30 C
Phnom Penh

មេបញ្ជាការ​កងទ័ព​ជើង​ទឹក​អាមេរិក​ដើម​កំណើត​ខ្មែរ​ម្នាក់​​ត្រូវ​បាន​ចាប់​ខ្លួន​ពី​បទ​ទទួល​សំណូក​

ដោយ ឌឹ ខេមបូឌា ដេលី

បទវិភាគ

ការិយាល័យ​មេធាវី​នៃ​រដ្ឋ​អាជ្ញា​សហ​រដ្ឋ​អាមេរិក​ ប្រចាំ​រដ្ឋ​សាន​ឌីយ៉ាហ្គោ​ បាន​លើក​ឡើង​ក្នុង​សេចក្ដី​ថ្លែង​ការណ៍​មួយ​ថា​ពលរដ្ឋ​អាមេរិក​ដើមកំណើត​ខ្មែរ​ម្នាក់​ដែល​មាន​​​ឋានៈ​ជា​មេបញ្ជាការ​កង​ទ័ព​ជើងទឹក​សហ​រដ្ឋ​អាមេរិក​នោះ ត្រូវ​បាន​ចាប់​ខ្លួន​កាល​ពី​ថ្ងៃ​ច័ន្ទ នៅ​ក្នុង​រដ្ឋ​ខូល័ររ៉ាដូ ហើយ​ត្រូវ​បាន​ចោទ​ប្រកាន់​ពី​បទ​​សម​គំនិត​ប្រព្រឹត្ត​ការ​ស៊ី​សំណូក។

មេបញ្ជាការ​កងទ័ព​ជើង​ទឹក​សហ​រដ្ឋ​អាមេរិក លោក ម៉ាយខល​ វណ្ណៈខែម​ មីស៊ីវិក (Michael Vannak Khem Misiewics) អាយុ​៤៧​ឆ្នាំ ត្រូវ​បាន​ចោទប្រកាន់​ពី​បទ​បាន​ទទួល​សំណូក ​ភាគច្រើន​​នៃ​សំណូក​នោះ​គឺ​ទម្រង់​​នៃ​ការ​ធ្វើ​ដំណើរ​យ៉ាង​ពិសេស​​និង​មាន​សេវា​កម្ម​ស្រី​ពេស្យា​​ផង​ដែរ ​ពី​សំណាក់​​លោក​លីអូ​ណាដ​ហ្វ្រង់ស៊ីស​(Leonard Francis) អគ្គ​នាយក​នៃ​​ក្រុមហ៊ុន​មួយ​​មាន​មូលដ្ឋាន​នៅ​ក្នុង​ប្រទស​សិង្ហបុរី​ដែល​ផ្តល់​សេវា​កម្ម​បម្រើ​នាវា​ជើង​ទឹក​សហរដ្ឋ​អាមេរិក​នៅ​ពេល​ចូល​ចត​នៅ​កំពង់​ផែ​នៅ​ប្រទេស​នេះ​​។

យោង​តាម​សេចក្ដី​ថ្លែង​ការណ៍​នោះ​ឲ្យ​ដឹង​ថា​ជា​​ការ​ឆ្លើយ​​តប​វិញ​មេបញ្ជាការ​កង​ទ័ព​ជើង​ទឹក​ លោក មីស៊ីវិក​ និង​ភ្នាក់ងារ​ស៊ើប​អង្កេត​ពិសេស​​បទ​ឧក្រិដ្ឋ​​នាវា​ជើង​ទឹក​​លោក ចន​ បឺត្រាន​ប៊ីលីវើ ​(John Bertrand Beliveau II ) ​ សង្ស័យ​ថា បាន​ផ្តល់​ព័ត៌មាន​សម្ងាត់​ទៅ​​លោក​ ហ្វ្រង់​ស៊ីស​ ដែល​បាន​ប្រើ​ប្រាស់​ព័ត៌មាន​នោះ​ ដើម្បី​ទទួល​បាន​​កិច្ច​ព្រម​ព្រៀង​ជា​មួយ​នាវា​ជើង​ទឹក​ដែល​មាន​តម្លៃ​រាប់​លាន​ដុល្លារ​។

សេចក្តី​ថ្លែង​ការណ៍​នោះ​បាន​បន្ត​ថា “ជា​ផ្នែក​មួយ​នៃ​ការ​សម​គំនិត​​លោក​ មីស៊ីវិក​ បាន​ផ្ញើ​​ឲ្យ​​លោក​ ហ្វ្រង់​​ស៊ីស  នូវ​ព័ត៌មាន​ដែល​ថា នាវា​ជើង​ទឹក​នេះ​ជា ការ​សម្ងាត់” ​រួម​ទាំង​គម្រោង​​នានា​ដែល​បង្ហាញ ពី​​ការ​ធ្វើ​ដំណើរ​របស់​នាវា​នេះ​រយៈ​ពេល​​ច្រើន​ខែ​ជា​មុន។

លោក មីស៊ីវិក ក៏​បាន​​ធ្វើ​​​ជា​​មេធាវី​ម្នាក់​នៅ​ក្នុង​​កងទ័ព​ជើង​ទឹក​សម្រាប់​​​ផល​ប្រយោជ​ន៍​របស់ លោក​ហ្វ្រង់​ស៊ីស​ ​ផង​ដែរ​ ដោយ​ជំរុញ​​ឲ្យ​មាន​ការ​សម្រេច​​​​​អំពី​ការ​ចូល​សំចត​នៅ​កំពង់​ផែ​នេះ​ហើយ​បាន​ប្រើ​ប្រាស់​កិច្ច​ព្រម​ព្រៀង​នោះ​​ដែល​ធ្វើ​ឡើង​ ដើម្បី​​ផ្តល់​ផល​ប្រ​យោ​ជ​ន៍​ដល់​លោក ហ្វ្រង់​ស៊ីស ដោយ​បន្ថែម​ថា មេបញ្ជាការ​កង​ទ័ព​ជើង​ទឹក​លោក មីស៊ីវិក​ ជា​ឪពុក​​​មាន​​កូន​បួន​នាក់​​រូប​នេះ​ បាន​ទទួល​​សេវា​ស្រី​ពេស្យា​ពី លោក​ ហ្វ្រង់​ស៊ីស មក​វិញ​។

កាលពី​ជិត​​​បី​ឆ្នាំ​​មុន ​រឿង​រ៉ាវ​ផ្ទាល់​ខ្លួន​របស់​​​មេ​បញ្ជាការ​កង​ទ័ព​ជើង​ទឹក​ មីស៊ីវិក​​ ត្រូវ​បាន​ប្រព័ន្ធ​​​ផ្សព្វផ្សាយ​​ជាតិ​ និង​​ប្រព័ន្ធ​​ផ្សព្វផ្សាយ​​សហ​រដ្ឋ​អាមេរិក​ចុះផ្សាយ​យ៉ាង​ទូលំទូលាយ​ ដោយ​​លើក​តម្កើង​លោក​​ថា ជា​ជន​​គំរូ​ដ៏​ឥត​ខ្ចោះ​នៃ​ក្តី​ស្រមៃ​របស់​ពល​រដ្ឋ​អាមេរិក​។ កាលនៅ​ជា​ក្មេង​ប្រុស ​​ម្តាយ​មីង​របស់​មេ​បញ្ជាការ​កង​ទ័ព​​ជើង​ទឹក​ លោក មីស៊ីវិក​​​រូប​នេះ​បាន​រៀប​ចំ​ឲ្យ​ស្ត្រី​ជន​ជាតិ​អាមេរិក​ម្នាក់​យក​លោក​ទៅ​​ចិញ្ចឹម តាម​រយៈ​​​កង​ទ័ព​ជើង​ទឹក​សហ​រដ្ឋ​អាមេរិក​​ប្រចាំ​ក្រុង​​​ភ្នំពេញ​កាល​ពី​ឆ្នាំ​១៩៧៣​។

ឪពុក​​និង​ប្អូន​ស្រី​ម្នាក់​របស់​លោក​បាន​បាត់​ខ្លួន​អំឡុង​របប​ខ្មែរ​ក្រហម​ ប៉ុន្តែ មេ​បញ្ជាការ​ ​មីស៊ីវិក ទើប​តែ​បាន​ដឹង​ពី​ការ​ស្លាប់​របស់​ពួ​ក​គាត់​នៅ​ពេល​​លោក បាន​ជួប​ជុំ​គ្រួសារ​ជា​លើក​​ដំបូង​របស់​លោកនៅ​​​​ក្នុង​ឆ្នាំ​១៩៨៩​ប៉ុណ្ណោះ​។ មេបញ្ជាការ​កង​ទ័ព​ជើង​ទឹក​រូប​នេះ​ អាច​ប្រឈម​ទោស​ជាប់​ពន្ធនាគារ​រយៈពេល​ប្រាំ​ឆ្នាំ​ និង​ពិន័យ​ជា​ប្រាក់​រហូត​ដល់​២៥០.០០០​​​ដុល្លារ​ ប្រសិន​បើ​លោក​ត្រូវ​បាន​​រក​ឃើញ​ថា មាន​ពិរុទ្ធភាព​​​មែន​នោះ​៕

ប្រែសម្រួល​ដោយ​ ឃិន ណៃ​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស