29 C
Phnom Penh

អតីត​អ្នក​ភូមិ​បឹង​កក់តវ៉ាទាម​ទារ​ប្រាក់​សំណង​បន្ថែម​

ដោយ ឌឹ ខេមបូឌា ដេលី

បទវិភាគ

អតីត​អ្នក​ភូមិ​សហ​គមន៍​បឹង​កក់​ជាង​២០០​នាក់ បាន​ធ្វើ​ការ​តវ៉ា​កាល​ពី​ម្សិល​មិញ​នៅ​ក្រៅ​​​​​​​សាលា​រាជ​ធានី​ភ្នំ​ពេញ​ ដើម្បី​ទាម​ទារ​សុំប្រាក់​​​​សំណង​បន្ថែម​ទៀតពីលើ​ចំនួន​ទឹក​ប្រាក់​ដំបូង​​​​ដែល​ពួក​គាត់​ទទួល​បាន​នៅ​ពេល​ដែល​ត្រូវ​បាន​គេ​បណ្តេញ​ចេញ​​ដោយ​បង្ខំពី​តំបន់​បឹង​កក់​ កាល​ពី​ឆ្នាំ​២០០៩។

អ្នក​តវ៉ា​ដែល​បាន​ទទួល​ប្រាក់​សំណង​ពី​ក្រុម​​​​ហ៊ុន​ស៊ូកាគូ​ ជាក្រុម​ហ៊ុន​អភិវឌ្ឍន៍​អចល​ន​ទ្រព្យ​ឯក​ជន​ ដើម្បី​បើក​ផ្លូវ​ឲ្យ​គម្រោង​អភិ​វឌ្ឍន៍​អចល​នទ្រព្យ​ដ៏​ចម្រូង​ចម្រាសរបស់​លោក ឡៅ ម៉េង​ឃិន អតីត​សមា​ជិក​ព្រឹទ្ធ​សភា​​​​គណ​បក្ស​ប្រជា​ជន​កម្ពុជា​នោះ ទទួល​បាន​សំណង​​​​ចំនួន​៨.៥០០​ដុល្លារ​ ឬ​ទទួល​យក​ជម្រើស​ទី​២ គឺ​ទទួល​បាន​ប្រាក់​២លាន​រៀល​ និង​ផ្ទះ​ល្វែង​តូច​មួយ​នៅ​កន្លែង​តាំង​លំនៅ​ថ្មី​ស្ថិត​ក្នុង​ខណ្ឌ​ដង្កោ​។

បន្ទាប់​ពី​អតី​ត​អ្នក​ភូមិ​បឹង​កក់​បាន​តវ៉ា​នៅ​ខាង​ក្រៅ​សាលា​រាជ​ធានី​កាល​ពី​ម្សិល​មិញ​រយៈ​ពេល​ប្រហែល​៣០​នាទី​មក លោក ឃួង ស្រេង អភិបាល​រង​រាជ​ធានី​បាន​អញ្ជើញ​ពួក​គាត់​ឲ្យចូល​ទៅ​ក្នុង​សាលា​រាជ​ធានី ដើម្បី​ឲ្យ​ពួក​គេ​ដាក់​សំណើ​ជា​ផ្លូវ​ការ​ជាមួយ​អាជ្ញាធរ។

លោក ឃួង ស្រេង បាន​និយាយ​ទៅ​កាន់​អ្នក​តវ៉ា​ថា “ខ្ញុំ​គ្មាន​សិទ្ធិ​ដោះ​ស្រាយ​បញ្ហា​ជូន​​បងប្អូន​ទាំង​អស់​គ្នា​ទេ ប៉ុន្តែខ្ញុំ​នឹង​យក​​សំណើ​របស់​​បងប្អូន​​ទាំង​អស់​គ្នា​ជូន​លោកអភិ​បាល​ ប៉ា សុជាតិវង្ស ដើម្បី​​សម្រេច​”។

អ្នកស្រី សៀ ណារ៉េត អាយុ៥៥​ឆ្នាំ តំណាង​​​​អ្នក​ភូមិ​ជាង​៩០០​គ្រួសារ​ ដែល​បាន​ទទួល​យក​​​​​ប្រាក់​សំណង​កាល​ពី​ឆ្នាំ​២០០៩​បាន​និយាយ​ថា អតីត​អ្នក​ភូមិ​បឹង​កក់​សង្ឃឹម​ថា នឹង​ទទួល​បានប្រាក់​សំណង​បន្ថែម​ទៀត​ពី​រដ្ឋ​បាលថ្មី​សាលា​រាជ​ធានី​ ដោយ​សារ​អ្នក​ភូមិ​ភាគ​ច្រើន​គិត​ថា ពួក​គាត់​ត្រូវ​បាន​គេ​បង្ខំ​ឲ្យ​ចាក​​​​
ចេញ​ពី​ផ្ទះ​សំបែង​របស់​ខ្លួន​ដោយ​អ​យុត្តិ​ធម៌ដោយ​មិន​​ទទួល​បាន​ប្រាក់​សំណង​គ្រប់​គ្រាន់។

អ្នក​ស្រី​ ណារ៉េត បាន​និយាយថា “លោក​ ឃួង ស្រេង បាន​អនុញ្ញាត​ឲ្យ​មន្ត្រី​របស់​លោក​បំពេញ​បែប​បទ​​ឲ្យ​​ពួក​យើង​ទាំង​អស់​គ្នា​ ដោយ​​​​​​​បញ្ជាក់​ពី​ទំហំ​ដី​របស់​យើង​ ​ជាមួយ​​ព័ត៌មាន​ពី​សៀវ​ភៅ​គ្រួសារ​ដើម្បី​ឲ្យ​ពួក​គេ​អាច​ទទួល​ស្គាល់​​ថា យើង​គឺ​ជា​គ្រួសារ​​​​ដែល​ត្រូវ​បាន​បណ្តេញ​ចេញ​ពី​ដី​មែន។​ យើង​​​​ទាំង​អស់​គ្នា​នឹង​ទាម​ទារ​ឲ្យ​សាលា​រាជ​ធានី​ដោះ​ស្រាយ​បញ្ហា​នេះ​ឲ្យ​បាន​ឆាប់ បន្ទាប់​ពី​យើង​បាន​ដាក់​ជូន​បែប​បទ​ទាំង​នេះ​រួច ពី​ព្រោះ​យើង​ត្រូវ​ការ​ប្រាក់​សំណង​សម​រម្យ​ ដើម្បី​ទិញ​ផ្ទះ​ថ្មី​”។

អ្នក​ស្រី ណារ៉េត បាន​បន្ថែម​ថា “ចាប់​តាំង​ពី​២០០៩​មក​ ជីវភាព​របស់​គ្រួសារ​ភាគ​ច្រើន​បាន​ធ្លាក់​ចុះ ហើយ​អ្ន​ក​ដែល​រស់​នៅ​ក្នុង​តំបន់​នោះ​បាន​ជំពាក់​បំណុល​គេ​​វ័ណ្ឌក ដោយ​សារព្យាយាមបង់​​ប្រាក់​សម្រាប់​ផ្ទះ​ថ្មី”។

កូនៗ​របស់​គ្រួសារ​ដែល​ត្រូវ​បាន​បណ្តេញ​​​​ចេញ​នោះ ក៏​ជួប​បញ្ហា​បែប​នេះ​ដែរ​ ដោយ​បាន​ឈប់​រៀន ពី​ព្រោះ​ឥឡូវនេះ​ពួក​គេ​ត្រូវ​ជួយ​រក​ប្រាក់​ឪពុក-ម្តាយ។
លោក ភួង សុភី អាយុ​៥៦​ឆ្នាំ ដែល​មាន​ដី​​​​មួយ​ក្បាល​ទំហំ​១៦​ម៉ែត្រ​គុណ​នឹង​៣០​ម៉ែត្រ​នៅ​ក្នុង​តំបន់​បឹង​កក់​បាន​និយាយ​ថា គាត​់សម​តែ​ទទួលបាន​ប្រាក់​សំណង​១៥.០០០​ដុល្លារ ពី​ព្រោះ​គាត់ត្រូវ​បាន​បណ្តេញ​ចេញ​ដោយ​គ្មាន​ផ្តល់​សំណង​ឡើយ​។ លោក​បាន​និយាយថា “ប៉ុន្តែ ខ្ញុំ​​គិត​ថា សា​​​លា​រាជ​ធានី​នឹង​មិន​ស្វែងរក​ដំណោះ​ស្រាយ​ឲ្យ​យើង​​ទេ ពី​ព្រោះ​នេះ​គ្រាន់​តែ​ជា​ការ​សន្យា​ខ្យល់​តែ​ប៉ុណ្ណោះ​”៕

ប្រែ​សម្រួល​ដោយ សោម សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស