30 C
Phnom Penh

ក្រសួង​មហាផ្ទៃចេញ​សេចក្តីប្រកាសទាក់ទងនឹងករណីប៉ះ​ទង្គិច​គ្នា​នៅក្បែរ​ស្ពាន​ព្រះ​មុនីវង្ស

ដោយ ឌឹ ខេមបូឌា ដេលី

បទវិភាគ

លោក​ ស ខេង រដ្ឋមន្ត្រី​ក្រសួងម​ហា​ផ្ទៃ​​​​បាន​រិះគន់​​ខ្លាំង​ៗដល់​គណបក្ស​សង្គ្រោះ​ជាតិដោយ សារតែគណបក្សនេះ បាន​ធ្វើ​បាតុកម្ម​របស់​ខ្លួន​នៅ​ទីលាន​ប្រជាធិបតេយ្យ​​ក្នុង​រាជ​​ធានី​ភ្នំពេញ​កាល​ពី​សប្តាហ៍​មុន​រយៈពេល​យូរ​ជាង​រយៈពេល​កំណត់ និង​បាន​ស្តី​បន្ទោ​ស​គណបក្ស​នេះ​លើករណីអំពើ​ហិង្សា​ ដែល​បានកើតឡើងនៅ​ក្បែរ​ស្ពាន​ព្រះ​មុនីវង្ស និង​ បណ្តាលឲ្យ​​មនុស្ស​ស្លាប់​ ​។

កម្មករ​សំណង់​អាយុ​២៩​ឆ្នាំ​ម្នាក់​ត្រូវ​បាន​បាញ់​ស្លាប់​ ខណៈ​ដែល​កំពុង​អង្គុយ​នៅ​លើ​ម៉ូតូ​របស់​ខ្លួន​ នៅក្បែរ​កន្លែង​ប៉ះ​ទង្គិច​គ្នា​រវាង​កង​កម្លាំង​សន្តិសុខ​ និង​​ក្រុម​អ្នក​តវ៉ា​នៅ​ក្នុង​តំបន់​ជុំវិញ​ស្ពានព្រះមុនីវង្ស​។

លោក​ ស ខេង បានលើកឡើងក្នុង​សេចក្តី​​​​ប្រកាស​ចេញ​កាល​ពីម្សិលមិញ​ថា “គណ​​​បក្ស​សង្គ្រោះ​ជាតិ​បាន​រំលោភ​ច្បាប់​ស្តីពីការ​ធ្វើ​បាតុកម្ម​ដោយ​សន្តិវិធី​ និង​កិច្ច​ព្រម​ព្រៀង​​ជាមួយ​សាលា​រាជធានី​ ដោយ​បាន​ធ្វើ​ការ​តវ៉ា​រយៈពេល​បីថ្ងៃ​បីយប់​ និង​បាន​ដើរ​ក្បួន​នៅ​ទី​កន្លែង​ផ្សេង​ៗ​គ្នា​​ ដែលស្ថិតខាង​ក្រៅ​ទីលាន​ប្រជាធិបតេយ្យ​ ហើយបង្ក​ផល​ប៉ះពាល់​ខ្លាំង​​​ដល់​សណ្តាប់​ធ្នាប់​ និង​សន្តិសុខ​សាធារណៈ ​ក្នុ​ង​​​​រាជធានី​ភ្នំពេ​ញ​ រហូត​ឈាន​ដល់​មាន​សកម្ម​​​​ភាព​បំផ្លិច​បំផ្លាញ​បាន​កើត​ឡើង​ ពោល​​​គឺ​​​មាន​​​ការ​បំផ្លាញ​ទ្រព្យ​សម្បត្តិ​រដ្ឋ​ និង​ទ្រព្យ​សម្បត្តិ​ឯកជន​ និងការ​ប្រឆាំ​ងកង​កម្លាំង​នគរបាល​ដែល​កំពុង​បំពេញ​ភារកិច្ច​”។

លោក ស ខេង បាន​ស្តី​បន្ទោស ​“មនុស្ស​​ដែល​មាន​គំនិត​អាក្រក់​មួយ​ចំនួន​តូច​” រឿង​ប៉ះ​ទង្គិច​គ្នា​ ដែល​ធ្វើ​ឲ្យ​កម្ម​ករ​សំណង់​ត្រូវ​បាន​​​​បាត់​​​បង់​​​ជីវិត​​​​​​​ និង​អ្នក​ផ្សេង​ទៀត​រង​របួស​ធ្ងន់​ ដោយ​បាន​ថ្លែងបន្ត​ថា អាជ្ញាធរ​គួរ​តែ​ធ្វើ​ការ​ផ្សព្វផ្សាយខ្លឹមសារ​នៅ​ក្នុង​សេចក្តី​ប្រកាស​​​​​នេះជា​ទូទៅ​ ដើម្បីបង្ការព័ត៌មា​ន​មិនពិត​ដែល​​អាចកើត​មាន​។

លោក​ ឡុង​ ឌីម៉ង់ អ្នក​នាំពាក្យ​សាលា​រាជ​ធានីភ្នំពេញ​ បាន​បញ្ជាក់ថា សាលា​រាជធានី​ភ្នំ​ពេញ​បាន​ទទួល​លិខិត​នេះ​ហើយ​ ហើយ​នឹង​អនុវត្ត​តាម​សំណើរបស់​លោក ស ខេង ដើម្បីផ្សព្វផ្សាយ​សេចក្តី​ប្រកាស​នេះ​។ លោក​បាន​ថ្លែង​​​ថា “ជានិច្ច​កាល ​យើង​តែង​តែ​ធ្វើ​ការ​យ៉ាង​ជិត​ស្និទ្ធ​ជា​មួយ​ក្រសួង​ ហើយ​យើង​មិន​ស្ទាក់​ស្ទើរ​នៅ​​​ក្នុង​ការ​អនុវត្ត​បទ​បញ្ជា​​ដែល​យើង​បាន​ទទួល​នា​ពេល​នេះ​ទេ”។ ​​​​លោក​បន្ថែម​ថា វិធាន​ការ​សន្តិសុខ​​ត្រូវ​បានដាក់​​រួច​ហើយ​​សម្រាប់​ការ​​​បើក​​​សម័យ​​​​ប្រជុំ​ដំបូងនៃរដ្ឋ​សភា​​នៅ​ព្រឹក​​​នេះ​។

លោក​ អ៊ុច​ សំអុន អភិបាល​ខេត្ត​កំពង់​ធំ​បាន​មាន​ប្រសាសន៍ថា លោក​ក៏បាន​ទទួល​លិខិត​​​​នេះ​ផងដែរ​ ហើយ​នឹង​អនុវត្ត​តាម​​ការ​ណែនាំ​​​​ក្នុង​លិខិត​នេះ​។  លោក​បាន​មាន​ប្រសាសន៍​​​ថា “យើង​បាន​ផ្សព្វផ្សាយ​លិខិត​នេះ​ទៅ​អាជ្ញាធរ​មូល​ដ្ឋាន​ និ​ងទៅ​ប្រជាពល​រដ្ឋ​ដើម្បី​ឲ្យ​ពួក​គាត់​ដឹង​ពី​បញ្ហា​នេះ​”។ ​លោក​បាន​​​បន្ថែម​​​​ថា ទោះ​ជាយ៉ាង​ណា លោក​​នឹង​មិនទប់​ស្កាត់​នរណាម្នាក់​មិន​ឲ្យ​មក​កាន់​រាជធានី​ភ្នំពេញ​​ដើម្បី​ចូល​រួម​បាតុកម្ម​របស់​គណបក្ស​ប្រឆាំង ក្នុង​ពេល​អនាគត​នោះ​ទេ​។ លោក​បាន​ថ្លែងថា “យើង​នឹងមិន​រារាំង​ប្រជា​ពល​រដ្ឋ​មិន​ឲ្យ​មក​ចូល​រួម​បាតុកម្ម​ទេ​ ប៉ុន្តែ យើង​ចង់​ឲ្យ​ពួកគាត់​ដឹង​អំពី​ថា តើ​ត្រូវ​ដោះ​ស្រាយ​​បញ្ហា​ដែល​ពួក​គេ​នឹង​ប្រឈម​យ៉ាង​ណា​ [ប្រសិន​បើការ​ប៉ះ​ទង្គិច​គ្នា​ផ្ទុះ​ឡើង​​] នោះ​”។

លោក​ យឹម​ សុវណ្ណ​ អ្នក​នាំពាក្យ​គណបក្ស​សង្គ្រោះ​ជាតិ​បាន​បដិសេធ​ថា អ្នក​គាំទ្រ​គណ​បក្ស​នេះមិន​បាន​បំផ្លាញ​ទ្រព្យ​សម្បត្តិ​ណា​មួយ​ទេ​។ លោក​បាន​ថ្លែង​ថា “វា​មិន​ពិត​ទេ​ពីព្រោះ​យើង​បាន​ធ្វើ​បាតុកម្ម​ដោយ​សន្តិ​វិធី​។ យើង​មិន​បាន​បំផ្លាញ​​ទ្រព្យ​សម្បត្តិ​ណា​មួយ​ឡើយ​​”៕

ប្រែសម្រួលដោយ ចេវ ប៊ុននី

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស