28 C
Phnom Penh

ការ​ស៊ើប​អង្កេត​លើ​ករណី​​បាញ់​ប្រហារ​មិន​ទាន់​​​មានលទ្ធ​ផលនៅឡើយ

ដោយ ឌឹ ខេមបូឌា ដេលី

បទវិភាគ

អ្នក​នាំ​ពាក្យ​ក្រសួង​មហាផ្ទៃ​ម្នាក់​មាន​ប្រសាសន៍​កាល​ពី​ម្សិល​មិញ​ថា រយៈពេល​មួយ​សប្តាហ៍​ បន្ទាប់​ពី​បុរស​ម្នាក់​ត្រូវ​បាន​បាញ់​ស្លាប់ និង​​​រង​របួស​ជា​ច្រើន​នាក់​ទៀត​ អំឡុង​ការ​ជាប់​គាំង​រវាង​កង​កម្លាំង​សន្តិសុខ​​និង​ក្រុម​បាតុករ​នោះ ការ​ស៊ើប​អង្កេត​មួយ​​ដែល​ថា តើ​នរណា​ជា​អ្នក​ទទួល​ខុស​ត្រូវ​ក្នុង​ករណី​នេះ​​​​ គឺ​មិន​ទាន់​សន្និដ្ឋាន​បញ្ចប់​​ឡើយ​។

លោក​ឧត្ដម​សេនីយ៍​ឯក ខៀវ សុភ័គ​​មាន​ប្រសាសន៍​បន្ត​ថា “ខ្ញុំ​មិន​មាន​​ព័ត៌​មាន​ថ្មី​​ពាក់​ព័ន្ធ​នឹង​បញ្ហា​នេះ​ទេ​។ ពួក​គេ​កំពុង​ធ្វើ​ការ​របស់​ខ្លួន​ ប៉ុន្តែ ខ្ញុំ​មិន​ទាន់​ទទួល​បាន​​ព័ត៌​មាន​ណា​មួយ​ទេ​”។

កាល​ពី​ថ្ងៃ​ទី​១៥​​​ ខែ​កញ្ញា នៅ​ចុង​បញ្ចប់​​ថ្ងៃ​ទី​១នៃ​ការ​ធ្វើ​បាតុកម្ម​របស់​គណ​បក្ស​សង្គ្រោះ​​​​ជាតិ​ ដែលប្រឆាំង​នឹង​លទ្ធ​ផល​ឆ្នោត​ផ្លូវ​ការ ហើយ​​​កង​កម្លាំង​សន្តិ​សុខ​បាន​បើក​ការ​បាញ់​ប្រហារ​មក​លើ​ក្រុម​បាតុករ​មួយ​ក្រុម​​ និង​អ្នក​ធ្វើ​ដំណើរ​ដែល​មាន​កំហឹង​ដោយ​សារ​ការ​ដាក់​របាំង​លួស​បន្លា​ បិទ​ផ្លូវ​​មិន​​ឲ្យ​ពួក​គាត់​ត្រឡប់​ទៅ​ផ្ទះ​វិញ​បាន​។ អ្នក​យក​ព័ត៌​មាន​នៅ​កន្លែង​ហេតុ​ការណ៍​នោះ​ បាន​ធ្វើ​ជា​សាក្សី​​​​ថា កង​កម្លាំង​នគរ​បាល​បង្ក្រាប​កុបកម្ម​ និង​កង​រាជ​អាវុធ​ហត្ថ​បំពាក់​ដោយ​​ឧស្ម័ន​បង្ហូរ​ទឹក​ភ្នែក គ្រាប់​បែក​ផ្សែង និង​អាវុធ​ផង​ដែរ។

ទោះ​ជា​យ៉ាង​ណា​ នគរ​បាល​បាន​ច្រាន​ចោល​​​​ម្តង​ហើយ​ម្តង​ទៀត​ថា កង​កម្លាំង​សន្តិ​សុខ​មិន​មាន​អាវុធ​ទេ​ ការ​ប៉ះ​ទង្គិច​គ្នា​នោះ​​ចុង​បញ្ចប់​បណ្តាល​ឲ្យ​ លោក ​ម៉ៅ សុខ​ចាន់​ ​​ស្លាប់​ដោយ​សារ​ត្រូវ​​បាញ់​​​ចំ​ក្បាល​។ អ្នក​ជំនាញ​ផ្នែក​សន្តិ​សុខ​បាន​លើក​ឡើង​កាល​ពី​សប្តាហ៍​មុន​ថា​មិន​មាន​អ្វី​​សង្ស័យ​ទេ​ ដែល​ថា​ កង​កម្លាំង​សន្តិ​សុខ​​មាន​​កំហុស​​​ក្នុង​អំពើ​ហិង្សា​​នោះ។

លោក ម៉ៃខល ស្កុត​ (Michael Scott) ជា​សាស្ត្រា​ចារ្យ​មួយ​រូប​ប្រចាំ​​សាកល​វិទ្យា​ល័យ​ ច្បាប់​វីស្ខន់សិន និង​ជា​អ្នក​ជំនាញ​ផ្នែក​យុទ្ធ​សាស្ត្រ​គោល​ន​យោយ​​បាន​លើក​ឡើង​តាម​រយៈ​អ៊ីម៉េល​ថា “ការ​ប្រើ​ប្រាស់​កម្លាំង​ដ៏​គ្រោះ​​​​​​​ថ្នាក់​​បែប​នេះ​​គឺ​មិន​ត្រឹម​ត្រូវ​ឡើយ​​​​ក្នុង​ការ​ឆ្លើយ​តប​ចំពោះ​ការ​ប្រើ​ប្រាស់​កម្លាំង​មិន​ប្រកប​ដោយ​គ្រោះ​ថ្នាក់​នោះ​​ ដែល​ភាគ​ច្រើន​​ការ​​ចោល​ដុំ​ថ្ម​ត្រូវ​បាន​ចាត់​ទុក​ថា ជា​កម្លាំង​មិន​ប្រកប​ដោយ​គ្រោះ​ថ្នាក់​ទេ​​” ។

លោក​មាន​ប្រសាសន៍​បន្ត​ថា​ទោះបី​ប្រជា​​​​ពល​រដ្ឋ​បាន​ប្រើ​ប្រាស់​អាវុធ​ដ៏​គ្រោះ​ថ្នាក់​ក៏​ដោយ​ ក៏​កង​​កម្លាំង​សន្តិ​សុខ​មិន​គួរ​ជាប់​ពាក់​ព័ន្ធ​ក្នុង​ការ  “ប្រើ​ប្រាស់​កម្លាំង​ដ៏​គ្រោះ​ថ្នាក់​ដែរ​​ ហើយ​​គួរ​​តែ​មិន​ត្រូវ​ធ្វើ​ឲ្យ​ប្រជា​ពលរដ្ឋ​ស្លូត​ត្រង់​ក្នុង​ក្រុម​​មនុស្ស​នោះ​រង​របួស​​ឡើយ​​​” ​​​ដោយ​បន្ថែម​ថា ​សកម្ម​ភាព​របស់​នគរ​បាល​បាន​បង្ហាញ​ថា​ “​មាន​វិសមាមាត្រ​កម្លាំង​”​​ ចំពោះ​ការ​ចោល​​ដុំ​ថ្ម​ដោយ​ក្រុម​​បាតុករ​។

លោក ផល ថោនសិន (Paul Townsend) អ្នក​ប្រឹក្សា​យោបល់ ​ក្រុម​ហ៊ុន​ ក្រោន​ឌីណា​​​មិក (Crowd Dynamics) ជា​ក្រុមហ៊ុន​មួយ​របស់​ប្រទេស​អង់គ្លេស​​ដែល​ផ្តល់​ប្រឹក្សា​ដល់​រដ្ឋា​ភិបាល​ និង​​ជា​អ្នក​ផ្តល់​គម្រោង​​សុវត្ថិ​ភាព​លើ​ព្រឹត្តិការ​ធំៗ​បាន​លើក​ឡើង​ថា ការ​បាញ់​កាំ​ភ្លើង​ឡើង​លើ​គឺ​ទំនង​ជា​​ធ្វើ​ឲ្យ​ក្រុម​បាតុករ​ភ័យ​ស្លន់​ស្លោ​ជា​ជាង​ធ្វើ​ឲ្យ​​​ពួក​គេ​ស្ងប់​ស្ងាត់។ លោក​ថ្លែង​បន្ត​ថា  “ក្នុង​ករណី​​ធ្វើ​ឲ្យ​​ក្រុម​មនុស្ស​​ស្ងប់ស្ងាត់​ ដោយ​​ផ្តល់​​ព័ត៌​មាន​ជា​ចាំ​បាច់​បំផុត​ដល់​ពួក​គេ​តាម​ដែល​អ្នក​អាច​ធ្វើ​បាន​ ហើយ​ការ​​បាញ់​កាំភ្លើង​ឡើងលើ ​មិន​អាច​ធ្វើឲ្យ​ពួក​គេ​ស្ងប់​ស្ងាត់​​បាន​ឡើយ”។​

លោក ថោនសិន មាន​ប្រសាសន៍​បន្ថែម​ថា អាជ្ញាធរ​គួរ​តែ​ផ្ដល់​ព័ត៌មាន​ដល់​​ប្រជា​ពល​រដ្ឋ​ជា​មុន​ អំពី​ការ​ដាក់​របាំង​លួស​បន្លា​​ណា​មួយ​នៅ​ក្នុង​​ទូទាំង​រាជ​ធានី​នោះ​ និង​​ការ​បិទ​ផ្លូវ​នៅ​​ស្ពាន​នេះ​ផង​ដែរ​។ លោក​ ថោនសិន បាន​​​ថ្លែង​បន្ថែម​ទៀត​ថា “វា​ជា​ការ​សំខាន់​ ​​​ត្រូវ​តែ​​ទទួល​​ព័ត៌​មាន​​​ពី​​​ក្រុម​​ប្រជា​ពល​រដ្ឋ​នោះឲ្យ​បាន ហើយ​​ត្រូវ​ធ្វើ​​ឲ្យ​​បាន​មុន​ប្រ​ជា​ពល​រដ្ឋ​នៅ​ក្នុង​ក្រុម​មនុស្ស​​​​នោះ​​ផ្លាស់​ប្តូរ​ចិត្ត​”។

លោក ចាន់ សុវ៉េត អនុ​ប្រធាន​​កម្មវិធី​ឃ្លាំ​មើល​អង្គការ​សិទ្ធិ​មនុស្ស​អាដ​ហុក​ បាន​មាន​ប្រសាសន៍​ថា កង​កម្លាំង​សន្តិ​សុខ​នៅ​ប្រទេស​កម្ពុជា​គឺ​មាន​ការ​ហ្វឹក​ហាត់​​ខ្សោយ​ណាស់​​អំពី​ការ​គ្រប់​គ្រង​ក្រុម​មនុស្ស ​ជា​ពិសេស​អំឡុង​ពេល​មាន​បាតុកម្ម​។

លោក ចាន់ សុវ៉េត បាន​​​មាន​ប្រសាសន៍​បន្ត​ថា “នៅ​ពេល​ណា​​ដែល​ភ្នាក់​ងារ​រដ្ឋា​ភិ​​​បាល​ បាន​ប្រើ​ប្រាស់​កម្លាំង​យ៉ាង​ច្រើន​លើស​លប់​​ក្នុង​ការ​បង្ក្រាប​ក្រុម​បាតុករ​ និង​អ្នក​តវ៉ា​ដី​ធ្លី​នោះ​…ពួក​គេ​មិន​ដែល​ទទួល​ខុស​ត្រូវ​ចំពោះជន​រង​គ្រោះ​ ដែលបាន​បាត់​​បង់​ជីវិត​នោះ​​​ឡើយ”។

ស្ថាន​ភាព​ស្រដៀង​គ្នា​នេះ​ដែរ បាន​កើត​ឡើង​កាល​ពី​ខែ​ឧសភា ឆ្នាំ​២០១២​​​ នៅ​ក្នុង​ខេត្ត​ក្រចេះ នៅ​ពេល​កង​កម្លាំង​សន្តិ​សុខ​ដែល​​​​បំពាក់​ដោយ​អាវុធ​គ្រប់​ដៃ បាន​សម្រុក​ចូល​ភូមិ​ប្រមា ដើម្បី​បញ្ឈប់​ការ​តវ៉ា​ដី​ធ្លី​មួយ ហើយ​​​​​ក្មេង​ស្រី​អាយុ​១៤​ឆ្នាំ​ ម្នាក់​​ត្រូវ​បាញ់​ស្លាប់​នៅ​ពេល​នោះ​។ ក្រោយ​មក​​ក្រុម​មន្ត្រី​បាន​លើក​ឡើង​ថា ការ​បាញ់​ប្រហារ​នោះ​គឺ​ជា​ឧបទ្ទវ​​​ហេតុ​​​​មួយ​ ហើយ​ថា មិន​មាន​ការ​ស៊ើប​អង្កេត​ចាំ​បាច់​ណា​មួយ​ក្នុង​ករណី​នោះ​ទេ​។

លោក​ឧត្តម​សេនីយ៍​ទោ ខេង ទីតូ អ្នក​នាំ​ពាក្យ​កង​រាជ​អាវុធ​ហត្ថ​បាន​ការពារ​ការ​ហ្វឹក​ហ្វឺន​របស់​កង​កម្លាំង​នគរបាល។ លោក​មាន​ប្រសាសន៍​បន្ត​ថា “ប៉ុន្តែ នៅ​ក្នុង​ព្រឹត្តិការណ៍​ខ្លះ​យើង​មិន​អាច​ជៀស​វាង​​ពី​ការ​បង្ក្រាប​ដោយ​ប្រើ​កម្លាំង​ប្រដាប់​អាវុធ​ច្រើន​នោះ​​ទេ​។ ឧបទ្ទវហេតុ​ដូច្នោះ​ មិន​អាច​ព្យាករ​បាន​ឡើយ​។យើង​មិន​ចង់​ឃើញ​​មាន​ការ​ស្លាប់​ណា​មួយ​ដែល​ជា​លទ្ធ​ផល​នៃ​ការ​ប៉ះ​ទង្គិច​គ្នា​រវាង​កម្លាំង​ប្រដាប់​អាវុធ និង​ក្រុម​បាតុករ​ឡើយ”។ លោក​បាន​អះអាង​ម្តង​ទៀត​ថា មិន​មាន​មន្ត្រី​ណា​ម្នាក់​​ជាប់​ពាក់​ព័ន្ធ​ក្នុង​ការ​ប៉ះ​ទង្គិច​គ្នា​​កាល​ពី​ថ្ងៃ​អាទិត្យ​នោះ​​មាន​​​អាវុធ​​ឡើយ​។

យ៉ាង​ណា​មិញ អ្នក​ស្រី ជាវ សុខវី ភរិយា​សព​​លោក ម៉ៅ  សុខចាន់ បាន​និយាយ​កាល​ពី​ម្សិល​មិញ​ថា រដ្ឋា​ភិបាល​ត្រូវ​តែ​ស្វែង​រក​ និង​កាត់​ទោស​ឃាត​ករ​ ដែល​បាន​សម្លាប់​ប្តី​របស់​អ្នក​ស្រី​។ អ្នក​ស្រី​ ជាវ សុខវី និយាយ​បន្តថា “វា​មាន​​រយៈពេល​៧​ថ្ងៃ​មក​ហើយ ហើយ​នៅ​មិន​ទាន់​មាន​នរណា​ម្នាក់​​មក​សួរ​ខ្ញុំ​ ឬ​ប្រាប់​ខ្ញុំ​​អំពី​អ្វី​មួយ​អំពី​ការ​ស៊ើប​អង្កេត​នោះ​ទេ​”៕

(រាយការណ៍​បន្ថែម​ដោយ​ Ben Wood
និង​ អ៊ាង​ម៉េង​ឡេង)
ប្រែ​សម្រួល​ដោយ ឃិន ណៃ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស