27 C
Phnom Penh

គណបក្ស​សង្គ្រោះ​ជាតិ​​ចង់​បានតំណែង​​​​​​​​ប្រធានសភា​​មុន​ពេល​ទទួល​យក​អាសនៈ​ក្នុង​រដ្ឋ​សភា​

ដោយ ឌឹ ខេមបូឌា ដេលី

បទវិភាគ

នៅ​ពេល​គណបក្ស​ប្រជា​ជន​កម្ពុជាកំពុង​​កាន់​អំណាច​បោះឆ្នោត​​នៅ​ក្នុង​រដ្ឋ​សភា​​​​ដើម្បី​ជ្រើសរើស​ថ្នាក់​​​ដឹកនាំ​​​​​​​​​សភា និង​​រដ្ឋ​មន្ត្រី​​នៅ​ក្នុង​ជួរ​រដ្ឋាភិបាលរបស់​ខ្លួន​​​កាល​ពី​ម្សិលមិញ​ មន្ត្រី​មក​ពី​គណ​បក្ស​សង្គ្រោះ​ជាតិ​បាន​លើក​ឡើង​ថា សមា​ជិក​សភា​​មក​ពី​គណបក្ស​នេះ​​​​​​​​នឹង​មិន​ទទួល​​យក​អាសនៈ​របស់​ខ្លួន​នៅ​ក្នុង​សភា​ឡើយ​ លុះ​ត្រា​តែ​​គណបក្ស​នេះ​​​ទទួល​​​បាន​​​តំណែង​​​ជា​​​ប្រធាន​​​​សភា​។​

លោក​ សុន ឆ័យ​ ជា​​​ប្រធាន​ក្រុម​តំណាង​រាស្ត្រ​របស់​គណបក្ស​សង្គ្រោះ​ជាតិ​​បាន​​​លើក​ឡើង​កាល​ពី​ថ្ងៃ​​​ម្សិល​មិញ​ថា “ខ្ញុំ​គិត​ថា កិច្ច​ចរចា​​​រយៈ​ពេល​ពីរ​ថ្ងៃ​​​​​នោះ​​​ គឺ​ជា​ឱកាស​ចុង​ក្រោយ​សម្រាប់​គណបក្ស​ប្រជាជន​កម្ពុជា​​​​ក្នុងការ​​​ទទួល​យក​សំណើរបស់​យើង​ ប៉ុន្តែ​គេ​​​មិន​ចាប់​អារម្មណ៍​នឹង​សំណើ​នេះ​ឡើយ។​ ខ្ញុំ​ទទួល​បាន​ដំណឹង​ថា [ឥឡូវ​នេះ​ពួក​គេ​កំពុង​តែ​ហៅ​យើង​] ឲ្យ​ធ្វើ​សច្ចា​ប្រណិធាន​ ដើម្បី​ទទួល​យក​តំណែង​ជា​​សមាជិក​រដ្ឋ​សភា​​មុន​ពេល​​កិច្ច​ចរចា​​​​ថ្មីអាច​ចាប់​​ផ្ដើម​ ក៏​​​ប៉ុន្តែ​​រឿង​នេះ​​​​គឺ​មិន​អាច​ទទួល​​​យក​បាន​ទេ​”។ លោក​បាន​បន្ថែម​ថា  លោក​​​មិន​​​សូវ​​​មាន​​​ជំនឿ​​​​ថា គណ​​​បក្ស​ទាំង​ពីរ​​​​​​អាច​វិល​ត្រឡប់​​​​​ទៅ​​​កាន់​​​​តុ​ចរចា​​​វិញ​​​​ឡើយ​។

លោក​បាន​មាន​ប្រសាសន៍​ថា “គណបក្ស​​សង្គ្រោះ​ជាតិ​​នឹង​មិន​ចូល​រួម​ប្រជុំ​នៅ​​​រដ្ឋសភា​​​ឡើយ​ លុះ​ត្រា​តែ​ថ្នាក់​ដឹកនាំកំពូល​​​នៃ​​​គណ​​​បក្ស​​​ទាំងពីរ​​​​ព្រម​ព្រៀង​​​​គ្នា​ជា​មុន​សិន​ ប៉ុន្តែ​​រហូត​មក​ទល់​ពេល​នេះ​​​ [នៅ​មិន​ទាន់​មាន] ​កិច្ច​ព្រម​ព្រៀង​នៅ​ឡើយ​ទេ​ ហេតុដូច្នេះ​ខ្ញុំ​គិត​​​​ថា [យើង​នឹងមិន​ចូល​រួម​ប្រជុំ​នៅ​ក្នុង​សភាឡើយ​]”។ លោក​​បាន​មាន​ប្រសាសន៍​បន្ថែម​​​​ទៀត​​​​​​ថា​​​ “អាសនៈ​របស់​យើង​គឺ​ជា​របស់​យើង​។​ យើង​មិន​ចាំ​បាច់​ប្រញាប់​ធ្វើ​សច្ចាប្រណិធាន​ចូល​កាន់​តំណែង​និង​​​ផ្តល់​​​ភាព​​​ស្របច្បាប់​​​ដល់​​​​រដ្ឋាភិបាល​របស់​គណបក្ស​ប្រជាជន​កម្ពុជា​​​​​​ទេ​​​​យើង​នៅ​មាន​សិទ្ធិ​ និង​ពេល​វេលា​ ដើម្បី​ធ្វើ​ការ​តវ៉ា​ ពីព្រោះ​បញ្ហា​នេះ​ គឺ​មាន​សារៈ​សំខាន់​​​​ណាស់​សម្រាប់​​ប្រទេស​ជាតិ​”។ លោក​បាន​មានប្រសាសន៍​បន្ត​ទៀត​ថា “យើង​គួរ​តែ​ឈរ​លើ​ជំហរ​ដ៏​រឹង​មាំ​ ដើម្បី​ធ្វើ​ឲ្យ​ប្រទេស​ជាតិ​មាន​ការ​ផ្លាស់​ប្ដូរ​ គឺ​មិន​ត្រូវ​ព្រួយ​បារម្ភ​​​​តែ​​​ពី​អាសនៈ​របស់​ខ្លួន​ឡើយ​”។

ថ្លែង​ទៅ​កាន់​អ្នក​យក​ព័ត៌មាន​​​​ក្រោយ​​​​ការ​បោះឆ្នោត​​សម្រាប់​តំណែង​​នៅ​ក្នុង​រដ្ឋ​សភា​​កាល​ពី​ម្សិលមិញ​ លោក​នាយក​រដ្ឋ​មន្ត្រី​ ហ៊ុន សែន​ បាន​មានប្រសាសន៍​ថា ការ​​ទាម​ទារ​របស់​​​​​​​គណបក្សសង្គ្រោះ​ជាតិ​​​​​ដែល​ចង់​​​​​បាន​​​តំណែង​​​​ជា​ប្រធាន​​​​រដ្ឋ​សភា​នោះ​ គឺ​ជា​​​រឿង​​​​​​​ដែលមិន​​​​​​​​​​ធ្លាប់​​​​​មាន​​​នៅ​ក្នុង​ប្រព័ន្ធ​រដ្ឋ​សភា​។ លោក​ ហ៊ុន សែន​ បាន​សួរ​ថា “កិច្ច​ចរចា​​បាន​ជាប់​គាំង​ហើយ​​​ ប៉ុន្តែ​វា​មិន​អាច​ទៅ​រួច​ទេ​។​​​ តើ​​​​អស់​​​លោក​​​ធ្លាប់​​​​​ឃើញ​​​​គណបក្ស​​​ដែល​​​​​​មាន​​​​សំឡេង​ភាគ​តិច​​​​កាន់​​​តំណែង​​​​ជា​ប្រធាន​​រដ្ឋ​សភា​​​​​​​លើ​​​ពិភព​​​លោក​​​នេះ​​​ដែរ​​​​​​​ឬ​​​ទេ​​​?”។ លោក​បាន​មាន​ប្រសាសន៍​ថា “[កា​រ​ទាម​ទារ​របស់​​គណបក្ស​សង្គ្រោះ​ជាតិ​] គឺ​​ចង់​ធ្វើ​ជា​ប្រធានរដ្ឋ​សភា​… យើង​ផ្ដល់​តំណែង​​ជា​ប្រធាន​​គណៈកម្មការ​​ចំនួន​​​​៤និង​​​​​អនុ​ប្រធាន​​​គណៈ​​​កម្មការ​​​ចំនួន​​​​ប្រាំ​​​”។​

លោក​បាន​មាន​ប្រសា​សន៍​បន្ថែម​ថា ការ​ស្នើ​​របស់​គណបក្ស​សង្គ្រោះ​ជាតិ​ឲ្យ​មាន​ការ​ស៊ើប​អង្កេត​​ឯក​រាជ្យ​ចំពោះ​ភាព​មិន​ប្រក្រតី​​នៃការ​​​បោះ​ឆ្នោតត្រូវ​​​បាន​​ដក​ចេញ​​ពី​តុ​ចរចា​​នៅ​ថ្ងៃ​ទី​២ នៃ​កិច្ច​​​​ចរចា​​​​​​​។ លោ​ក ហ៊ុន សែន​ បាន​ថ្លែង​​ថា “យើង​នៅ​តែ​រក្សា​​ជំហរ​​​របស់​​​​​យើង​​ ប៉ុន្តែ​វា​​ហាក់​បី​ដូច​ជា​លំបាក​បន្ដិច​ហើយ​។ ខ្ញុំ​នឹង​ផ្ដល់​ [តំណែង​​​​​ជា​ប្រធាន​​គណៈកម្មការ​របស់​រដ្ឋសភា​] ប៉ុន្តែ​វា​ត្រូវ​តែ​ធ្វើ​ឡើង​ដោយ​មាន​ការ​បោះឆ្នោត​​​​​គាំទ្រ​​​ពី​​​​​​សមាជិក​​​សភា​​​គណបក្ស​​​ប្រជាជន​​​”។

ទោះបីជា​ការ​អះអាង​របស់​លោក​ ហ៊ុន សែន​ ជា​​​រឿង​​​ផ្ទុយ​ក្ដី​ តែ​គណបក្ស​ចាញ់​ឆ្នោត​​​​​ដែល​​​ទទួល​​​បាន​​​តំណែង​​​​ជា​ប្រធាន​រដ្ឋសភា​នេះ​​​​ គឺ​​​​​​ធ្លាប់​​​​កើត​​​មានរួច​​​ហើយ​​​​​។ កាល​ពី​ខែ​កក្កដា​ ឆ្នាំ​២០០៤ ព្រះ​អង្គ​ម្ចាស់​​នរោត្តម​ រណប្ញទ្ធិ ដែល​គណបក្ស​ហ៊្វុន​​​ស៊ិនប៉ិច​របស់​ព្រះ​អង្គ​​បាន​ចាញ់​គណបក្ស​ប្រជាជន​កម្ពុជា​​​​​ក្នុង​ការ​បោះឆ្នោត​ជា​តិ​​​​នោះ​​​ ត្រូវ​បាន​​ផ្ដល់​តំណែង​ជា​ប្រធាន​រដ្ឋសភា​​ជាង​​១១​ខែ​​ក្រោយ​​ពី​កា​រ​បោះឆ្នោត​​ គឺ​​​បន្ទាប់​ពី​​​ព្រះ​អង្គ​បាន​យល់​ព្រម​ចូល​រួម​នៅ​ក្នុង​រដ្ឋាភិ​បាល​ចម្រុះ​ជាមួយ​លោក​​ ហ៊ុន សែន​។

លោក​ស្រី​ ជូឡុង សូមូរ៉ា សមាជិក​សភា​​មក​ពី​គណបក្សសង្គ្រោះ​ជាតិ​ និង​ជា​​ភរិយា​របស់​​លោក​ សម រង្ស៊ី ជា​​​ប្រធាន​គណបក្ស​សង្គ្រោះ​ជាតិ​​ បាន​បដិសេធ​មិន​និយាយ​ថា តើ​នៅ​ពេល​ណា​សមាជិក​សភា​របស់​គណ​បក្ស​ប្រឆាំង​នឹង​ទទួល​យក​អាសនៈ​នៅ​ក្នុង​រដ្ឋ​សភា​ឡើយ​​ ប៉ុន្តែ​លោក​ស្រី​​​​​មាន​ប្រសា​សន៍​ថា អាសនៈ​ទាំង​នេះ​នឹង​ត្រូវ​បាន​បំពេញ​នៅ​ទី​​​បំផុត​​​។

លោក​ស្រី​បាន​ថ្លែង​ថា “អាសនៈ​ទាំង​នេះ​​​​​គឺ​បាន​មក​ពី​សំឡេ​ង​ឆ្នោត​​​​ដែល​​ប្រជា​ពលរ​ដ្ឋ​ខ្មែរ​​បោះឆ្នោត​គាំទ្រ​​ ហើយ​ប្រជា​ពល​រដ្ឋ​បាន​​​​បោះឆ្នោត​​ឲ្យ​បេក្ខជន​តំណាង​រាស្ត្រ​របស់​​​​​គណ​​​បក្សសង្គ្រោះជាតិ​​។ ហេតុ​ដូច្នេះ​ហើយ​​ អាសនៈ​​ទាំង​នេះ​ គឺ​ជា​អាសនៈ​​​​ដែល​គួរ​តែ​ត្រូវ​បាន​កាន់​កាប់​ដោយ​សមា​ជិក​សភា​របស់​គណបក្សសង្គ្រោះ​ជាតិ​”។

សមាជិក​​​សភា​​​​​​នៃ​​​គណបក្ស​​​សង្គ្រោះ​​​ជាតិ​​​​ផ្សេង​ៗ​ទៀត​​ក៏​បាន​ផ្តល់​​​​សញ្ញា​​​​ផង​​​ដែរ​ថា ការ​ធ្វើ​ពហិការ​មិន​ចូល​រួម​ប្រជុំ​សភា​​នេះគឺ​​​​​​មិន​​​​មែន​​​​​​ធ្វើ​​​ឡើង​​​រហូត​​​នោះ​ទេ​។
លោក​ អ៊ូ ច័ន្ទ​រិទ្ធ​ សមាជិក​សភា​មក​ពី​គណ​​​បក្ស​សង្គ្រោះ​ជាតិ​​បាន​មាន​ប្រសាសន៍​ថា នៅ​​​ពេល​គណបក្ស​ប្រជាជន​កម្ពុជា​​​​​​បោះ​​​ជំហាន​ទៅ​មុខ​នៅ​ក្នុង​ការ​បង្កើត​​រដ្ឋាភិ​បាល​នោះ​ គណបក្សសង្គ្រោះជាតិ​​​​ក៏​​​បាន​ “ផ្លាស់​ប្ដូរ​ជំហរ​របស់​ខ្លួន” ដែរ​​​ ប៉ុន្តែ​លោក​បាន​បដិសេធ​មិន​​​​បរិយាយ​​​​ថា តើ​​​អ្វី​ទៅ​ជា​ជំហរ​​ថ្មី​​របស់​គណ​បក្សសង្គ្រោះ​ជាតិ​​​​​ឡើយ​​។

លោក​បាន​លើក​ឡើង​ថា “ពួក​គេ​ [គណ​បក្ស​ប្រជាជន​កម្ពុជា​] មិនព្រម​​​​ឈប់​​ឡើយ​ ហេតុ​ដូច្នេះ​ហើយ​ យើង​ចាំបាច់​ត្រូវ​តែ​​ផ្លាស់​ប្ដូរ​ជំហរ​របស់​យើង​​។ ប្រសិន​បើ​គ្មាន​សម័យ​ប្រជុំ​ [នៅ​ក្នុង​រដ្ឋសភា​​​​​ទេ​​​នោះ​​​​] យើង​​នឹង​ផ្អាក​ ហើយ​ចរចា​។​ ប៉ុន្តែ​ថ្ងៃ​នេះ​ [គណបក្ស​ប្រជាជន​កម្ពុជា​] បាន​បើក​សម័យ​ប្រជុំ​ ហើយ​​ធ្វើ​ដំណើរ​ឆ្ពោះ​ទៅ​មុខ​”។

លោក​ សម រង្ស៊ី បាន​ប្រកាស​នៅ​លើ​ទំព័រ​ហ្វេសប៊ុក​របស់​លោក​កាល​ពី​ម្សិលមិញ​ថា គណបក្សសង្គ្រោះជាតិ​នឹង​បើក​សន្និសីទ​កាសែត​មួយ​នៅ​​ម៉ោង​៩ព្រឹក​នេះ “ដើម្បី​ថ្កោលទោស​​​​​ការ​ធ្វើ​​រដ្ឋប្រហារ​រដ្ឋធម្មនុញ្ញ​ពី​សំណាក់​គណបក្ស​ប្រជាជន​កម្ពុជា​”។

លោក​ កែម ឡី អ្នក​វិភាគ​នយោ​បាយ​ឯក រាជ្យ​បាន​មាន​ប្រសាសន៍​ថា ឱកាស​នៃ​កិច្ច​ចរចា​​​​លើក​ក្រោយ​​​រវាង​គណបក្ស​ទាំង​ពីរ​ គឺ​មាន​តិច​តួច​ណាស់​ ក៏​​​ប៉ុន្តែ​​​​ លោក​បាន​លើក​ឡើង​ថា  លោក​ជឿជាក់​ថា សមាជិក​សភា​របស់​គណបក្សសង្គ្រោះ​ជាតិ​​ នឹង​ទទួល​យក​អាសនៈ​របស់​ខ្លួន​នៅ​ក្នុង​រដ្ឋ​សភា​ក្នុង​ពេល​ឆាប់​ៗ ដើម្បី​​​​ពុះពា​​​រ​​​​​​ធ្វើ​​​យ៉ាងណា​​​​ឲ្យ​មាន​ការ​ធ្វើ​កំណែ​​​ទម្រង់​​នៅ​ក្នុង​រដ្ឋសភា​ ហើយ​​ឆ្លៀត​ឱកាស​នេះ​​បន្ត​​ដាក់​សម្ពាធ​​​​ទៅ​​​លើ​គណបក្ស​​​ប្រជា​​​ជន​​កម្ពុជា​តាម​រយៈ​មហាបាតុកម្ម​។ លោក​ កែម​ ឡី បាន​​​​មាន​​​ប្រសាសន៍​​​បន្ថែម​​​ថា “ពួក​គេ​នឹង​ចូល​រួម​នៅ​ក្នុង​រដ្ឋ​សភា ហើយ​នឹង​រួម​ដៃ​គ្នា​ ដើម្បី​​​​​​​ជំរុញ​ឲ្យ​មាន​កំណែ​ទម្រង់​​​​តាម​​​ការ​​​ចង់បាន​​​របស់​​​ខ្លួន​​​”៕

(រាយការណ៍​បន្ថែម​​ដោយ​ ហ៊ុល រស្មី, ឃួន ណារីម និង​ ផន បុប្ផា)
ប្រែសម្រួលដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស