មួយថ្ងៃបន្ទាប់ពីសភាបើកសម័យប្រជុំលើកដំបូងរបស់ខ្លួន ដែលមិនមានវត្តមានរបស់សមាជិកសភាជាប់ឆ្នោតទាំង៥៥រូបរបស់គណបក្សសង្គ្រោះជាតិនោះ រដ្ឋសភាថ្មីដែលមានគណបក្សតែមួយនេះបានបោះឆ្នោតគាំទ្រលោក ហ៊ុន សែន ឲ្យធ្វើជានាយករដ្ឋមន្ត្រីមួយអាណត្តិប្រាំឆ្នាំទៀត កាលពីម្សិលមិញ និងបានអនុម័តលើការរុះរើគណៈរដ្ឋមន្ត្រីដ៏ធំរបស់លោក។
នៅក្នុងការបោះឆ្នោតជាកញ្ចប់ដែលមានការអនុម័តយល់ព្រមជាឯកច្ឆន្ទ ពីសមាជិកសភាគណបក្សប្រជាជនកម្ពុជាទាំង៦៨រូបនេះ ក៏បានបោះឆ្នោតឲ្យលោក ហេង សំរិន អាយុ៧៩ឆ្នាំ ធ្វើជាប្រធានរដ្ឋសភាម្ដងទៀត និងបានបោះឆ្នោតបង្កើតក្រសួងថ្មីមួយគឺក្រសួងមុខងារសាធារណៈ ព្រមទាំងបង្កើតតួនាទីថ្មីចំនួន១៣សម្រាប់រដ្ឋមន្ត្រីប្រគល់ទៅឲ្យនាយករដ្ឋមន្ត្រីផងដែរ។
ដោយបានត្រឡប់មកកាន់តំណែងចាស់របស់លោកវិញ លោក ហេង សំរិន បានស្វាគមន៍សហការីនៅក្នុងគណបក្សប្រជាជនកម្ពុជារបស់លោកទាំងថ្មីទាំងចាស់ដែលបានត្រឡប់មកកាន់តួនាទីរបស់ខ្លួនវិញ។
លោក ហេង សំរិន បានមានប្រសាសន៍អំពីសមាជិកសភាមួយចំនួននៅក្នុងគណបក្សរបស់លោកថា “ឈ្មោះប្រធាន និងអនុប្រធានរដ្ឋសភា និងឈ្មោះសមាជិកគណៈកម្មការបច្ចេកទេសនៃរដ្ឋសភា និងឈ្មោះសមាជិករដ្ឋាភិបាលអាណត្តិទី៥នេះ ត្រូវបានរដ្ឋសភាអនុម័តយល់ព្រម ដោយសំឡេង៦៨លើ៦៨សំឡេង នៅថ្ងៃអង្គារ ទី២៤ ខែកញ្ញា ឆ្នាំ២០១៣”។
បន្ទាប់ពីសម័យប្រជុំរយៈពេលខ្លីលើកទី២ របស់រដ្ឋសភា រដ្ឋាភិបាលថ្មីនេះបានបញ្ចេញបញ្ជីឈ្មោះជាផ្លូវការនៃរដ្ឋមន្ត្រីថ្មីរបស់នាយករដ្ឋមន្ត្រី ដែលក្នុងនោះមានការផ្លាស់ប្ដូរថ្នាក់ដឹកនាំក្រសួងចំនួន១០ក្នុងចំណោមក្រសួងទាំង២៧។
លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្មត្រូវផ្លាស់ទៅក្រសួងឧស្សាហកម្ម រ៉ែ និងថាមពល ហើយលោក ស៊ុយ សែម អតីតរដ្ឋមន្ត្រីក្រសួងឧស្សាហកម្ម រ៉ែ និងថាមពល ពេលនេះគឺជាសមាជិករដ្ឋសភា។ លោក ស៊ុន ចាន់ថុល អតីតអគ្គលេខាធិការក្រុមប្រឹក្សាអភិវឌ្ឍន៍កម្ពុជា ឥឡូវនេះជារដ្ឋមន្ត្រីក្រសួងពាណិជ្ជកម្ម។
លោក អ៊ុក រ៉ាប៊ុន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ នឹងជំនួសលោក ច័ន្ទ សារុន ជារដ្ឋមន្ត្រីក្រសួងកសិកម្ម។ ឥឡូវនេះលោក ច័ន្ទ សារុន គឺជាទេសរដ្ឋមន្ត្រីទទួលបន្ទុកបេសកកម្មពិសេសនៅក្រោមលោក ហ៊ុន សែន ។
លោក អូន ព័ន្ធមុនីរ័ត្ន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ នឹងជំនួសលោក គាត ឈន់។ ពេលនេះលោក គាត ឈន់ គឺជាសមាជិករដ្ឋសភា និងជាឧបនាយករដ្ឋមន្ត្រី។ លោក ហង្ស ជួនណារ៉ុន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុនឹងជំនួសលោក អ៊ឹម សិទ្ធី រដ្ឋមន្ត្រីក្រសួងអប់រំ។ ពេលនេះលោក អ៊ឹម សិទ្ធី គឺជាសមាជិករដ្ឋសភា។
លោក ប្រាក់ សុខុន រដ្ឋលេខាធិការទីស្ដីការគណៈរដ្ឋមន្ត្រី នឹងជំនួសលោក សូរ ឃុន ជារដ្ឋមន្ត្រីក្រសួងប្រៃសណីយ៍ និងទូរគមនាគមន៍។ ពេលនេះលោក សូរ ឃុន គឺជាសមាជិករដ្ឋសភា។ លោក ភឿង សកុណា រដ្ឋលេខាធិការក្រសួងវប្បធម៌ និងវិចិត្រសិល្បៈ នឹងជំនួសលោក ហ៊ឹម ឆែម ជារដ្ឋមន្ត្រី។ លោក ហ៊ឹម ឆែម ក៏ក្លាយជាទេសរដ្ឋមន្ត្រីទទួលបន្ទុកបេសកកម្មពិសេសនៅក្រោមលោក ហ៊ុន សែន ផងដែរ។
លោក វង សូត រដ្ឋមន្ត្រីក្រសួងការងារ និងលោក អ៊ិត សំហេង រដ្ឋមន្ត្រីសង្គមកិច្ច និងប្ដូរក្រសួងគ្នា។ លោក ម៉ុក ម៉ារ៉េត រដ្ឋមន្ត្រីក្រសួងបរិស្ថានជំនួសដោយលោក សាយ សំអាល់ ដែលធ្លាប់ជាប្រធានគណៈកម្មការវិនិយោគរបស់រដ្ឋសភា។ ឥឡូវនេះលោក ម៉ុក ម៉ារ៉េត គឺជាសមាជិករដ្ឋសភា។
លោក ឈាង វុន សមាជិករដ្ឋសភាមកពីគណបក្សប្រជាជនកម្ពុជា និងជាអ្នកនាំពាក្យរដ្ឋសភាបាននិយាយជាមួយអ្នកយកព័ត៌មានថា ការដោះដូររដ្ឋមន្ត្រីមួយចំនួននេះគឺជាការឆ្លើយតបទៅតាមតម្រូវការរបស់ប្រជាជន។ លោកបាននិយាយថា “ពីរដ្ឋាភិបាលមួយអាណត្តិទៅរដ្ឋាភិបាលមួយអាណត្តិ និងពីរដ្ឋសភាអាណត្តិថ្មីនីមួយៗ ត្រូវតែមានការផ្លាស់ប្ដូរនៅក្នុងរដ្ឋាភិបាល។ វាមានន័យថា ការផ្លាស់ប្ដូរនេះគឺដើម្បីឆ្លើយតបទៅនឹងតម្រូវការរបស់ប្រជាជន”។
មុនពេលសម្រាកកិច្ចប្រជុំរដ្ឋសភារយៈពេលខ្លីនេះ លោក ហ៊ុន សែន ដែលបានកាន់អំណាចអស់រយៈពេល២៨ឆ្នាំមកហើយនេះ បានឡើងថ្លែងជាចុងក្រោយអំពីអវត្តមានគួរឲ្យកត់សម្គាល់នៃសមាជិកសភាជាប់ឆ្នោតទាំង៥៥រូបរបស់គណបក្សសង្គ្រោះជាតិ ពីកិច្ចប្រជុំសភានេះ។
គណបក្សសង្គ្រោះជាតិ កំពុងធ្វើពហិការមិនចូលរដ្ឋសភា ដើម្បីតវ៉ានឹងលទ្ធផលផ្លូវការនៃការបោះឆ្នោតកាលពីថ្ងៃទី២៨ ខែកក្កដាដែលខ្លួនអះអាងថា ត្រូវបានលួចបន្លំដើម្បីធ្វើឲ្យគណបក្សប្រជាជនកម្ពុជាឈ្នះ និងអះអាងថា ខ្លួនជាអ្នកឈ្នះពិតប្រាកដ។សមាជិកសភាជាប់ឆ្នោតទាំង៥៥រូបរបស់គណបក្សនេះបានធ្វើដំណើរទៅក្រុងសៀមរាបរង់ចាំឲ្យព្រះមហាក្សត្រ នរោត្តម សីហមុនី បញ្ចប់ការបើកសម័យប្រជុំសភានេះ ហើយកាលពីថ្ងៃច័ន្ទ គណបក្សសង្គ្រោះជាតិ បានចាត់ទុករដ្ឋសភាថ្មីនេះថា មិនស្របតាមរដ្ឋធម្មនុញ្ញ។
លោក ហ៊ុន សែន បានច្រានចោលការអះអាងនេះ។ លោកមានប្រសាសន៍ថា “យើងទាំងអស់គ្នានៅទីនេះមិនមែនជាចំណាប់ខ្មាំងរបស់ក្រុមណាមួយទេ ពីព្រោះយើងបានមកបំពេញភារកិច្ចរបស់យើងទៅតាមរដ្ឋធម្មនុញ្ញ។ ពួកគេនិយាយថា រដ្ឋសភាឯកបក្ស ហើយកិច្ចប្រជុំរបស់យើងខុសច្បាប់ ប៉ុន្តែទា្វរទាំងអស់នៅជាន់ក្រោម និងនៅក្នុងអគារនេះមិនបានចាក់សោរារាំងសមាជិកដែលមកពីគណបក្សនយោបាយមួយទៀតមិនឲ្យចូលរួមកិច្ចប្រជុំនេះទេ”។
នាយករដ្ឋមន្ត្រីរូបនេះបានបន្តថា “ពួកគេដើរចេញដោយខ្លួនឯង បើអ៊ីចឹងមានន័យថា តើយើងគួរទៅខេត្តសៀមរាប ដើម្បីចូលរួមជាមួយពួកគេនៅទីនោះឬ? ឬយើងគួរចូលមកក្រោមដំបូលរដ្ឋសភា? រដ្ឋធម្មនុញ្ញចែងថា កិច្ចប្រជុំសភាត្រូវស្ថិតនៅក្រោមអធិបតីភាពរបស់ព្រះមហាក្សត្រ ហើយកន្លែងប្រជុំសភាត្រូវស្ថិតនៅភ្នំពេញ លើកលែងតែមានករណីពិសេស”។
រួមជាមួយនឹងការបោះឆ្នោតតែងតាំងនាយករដ្ឋមន្ត្រី តែងតាំងប្រធានរដ្ឋសភា និងការដោះដូររដ្ឋមន្ត្រីនោះ ការបោះឆ្នោតកាលពីម្សិលមិញនេះ ក៏បានបោះឆ្នោតផ្លាស់ប្ដូររដ្ឋលេខាធិការដ្ឋានមុខងារសាធារណៈនៃទីស្ដីការគណៈរដ្ឋមន្ត្រី ដែលទទួលបន្ទុករៀបចំការងារ និងប្រាក់ខែរបស់មន្ត្រីរាជការនោះទៅជាក្រសួងមុខងារសាធារណៈផងដែរ ដែលត្រូវដឹកនាំដោយលោក ពេជ្រ ប៊ុនធិន រដ្ឋលេខាធិការនៃរដ្ឋលេខាធិការដ្ឋាននេះតែម្ដង។
រដ្ឋសភាក៏បានបង្កើតតួនាទីថ្មីចំនួន១៣ សម្រាប់រដ្ឋមន្ត្រីប្រគល់ឲ្យនាយករដ្ឋមន្ត្រីផងដែរ ដែលតួនាទីទាំងនេះធ្លាប់ស្ថិតនៅក្រោមក្រសួងនីមួយៗរៀងៗខ្លួន ហើយនឹងទទួលខុសត្រូវចំពោះវិស័យមួយចំនួនដែលស្ថិតនៅក្រោមការគ្រប់គ្រងដោយផ្ទាល់របស់លោក ហ៊ុន សែន។
យោងតាមឯកសារដែលត្រូវបានផ្សព្វផ្សាយកាលពីម្សិលមិញ លោក ហ៊ុន សែន ក៏មានឧបនាយករដ្ឋមន្ត្រីតិចជាងមុនដែរ គឺមានតែប្រាំបួនរូបប៉ុណ្ណោះ។
ឈ្មោះរបស់លោក គង់ សំអុល រដ្ឋមន្ត្រីក្រសួងព្រះបរមរាជវាំងក៏បាត់ពីបញ្ជីឈ្មោះឧបនាយករដ្ឋមន្ត្រីទាំង១១នេះដែរ ហើយលោក ញឹក ប៊ុនឆៃ អគ្គលេខាធិការគណបក្សហ្វ៊ុនស៊ិនប៉ិច ដែលគណបក្សរបស់លោកមិនទទួលបានមួយអាសនៈសោះនៅក្នុងការបោះឆ្នោតកាលពីខែកក្កដានេះក៏បាត់ឈ្មោះពីតំណែងឧបនាយករដ្ឋមន្ត្រីដែរ និងគ្មានតួនាទីផ្សេងទៀតនៅក្នុងរដ្ឋាភិបាលទេ។ លោក ហ៊ុន សែន នឹងធ្វើជាអធិបតីក្នុងកិច្ចប្រជុំគណៈរដ្ឋមន្ត្រីរបស់លោកនៅថ្ងៃនេះ៕
ប្រែសម្រួលដោយ មូល គឹមហឿន