27 C
Phnom Penh

បន្ទាប់ពី​មហាបាតុកម្ម​និង​ការ​ឆ្លើយ​តប​យ៉ាង​ចាស់​​ដៃ​​ លោក​ ហ៊ុន​ សែន​ ជំរុញ​ឲ្យ​រក្សា​សន្ដិភាព​

ដោយ ឌឹ ខេមបូឌា ដេលី

បទវិភាគ

បន្ទាប់ពី​មហាបាតុកម្ម​ និង​ការ​បង្ក្រាប​​យ៉ាង​ចាស់ដៃ​​របស់​នគរបាល​​កាល​ពីសប្ដាហ៍​មុន​ លោក​នាយក​រដ្ឋ​មន្ត្រី​ ហ៊ុន សែន បាន​​អំពាវនាវ​ឲ្យ​ប្រជា​ពលរដ្ឋ​កម្ពុជា​​លើក​​កម្ពស់​ស្មារតី​ថែរក្សា​សន្ដិភាព​​សម្រាប់​ការ​អភិវឌ្ឍ​សង្គម​​​ និង​សេដ្ឋកិច្ច​របស់​ប្រទេស​នេះ​។​ 

នៅ​ក្នុង​សារលិខិត​មួយ​ច្បាប់​ ដើម្បី​អប​អរ​​ទិវា​​​សន្ដិភាព​អន្តរជាតិ​ កាល​ពី​ថ្ងៃ​សៅរ៍​ លោក​​នាយក​រដ្ឋ​មន្ត្រី​ ហ៊ុន សែន ក៏​បាន​ក្រើន​រំឭក​ប្រជាពលរដ្ឋ​កម្ពុជា​ពី​​អ្វី​ដែល​គណ​បក្ស​​របស់​លោក​បាន​ធ្វើ​ដើម្បី​រំដោះ​ប្រទេស​កម្ពុជា​​ចេញ​​ពី​របប​ខ្មែរ​ក្រហម​​ ជា​ឃ្លា​ដដែល​ ហើយ​ដែល​លោក​តែង​តែ​លើក​ឡើង​នៅ​មុន​ការ​បោះ​ឆ្នោត​ជាតិ​​កាល​ពី​ខែ​កក្កដា​ ព្រម​​ទាំង​ការ​គំរាម​​​ថា ប្រវត្តិសាស្ត្រ​ខ្មៅ​ងងឹត​របស់​ប្រទេស​​កម្ពុជា ​​អាច​នឹង​វិល​ត្រឡប់​មក​វិញ​ ប្រសិន​បើ​គណបក្ស​សង្គ្រោះជាតិ​​​ជា​គណ​បក្ស​ប្រឆាំង​​ឈ្នះ​ឆ្នោត។

លោក​នាយក​រដ្ឋ​មន្ត្រី​ ហ៊ុន សែន​ បាន​សរសេរ​នៅ​ក្នុង​សារ​លិខិត​ដដែល​នេះ​ថា “រដ្ឋាភិបាល​កម្ពុជា​ប្ដេជ្ញា​ប្រឹង​ប្រែង​អស់​ពី​សមត្ថភាព​​ ដើម្បី​ពង្រឹង​វប្បធម៌​សន្ដិភាព​​សម្រាប់​​ប្រយោជន៍​ដល់​ការ​អភិវឌ្ឍ​និងវិបុល​​ភាព​​របស់​ប្រទេសកម្ពុជា​”។

លោក​បាន​បន្ត​ថា “ខ្ញុំ​សូម​អំពាវនាវ​ដល់​ជន​រួម​ជាតិ​ទាំង​អស់​​ឲ្យ​រក្សា​សន្ដិភាព​ សណ្ដាប់​ធ្នាប់​ ស្ថិរភាព​ និង​សន្ដិសុខសង្គម​​ ដើម្បី​​អភិ​វឌ្ឍ​ប្រទេស​​របស់​យើង​លើ​​គ្រប់​វិស័យ​”។ លោក​ ហ៊ុន សែន​ ក៏​បាន​អំពាវនាវ​ផង​ដែរ​​ឲ្យ​ជន​រួម​ជាតិ​របស់​លោក​ “ស្រលាញ់​រាប់​អាន​គ្នា​ជា​ភាតរៈ​​”។

សារលិខិត​របស់​លោក​នាយក​រដ្ឋ​មន្ត្រី​ ហ៊ុន សែន​ ធ្វើ​ឡើង​​ខណៈ​ពេល​សម័យ​ប្រជុំ​សភា​ដំបូង​​គ្រោង​នឹង​​ធ្វើ​នៅ​ថ្ងៃ​នេះ​ ដោយ​គ្មាន​គណបក្ស​សង្គ្រោះ​ជាតិ​ និង​ចំពេល​​មាន​ការ​បង្កើន​វត្ត​មាន​នគរបាល​​ដ៏​ច្រើន​នៅ​ក្នុង​រាជធានី​ភ្នំពេញ។

កាល​ពី​ថ្ងៃ​ទី​១៥ ខែ​កញ្ញា​ កម្មករ​សំណង់​អាយុ​២៩​ឆ្នាំ​ម្នាក់​​ឈ្មោះ​ ម៉ៅ សុខចាន់​ ​ត្រូវ​បាន​បាញ់​ស្លាប់​ អំឡុង​ការ​​ប៉ះទង្គិចគ្នា​​រវាង​នគរ​បាល​ប្រឆាំង​កុប​កម្ម​ និង​​អ្នក​ធ្វើ​ដំណើរ​ ដែល​មាន​កំហឹង​​ក្បែរ​ស្ពាន​ព្រះ​មុនីវង្ស​។ តំណាងរបស់​អង្គការ​សង្គម​ស៊ីវិល​បាន​អះអាង​​កាល​ពី​ម្សិលមិញ​ថា សារលិខិត​របស់​លោក​នាយក​រដ្ឋ​មន្ត្រី​ ហ៊ុន សែន​ ​មិន​ត្រូវ​​​នឹង​កាលៈទេសៈ​ទេ បើ​ទោះ​ជា​មិន​​ខុស​ទាំង​ស្រុង​ក៏​ដោយ​។

លោក​ ទឹម​ ម៉ាឡៃ​ ប្រធាន​បណ្ដាញ​យុវ​ជន​កម្ពុជា​​បាន​មានប្រសាសន៍​ថា ប្រសិន​បើ​លោក​នាយក​រដ្ឋ​មន្ត្រី​​ពិត​ជា​ចង់​លើក​ស្ទួយ​សន្ដិភាព​មែន​ លោក​គួរ​ធ្វើ​ការ​ងារ​ ដើម្បី​​ធ្វើ​ឲ្យ​ប្រាកដ​ថា គណបក្ស​សង្គ្រោះជាតិ​គឺ​ជា​ផ្នែក​មួយ​នៃ​ការ​ពិភាក្សា​ផ្នែក​នយោបាយ​នា​ពេល​អនាគត​។ លោក​បាន​មានប្រសាសន៍​ថា “ត្រូវ​តែ​មាន​​គណបក្ស​នយោបាយ​មួយ​ទៀត ​ប្រសិន​បើ​រដ្ឋាភិបាល​ថ្មី​​ចង់​ឲ្យ​មាន​តុល្យាភាព​អំណាច​”។

លោក​ អឿ ណារិទ្ធ​ ជា​អ្នក​សម្រប​សម្រួល​​នៅ​ក្រុម​យុវជន​ដើម្បី​សន្ដិភាព ​ជា​អង្គការ​សង្គម​ស៊ីវិល​បាន​មានប្រសាសន៍​ថា “តាម​ធម្មតា​អ្វី​ដែល​គាត់​ [លោក​នាយក​រដ្ឋ​មន្ត្រី​ ហ៊ុន សែន]​ មាន​ប្រសាសន៍​គឺ​ល្អ”។​ លោក​ ណារិទ្ធ បាន​មានប្រសាសន៍​ថា “ប៉ុន្តែ​ខ្ញុំ​សូម​សួរ​ថា តើ​គាត់​កំពុង​​ស្វែង​រក​សន្ដិភាព​សម្រាប់​ប្រទេសកម្ពុជា​​ទាំង​មូល​ ឬ​គ្រាន់​តែ​សម្រាប់​គណបក្ស​របស់​លោក​ និង​ក្រុម​គ្រួសារ​របស់​លោក​?​”។ លោក​បាន​មាន​ប្រសាសន៍​ថា “គាត់​បាន​ប្រើ​អាវុធ​ និង​កម្លាំង​ប្រដាប់​អាវុធ ​ដើម្បី​ធ្វើ​បាប​​​យើង​ទាំង​អស់​គ្នា​…។ គាត់​ត្រូវ​តែ​ផ្ដល់​យុត្តិធម៌​ដល់​ប្រជា​ពល​រដ្ឋ​ ប្រសិន​បើ​គាត់​ចង់​បាន​សន្ដិភាព​”៕

ប្រែសម្រួលដោយ អ៊ូច សូនី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស