជគុណមានសង្ឃដីកាបន្តថា “ព្រះមហាក្សត្របានចេញព្រះរាជសារផ្ញើទៅរដ្ឋសភា និងសមាជិកសភារួចហើយសម្រាប់សម័យប្រជុំសភាដំបូង ដែលនឹងធ្វើឡើងនៅថ្ងៃទី២៣ ក្នុងខែនេះ ប៉ុន្តែ ប្រទេសរបស់យើងនៅមិនទាន់មានការឯកភាពគ្នានៅឡើយទេ”។
ព្រះតេជគុណបានមានសង្ឃដីកាបន្ថែមថា “ហេតុដូច្នេះយើងចង់ឲ្យព្រះមហាក្សត្ររបស់យើងព្រះតម្រិះឡើងវិញ។ អាត្មាមិនមែនចង់មានន័យថា ព្រះមហាក្សត្រគួរតែផ្អាកការយាងទៅធ្វើជា [អធិបតីនៅក្នុងរដ្ឋសភា] នោះទេ ពីព្រោះព្រះមហាក្សត្រមានព្រះរាជតួនាទីផ្ទាល់ព្រះកាយរបស់ព្រះអង្គ ប៉ុន្តែ យ៉ាងហោចណាស់ព្រះមហាក្សត្រគួរតែបានចំណាយពេលទតប្រជាពលរដ្ឋរបស់ព្រះអង្គដែលកំពុងជួបគ្រោះថ្នាក់ មុនពេលបើកសម័យប្រជុំសភាដំបូងនេះ”។
បន្ទាប់ពីព្រះសង្ឃបានគង់សមាធិប្រហែល២០នាទីក្រោយមក មាននគរបាលរាជធានីប្រហែល២០នាក់ ដែលភាគច្រើនមានខោអាវការពារ និងប្រដាប់ដោយខែលបានមកដល់កន្លែងប្រឈមមុខដាក់គ្នានេះ។
ព្រះសង្ឃបានងើបឈរឡើងប្រឈមនឹងកងសន្តិសុខ ខណៈមានការរារាំងដោយរបាំងដែកចំនួនពីរជាន់។ ព្រះសង្ឃខ្លះបានឲ្យផ្កាឈូកទៅនគរបាល ហើយមាននគរបាលមួយចំនួនបានទទួលយកផ្កាឈូកនេះ រួចហើយទុកផ្កាឈូកទាំងនេះនៅពីក្រោយខែលរបស់ខ្លួន។ ដោយមានការមិនពេញចិត្តចំពោះទង្វើដ៏សមរម្យនេះ មន្ត្រីជាន់ខ្ពស់មួយរូបបានយកផ្កាឈូកទាំងនេះគ្រវែងទៅលើផ្លូវភ្លាមៗ។ហើយប្រហែល៣០នាទីក្រោយមក ព្រះសង្ឃជាច្រើនអង្គបាននិមន្តចាកចេញ រីឯនគរបាលក៏បានចាកចេញដោយយករបាំងការពារចេញពីកន្លែងប្រឈមមុខដាក់គ្នាប្រហែលពីរបីម៉ែត្រផងដែរ។
លោក ហ៊ុន សុធី អធិការរងនគរបាលខណ្ឌដូនពេញ ដែលមានវត្តមាននៅកន្លែងប្រឈមមុខដាក់គ្នានោះបានបដិសេធមិនពន្យល់ថា តើហេតុអ្វីបានជានគរបាលបង្ក្រាបកុបកម្មមានវត្តមាននៅទីនោះទេ។
លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃបានលើកឡើងថា ព្រះសង្ឃមិនត្រូវបានអនុញ្ញាតឲ្យនិមន្តទៅក្បែរព្រះបរមរាជវាំងឡើយ ពីព្រោះបាតុកម្មរបស់ព្រះសង្ឃអាចនឹងរំលោភច្បាប់ធ្វើបាតុកម្មដែលរដ្ឋាភិបាលបានបង្កើតឡើងដើម្បីប្រឆាំងមហាបាតុកម្មអហិង្សានៅខាងក្រៅទីលានប្រជាធិបតេយ្យ។
លោកឧត្តមសេនីយ៍ឯក ខៀវ សុភ័គ បានថ្លែងថា “នៅខាងមុខព្រះបរមរាជរាំងគឺជាទីកន្លែងសម្រាប់ព្រះមហាក្សត្រ”។ លោកបានបន្ថែមថា កិច្ចខិតខំប្រឹងប្រែងរបស់ព្រះអង្គដើម្បីបញ្ចុះបញ្ចូលព្រះមហាក្សត្រឲ្យពន្យារពេលសម័យប្រជុំសភាដំបូងនេះ នឹងមិនបានទទួលផលឡើយ។ លោកបានបន្តថា “ព្រះមហាក្សត្របានសម្រេចព្រះទ័យរួចហើយថា ព្រះអង្គនឹងយាងធ្វើជាអធិបតីនៅក្នុងសម័យប្រជុំសភាដំបូងនៅថ្ងៃច័ន្ទ។ ព្រះសង្ឃដែលនិមន្តមកធ្វើបាតុកម្មបែបនេះគឺមិនគោរពដល់ព្រះមហាក្សត្រនោះទេ”។
លោក សុន ឆ័យ ប្រធានក្រុមតំណាងរាស្រ្តរបស់គណបក្សសង្គ្រោះជាតិបានថ្លែងថា គណបក្សប្រឆាំងបានបញ្ជូនសកម្មជនរបស់ខ្លួនឲ្យទៅប្រមូលស្នាមមេដៃពីសាធារណជនរួចហើយ ដើម្បីធ្វើញត្តិអំពាវនាវឲ្យព្រះមហាក្សត្រ នរោត្តម សីហមុនី ពន្យារពេលយាងទៅធ្វើជាអធិបតីនៅក្នុងសម័យប្រជុំសភាដំបូង ដោយរង់ចាំភាពជាប់គាំងនយោបាយត្រូវបានដោះស្រាយរួចរាល់សិន។ លោក សុន ឆ័យ បានថ្លែងថា លោកសង្ឃឹមថា គណបក្សរបស់លោក នឹងអាចប្រមូលស្នាមមេដៃបានរហូតដល់ទៅ១លាន ថ្វីបើនៅសល់ពេលត្រឹមតែបួនថ្ងៃមុនពេលបើកសម័យប្រជុំសភាដំបូងក៏ដោយ៕
ប្រែសម្រួលដោយ ស៊ា ស៊ុយឈាង