27 C
Phnom Penh

កុបកម្ម​នៅ​រោង​ចក្រ​កាត់​ដេរ អេស​ អិល ធ្វើ​ឲ្យ​មនុស្ស​​ចំ​នួន​១១នាក់​រង​របួស​ 

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កា​លពីម្សិល​មិញ​ថា កម្មករ​រោងចក្រ​កាត់​ដេរ​ចំនួន​ប្រាំបួន​នាក់​ និង​អ្នក​គ្រប់​គ្រង​​ជន​ជាតិ​ចិន​ចំនួន​ពីរនាក់​បាន​រង​របួស​កាល​ពីថ្ងៃ​សុក្រ​ នៅ​ក្នុង​ខណ្ឌ​មាន​ជ័យ​ រាជ​ធានីភ្នំពេញ បន្ទាប់​ពី​កុបកម្មមួយ​បាន​ផ្ទុះឡើង​ក្នុង​ចំណោម​កម្មករ​ចំនួន​៣០០នាក់​ ដែល​តវ៉ា​សុំ​​​ដំឡើងប្រាក់​ខែ​ខ្ពស់​ជាង​នេះ​ និង​ធ្វើ​ឲ្យ​ស្ថាន​ភាព​ការ​ងារ​ប្រសើ​រ​ឡើង​។

លោក​ ម៉ៅ​ សុវណ្ណ នាយនគរបាល​សង្កាត់​បាន​មាន​ប្រសាសន៍ថា កម្មករ​នៅ​រោង​ចក្រ​កាត់​ដេរ​ អេស អិល​ (SL Garment Factory)  ក្នុង​សង្កាត់​ស្ទឹង​មាន​ជ័យ​បាន​ទម្លាយ​​ចូល​ក្នុង​បរិវេណ​រោង​ចក្រ​នៅ​ពេល​រសៀល​ និង​បាន​កម្ទេចរថយន្ត​ជាង​៣០គ្រឿង​ ព្រម​ទាំង​កុំ​ព្យូទ័រ និង​គ្រឿង​ម៉ាស៊ីន​ផ្សេង​ទៀត​នៅ​ក្នុង​រោង​ចក្រ​នេះ​​​។

លោក  ម៉ៅ  សុវណ្ណ​ បាន​មាន​ប្រសាសន៍ថា “ពួក​គេ​ក៏​បាន​ប៉ះ​ទង្គិច​ជាមួយ​និយោជិត​​​​ផ្សេង​ទៀត​នៅ​ក្នុង​រោង​ចក្រ​នេះ​ដែរ​។ អំពើ​ហិង្សា​បាន​កើត​​​​ឡើ​ង ពីព្រោះមេដឹកនាំ​សហ​ជីព​បានញុះ​ញង់​​ឲ្យ​កម្មករ​វាយ​ទៅ​លើ​កម្មករ​ផ្សេង​ទៀត ហើយ​​នេះ​បាន​បំផ្លាញ​ទ្រព្យ​សម្បត្តិ​​របស់​រោង​ចក្រ”។

កម្មករ​មក​ពី​រោង​ចក្រកាត់​ដេរ​ អេស​ អិល​ ដែល​ជា​របស់​ជន​ជាតិ​សិង្ហ​បុរី​ ដែល​ផលិត​សម្លៀក​បំពាក់​ម៉ាក​ Levis’s and Gap របស់​អាមេរិក​ បាន​និង​កំពុង​តែធ្វើ​កូដកម្ម​រយៈ​ពេល​ជាង​មួយ​ខែមក​ហើយ​ ដើម្បីទាម​ទារ​ប្រាក់​បន្ថែម​សម្រាប់​អាហារ​ថ្ងៃ​ត្រង់​ ហៅ​មេដឹកនាំ​សហ​ជីព​ដែល​ត្រូវ​បាន​បណ្តេញ​ចេញ​មក​ធ្វើ​ការ​ងារ​វិញ និង​បណ្តេញ​ទីប្រឹក្សា​ក្រុម​ហ៊ុន​ម្នាក់​ចេញ​ ឈ្មោះ មាស សុថា ដែល​តាម​ចោទ​ថា បាន​​​​នាំ​មន្ត្រី​យោធា​ស្លៀក​ពាក់​ស៊ីវិល​ទៅ​យាម​​ការ​ពារ​រោង​ចក្រ​នេះ​។
កាល​ពីដើម​ខែ​នេះ​ ម្ចាស់​រោង​ចក្រ​បាន​យល់​ព្រម​ចំពោះ​សម្បទាន​ខ្លះ​ក្នុង​ចំណោម​សម្បទាន​របស់​កម្ម​ករ​​តាម​​​​លក្ខខណ្ឌថា ​ឲ្យ​បុគ្គ​​​លិក​ត្រឡប់​មក​ធ្វើ​ការ​វិញ​។

លោក​  សុថា  បាន​មាន​ប្រសាសន៍​កាល​ពី​ម្សិល​មិញថា ក្នុង​នាម​លោក​ជា​កូន​ហ៊ុន​ម្នាក់​នៅ​ក្នុង​រោង​ចក្រ​នេះ លោក​នឹង​មិន​ចុះ​ចេញ​ឡើយ​។ ក្រុម​ហ៊ុននឹង​ធ្វើ​ពាក្យ​បណ្តឹង​ប្តឹង​មេដឹកនាំ​សហជីពខ្លះ​។ លោក​ សុថា បាន​បន្តថា “អំឡុង​ការ​ប៉ះ​ទង្គិច​គ្នា​នោះ មនុស្ស​ចំនួន​១១នាក់​បាន​រង​របួស​​រួម​ទាំង​ជន​ជាតិ​ចិន​ពីរ​នាក់​ផង ​ដែល​ត្រូវ​បាន​បញ្ជូន​ទៅមន្ទីរ​ពេទ្យ​មួយ​ក្នុង​ប្រទេស​សិង្ហ​បុរី​ [កាល​ពីថ្ងៃ​សៅរ៍] ពីព្រោះ​ពួក​គេ​ស្ថិត​ ក្នុង​ស្ថាន​ភាព​ធ្ងន់​ធ្ងរ​។ យើង​នឹង​បញ្ជូន​ [ របាយ​ការណ៍​​ស្តី​ពី​ទ្រព្យ​សម្បត្តិ​ដែ​លខូច​ខាត​ទាំង​អស់​]  ជាមួយ​នឹង​ពាក្យ​បណ្តឹង​មួយ​ទៅ​តុលាការ​ឆាប់​ៗ​នេះ​ ដើម្បី​ឲ្យ​តុលាការ​ចាត់​ការ​ទៅ​តាម​ច្បាប់​”។

លោក​ ឡាយ សុផុន កម្មករ​រោង​ចក្រ​អាយុ​៣២​ឆ្នាំ​ដែល​មាន​វត្ត​មាន​នៅ​កន្លែង​កើត​ហេតុ​នោះ​មាន​ប្រសាសន៍ថា អំពើ​ហិង្សា​បាន​កើត​ឡើង​ បន្ទាប់​ពីកម្មករ​​​ដែល​​​​បន្ត​សកម្ម​ភាពកូដ​កម្ម​ បាន​ចាប់​ផ្តើម​​វាយ​តប់​គ្នា​ជាមួយ​នឹង​កម្ម​ករ​ដែល​វិល​ត្រឡប់​មក​កាន់​ការងារ​របស់​ខ្លួន​វិញ​។ លោកបន្ត​ថា “យើង​ត្រូវ​ការ​ដំណោះ​​​ស្រាយ​​​​មួយ​ពីក្រុម​ហ៊ុន​។ ពួក​គេ​បាន​សន្យា​ប្រាប់​​​​យើង​ថា នឹង​រក​ដំណោះស្រាយ​ ក៏​  ប៉ុន្តែ មក​ទល់​​​​ពេល​នេះ​ពួ​កគេ​មិន​បាន​ដោះ​ស្រាយ​ទេ”។

លោក អាត់​ ធន់ ប្រធាន​​​សម័្ពន្ធ​សហ​ជីព​​​​ប្រជា​​​ធិបតេយ្យ​​​កម្មករ​កាត់​ដេរ​កម្ពុជា បាន​បដិសេធ​ថា មិន​​បាន​​ញុះ​ញង់​ឲ្យ​កម្មករ​ប្រើ​អំពើ​ហិង្សា​ទេ​។ លោក​ថ្លែង​​​ថា “ យើង​គ្រាន់​​​​តែ​ជួយ​​​កម្មករ​ បន្ទាប់​ពី​ពួក​គេ​បាន​ស្នើ​សុំ​​​​ជំនួយ​ ដូច្នេះ​អំពើ​ហិង្សា​មិន​ពាក់​ព័ន្ធ​ជាមួយ​ខ្ញុំ​ទេ​ ពីព្រោះ​ពួក​គេ​ប្រព្រឹត្ត​ដោយ​ខ្លួន​ឯង”​​​៕

ប្រែសម្រួលដោ​យ ​ចេវ ប៊ុននី​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស