28 C
Phnom Penh

តុលាការ​កំពូលសម្រេច​ដោះលែង​ជន​ជាប់​ចោទ​សម្លាប់លោក​ ជា​ វិជ្ជា

ដោយ ឌឹ ខេមបូឌា ដេលី

បទវិភាគ

លោក​ ប៊ន សំណាង និង លោក​ សុខ សំអឿន ដែល​ត្រូវ​បាន​​ផ្តន្ទា​ទោស​មិន​ត្រឹម​ត្រូវ​ដាក់​ពន្ធនាគារ​២០​ឆ្នាំ ពីបទ​សម្លាប់​ លោក ជា​ វិជ្ជា មេ​ដឹក​នាំ​សហជីព​សេរី​កម្មករកាលពីឆ្នាំ​២០០៤​នោះ ត្រូវ​បាន​តុលាការ​កំពូលសម្រេច​ឲ្យ​រួ​ចទោស​ កាល​ពីម្សិលមិញ​។

លោក សុខ សំ​អឿន​​​ (ឆ្វេង) និងលោក ប៊ន សំណាង (ស្តាំ)​ ដែល​ត្រូវ​បាន​​តុលាការផ្តន្ទា​ទោស​​ដាក់​ពន្ធនាគារ​២០​ឆ្នាំ ពីបទ​សម្លាប់​ លោក ជា​ វិជ្ជា មេ​ដឹក​នាំ​សហជីព​សេរី​កម្មករកាលពីឆ្នាំ​២០០៤​។​​​​​​​ តុលាការ​​​កំពូល​​​បាន​​​​សម្រេច​​​លើក​​​លែង​​​ការ​​​ចោទ​​​ប្រកាន់​​​ និង​​​បង្គាប់​​​ឲ្យ​​​ដោះ​លែង​កាល​ពី​ម្សិញ​មិញ​។ (ស៊ីវ ចាន់ណា)
លោក សុខ សំ​អឿន​​​ (ឆ្វេង) និងលោក ប៊ន សំណាង (ស្តាំ)​ ដែល​ត្រូវ​បាន​​តុលាការផ្តន្ទា​ទោស​​ដាក់​ពន្ធនាគារ​២០​ឆ្នាំ ពីបទ​សម្លាប់​ លោក ជា​ វិជ្ជា មេ​ដឹក​នាំ​សហជីព​សេរី​កម្មករកាលពីឆ្នាំ​២០០៤​។​​​​​​​ តុលាការ​​​កំពូល​​​បាន​​​​សម្រេច​​​លើក​​​លែង​​​ការ​​​ចោទ​​​ប្រកាន់​​​ និង​​​បង្គាប់​​​ឲ្យ​​​ដោះ​លែង​កាល​ពី​ម្សិញ​មិញ​។ (ស៊ីវ ចាន់ណា)

ឆ្លើយ​តប​ទៅ​នឹង​ការ​សម្រេច​ឲ្យ​រួច​ទោស​នេះ​ លោក ជា មុនី ប្អូន​ប្រុស​របស់​លោក ជា វិជ្ជា បាន​មាន​ប្រសាសន៍​ថា រដ្ឋា​ភិបាលជា​អ្នក​​ទទួល​ខុស​ត្រូវ​ចំពោះ​ការ​រៀប​ចំ​ការ​ធ្វើ​ឃាត​បង​ប្រុស​របស់​គាត់​ និងចំពោះ​ការបិទ​បាំង​រឿង​នេះ​។ សំណើ​ចុង​ក្រោយ​របស់បុរស​ទាំង​ពីរ​នាក់​សុំ​ឲ្យ​មាន​ការ​ដោះ​លែង​ បន្ទាប់​ពី​បាន​ជាប់​ពន្ធនាគារ​អស់​រយៈ​ពេលប្រាំ​ឆ្នាំ​ ត្រូវ​បានលើក​យក​មក​ពិភាក្សានៅ​តុលាការ​កំពូល​កាល​ពី​ម្សិល​មិញ​។

តុលាការ​កំពូលបាន​បញ្ជូនរឿង​ក្តី​របស់​បុរស​ទាំង​ពីរ​ទៅ​ឲ្យ​សាលា​ឧទ្ធរណ៍​វិញ​កាល​ពី​ឆ្នាំ​២០០៨ សម្រាប់ធ្វើ​ការ​ស៊ើប​អង្កេត​ឡើង​​វិញ​ ដោយ​សារ​ខ្វះភ័ស្តុតាង​។ ប៉ុន្តែ សាលា​ឧទ្ធរណ៍​បាន​ផ្តន្ទា​ទោស​បុរស​ទាំងពីរ​នាក់​ឡើង​វិញ​ កាល​ពីខែ​ធ្នូ ឆ្នាំ​២០១២ ពី​បទ​ឃាតកម្ម​នេះ។

ការ​សម្រេច​ឲ្យ​ សុខ សំអឿន និង​ ប៊ន សំណាង​ រួច​ទោស​នេះ​ មានន័យ​ថា ឃាតករ​សម្លាប់​ លោក ជា​ វិជ្ជា ពិត​ប្រាកដ​មិន​ទាន់​ចាប់​ខ្លួន​បាន​ទេ​ជិត​មួយ​ទសវត្សរ៍​ បន្ទាប់​ពី​ការ​សម្លាប់​នេះ ដែលបានកើត​ឡើង​ទាំង​កណ្តាល​​ថ្ងៃ​នៅពេលដែល​គាត់​អានកាសែត ខេម​បូឌា ដេលី នៅ​ខាង​ក្រៅ​វត្តលង្កា​នៅក្នុង​រាជ​ធានី​ភ្នំពេញ​ កាល​ពី​ថ្ងៃ​ទី​២២ ខែ​មករា ឆ្នាំ​២០០៤​។

លោក ឃឹម ប៉ុណ្ណ ចៅ​ក្រម​ជំនុំ​ជម្រះ​បាន​ប្រកាស​បន្ទាប់​ពី​ការ​ពិចារណា​អស់​រយៈ​ពេល​មួយ​ម៉ោង​ ក្រោយពី​បើក​សវនាការ​រយៈ​ពេល​បី​ម៉ោង​ប្រកប​ដោយ​អារម្មណ៍​រំជើប​រំជួល​នោះថា “តុលាការ​កំពូល​សម្រេច​លើក​លែង​ការ​ចោទ​ប្រកាន់​លើ ប៊ន សំណាង និង​ សុខ សំអឿន”។ ចៅ​ក្រម​រូប​នេះ​បាន​និយាយ​ថា “សូម​ដោះ​លែង​ ប៊ន សំណាង និង​ សុខ​ សំអឿន ប្រសិន​បើ​ជនទាំង​ពីរ​នាក់​នេះ​មិន​ត្រូវ​ឃុំ​ខ្លួន​ពីបទ​ឧក្រិដ្ឋ​ផ្សេង​ទេ​។ តុលាការ​កំពូល​ច្រាន​ចោល​សាល​ដីការបស់​សាលា​ឧទ្ធរណ៍​កាល​ពី​ថ្ងៃ​ទី​២៧​ ខែ​ធ្នូ ឆ្នាំ​២០១២”។

ទោះ​ជា​យ៉ាងណា លោក​ចៅក្រម ឃឹម ប៉ុណ្ណ មិនមាន​សង្ឃឹម​ថា បុរស​ទាំង​ពីរ​នឹង​ទទួល​បាន​សំណង​ចំពោះ​ការ​ជាប់​ទោស​រយៈ​ពេល​ប្រាំ​ឆ្នាំ​របស់​ខ្លួន​ទេ ដោយ​លោក​លើក​ឡើង​ពី​មាត្រា​២៣ នៃ​ក្រម​នីតិ​វិធី​ព្រហ្ម​ទណ្ឌ ហើយ​បាន​អះ​អាង​ថា ​មិនមាន​ការ​​បង្ហាញ​ថា បុរស​ទាំង​ពីរ​នាក់​​បាន​ទទួល​រង​​របួស​​ ដោយ​សារ​ការ​ឃុំខ្លួន​ខុស​រយៈ​ពេល​ប្រាំ​ឆ្នាំ​នេះ​ទេ​។

បន្ទាប់​ពី​ការប្រកាស​សាល​ដីកា​​នេះ​ មាន​​​ការ​​ទះ​ដៃ​ស្រែក​អប​អរ​សាទរ​នៅក្នុង​សាល​សវនា​ការ​ ហើយ ប៊ន សំណាង អាយុ​៣៣​​ឆ្នាំ និង សុខ សំអឿន អាយុ៤៥​ឆ្នាំ បាន​ឱន​ក្រាប​ទៅ​លើ​ឥដ្ឋ​នៅ​ចំពោះ​មុខ​ចៅ​ក្រម​ទាំង​ប្រាំ​បួន​រូប​។ ប៊ន សំណាង ដែល​មាន​អារម្មណ៍​ធូរ​ស្រាល និង​សប្បាយ​រីក​រាយ​បាន​និយាយ​អំពី​សមាជិក​ជាន់​ខ្ពស់​នៃ​គណ​បក្ស​ប្រជា​ជន​កម្ពុជា​ ដែល​អ្នក​រិះគន់​​បានរិះ​គន់​ជា​យូរ​មក​ហើយ​ថា ជា​អ្នក​គ្រប់​គ្រង​លើ​​ការ​ងារ​របស់​តុលាការ​នោះថា “ខ្ញុំ​សប្បាយ​ណាស់ ហើយ​ខ្ញុំ​សូម​អរ​គុណ​តុលា​ការ​ដែល​បាន​ដោះ​លែង​ខ្ញុំ។ ខ្ញុំ​សូម​អរគុណ​សម្តេច​យាយ ព្រះ​មហា​ក្សត្រ សម្តេច ជា ស៊ីម សម្តេច ហ៊ុន សែន និង សម្តេច​ ហេង សំរិន”។

អ្នក​ស្រី នួន គឹមស្រ៊ី ​​អាយុ​៥២​ឆ្នាំ ជា​ម្តាយ​​​របស់​ ប៊ន សំណាង និង​ លោកមេធាវី ជុំ សុវណ្ណាលី ​បាន​និយាយ​ថា នៅ​ទី​បញ្ចប់​បុរស​ទាំងពីរ​នាក់​នេះ​បានទទួល​យុត្តិ​ធម៌​ហើយ​។ លោក សុវណ្ណាលី បានមាន​ប្រសាសន៍​ថា “ខ្ញុំគិតថា រដ្ឋា​ភិបាល​ជាអ្នក​ទទួ​ល​ខុស​ត្រូវ​ចំពោះ​ការ​ផ្តល់​សំណង​ខូច​ខាត​ដល់​ពួក​គេ​ ពីព្រោះ​ពួក​គេ​ត្រូវ​បាន​ចាប់​ដាក់​ពន្ធនា​គារ”​។

ប៉ុន្តែ លោក ចៅ​ក្រម ឃឹម ប៉ុណ្ណ បាន​បញ្ជាក់​យ៉ាង​ច្បាស់​នៅ​ក្នុង​សាល​ដីការបស់​លោក​ថា មិនមាន​សំណង​ដល់​បុរស​ទាំង​ពីរនាក់​ ដែល​បាន​ជាប់​ពន្ធនាគារ​ម្នាក់​ប្រាំ​ឆ្នាំ​ពី​បទ​ឧក្រិដ្ឋ​ដែល​ពួក​គេ​មិន​បាន​ប្រព្រឹត្តនេះ​ទេ។

សុខ សំអឿន បាន​និយាយថា “ ខ្ញុំ​សូម​អរគុណ​តុលាការ​កំពូល​​ដែល​បាន​ដោះ​លែង​ខ្ញុំ​ ដូច្នេះ​​ខ្ញុំ​នឹង​ប្រាប់​ពិភព​លោក​ថា កម្ពុជា​មាន​យុត្តិ​ធម៌​ម្តង​ទៀត​​ហើយ​”។ ប្រពន្ធ​របស់​គាត់​ដែល​ពកូន​ស្រីអាយុ​៣​ឆ្នាំរបស់​ពួក​គេ ក៏​បាន​និយាយ​អំពី​អារម្មណ៍​ធូរ​ស្បើយ​របស់​អ្នក​ស្រី​ដែរ ហើយ​បាន​និយាយ​ថា តុលាការ​បាន​រក​យុត្តិ​ធម៌​ឲ្យ​ប្តី​របស់​គាត់​ដែល​រងគ្រោះ​ជាយូរ​មក​ហើយ​នេះ​។

លោក ហុង គឹមសួន មេ​ធាវី​របស់​ សុខ សំអឿន បាន​មានប្រសាសន៍​ថា តុលាការ​មាន​ហេតុ​ផល​នៅក្នុង​ការ​កែ​ប្រែ​សេចក្តី​សម្រេច​របស់​តុលាការ​ជាន់​ទាប។លោក គឹមសួន បាន​មាន​ប្រសាសន៍​ថា “ការ​ប្រកាស​សាល​ដីកានៅថ្ងៃ​នេះ​បង្ហាញ​ថា ប៊ន សំណាង និង សុខ សំអឿន មិន​មាន​ទោស​ពី​បទ​ឃាត​កម្ម​គិត​ទុក​មុន​លើ​ លោក ជា វិជ្ជា​ នោះ​ទេ​”។ លោក​បាន​បន្ថែម​ថា តុលាការ​ជាន់​ទាប​មានកំហុស​នៅ​ក្នុងការ​កាត់​ទោស​បុរស​ទាំង​ពីរ​នាក់​តាំង​ពីដំបូង។

លោក ជា មុនី ប្អូន​ប្រុស​របស់​លោក ជា​ វិជ្ជា​ ដែល​បាន​ជាប់​ឆ្នោត​ជា​មេ​ដឹកនាំ​សហ​ជីព​សេរី​កម្មករ បន្ទាប់​ពី​ការ​ធ្វើ​ឃាត​បង​ប្រុស​របស់​គាត់​តែង​តែ​អះ​អាង​ថា បុរស​ទាំង​ពីរ​នេះ​ត្រូវ​បាន​គេ​ទម្លាក់​កំហុស​ចំពោះ​ឃាត​កម្ម​នេះ​ ហើយ​ថា ការ​សម្រេច​ដោះ​លែង​ពួក​គាត់​មានន័យ​ថា មាន​សំណួរ​ថ្មី​ដែល​ត្រូវ​សួរ​ថា តើ​ហេតុ​អ្វី​បាន​ជា​មិន​ដែល​ចាប់​ខ្លួន​ឃាតករ​ពិត​ប្រាកដ​យក​មក​ផ្តន្ទា​ទោស​។

លោក​បាន​មាន​ប្រសាសន៍​ថា “១០​ឆ្នាំ​មក​ហើយ តុលាការ​រក​ឃាតករ​ពិត​ប្រាកដ​មិន​ឃើញ​ទេ។ នេះ​គឺ​ជា​ភាព​ទន់​ខ្សោយ​របស់​រដ្ឋា​ភិបាល និង​តុលាការ​”។ លោក​បាន​មាន​ប្រសាសន៍​ថា “ នេះ​គឺ​ជា​កាតព្វកិច្ច​របស់​រដ្ឋា​ភិបាល និង​តុលាការ​ក្នុង​ការ​ស្វែង​រក​ឃាតករ​ពិត​ប្រាកដ​។ ជា​យូរ​មក​ហើយ​ខ្ញុំ​មិន​ដែល​គិត​ថា ប៊ន សំណាង និង​ សុខ​ សំអឿន ជាឃាតករ​នោះ​ទេ។ ពេល​នេះ​ រដ្ឋា​ភិបាល​​ចាញ់​ក្នុង​រឿង​ក្តី​នេះ ពី​ព្រោះ​ខ្លួន​មិន​អាច​ស្វែង​រក​ពិរុទ្ធ​ជន​ពិត​ប្រាកដ​ ប៉ុន្តែ រដ្ឋា​ភិបាល​នៅ​ពី​ក្រោយ​ការ​សម្លាប់​បង​ប្រុស​របស់​ខ្ញុំ”។

នៅ​ក្នុង​តុលាការ​​ លោក ឃឹម ប៉ុណ្ណ បាន​បញ្ជាក់​នូវ​អ្វី​ដែល​គេ​តែង​តែ​និយាយ​ថា រឿង​​ក្តី​ប្រឆាំង​នឹង​បុរស​ទាំងពីរ​​មិន​មាន​ភ័ស្តុតាង​រឹង​មាំ​គ្រប់​គ្រាន់​ ចម្លើយ​សាក្សី​មិន​ត្រឹម​ត្រូវ​ និង​ការ​មិន​ពិចារណា​ព​ី​ការ​លើក​ឡើង​ថា ​​បុរស​ទាំង​ពីរ​​មិន​ស្ថិត​នៅ​កន្លែង​កើត​ហេតុ។ លោក​មាន​ប្រសាសន៍​ថា “មាន​សាក្សី​ជា​ច្រើន​បញ្ជាក់​ថា នៅ​ពេល​គេ​សម្លាប់​ លោក ជា វិជ្ជា នោះ​ ប៊ន សំណាង និង​ សុខ សំអឿន​ មិន​ស្ថិត​នៅ​​កន្លែង​កើតហេតុ​ទេ ដូច្នេះ​ពួក​គេ​​​​មិន​មែន​ជា​ឃាតករ​ឡើយ”។ លោក​បាន​​​​បន្ថែម​ថា សាក្សី​ម្នាក់​បាន​រាយការណ៍​មិន​ពិត​អំពី​ប្រភេទ​ម៉ូតូ​ដែល​ឃាតករ​ជិះ​។

សាក្សី​ឈ្មោះ ហ៊ាង ម៉េងហួត ក៏​បាន​ឆ្លើយ​អំឡុង​ពេល​បើក​សវនាការ​ជំនុំ​ជម្រះ​រឿង​ក្តី​បុរស​ទាំង​ពីរ​ដែរ​ថា គាត់​ស្ថិត​នៅ​ជាមួយ​ សុខ សំអឿន នៅ​កន្លែង​មួយ​ទៀត​ក្នុង​ក្រុង​នៅ​ពេល​ដែល​ឃាតកម្ម​នេះកើត​ឡើង​។ សាក្សី​ឈ្មោះ រស់ រ៉ន បាន​និយាយថា នៅ​ពេល​នោះដែរ ប៊ន សំណាង បាន​ជិះ​តាក់​ស៊ី ចេញ​ពី​រាជ​ធានី​ភ្នំពេញ​មួយ​ថ្ងៃ​មុន​ពេល​ឃាតកម្ម​នេះ​កើត​ឡើង​។

សុខ​ សំអឿន បាន​អះ​អាង​ពី​ភាព​គ្មាន​ទោស​របស់​គាត់​តាំង​ពី​ដំបូង។ ប៊ន សំណាង បានសារភាព​ពី​ដំបូង ប៉ុន្តែ បាន​ប្រាប់​តុលាការ​កំពូល​កាល​ពីឆ្នាំ​២០០៨​ថា ការ​សារភាព​នេះ​មិន​ពិត​ទេ​ ពីព្រោះ​គាត់​ឆ្លើយ​សារភាព​ដោយ​សារ​នគរ​បាល​ដែល​បាន​ឃុំ​ខ្លួន​គាត់​នោះ​វាយ​គាត់​។ អង្គការ​សិទ្ធិ​មនុស្ស​បាន​ស្វាគមន៍​សេចក្តី​សម្រេច​នោះ ប៉ុន្តែ បាន​ទាម​ទារ​ឲ្យ​​មាន​ការ​ស៊ើប​អង្កេត​ឲ្យ​បាន​ហ្មត់​ចត់​ ដើម្បី​នាំ​យក​ឃាតករ​ពិត​ប្រាកដ​មក​ផ្តន្ទា​ទោស​។

នៅ​ក្នុង​សេចក្តី​ថ្លែងការណ៍​រួម​មួយ​ ការិ​យាល័យ​ស្នង​ការ​ជាន់​ខ្ពស់​អង្គការ​សហ​ប្រជា​ជាតិ​ទទួល​បន្ទុក​សិទ្ធិ​មនុស្ស​ និង​អង្គការ​ពល​កម្ម​អន្តរ​ជាតិ​បាន​លើក​ឡើង​ថា ខណៈ​ដែល​ពួក​គេ​ស្វាគមន៍​ការ​សម្រេច​ឲ្យ​រួច​ទោស និង​ការ​ជិតដោះ​លែង​បុរស​ទាំងពីរ​នាក់​នេះ ពួក​គេ​បាន​លើក​ឡើង​សាជា​ថ្មី​អំពី​ការ​ទាម​ទារ​របស់​​ស្ថាប័ន​គ្រប់​គ្រង​អន្តរ​ជាតិ​​ឲ្យ​មាន​ការ​ស៊ើប​អង្កេត​ហ្មត់​ចត់​លើ​ការ​សម្លាប់​លោក ជា វិជ្ជា ដើម្បី​ធានា​ថា យក​ឃាតករ​ពិត​ប្រាកដ​​មក​​ផ្តន្ទា​ទោស។

អង្គការ​សិទ្ធិ​មនុស្ស​លីកាដូ​បាន​ចេញសេក្តី​ថ្លែង​ការណ៍ចុះ​ហត្ថ​លេខា​រួម​គ្នា​ដោយ​អង្គ​ការ​ក្រៅ​រដ្ឋា​ភិបាល​ប្រាំបួន​ផ្សេង​ទៀត ដែល​លើក​ឡើង​ថា ការ​សម្រេច​ឲ្យ​រួច​ទោស​នេះ​គួរ​តែ​ធ្វើ​ជា​យូរ​មក​ហើយ​ ហើយ​ត្រូវ​តែ​មាន​ការ​ផ្តល់​សំណង​។

លោក​ស្រី ណាលី ពីឡូក នាយិកា​អង្គការ​លីកាដូ​បាន​មាន​ប្រសាសន៍ថា “ ប៊ន សំណាង​ និង សុខ សំអឿន បាន​បាត់​សិទ្ធិ​សេរី​ភាព​របស់​ខ្លួន និង​បាន​បែក​ពី​ក្រុម​គ្រួសារ​អស់​រយៈ​ពេល​ជា​ច្រើន​ឆ្នាំ​ និង​ត្រូវ​បាន​ផ្តន្ទា​ទោស​ដោយ​​​​មិន​ត្រឹម​ត្រូវ​តាំងពី​ឆ្នាំ​២០០៥​មក​។ ដូច្នេះ ពួក​គាត់​គួរ​តែ​ទទួលបាន​សំណង​ចំពោះ​អំពើ​អយុត្តិធម៌​នេះ”។

លោក មឿន តុលា​ ប្រធាន​កម្ម​វិធី​ការ​ងារ​នៅ​មជ្ឈមណ្ឌល​អប់រំ​ច្បាប់​សម្រាប់​សហ​គមន៍​​​​បាន​មាន​ប្រសាសន៍ថា ការ​បើក​ការ​ស៊ើប​អង្កេត​​​​កាលពី​ពេល​ថ្មីៗ​លើ​​ការ​សម្លាប់​លោក ជា វិជ្ជា ​​​នឹង​ជួយ​ “ ប្រយុទ្ធ​ប្រឆាំង​និទណ្ឌភាព​ដ៏រាល​ដាលនៅ​ក្នុង​ព្រះ​រាជ​ាណា​ចក្រ​កម្ពុជា​”។

ប៊ន សំណាង​ និង ​សុខ​ សំអឿន ត្រូវ​បាន​ចាប់​ខ្លួន​រយៈពេល​ប៉ុន្មាន​ថ្ងៃ​ប៉ុណ្ណោះ​បន្ទាប់ពី​ការ​សម្លាប់​នោះ​ ហើយ​រឿងក្តី​នេះ​ត្រូវ​បាន​បញ្ជូន​ទៅ​ធ្វើ​ការជំនុំ​ជម្រះ​​ឡើង​វិញ ប៉ុន្តែ​ត្រូវ​បាន​ច្រានចោល​កាល​ពី​ថ្ងៃ​ទី​១៩ ខែ​មីនា​​​ ឆ្នាំ​២០០៤ដោយ​លោក ហ៊ីង ធីរិទ្ធិ ដែល​ពេលនោះ​ជា​ចៅ​ក្រម​សាលា​ដំបូង​រាជ​ធានី​ភ្នំពេញ​ ដែល​បាន​លើក​ឡើង​ថា ខ្វះ​​​ភ័ស្តុតាង។

លោក មឿន តុលា​ បាន​និយាយពី​រឿង​រ៉ាង​ដែល​​គេ​ដក​ចៅក្រម​ ហ៊ីង​​ ធីរិទ្ធិ ថា “ប៉ុន្មាន​​​​ថ្ងៃ​ក្រោយ​មក លោក​​ត្រូវ​បាន​ដកចេញ​ពី​តួនាទី ហើយ​ត្រូវ​បាន​ផ្ទេរ​​ទៅ​សាលាដំ​បូង​ខេត្ត​ស្ទឹងត្រែង​”។ រឿង​ក្តី​នេះ​ចម្លែកណាស់ នៅពេល​ដែល​លោក ធូ មណី ចៅក្រម​សាលា​ឧទ្ធរណ៍​បាន​ច្រាន​ចោលសេចក្តី​សម្រេច​របស់​ចៅ​ក្រម ហ៊ីង ធីរិទ្ធិ កាលពី​ថ្ងៃទី១ ខែ​មិថុនា ឆ្នាំ​២០០៤ ហើយ​បាន​បង្គាប់​ឲ្យ​ធ្វើ​ការ​ចោទ​ប្រកាន់​បុរស​​​​ទាំង​ពី​រនេះ​ឡើង​វិញពី​បទ​មនុស្ស​ឃាត​ បើ​ទោះ​ជាមិន​មាន​ភ័ស្តុតាង​ថ្មី​ក៏ដោយ។

ប៊ន សំណាង​ និង​ សុខ សំអឿន ត្រូវ​បាន​កាត់​ឲ្យ​ជាប់​ទោស​ពី​បទ​សម្លាប់​ លោក ជា​ វិជ្ជា​ ​​​ដោយសាលាដំបូង​រាជ​ធានី​ភ្នំពេញ​កាលពី​ខែ​សីហា ឆ្នាំ​២០០៥ ហើយ​ត្រូវ​បាន​ផ្តន្ទា​​​ទោស​​​​ឲ្យ​ជាប់​ពន្ធនា​គារ​រយៈពេល​២០ឆ្នាំ​។ បន្ថែមពី​លើភ័ស្តុតាង​គួរ​ឲ្យ​សង្ស័យ​នេះ រឿង​ក្តី​ប្រឆាំ​ងបុរសទាំង​ពី​រនាក់​នេះត្រូវ​បាន​រៀប​ចំឡើង​​ដោយលោក ហេង ពៅ ដែល​ពេល​នោះជា​ស្នងការ​នគរ​បាល​ក្រុង​ភ្នំពេញ​ ដែល​​ក្រោយ​មក​បាន​ឡើង​ទៅ​​​ជា​ទីប្រឹក្សា​​ផ្នែក​​​​សន្តិសុខ​របស់​លោកនាយក​រដ្ឋ​មន្ត្រី​ ហ៊ុន សែន ​​​និង​ជា​អនុរដ្ឋ​លេខា​ធិការ​ក្រសួង​​​​មហាផ្ទៃ។

ទោះ​ជា​យ៉ាងណា ឥឡូវនេះ​ លោក​​​ ហេង​ ​​​​​​ពៅ កំពុង​អនុវត្ត​ទោស​ជាប់​ពន្ធនាគារ​រយៈ​​​ពេល​១០០ឆ្នាំ​ពី​​បទ​ឧក្រិដ្ឋ​ជា​ច្រើន​រួម​ទាំង​ការ​​​​សម្លាប់​ចៅក្រ​ម​សាលា​ដំបូង​រាជ​ធានី​ផង​ដែរ​។ ពេល​ដែល​លោក ហេង​ ពៅ​ បាន​រត់​គេច​​​​ខ្លួន​ពី​សំណាញ់ច្បាប់ ហើយ​ទៅ​លាក់​ខ្លួន​នៅ​ប្រទេស​សិង្ហបុរី លោក​បាន​សម្ភាស​ជាមួយ​ទស្សនាវដ្តី​បារាំង​ឈ្មោះ L’Express កាលពី​ខែ​សីហា​ ឆ្នាំ​២០០៦ ដែល​បាន​អះអាង​​យ៉ាង​ច្បាស់​ថា​ ​រឿង​ក្តី​ទាំង​​មូល​​ប្រឆាំង​ ប៊ន សំណាង​ ​​​និង​ សុខ សំអឿន ត្រូវ​បាន​ប្រឌិត​ដោយ​​​លោក ហុក ឡងឌី​ ដែល​ពេល​នោះជា​អគ្គ​​​ស្នង​​​ការ​នគរ​បាល​ជាតិ ហើយ​ថា លោក ហុក​ ឡងឌី បាន​បញ្ជា​ឲ្យ​ចាប់​ខ្លួន​បុរស​ទាំង​ពីរ​នាក់​នេះ​ដើម្បីផ្គាប់​ចិត្ត​រដ្ឋាភិបាល​ដែល​កំពុង​ស្ថិត​ក្រោម​សម្ពាធ​យ៉ាង​ខ្លាំង​។

លោក ហេង ពៅ ត្រូវ​បាន​ទស្ស​នាវដ្តី​ L’Express​ ដកស្រង់​សម្តី​ដែល​និយាយ​ថា “ខ្ញុំ​មិន​ចាំបាច់​ចំណាយ​ពេល​យូរ​ក្នុង​ការ​ស្វែង​យល់​ពីជន​សង្ស័យ​ទាំង​ពីរទេ​ គឺ​ ប៊ន សំណាង និង ​​សុខ សំអឿន មិន​ពាក់​ព័ន្ធ​នឹង​អំពើ​មនុស្ស​​​ឃាត​​នេះ​​ទេ”។ លោក ហុក ឡងឌី ដែលជា​សម្ពន្ធមិត្ត​ដ៏​​​ជិត​​ស្និទ្ធ​របស់​លោកនាយក​រដ្ឋ​មន្ត្រី​ ហ៊ុន សែន បាន​ស្លាប់​ដោយ​សារ​ការ​ធ្លាក់​ឧទ្ធម្ភាគចក្រ​កាល​ពី​ឆ្នាំ​២០០៨។

​ពេល​មាន​ការ​តាម​ដាន​​យ៉ាង​យក​ចិត្ត​ទុក​ដាក់​​ពី​អន្តរជាតិលើ​រឿង​ក្តីបុរស​ទាំងពី​រ​នេះ កាលពីឆ្នាំ​២០០៨ តុលាការ​កំពូល​បាន​តម្កល់​សាលដីកាផ្ត​ន្ទាទោស​​របស់​បុរស​ទាំង​ពីរ​នាក់​នេះ​ ប៉ុន្តែ​បាន​បង្គាប់ឲ្យ​ដោះ​លែង​ពួកគេ​ឲ្យ​នៅ​ក្រៅ​ឃុំ​បណ្តោះ​អាសន្ន ខណៈដែល​សាលាឧទ្ធរណ៍បាន​ស៊ើប​​អង្កេត​រឿង​ក្តី​នេះ​ឡើង​វិញ។

លោក ហេង ពៅ​ ដែល​កំពុង​ជាប់​ពន្ធនា​​​គារ​​​​ព្រៃស បាន​បដិសេធ​មិន​ផ្ត​ល់​សក្ខីកម្ម​នៅ​ពេល​បើក​សវនាការ​កាត់​ក្តី​បុរស​ទាំង​ពីរ​នេះ​ឡើង​វិញ​កាលពី​ឆ្នាំមុន​ឡើយ ដោយ​អះ​អាង​ពី​​ការដែល​លោក​ប្តូរ​ទៅ​កាន់​សាសនា​​​គ្រិស្ត​​​ថា ជា​ហេតុផល​ដែល​លោក​នៅ​ស្ងៀម​បែប​​​នេះ។ ការ​បើក​សវនាការ​ឡើង​វិញ​នោះ​មាន​​ការ​រិះគន់​ស្រដៀងគ្នា​ពី​សំណាក់​អង្គ​ការ​សិទ្ធិ​មនុស្ស​នានា​ជាពិសេស​​ដោយ​សារ​​មិន​មាន​ការ​បង្ហាញ​ភ័ស្តុតាង​ថ្មី​ ហើយ​បុរស​ទាំងពីរ​នាក់​​​​នេះ​ត្រូវ​ផ្តន្ទាទោស​ឡើងវិញតាម​សេចក្តី​​​​សម្រេច​​មួ​យ​ ដើម្បី​បិទបាំង​​ការ​រំលោភ​សិទ្ធិ​មនុស្ស​​ដ៏​ធ្ងន់​ធ្ងរ​​នៅ​ក្នុង​ប្រទេស​កម្ពុជា​​នៅ​ឆ្នាំ​នោះ​។

កាលពី​ម្សិលមិញ មន្ត្រី​ជាន់​ខ្ពស់​ក្រសួង​មហាផ្ទៃ​មួយ​រូប​បាន​និយាយថា ការ​ស៊ើប​អង្កេត​​លើ​ការ​សម្លាប់​លោក ជា​ វិជ្ជា​ អាស្រ័យ​​​​ថា តើ​មាន​ដីកាបង្គាប់​ពី​តុលាការ​ឬ​អត់​។

លោកឧត្ត​មសេនីយ៍ឯក ឆៃ ស៊ី​ណារិទ្ធ ប្រធាន​នាយកដ្ឋាន​កណ្តាល​សន្តិសុខបាន​មាន​ប្រសាសន៍ថា “ប្រសិន​បើ [តុលាការ​កំពូល]​ បញ្ជាក់​ថា បុរសទាំង​ពីរ​នេះ​មិន​បាន​​​ប្រព្រឹត្ត​អំពើ​មនុស្ស​ឃាត​ទេ​នោះ  យើង​នឹង​បន្តស៊ើប​អង្កេត​ដើម្បីស្វែង​រក​ឃាតករពិត​ប្រាកដ​​​ទៀត”៕

(រាយការ​ណ៍បន្ថែម​ដោយ Lauren Crothers)
ប្រែសម្រួលដោយ មូល​ គឹម​ហឿន
និង​ សោម សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស