28 C
Phnom Penh

មេបញ្ជាការ​កងរាជ​អាវុធហត្ថ​រាជធានី​ភ្នំ​ពេញ​ថ្មីបានចូល​កាន់​តំណែង​ជា​ផ្លូវការ​

ដោយ ឌឹ ខេមបូឌា ដេលី

បទវិភាគ

លោក​ឧត្តម​សេនីយ៍ទោ រ័ត្ន ស៊្រាង ត្រូវ​បាន​​​​តែង​​តាំង​ជា​​មេបញ្ជាការ​ថ្មី​នៃ​​កង​រាជ​អាវុធ​ហត្ថ​រាជ​ធានី​ភ្នំ​ពេញ​ជា​ផ្លូវ​ការ​កាល​ពី​រសៀល​​​​ម្សិល​មិញ​អំឡុង​ពិធី​មួយ​នៅ​ឯ​ទី​បញ្ជាការ​ដ្ឋាន​កង​រាជអាវុធហត្ថ​រាជធានី​។

​អតីត​មេបញ្ជាការ​កងរាជអាវុធហត្ថ​ខេត្ត​បន្ទាយមានជ័យ​ លោក​ឧត្ដមសេនីយ៍ទោ រ័ត្ន ស៊្រាង ត្រូវ​បាន​តែង​តាំង​ជំនួស​លោក​​ឧត្ដម​សេនី​យ៍ឯក យ៉ា គឹមអ៊ីដែល​ត្រូវ​បាន​តែង​តាំង​កាល​ពី​ឆ្នាំ​២០០៤​​ហើយ​បច្ចុប្បន្ននេះ​លោក​នឹង​មាន​​តួនាទី​ជាមេបញ្ជាការ​រង​កង​រាជ​អាវុធហត្ត​លើ​ផ្ទៃ​ប្រទេស​​។

ថ្លែង​នៅ​ក្នុង​ថ្ងៃ​ដែល​ព្រះ​មហាក្សត្រ នរោត្ដម សីហមុនី យាង​​ជា​​អធិបតី​បើក​សម័យ​​​​​​​ប្រ​ជុំ​សភា​លើក​ដំបូង​ ទោះបី​ជា​​មាន​ការ​អំពាវ​​​​​​​នាវ​ពី​គណបក្ស​សង្គ្រោះ​ជាតិ​​ឲ្យ​ព្រះ​អង្គ​ពន្យារ​​​​​​​ពេល​​​ក្នុង​ការ​បើក​សម័យ​ប្រជុំ​នេះ​ក៏ដោយ​ ក៏​ លោក​ឧត្ដមសេនីយ៍ទោ​ រ័ត្ន​ ស៊្រាង បាន​ថ្លែង​ថា លោក​នឹង​ប្តេជ្ញា​ការពារ​ព្រះ​មហាក្សត្រ និង អនុ​វត្ត​តាម​រដ្ឋធម្មនុញ្ញ​។

លោក​ឧត្ដមសេនីយ៍ទោ រ័ត្ន ស៊្រាង បាន​ថ្លែង​​ថា​ “ ខ្ញុំ​សន្យា​ការពារ​ព្រះមហាក្សត្រ និង​រដ្ឋធម្មនុញ្ញ ហើយនឹង​មិន​អនុញ្ញាត​ឲ្យ​នរណា​ម្នាក់​រំលោភ​ស្ថាប័ន​ទាំង​នេះ​បាន​ឡើយ​”។

លោក​ឧត្ដមសេនីយ៍ឯក យ៉ា គីមអ៊ី បាន​ថ្លែង​នៅ​ឯ​ពិធី​នោះ​ថា លោក​បាន​ធ្វើ​ការ​ដោយ​​​​​​​មិន​​​​ខ្លាច​ការ​នឿយ​ហត់​ ដើម្បី​ធ្វើ​ឲ្យ​រាជធានីភ្នំ​ពេញមាន​សុវត្ថិភាព​ សម្រាប់​ប្រ​ជា​ពលរដ្ឋ និង​ផ្លាស់​ប្តូរ​មុខ​មាត់​​រាជធានី​​ភ្នំ​ពេញ​ដោយ​មាន​ការ​បង្ក្រាប​ការ​ជួញដូរ​គ្រឿងញៀន និង​ការ​​ឆក់​ប្លន់ជាដើម។ លោក​ថ្លែង​បន្ត​ថា​ “យើង​បាន​ធ្វើការ​យ៉ាង​សកម្ម​ ដើម្បី​រក្សា​សន្តិសុខ​អំឡុង​ព្រឹត្តិការណ៍​បុណ្យ​ជាតិ​និង​អន្តរជាតិ​​​រួម​ទាំង​អំឡុង​ពេល​បោះ​ឆ្នោត​ផង​ដែរ​ ប៉ុន្តែ ទោះ​បី​ជា​យើង​ប្រឹង​​​​​​​ប្រែង​យ៉ាង​ណា​ក៏ដោយ​ ក៏​រាជធានី​ភ្នំពេញ​នៅ​តែ​បន្ត​ប្រឈម​​នឹង​បញ្ហា​ដោយ​ការ​ជួញ​ដូរ​គ្រឿង​ញៀន​ ក្រុម​ក្មេងទំនើង​​ ការ​ឆក់​ប្លន់​ និង​ការ​ធ្វើ​បាតុកម្ម​ ព្រម​ទាំង​ការ​កកស្ទះ​ចរា​​​ចរណ៍​​ដដែល​”។ លោក​បាន​បន្ថែម​ថា លោក​សង្ឃឹម​ថា មេ​​​បញ្ជាការ​កង​រាជ​អាវុធ​ហត្ថ​ថ្មី​នឹង​​ព្យាយាម​បំពេញ​ការ​ងារ​​ ដើម្បី​ឆ្លើយ​តប​ទៅ​នឹង​តម្រូវ​ការ​សាធារណជន។

មន្ត្រី​កង​រាជ​អាវុធ​ហត្ថ​ត្រូវ​បាន​ចោទ​ប្រកាន់​​​​ថា​ មិន​បានធ្វើការ​ការពារ​​​ ហើយ​បណ្តោយ​ឲ្យ​មាន​បញ្ហាកើត​ឡើង​​នៅពេល​ដែល​មនុស្ស​​​​​​​មួយ​ក្រុម​ប្រដាប់​ដោយ​ដំបង​ ដុំថ្ម និង​ដំបង​ឆក់​​វាយ​ប្រហារ​ទៅលើ​ក្រុម​អ្នក​តវ៉ា​ ដោយ​អហិង្សា​និង​ក្រុម​អ្ន​ក​យក​ព័ត៌មាន​នៅ​រមណីយ​​​​​​ដ្ឋាន​វត្ត​ភ្នំ​កាល​ពី​យប់​ថ្ងៃ​អាទិត្យ​ ដែល​បាន​បណ្តាល​ឲ្យមនុស្ស​មួយ​ចំនួន​​​រង​របួស​៕

ប្រែសម្រួលដោយ ឃិន​ ណៃ​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស