28 C
Phnom Penh

ការ​កក​ស្ទះ​ច​រា​ចរ​ណ៍​កើត​មាន​សារ​ជា​ថ្មី​ទៀត​ដោយ​សារ​ការ​បិទ​ផ្លូវ​មួយ​ចំនួន​​

ដោយ ឌឹ ខេមបូឌា ដេលី

បទវិភាគ

អ្នក​ធ្វើ​ដំណើរ​ត្រូវ​ប្រើ​ផ្លូវ​វាង  ​និង​​ចំណាយ​ ពេល​យូរ​ ហើយ​តុលាការ​កំពូល និង សាលា​ឧទ្ធរណ៍ ត្រូវ​បាន​បិទ​ទ្វារ​ផង​ដែរ​កាល​ពី​ម្សិល​មិញ ​​ដោយ​សារ​កងកម្លាំង​សន្តិសុខ​បាន​​ដាក់​របាំង​លួស​បន្លា​បិទ​ផ្លូវ​សំខាន់ៗ និងផ្លូវ​តូចៗ​មួយ​ចំនួន​ បណ្ដាល​ឲ្យ​មាន​ការ​កកស្ទះ​ចរា​​​ចរណ៍​នៅ​កណ្ដាល​រាជ​ធានី​។

អ្នក​ធ្វើ​ដំណើរ​ជា​ច្រើន​នាក់​កំពុង​អង្គុយ​ខាង​មុខ​របាំង​​​បន្លា​លួស​ដែល​កម្លាំង​​សន្តិសុខ​​​បាន​​​​​​​បិទ​​មហា​វិថី​ព្រះ​​​នរោត្តម  កាល​​​ពី​ម្សិល​​​​មិញ និង​ផ្លូវ​​​​​​សំ​ខាន់​ៗ​ដ៏ទៃ​​ទៀត​ដែល​​​ភ្ជាប់​​​ទៅ​​​​​​វិមាន​​​ឯករាជ្យ ​​​ មក​ព្រះ​​​បរ​​ម​រាជ​វាំង​​​ និង​រដ្ឋសភា​​​  ដើម្បី​​​​រឹត​បន្តឹង​​​សន្តិសុខ​​​ក្នុង​​​ថ្ងៃ​​​​​​បើក​​​សម័យ​​​ប្រជុំ​​​សភា​​​លើក​​​ដំបូង​​​។ (​ស៊ីវ​ ចាន់​ណា)
អ្នក​ធ្វើ​ដំណើរ​ជា​ច្រើន​នាក់​កំពុង​អង្គុយ​ខាង​មុខ​របាំង​​​បន្លា​លួស​ដែល​កម្លាំង​​សន្តិសុខ​​​បាន​​​​​​​បិទ​​មហា​វិថី​ព្រះ​​​នរោត្តម កាល​​​ពី​ម្សិល​​​​មិញ និង​ផ្លូវ​​​​​​សំ​ខាន់​ៗ​ដ៏ទៃ​​ទៀត​ដែល​​​ភ្ជាប់​​​ទៅ​​​​​​វិមាន​​​ឯករាជ្យ ​​​ មក​ព្រះ​​​បរ​​ម​រាជ​វាំង​​​ និង​រដ្ឋសភា​​​ ដើម្បី​​​​រឹត​បន្តឹង​​​សន្តិសុខ​​​ក្នុង​​​ថ្ងៃ​​​​​​បើក​​​សម័យ​​​ប្រជុំ​​​សភា​​​លើក​​​ដំបូង​​​។ (​ស៊ីវ​ ចាន់​ណា)

របាំង​លួស​បន្លា​​​ត្រូវ​បាន​ដាក់​ភាគ​ច្រើន​នៅ​តាម​បណ្ដោយ​តីរវិថី​ព្រះស៊ីសុវត្ថិ និង មហាវិថី​ព្រះ​នរោត្ដម មិន​ឲ្យ​ធ្វើ​ដំណើរ​ចេញ​​​ចូល​ទៅ​កាន់​ព្រះ​បរម​រាជវាំង​​​ និងរដ្ឋ​សភា​ជាតិ ដែល​នៅ​ទី​នោះ​តំណាង​រាស្ត្រ​មក​ពី​គណ​​​បក្ស​ប្រ​ជា​ជន​កម្ពុជាកំពុង​កាន់​អំ​ណាច​ បាន​ចូល​រួម​ប្រជុំសភា​នៅ​ថ្ងៃ​ដំបូង​ ទោះ​បី​ជា​​មិន​មាន​តំណាង​រាស្រ្ត​មក​ពី​គណបក្ស​សង្គ្រោះ​​​​ជាតិ​ចូល​រួម​​ប្រជុំ​ក៏​ដោយ​​។

ផ្លូវ​នានា​ដែលភ្ជាប់​ទៅ​វិមាន​ឯករាជ្យ និង​ផ្លូវ​នានា​​ដែល​ភ្ជាប់​មហា​វិថី​ព្រះ​នរោត្ដម​ទៅ​​​ផ្លូវ​​​​លេខ​៥១​ ក៏​ត្រូវ​បាន​បិទ​ផង​ដែរ។ នគរបាល​បង្ក្រាបកុបកម្ម​ជា​ច្រើន​នាក់​​ត្រូវ​បាន​ដាក់​ពង្រាយ​តាម​បណ្ដោយ​មហា​វិថី​ព្រះ​នរោត្ដម នៅ​ជិត​អគារ​រដ្ឋ​សភាជាតិ​ និង​នៅ​ជុំវិញ​រមណីយដ្ឋាន​វត្តភ្នំ ដែល​នៅ​ទី​​នោះ​មាន​ការ​ប៉ះ​ទង្គិច​គ្នា​មួយ​បាន​កើត​ឡើង​កាល​ពី​យប់​ថ្ងៃ​​អាទិត្យ​ នៅ​ពេល​មនុស្ស​មួយ​ក្រុម​​​ភាគ​ច្រើន​ជា​ក្មេង​ទំនើង​​​ស្លៀក​ពាក់​ស៊ីវិល​ បាន​វាយ​ប្រហារ​លើ​ក្រុម​អ្នក​តវ៉ា​ប្រឆាំង​នឹង​ការ​បណ្ដេញ​ចេញ​ពី​ដី​ធ្លី ក្រុម​អ្នក​ឃ្លាំ​មើល​​​សិទ្ធិ​​​​មនុស្ស និង​អ្នក​យក​ព័ត៌មាន​ ខណៈ​ដែល​​​កម្លាំង​​​​កង​រាជ​អាវុធហត្ថ​បាន​ឈរ​មើល​ហេតុ​​​ការណ៍​នោះ​​។

លោក​ឧត្ដម​សេនីយ៍ទោ ខេង ទីតូ អ្នក​នាំ​ពាក្យ​កងរាជអាវុធហត្ថ​បាន​មាន​ប្រ​សាសន៍​ថា កង​កម្លាំង​ប្រដាប់​អាវុធ​​ជាង​មួយ​ពាន់​នាក់​ត្រូវ​បាន​ដាក់​ពង្រាយ​នៅ​ទូទាំង​រាជ​ធានី​ភ្នំ​ពេញ​ ដើម្បី​រក្សា​សុវត្ថិភាពជូន​តំណាង​រាស្រ្ត​មក​ពី​គណបក្សប្រ​ជាជន​កម្ពុជា​ ដែល​បាន​មក​ចូល​រួម​សម័យ​ប្រជុំ​សភាលើក​ដំបូង​​។
មន្ត្រី​តុលាការ​បាន​ឲ្យ​ដឹង​ថា​ ដំណើរ​ការ​​នៅ​ឯ​សាលាឧទ្ធរណ៍ និងតុលាការ​កំពូល​ ដែល​​​​មាន​ទីតាំង​នៅ​ជិត​ព្រះ​បរម​រាជវាំង​បា​ន​ត្រូវ​រាំង​ស្ទះ​ដោយសារ​​បុគ្គលិក​មិន​អាច​ចូល​ទៅ​កាន់​តុលាការ​ទាំង​ពី​រនេះ​បាន​។

លោក ឃឹម ប៉ុណ្ណ អនុ​ប្រធាន​តុលាការ​កំពូល​បាន​ថ្លែង​ថា “តុលាការ​កំពូល​មិន​បាន​ធ្វើការ​ទេ​ថ្ងៃ​នេះ​ ដោយសារតែ​មាន​ការ​បិទ​ផ្លូវ​ ហើយ​យើង​មិន​អាច​​ចូល​ទៅ​ធ្វើ​ការ​បាន​ទេ​”។

លោកស្រី​ សេង សុគន្ធ ក្រឡាបញ្ជី​សាលា​​​ឧទ្ធរណ៍ បាន​មាន​ប្រ​សាសន៍ថា​ គម្រោង​បើក​​សវនាការ​ត្រូវ​បានពន្យារ​ពេល​។

អ្នក​ធ្វើ​ដំណើរ​ដែល​មិន​សប្បាយ​ចិត្តបាន​រង់​ចាំ​ខណៈ​នគរបាល​ចរាចរដែល​ឈរ​ជើង​នៅ​តាម​មហាវិថី​ព្រះ​នរោត្ដមអនុញ្ញាត​​ឲ្យ​តែ​រថ​យន្ត​ណា​មាន​ស្លាក​សញ្ញា​គណបក្ស​ប្រ​ជា​ជន​កម្ពុជា​ប៉ុណ្ណោះ អាចឆ្លងកាត់​របាំង​​បាន ដែល​​ក្រសួង​មហាផ្ទៃ​​បាន​លើក​ឡើង​​ថា អាច​​​​នឹង​ដាក់​របាំង​បិទ​ផ្លូវ​នេះ​រហូត​ដល់​ថ្ងៃ​ពុធ​។

កញ្ញា នុត ស្រីនិត អាយុ​២២​ឆ្នាំ ជា​និស្សិត​សាកល​វិទ្យាល័យ​បៀល​ប្រាយ​ ដែល​មាន​ទី​តាំង​នៅ​ជិត​វិមាន​រដ្ឋ​សភា​នោះ មាន​បញ្ហា​ដោយ​សារ​ការ​បិទ​ផ្លូវ​នេះ ដោយ​ត្រូវ​ចំណាយ​​​​ពេល​យ៉ាង​​យូរ ហើយនាង​មិន​សប្បាយ​ចិត្ត​សោះ ព្រោះ​​នាង​ត្រូវ​​តែ​​រង់​ចាំ​អស់​រយៈ​ពេល​​​ជាច្រើន​​ម៉ោង​ក្នុង​ការ​ធ្វើ​ដំណើរ​ឆ្លង​កាត់​របាំង​​ផ្លូវ​​តែ​បួន​កន្លែង​ប៉ុណ្ណោះ។

កញ្ញា ស្រីនិត បាន​និយាយ​ថា​ “ខ្ញុំ​ត្រូវ​ទៅ​ដល់​សាលាដើម្បី​​ប្រឡង​នៅ​ពេលរសៀល​ ដូច្នេះ ខ្ញុំ​​ត្រូវ​​ស្រូតទៅ​​​បន្តិច ពីព្រោះ​ខ្ញុំ​បារម្ភ​ថា ពួកគេ​នឹង​​បិទ​ផ្លូវ​​ទៀត​។​ប៉ុន្តែ​ ឥឡូវ​នេះ​​ខ្ញុំ​បាន​ចំណាយ​ពេល​ប្រហែល​ពីរ​ម៉ោងក្នុង​ការ​ទើប​​​បាន​​​មក​ដល់​សាលា​នេះ​​​”។

លោក ស៊ិន ម៉េង អាយុ​២៩ឆ្នាំ បាន​និយាយ​​​​ថា​ លោកគ្រាន់​តែ​ធ្វើ​ដំណើរ​តែ​ពីរ​ប្លុក​ប៉ុណ្ណោះទៅកាន់​​ហាង​ The Warehouse ជា​ហាង​លក់ស្រាដែលស្ថិ​ត​​នៅ​តាម​បណ្ដោយ​ផ្លូវ​លេខ​២៤០​ដែល​លោកជា​អ្នក​គ្រប់​គ្រង​ហាងនោះ  ប៉ុន្តែ​ លោក​បាន​ចំណាយ​ពេល​រង់ចាំ​នៅ​ចំណុច​ប្រសព្វ​​ត្រង់​​មហាវិថី​ព្រះ​នរោត្ដម អស់​រយៈពេល​បី​ម៉ោង​ឯណោះ​។

លោក​ ស៊ិន ម៉េង បាន​មាន​ប្រសាសន៍​ថា “ខ្ញុំ​មិន​ចូលចិត្ត​បញ្ហា​កើត​​ឡើង​បែប​នេះ​ទេ​។​​​នៅ​ក្នុង​ឆ្នាំនេះ​ នេះ​ជា​លើក​ដំបូង​ហើយ​ដែល​​​​ជួប​បញ្ហា​បែប​នេះ​។ប្រសិន​បើ​មាន​បាតុកម្ម ពួកគេ​នឹង​បិទ​ផ្លូវ​ ប៉ុន្តែ បើមិន​មាន​បាតុកម្ម​ទេ អ៊ីចឹង​ពួក​គេគួរ​តែ​​បើក​ផ្លូវ។នោះហើយ​គឺ​ជា​អ្វីដែល​ពួក​គាត់​ព្រួយ​បារម្ភ​”។

ក្រសួង​មហាផ្ទៃបាន​ចេញសេចក្តីជូន​ដំណឹង​ស្នើ​ឲ្យ​ប្រ​ជា​ពលរដ្ឋ​មេត្តា​យោគ​យល់ និង​អត់​ធ្មត់​ “ចំ​ពោះ​ការ​ដាក់​បិទ​ផ្លូវ​នេះ​ដែល​នឹង​ត្រូវបិទ រហូត​ដល់​ថ្ងៃ​ពុធ”​។ ដោយ​ហៅ​បញ្ហាសន្តិសុខ​​ថា “​ជា​ការ​​​ចាំ​​​បាច់​”  នោះ​ ​ក្រសួង​មហាផ្ទៃ​បាន​លើក​ឡើង​​​​ថា ក្រសួង​ត្រូវ​ធានាថា “​​​សង្គម​កម្ពុជា​​ត្រូវ​មាន​​​​និរន្តរភាព​ ​ស្ថិរភាព​ និង​ការ​អភិវឌ្ឍ”៕

(រាយការ​បន្ថែម​ដោយ គីម ចាន់)
ប្រែសម្រួលដោយ ឃិន ណៃ​​​​​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស