តើអក្សរ វី (V) ជាសញ្ញាជ័យជម្នះ? ឬ V ជាសញ្ញាសន្តិភាព? ឯកអគ្គរដ្ឋទូតសហរដ្ឋអាមេរិកលោក វីលៀម អ៊ី ថត់ (William E. Todd) បានលើកម្រាមដៃបង្ហាញសញ្ញាអក្សរ “ V” ដែលមានន័យមិនច្បាស់លាស់មួយ ដាក់ក្រុមអ្នកយកព័ត៌មាននៅឯពិធីបើកសម័យប្រជុំរបស់រដ្ឋសភា ដែលនាំឲ្យមានការភាន់ច្រឡំជុំវិញសារ ដែលលោកបានកំពុងតែព្យាយាមបញ្ជូននៅឯការបើកសម័យប្រជុំសភា ដែលមានតែសមាជិកសភាមកពីគណបក្សប្រជាជនគ្រប់គ្រងអំណាចប៉ុណ្ណោះ បានចូលរួម។
សញ្ញា “ V” កើតឡើងដោយសារការលើកម្រាមចង្អុលឡើង និងម្រាមកណ្តាលដើម្បីបង្កើតជាអក្សរ “V” ប៉ុណ្ណោះ។ តាមប្រវត្តិ សញ្ញានេះត្រូវគេសម្គាល់ថាជាតំណាងឲ្យជ័យជម្នះ ប៉ុន្តែវាក៏អាចមានន័យថា សន្តិភាពដែរ។
នៅពេលបញ្ចប់ពិធីបើកសម័យប្រជុំរដ្ឋសភាកាលពីម្សិលមិញនេះ ដែលត្រូវបានគណបក្សសង្គ្រោះជាតិធ្វើពហិការ ពីព្រោះខ្លួនអះអាងថា ការបោះឆ្នោតត្រូវបានលួចបន្លំជាមួយនឹងភាពមិនប្រក្រតីនោះ លោកថត់ បានចាប់រលាក់ដៃជាមួយព្រះមហាក្សត្រ នរោត្តម សីហមុនី បន្ទាប់មកបានងាកទៅរកក្រុមអ្នកយកព័ត៌មាន បានលើកដៃរបស់លោក និងបង្ហាញអក្សរ V។
ស្ថានទូតអាមេរិកបញ្ជាក់ថា ទង្វើរបស់លោកឯកអគ្គរដ្ឋទូត វីលៀម អ៊ី ថត់ គឺជាសញ្ញាសម្រាប់សន្តិភាព។ លោក ចន ស៊ីមម៉ុន (John Simmons) អ្នកនាំពាក្យរបស់ស្ថានទូតអាមេរិក បានមានប្រសាសន៍ថា “ថ្ងៃនេះ នៅឯរដ្ឋសភា លោកឯកអគ្គរដ្ឋទូត វីលៀម អ៊ី ថត់ បានបង្ហាញសញ្ញាសន្តិភាព ដែលគេទទួលស្គាល់ជាសកល ជាសារមួយដល់ពលរដ្ឋខ្មែរទាំងអស់សម្រាប់សន្តិភាពនិងអហិង្សា។ ស្ថានទូតអាមេរិកជានិច្ចកាលតែងតែអំពាវនាវកុំឲ្យមានប្រើអំពើហិង្សានិងបានពោលសង្កត់ធ្ងន់ពីសារៈសំខាន់នៃការសន្ទនាបែបស្ថាបនា និងប្រកបដោយសន្តិវិធី”។
ប៉ុន្តែពលរដ្ឋកម្ពុជាខ្លះមានការយល់ច្រឡំនិងចាត់ទុកថា សញ្ញារបស់លោកឯកអគ្គរដ្ឋទូតមានន័យថាជាជ័យជម្នះ និងជាការបង្ហាញការគាំទ្រមួយដល់ការបើកសម័យប្រជុំរដ្ឋសភានីតិកាលទី៥។
លោក អ៊ូ ឫទ្ធី អ្នកវិភាគនយោបាយដ៏លេចធ្លោម្នាក់ បានលើកឡើងក្នុងអ៊ីម៉េលមួយកាលពីម្សិលមិញថា សញ្ញាលើកឡើងដោយលោក វីលៀម អ៊ី ថត់ ដែលមានន័យថា ជ័យជម្នះនោះហាក់ដូចជាមានន័យថា សហរដ្ឋអាមេរិក និងបណ្តាបស្ចិមប្រទេសនៅតែបន្តគាំទ្រគណបក្សប្រជាជនកម្ពុជា។ “វាមានន័យច្រើនតែជារបៀបការទូត!។
វត្តមាននិងសញ្ញាជាអក្សរ V របស់លោកបង្ហាញថា លោកគាំទ្រសម័យប្រជុំរដ្ឋសភាលើកដំបូង”។ ក្រោយពិធីនេះ ស្ថានទូតអាមេរិកបានចេញសេចក្តីប្រកាសមួយ មានខ្លឹមសារថា ការចូលរួមរបស់លោក វីលៀម អ៊ី ថត់ មិនមែនជាការគាំទ្រលទ្ធផលនៃការបោះឆ្នោត ឬគណបក្សណាមួយទេ ហើយបន្ទាប់មកបានបង្ហោះរូបភាពមួយនៅលើទំព័រហ្វេសប៊ុករបស់ខ្លួនមានរូបលោក វីលៀម អ៊ី ថត់ លើកដៃបង្ហាញសញ្ញាអក្សរ V ជាមួយក្រុមយុវជនស្ម័គ្រចិត្ត។
ការពិពណ៌នាអំពីរូបថតនេះមានខ្លឹមសារថា “សញ្ញាសន្តិភាព គឺជាសញ្ញាដែលគេស្គាល់ជាសកល បង្ហាញពីសន្តិភាព និងអហិង្សា។ ឯកអគ្គរដ្ឋទូត វីលៀម អ៊ី ថត់ បានប្រើសញ្ញានេះថ្ងៃនេះ នៅរដ្ឋសភា ដើម្បីជំរុញឲ្យមានសន្តិភាពនិងគ្មានអំពើហិង្សាសម្រាប់កម្ពុជា”។
អ្នកធ្វើអត្ថាធិប្បាយម្នាក់បានសរសេរនៅក្រោមរូបថតនោះថា “លោកឯកអគ្គរដ្ឋទូតខ្ញុំបានឃើញលោកលើកដៃក្នុងសញ្ញានេះ។ តើវាមានន័យសន្តិភាព ឬជ័យជម្នះរបស់គណបក្សប្រជាជនកម្ពុជា?”។
អ្នកផ្សេងទៀតបានសរសេរថា ពេលនេះ ពួកគេបានយល់ពីទង្វើរបស់លោក ថត់ហើយ។ ម្នាក់ទៀតសរសេរថា “សញ្ញារបស់លោក គឺជាសញ្ញាសន្តិភាព”៕
(រាយការណ៍បន្ថែមដោយ Colin Meyn និង Zsombor Peter)
ប្រែសម្រួលដោយ ចេវ ប៊ុននី