27.5 C
Phnom Penh

សមាជិក​សភា​គណ​បក្ស​សង្គ្រោះ​ជាតិ​ធ្វើ​ពហិការ​កិច្ច​ប្រជុំ​រដ្ឋ​សភា

ដោយ ឌឹ ខេមបូឌា ដេលី

បទវិភាគ

កាលពី​ម្សិល​មិញ​ សមាជិក​សភា​បក្ស​សង្គ្រោះ​ជាតិ​បាន​ស្បថ​នៅ​មុខ​ប្រាសាទ​អង្គរ​វត្ត​ថា ខ្លួន​នឹង​ធ្វើ​​​​​​​ពហិការ​សម័យ​ប្រជុំបើករដ្ឋ​សភា​នៅ​ថ្ងៃ​នេះ ហើយ​​​​សន្យា​ថា “មិន​ក្បត់​​ឆន្ទៈ​​របស់​ប្រជា​ពលរដ្ឋ​ឡើយ”។

ដោយ​គណ​បក្ស​ប្រឆាំង​ស្ថិត​នៅ​ក្នុង​ខេត្ត​សៀម​រាប គណ​បក្ស​ប្រជា​ជន​កម្ពុជា​ ដែល​បាន​​ឈ្នះ​ជាផ្លូវ​ការ​នូវ​សំឡេង​ភាគ​ច្រើន​​​នៃ​​​​​​​អាសនៈ​រដ្ឋ​សភា​ទាំង​១២៣ បាន​និយាយ​​​ថា​​​ សមាជិក​សភា​៦៨​រូប​របស់​ខ្លួន​នឹង​ចូល​រួម​សម័យ​​​​ប្រជុំ​បើក​រដ្ឋ​សភា​នៅ​ព្រឹក​នេះ​ ព្រម​​​ទាំង​ចូល​រួម​ពិធី​ស្បថ​ចូល​កាន់​​​​តំណែង​ ដែល​គ្រោង​ធ្វើ​នៅរសៀល​ថៃ្ងនេះ នៅ​ព្រះបរម​រាជ​វាំង​។

លោក​នាយក​រដ្ឋ​មន្ត្រី​ ហ៊ុន សែន និង​ លោក ​​​សម រង្ស៊ី មេ​ដឹក​នាំគណ​បក្ស​ប្រឆាំង​ បាន​ចរចា​គ្នា​រយៈ​ពេល​ពីរ​ថ្ងៃ​ កាលពី​ដើម​សប្តាហ៍​​​​មុន​ នៅ​ក្នុង​កិច្ច​ខិត​ខំ​ប្រឹង​ប្រែង​ជា​លើក​ចុង​ក្រោយ​ ដើម្បី​បំបែក​ភាព​ទាល់​ច្រក​ក្នុង​​ការ​បោះ​ឆ្នោត​ កាល​ពី​ថ្ងៃ​ទី​២៨ ខែ​កក្កដា ដែល​​បក្សទាំង​ពីរ​អះ​អាង​ថា បាន​ឈ្នះ​រៀងៗ​ខ្លួន​។

ប៉ុន្តែ ដោយ​ការ​ចរ​ចា​ទាំង​នោះ​បាន​ជាប់​គាំង​ដោយ​សារ​ការ​ទាម​ទារ​របស់​គណបក្ស​ប្រឆាំង​ឲ្យ​មាន​ការ​ស៊ើប​អង្កេត​ដោយ​ឯក​រាជ្យ​លើ​ភាព​មិន​ប្រក្រតី ដែលកើត​មាន​នៅ​ថ្ងៃ​បោះ​ឆ្នោត​នោះ គណ​បក្ស​សង្គ្រោះជាតិ​បាន​នាំ​សមាជិក​សភាព​ជាប់​ឆ្នោត​ទាំង​៥៥​រូប​របស់​ខ្លួន និងសមា​ជិក​សភា​ប្រាំបី​នាក់​ទៀត ដែល​ខ្លួន​អះ​អាង​ថា គួរ​តែ​បាន​ជាប់​ឆ្នោត​ដែរ​​​​នោះ ទៅ​ក្រុង​សៀម​រាប​កាល​ពី​ចុង​សប្តាហ៍​នេះ​ ហើយ​មាន​គម្រោង​ឲ្យ​ពួក​គេ​ស្នាក់​​​​នៅ​ទីនោះ​រហូត​ដល់​ថ្ងៃ​អង្គារ។

លោក សម រង្ស៊ី បាន​ថ្លែង​កាលពី​ម្សិល​​​មិញ​ថា “ការ​ដែល​យើង​មក​ក្រុង​សៀម​រាប​រួម​​គ្នា​នេះ មានន័យ​ថា យើង​នឹង​មិន​ចូល​រួម​សម័យ​​​​ប្រជុំបើក​រដ្ឋ​សភា​ទេ​។ វត្ត​មាន​របស់​យើង​នៅ​​​ទី​​​នេះ​បង្ហាញ​យ៉ាង​ច្បាស់​ហើយ​”។ លោក​បានមាន​ប្រសាសន៍​អំពី​ការដែល​សមា​ជិក​សភា​ទាំង​នេះ​បាន​សន្យា​នៅ​ចំពោះ​មុខ​​ប្រាសាទ​​​​​​ពិភព​លោក​ដ៏​ល្បី​ឈ្មោះ​នេះ​ថា “យើង​ប្តេជ្ញា​ស្មោះ​ត្រង់​ចំពោះ​ប្រជា​ពល​រដ្ឋ មិន​ក្បត់​ឆន្ទៈ​របស់​ប្រជាពល​រដ្ឋ​ ត្រៀម​ខ្លួន​លះ​បង់​ជីវិត​ដើម្បី​ការ​ពារ​ផល​ប្រយោជ​ន៍​ប្រទេស​ជាតិ​ និង​ប្រយុទ្ធ​ប្រឆាំង​ចំពោះ​​ភាព​អយុត្តិ​ធម៌”។

លោក ប្រាក់ សុខុន មក​ពី​គណ​បក្ស​ប្រជា​ជន​កម្ពុជា​ ជា​រដ្ឋ​លេខា​ធិការទី​ស្តី​ការ​គណៈ​រដ្ឋ​មន្ត្រី​បានថ្លែងថាគណបក្ស​របស់​លោក​​ប្តេជ្ញា​បើក​សម័យ​​​​ប្រជុំ​រដ្ឋ​សភា​នៅ​ថ្ងៃ​នេះ ព្រម​ទាំង​បង្កើត​រដ្ឋា​ភិបាលថ្មី​ជា​ផ្លូវ​ការ ដោយ​ការ​តែង​តាំង​រដ្ឋ​មន្ត្រី និង​​​​តួនាទី​ជាន់​ខ្ពស់​ផ្សេង​ៗ​ទៀត​ បន្ទាប់​ពី​ថ្ងៃ​នោះ​។

លោក​បាន​មាន​ប្រសាសន៍​អំពី​គម្រោង​នៅ​ថ្ងៃ​នេះថា “បន្ទាប់​ពី​កិច្ច​ប្រជុំ​នេះ យើង​នឹង​ទៅ​ព្រះ​បរម​រាជ​វាំង​។ យើង​នឹង​ស្បថ​ចូល​កាន់​តំណែង​នៅ​ថ្ងៃ​នេះ ហើយ​យើង​នឹង​រៀប​ចំ​រចនា​សម្ព័ន្ធ​រដ្ឋ​សភា​ និង​ថ្នាក់​ដឹក​នាំ​រដ្ឋា​ភិបាល​នៅថ្ងៃ​បន្ទាប់”។

អ្នក​វិភាគ​ និង​មេធាវី​មិ​ន​យល់​ស្រប​ថា រដ្ឋ​​​​ធម្ម​នុញ្ញ​អនុញ្ញាត​ឲ្យ​គណបក្ស​ប្រជា​ជន​កម្ពុជា​ធ្វើ​កិច្ច​ការ​ទាំង​អស់​នេះ​​ ដោយ​គ្មាន​គណ​បក្ស​ប្រឆាំង​ចូល​រួម​នោះ​ទេ​។ គណបក្ស​ប្រឆាំង​បញ្ជាក់​ថា គណបក្ស​ប្រជា​ជន​កម្ពុជា មិនអាច​បង្កើត​រដ្ឋា​ភិបាល​តែ​ម្នាក់​ឯង​បាន​ទេ​។ ប៉ុន្តែ លោក ប្រាក់ សុខុន បាន​មាន​ប្រសា​សន៍​ថា គណ​បក្ស​ប្រជា​ជន​កម្ពុជា​អាច​ធ្វើ​បាន​ ហើយ​នឹង​ធ្វើ​ទៀត​ផង​។ លោក​បាន​មាន​ប្រសាសន៍​ថា “រដ្ឋ​ធម្ម​នុញ្ញ​​​​មិន​រារាំង​យើងទេ​។​ រដ្ឋ​ធម្ម​នុញ្ញ​បើក​ផ្លូវ​ឲ្យ​យើង​”។

ទោះ​បី​ជា​លោក ហ៊ុន សែន គំរាម​បែង​ចែក​អាសនៈ​របស់​គណ​បក្ស​ប្រឆាំង​ទៅ​ឲ្យ​គណបក្ស​ប្រជា​ជន​​ ប្រសិន​បើ​គណ​​​បក្ស​ប្រឆាំង​​​​នៅ​តែ​ធ្វើ​ពហិការ​​នោះ លោក​ ប្រាក់ សុខុន និង​មន្ត្រី​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោត​បាន​បដិសេធ​​ចាប់​តាំង​ពី​ពេល​នោះ​ថា មិន​អាច​​មាន​រឿង​​បែប​នេះ​ទេ​។

ចំណែក​ឯ​លោក សម រង្ស៊ី មេ​ដឹក​នាំ​​គណ​​​បក្ស​ប្រឆាំងជា​យូរ​មក​ហើយ​នោះ ធ្លាប់​ធ្វើ​ពហិការ​​​​មិន​ចូល​រួម​ការ​បើក​សម័យ​ប្រជុំ​សភា​លើក​ដំបូង​ ដោយ​សារ​លទ្ធ​ផល​បោះ​ឆ្នោត​មិន​ត្រឹម​​​​ត្រូវ​ ប៉ុន្តែ​បាន​ប្តូរ​ចិត្ត​វិញនៅ​នាទី​ចុង​ក្រោយ​។ បន្ទាប់​ពី​ចាញ់​គណ​បក្ស​ប្រជា​ជន​កម្ពុជា​នៅ​​​​ក្នុង​ការ​បោះ​ឆ្នោត​ដែល​មាន​​បញ្ហា​ស្រដៀង​គ្នា​​នេះ​កាល​ពី​ឆ្នាំ​២០០៨ លោក សម រង្ស៊ី បាន​បញ្ជាក់​ថា គណបក្ស​ដែល​ដាក់​ឈ្មោះ​តាម​ឈ្មោះ​របស់​លោក​នៅ​ពេល​នោះ​មិន​ទទួល​យក​អាសនៈ​របស់​ខ្លួន​ទេ។ ប៉ុន្តែ បន្ទាប់​ពី​ការ​ចរ​ចា​ជាមួយ​គណបក្ស​ប្រជា​ជន​កម្ពុជា ដែល​បាន​ធ្វើ​ឡើង​តែ​ប៉ុន្មាន​ម៉ោង​ប៉ុណ្ណោះ នៅ​ថ្ងៃ​បើក​រដ្ឋ​សភា​នោះ គណបក្ស​ប្រឆាំង​​​​​បាន​ផ្លាស់​ប្តូរ​ឥរិយាបថ​ជា​ថ្នូរ​នឹង​ការ​សន្យា​ពី​គណ​បក្ស​ប្រ​ជា​ជន​កម្ពុជា​ ដើម្បី​កែ​ទម្រង់​វិធាន​ផ្ទៃ​ក្នុង​​​រដ្ឋ​សភា​មួយ​ចំនួន។ ប៉ុន្តែ ការ​សន្យា​នោះមិន​ដែល​យក​មក​​​​អនុ​វត្ត​ទេ​។

ដោយ​សមាជិក​សភា​របស់​ខ្លួន​ទាំង​អស់​ស្ថិត​នៅ​ក្នុង​ក្រុង​សៀមរាប លោក សម រង្ស៊ី បាន​បញ្ជាក់​កាល​ពី​ម្សិល​មិញ​ថា រឿង​នេះ​នឹង​មិន​អាច​កើត​ឡើង​ម្តង​ទៀត​បាន​ទេ ហើយ​បាន​មាន​ប្រសា​​​សន៍​ថា រដ្ឋា​ភិបាល​ណា​មួយ​ដែល​កើត​ចេញ​ពី​សម័យ​ប្រជំុ​បើក​រដ្ឋ​សភា​នៅ​ថ្ងៃ​នេះ នឹង​មិន​ស្រប​ច្បាប់​ឡើយ។

លោក សម រង្ស៊ី បាន​មាន​ប្រសាសន៍​ថា “យើង​នឹង​បន្ត​ធ្វើ​ពហិការ​​រដ្ឋ​សភា​ និង​ធ្វើ​ឲ្យ​​រដ្ឋា​ភិបាល​ និង​រដ្ឋ​សភា​របស់​គណបក្ស​ប្រជា​ជន​កម្ពុជា​​មិន​ស្រប​ច្បាប់​ ពី​ព្រោះ​ការ​ធ្វើ​បែប​នេះផ្ទុយ​ទាំង​ស្រុង​​​​​ពី​រដ្ឋ​ធម្ម​នុញ្ញ​ដែល​តម្រូវ​ឲ្យ​មាន​ពហុ​បក្ស​”។ លោក សម រង្ស៊ី បាន​មាន​ប្រសាសន៍ថា គណ​បក្ស​លោក​មិន​ទាន់​សម្រេច​ថា តើ​នឹង​បន្ត​ធ្វើ​មហា​បាតុកម្ម​ដែល​បាន​ធ្វើ​ឲ្យ​អ្នក​គាំទ្រ​គណ​បក្ស​ប្រឆាំង​រាប់​ម៉ឺន​នាក់​ ចូ​លមក​ទីលាន​ប្រជា​ធិប​តេយ្យ​នៅ​ក្នុង​រាជ​ធានី​ភ្នំ​ពេញ​ អស់​រយៈ​ពេល​បី​ថ្ងៃ​ជាប់ៗ​គ្នា​កាល​ពី​សប្តាហ៍​មុន​ឬយ៉ាង​ណា​ទេ នៅ​ពេល​ដែល​សមា​ជិក​សភា​ត្រឡប់​មក​ពី​សៀម​រាប​វិញ​ នៅ​ថ្ងៃ​អង្គារ។

ទោះ​ជា​យ៉ាង​ណា​ លោក សម រង្ស៊ី បាន​មាន​ប្រសាសន៍ថា​ គណ​បក្ស​សង្គ្រោះ​ជាតិ នឹង​ធ្វើ​ញត្តិ​មួយ​ប្រឆាំង​លទ្ធ​ផលបោះ​ឆ្នោត​នេះ ដែល​ញ្ញតិ្ត​នោះ​​មាន​បំណង​យក​ស្នាម​មេដៃពី​ប្រជា​ពល​រដ្ឋ​ប្រហែល​៣,២​លាន​នាក់ ដែល​បាន​បោះ​ឆ្នោត​ជា​​​ផ្លូវ​ការឲ្យ​គណ​​​បក្ស​សង្គ្រោះ​ជាតិ​។ លោក​មាន​ប្រសាសន៍ថា “យើង​នឹង​ប្រមូល​​​​ស្នាមមេដៃ​ពី​ប្រជា​ពល​រដ្ឋ​៣,៣​លាន​នាក់​ពី​ទូទាំង​​​​ប្រទេស​ ដើម្បី​បង្ហាញ​ថា ប្រជា​ពល​រដ្ឋ​ភាគ​ច្រើន ច្រាន​ចោល​លទ្ធ​ផល​បោះ​ឆ្នោត​នេះ។ ការ​ធ្វើ​ញ្ញត្តិ​​​​នេះ​គឺ​ជា​វិធី​មួយ​ទៀត​​ក្នុងការ​ធ្វើ​ឲ្យ​រដ្ឋា​ភិបាល​របស់​គណ​បក្ស​ប្រជា​ជន​កម្ពុជា​មិន​ស្រប​ច្បាប់​”។

លោក សម រង្ស៊ី បាន​មាន​ប្រសាសន៍ថា លោក​ក៏​នៅ​តែ​មាន​សង្ឃឹម​ថា ព្រះ​មហា​ក្សត្រ​ ​​​នរោត្តម សីហមុនី នឹង​ប្តូរ​ព្រះ​ទ័យ​របស់​ព្រះ​អង្គ​ ហើយ​យល់​​​​ព្រម​ពន្យារ​ពេល​ការ​បើក​សម័យ​ប្រជុំ​សភា​នេះ រហូត​ដល់​គណ​បក្ស​ទាំង​ពីរ​ដោះ​ស្រាយ​ការ​ខ្វែង​គំនិត​របស់​ខ្លួន​នៅ​លើ​តុចរចារួច​ហើយ​សិន។ ប៉ុន្តែ សមាជិក​រាជ​វង្សានុវង្ស និង​ទី​​ប្រឹក្សា​ស្និទ្ធ​នឹង​ស្ថា​ប័ន​ព្រះ​មហាក្សត្រ​បាន​និយាយ​ថា ព្រះ​មហា​​​ក្សត្រ​នឹង​​បើក​សម័យ​ប្រជុំ​សភា​​​នៅ​ថ្ងៃ​នេះដូច​ការ​គ្រោង​ទុក​៕

ប្រែសម្រួល​ដោយ មូល គឹមហឿន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស