សាលារាជធានីភ្នំពេញ បានស្នើឲ្យម្ចាស់ស្ថានីយវិទ្យុដ៏ល្បីមួយឲ្យពន្យារពេលការជួបជុំដ៏ធំមួយក្នុងការគាំទ្រព្រះរាជអំពាវនាវរបស់ព្រះមហាក្សត្រ នរោត្តម សីហមុនី សុំឲ្យគណបក្សសង្គ្រោះជាតិចូលរួមការបើកសម័យប្រជុំរដ្ឋសភានៅព្រឹកនេះ ដោយស្នើឲ្យម្ចាស់ស្ថានីយវិទ្យុរូបនេះរង់ចាំ រហូតដល់រដ្ឋាភិបាលបង្កើតឡើងជាផ្លូវការសិន។
ក្នុងការចាក់ផ្សាយផ្ទាល់មួយកាលពីព្រឹកម្សិលមិញ លោក សេង ប៊ុនវ៉េង ដែលជាម្ចាស់ ស្ថានីយវិទ្យុ អែហ្វ អឹម អេ ប៊ី ស៊ី ABC FM Radio មានរហស្សនាមថា “អាចារ្យ អេ” បាន លើកយកលិខិតមួយច្បាប់ចេញដោយសាលារាជធានីភ្នំពេញ ដោយបញ្ជាក់ថា មន្ត្រីសាលារាជធានីបានឲ្យផ្អាកការប្រមូលផ្តុំគ្នានៅថ្ងៃអង្គារ ដែលនឹងរាប់បញ្ចូល “ការប្រគំតន្ត្រីមនុស្សធម៌” រៃអង្គាស សម្រាប់យកទៅជួយឧបត្ថម្ភដល់មន្ទីរពេទ្យកុមារ គន្ធបុប្ផា។
សេចក្តីប្រកាសនេះដែលចុះថ្ងៃសៅរ៍និងចុះហត្ថលេខាដោយលោក ប៉ា សុជាតិវង្ស អភិបាលរាជធានីភ្នំពេញ មានខ្លឹមសារថា “ខ្ញុំសូមជំរាបលោកអគ្គនាយក[លោក ប៊ុន វ៉េង]ថា ថ្មីៗនេះ ព្រះមហាក្សត្រ រដ្ឋាភិបាល និងក្រសួងមហាផ្ទៃបានអំពាវនាវដល់ប្រជាពលរដ្ឋទាំងអស់ឲ្យរក្សាភាពស្ងៀមស្ងាត់ ដើម្បីផ្តល់សន្តិសុខ ស្ថិរភាពសង្គម និងបង្កើតឡើងនូវបរិយាកាសល្អមួយ សម្រាប់សម័យប្រជុំរដ្ឋសភាលើកដំបូងនីតិកាលទី៥”។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានមានប្រសាសន៍ថា លោក ប៊ុនវ៉េង អាចធ្វើការប្រមូលផ្តុំគ្នារបស់គាត់នៅពេលរដ្ឋាភិបាលថ្មីបង្កើតជាផ្លូវការរួច។ លោកបានថ្លែងថា “យើងនឹងអនុញ្ញាតឲ្យវិទ្យុ ABC ធ្វើពិធីប្រគំតន្ត្រី បន្ទាប់ពីរដ្ឋសភានិងរដ្ឋាភិបាលត្រូវបានបង្កើតជាផ្លូវការ”។
អ្នកស្រី រឿន ស៊ីណាត តំណាងវិទ្យុ ABC FM Radio បានអះអាងថា សាលារាជធានីបានធ្វើសំណើរបស់ខ្លួនឲ្យលោក ប៊ុនវ៉េង ពន្យារពេលការជួបជុំគ្នានៅស្តាតអូរឡាំពិក ដោយសារគណបក្សសង្គ្រោះជាតិមានផែនការធ្វើបាតុកម្មប្រកួតប្រជែងមួយនៅថ្ងៃនោះដែរ។ អ្នកស្រីបានបន្តថា “អគ្គនាយករបស់ខ្ញុំ
បានប្រាប់ពួកយើងថា ការប្រគំតន្ត្រីត្រូវពន្យារពេល ពីព្រោះគាត់បារម្ភថា អំពើហិង្សាអាចកើតមាន ពីព្រោះមេដឹកនាំគណបក្សប្រឆាំងបានគំរាមធ្វើបាតុកម្មនៅថ្ងៃនោះដែរ”។
លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិបានបដិសេធថា គណបក្សរបស់លោកគ្មានផែនការធ្វើបាតុកម្មនៅថ្ងៃអង្គារទេ ហើយលោកបានបញ្ជាក់ឡើងវិញថា លោកគាំទ្រសិទ្ធិរបស់វិទ្យុ ABC ក្នុងការធ្វើការប្រមូលផ្តុំគ្នាមួយ។ លោកបន្តថា ពួកគេមានសិទ្ធិរៀបចំបាតុកម្មដោយសន្តិវិធី វាជាសិទ្ធិរបស់ប្រជាពលរដ្ឋ ហើយយើងគ្មានផែនការធ្វើបាតុកម្មនៅថ្ងៃទី២៤ទេ”៕
( រាយការណ៍បន្ថែមដោយ Alex Willemyns)
ប្រែសម្រួលដោយ ចេវ ប៊ុននី