កាលពីម្សិលមិញ តំណាងរបស់អង្គការសង្គមស៊ីវិលចំនួន១០បានប្រមូលផ្ដុំគ្នានៅក្បែរព្រះបរមរាជវាំងក្នុងរាជធានីភ្នំពេញ ដើម្បីដាក់ញត្តិថ្វាយព្រះមហាក្សត្រនរោត្តម សីហមុនី ស្នើឲ្យព្រះអង្គកុំយាងធ្វើជាព្រះរាជធិបតីភាពនៅក្នុងសម័យប្រជុំសភាដំបូងនៅថ្ងៃនេះ។ ហើយសំណៅនៃញត្តិស្រដៀងគ្នានេះដែរដែលមានស្នាមមេដៃជាង២៦០.០០០ត្រូវបានថ្វាយព្រះមហាក្សត្រកាលពីថ្ងៃសៅរ៍។
លោក ស៊ីង ពៅ អាយុ៥៤ឆ្នាំជាអ្នកគាំទ្រម្នាក់ក្នុងចំណោមអ្នកគាំទ្រគណបក្សសង្គ្រោះជាតិប្រហែល៤០នាក់បានប្រមូលផ្ដុំគ្នាក្បែរសារមន្ទីរជាតិកាលពីថ្ងៃសៅរ៍ ដើម្បីតាមមើលការដាក់ញត្តិថ្វាយព្រះមហាក្សត្រនៅព្រះបរមរាជវាំងបាននិយាយថា “ប្រសិនបើព្រះមហាក្សត្រធ្វើព្រះរាជធិបតីសម័យប្រជុំសភាដំបូងនៅថ្ងៃទី២៣ ខែកញ្ញាមែន នោះនឹងផ្ទុយពីឆន្ទៈរបស់ប្រជាពលរដ្ឋ” ។ លោក ស៊ីង ពៅ បាននិយាយថា “ខ្ញុំសង្ឃឹមយ៉ាងមុតមាំថា ព្រះមហាក្សត្រនឹងព្រះតម្រិះលើខ្លឹមសាររបស់ញត្តិនេះ”។
ព្រះមហាក្សត្រនរោត្តម សីហមុនី បានបញ្ជាក់ពីរលើករួចមកហើយថា ច្បាប់តម្រូវឲ្យព្រះអង្គយាងចូលរួមសម័យប្រជុំសភាដំបូង ហើយបានទទូចឲ្យគណបក្សសង្គ្រោះជាតិ ដែលគំរាមធ្វើពហិការសម័យប្រជុំនេះទទួលយកអសនៈរបស់ខ្លួនផងដែរ។
លោក ហូ ឌី ហូ (Ho Dy Ho) តំណាងឲ្យព្រះមហាក្សត្រ សីហមុនី បានទទួលយកញត្តិកាលពីម្សិលមិញ ហើយបានអះអាងថា ព្រះមហាក្សត្រទ្រង់បានទទួលយកញត្តិដែលបានថ្វាយកាលពីថ្ងៃសៅរ៍ដោយផ្ទាល់។ លោក ហូ ឌីហូ បានមានប្រសាសន៍ថា “យើងបានថ្វាយញត្តិជូនព្រះមហាក្សត្រ ប៉ុន្តែយើងមិនទាន់បានទទួលការឆ្លើយតបពីព្រះអង្គនៅឡើយទេ”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា ខណៈពេលគណបក្សរបស់លោកបានជួយសម្របសម្រួលថ្នាក់ដឹកនាំតាមមូលដ្ឋាន ដើម្បីប្រមូលស្នាមមេដៃជាង២៦០.០០០នាក់ លើញត្តិកាលពីថ្ងៃសៅរ៍ កម្លាំងជំរុញឲ្យមានញត្តិនេះគឺចេញពីប្រជាពលរដ្ឋសាមញ្ញ។
លោកបានមានប្រសាសន៍ថា “វាជាគំនិតរបស់ប្រជាពលរដ្ឋ។ យើងផ្ដល់យោបល់ខ្លះដល់ពួកគាត់ពីរបៀបយកញត្តិទៅថ្វាយព្រះមហាក្សត្រ ហើយយើងបានសម្របសម្រួលជាមួយនគរបាល ដែលការពារនៅតំបន់ក្បែរព្រះបរមរាជវាំង”។
វត្តមានរបស់នគរបាលក្បែរព្រះបរមរាជវាំងមានចំនួនច្រើនកាលពីចុងសប្ដាហ៍។ នៅពេលប្រជាពលរដ្ឋប្រហែល២០០នាក់ព្យាយាមដង្ហែក្បួនទៅក្បែរព្រះបរមរាជវាំងនៅម៉ោង៨ព្រឹកថ្ងៃម្សិលមិញ ដើម្បីថ្វាយញត្តិចុងក្រោយនេះ ពួកគាត់ត្រូវបានរារាំងដោយនគរបាលប្រឆាំងកុបកម្មដែលមានចំនួនប្រហាក់ប្រហែល បានដាក់របាំងបិទតីរវិថី ស៊ីសុវត្ថិ។
លោក វន ពៅ ប្រធានសមាគមន៍ប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធបានមានប្រសាសន៍ថា “ពួកគេរារាំងយើងមិនឲ្យដាក់ញត្តិថ្វាយព្រះមហាក្សត្រ ដូច្នេះពួកគេក្បត់ព្រះមហាក្សត្រ និងប្រជាពលរដ្ឋខ្លួនឯង”។ លោក វន ពៅ រួមជាមួយនឹងមនុស្សបីនាក់ផ្សេងទៀតនៅទីបំផុតត្រូវបានអនុញ្ញាតឲ្យឆ្លងកាត់របាំងដើរទៅព្រះបរមរាជវាំងដោយនាំយកញត្តិទៅជាមួយនៅម៉ោងប្រហែល១០ និង៣០នាទីព្រឹក។
លោក ជាម យៀប អ្នកនាំពាក្យគណបក្សប្រជាជនកម្ពុជាបានមានប្រសាសន៍ថា ការថ្វាយញត្តិកាលពីចុងសប្ដាហ៍នឹងមិនគ្រាន់តែបង្ហាញពីអប្រសិទ្ធិភាពប៉ុណ្ណោះទេ ប៉ុន្តែក៏បង្ហាញពីការព្យាយាមរបស់គណបក្សសង្គ្រោះជាតិ ក្នុងការបន្ថែមរបៀបវារៈរបស់ខ្លួនផងដែរ។
លោក ជាម យៀប បានមានប្រសាសន៍ថា “អង្គការក្រៅរដ្ឋាភិបាល អង្គការសហគមន៍ និងសង្គមស៊ីវិល… ៨០ភាគរយក្នុងចំណោមពួកគេគាំទ្រគណបក្សសង្គ្រោះជាតិ”៕
ប្រែសម្រួលដោយ អ៊ួច សូនី