29 C
Phnom Penh

ចោរ​​បាញ់​ប្លន់​ជន​បរទេស​ពីរ​នាក់​​ក្នុង​ករណីប្លន់​​ដាច់​ដោយ​ឡែក​ពី​គ្នានៅ​​រាជ​ធានី​ភ្នំ​ពេញ

ដោយ ឌឹ ខេមបូឌា ដេលី

បទវិភាគ

អ្នក​ពិគ្រោះ​យោបល់​ផ្នែក​សំណង់​ជន​ជាតិ​អាមេរិក​កាំង​ម្នាក់​ និង​ទេសចរ​​ជន​ជាតិ​ជប៉ុន​ម្នាក់​ត្រូវ​បាន​ចោរ​បាញ់​ប្លន់​ឲ្យ​រង​របួស​យ៉ាង​ធ្ងន់​ អំឡុងពេល​ប្លន់​ពីរ​​​ករណី​​​ដាច់​ដោយ​ឡែក​​​ពី គ្នា​នៅ​ក្នុង​រាជ​ធានី​ភ្នំ​ពេញ កាល​ពី​ចុង​សប្តាហ៍​នេះ ដោយ​ធ្វើ​ឲ្យ​ស្ថាន​ទូត​ជប៉ុន​សម្តែង​កង្វល់​កាល​ពី​ម្សិល​មិញ​ចំពោះ​សុវត្ថិ​ភាព​របស់​ជន​បរទេស​នៅ​ក្នុង​ប្រទេស​កម្ពុជា។

លោក ម៉ូរៃស៍  ឡ អាយុ​៥៧​ឆ្នាំ​ ដែល​រស់​​នៅ​​ក្នុង​ប្រទេស​កម្ពុជា​ត្រូវ​បាន​ចោរ​ប្លន់​​បាញ់​ចំ​ក្រលៀន នៅ​ម៉ោង​ប្រហែល​៧​យប់​កាល​ពី​​ថ្ងៃ​សុក្រ នៅ​ពេល​ដែលគាត់​កំពុង​ដើរ​ទៅ​ផ្ទះ​ជាមួយ​ប្រពន្ធ​របស់​គាត់​ នៅ​ក្នុង​សង្កាត់​ទន្លេ​បាសាក់ ខណ្ឌ​ចំការមន។

នៅ​ក្នុង​ហេតុការណ៍​ដាច់ដោយ​ឡែក​មួយ​ទៀត​កាល​ពី​យប់​ថ្ងៃ​សៅរ៍ ទេសចរ​ជន​ជាតិ​ជប៉ុន​ឈ្មោះ សាគីកូ តាកាយាណាជី អាយុ​៣៣​ឆ្នាំ ត្រូវ​បាន​ចោរ​បាញ់​ប្លន់​ត្រូវ​ចំ​ជើង​ឆ្វេង​នៅ​ជិត​ផ្សារ​រាត្រី ក្នុង​សង្កាត់​វត្ត​ភ្នំ ខណ្ឌ​ដូន​ពេញ​នៅ​ម៉ោង​ប្រហែល​៨​យប់។

លោក ឡ ដែល​មាន​សភាព​ស្លេក​ស្លាំង​ និង​ញាប់​ញ័រ​នៅ​ក្នុង​បន្ទប់​ដាច់​ដោយ​ឡែក​មួយ បន្ទាប់​ពី​វេជ្ជ​បណ្ឌិត​បាន​វះកាត់​ក្រលៀន​​និង​ភ្លៅ​ឆ្វេង​របស់​គាត់​​កាលពីយប់​ថ្ងៃ​សុក្រ ​នៅក្នុង​មន្ទីរ​ពេទ្យ​កាល់​ម៉ែត បាន​រៀប​រាប់​ពី​ហេតុការណ៍​នៅ​មុន​ការ​បាញ់​ប្រហារ​នោះ រីឯ​ប្រពន្ធ​របស់​គាត់​ឈ្មោះ ដេប៊ី អាយុ​៥៧​ឆ្នាំ​ដែរនោះ បាន​រៀប​រាប់​ពី​ហេតុការណ៍​ដែល​​គាត់​បាន​ជួប​ប្រទះ​។

ប្តី​-ប្រពន្ធ​នេះ​បាន​និយាយ​ថា ពួក​គេ​កំពុង​ដើរ​ទៅ​ផ្ទះ​ មក​ពី​កន្លែង​បរិភោគ​អាហារ​ល្ងាច​ ស្រាប់​តែ​នៅពេល​នោះ​មនុស្ស​ពីរ​នាក់​ជិះ​ម៉ូតូ​មួយ​គ្រឿង​បានជិះ​​តាម​ក្រោយ​ពួក​គេ​នៅ​តាម​ផ្លូវ​តូច​មួយ​ជិត​ចំណុច​ប្រសព្វ​រវាង​ផ្លូវ​លេខ៣០៨ និង​ផ្លូវ​លេខ២១។

អ្នក​ស្រី ឡ បាន​និយាយ​ថា “ពួក​គាត់​​បាន​ដើរ​តាម​កាច់​ជ្រុង​មួយ​ដែល​ងងឹត​ខ្លាំង​ណាស់​។ ហើយ​ពួក​ចោរ​បាន​មក​ស្ងាត់ៗ​ ហើយ​អ្នក​ជិះ​ពី​ក្រោយ​ដែល​មាន​កាំ​ភ្លើង​​បាន​លោត​​ចុះ​​មក​ក្បែរខ្ញុំ​​”។ អ្នក​ស្រី​បាន​បន្ថែម​ថា អ្នក​ស្រី​បាន​ប្រគល់​កាបូប​ដៃ​អ្នក​ស្រី​ទៅ​ឲ្យ​ចោរ​ភ្លាមៗ ដែល​នៅក្នុង​កាបូប​នោះ​មាន​តែ​លុយ​បន្តិច​បន្តួច​ និង​ទូរស័ព្ទ​អាយហ្វូន​របស់​អ្នក​ស្រី ហើយ​​អ្នក​ស្រី​បាន​ចាប់​ផ្តើម​ស្រែក​ឲ្យ​គេ​ជួយ​។

លោក​ ឡ ​បន្ត​ថា “ខ្ញុំ​នៅ​ចម្ងាយ​ប្រហែល​​បី​ជំហាន​ខាង​មុខ​ប្រពន្ធ​ខ្ញុំ ហើយ​បន្ទាប់​មក​ខ្ញុំ​បាន​ឮ​គាត់​ស្រែក​ ហើយ​ខ្ញុំ​បាន​ងាក​ក្រោយ​ហើយ​គិត​ថា នេះ​គឺ​ជា​ការ​លេង​សើច។ ប៉ុន្តែ មិន​ដឹង​ថា ជន​ទាំង​ពីរ​នេះ​ជា​នរណា​ទេ ពួក​គេ​មាន​កាំភ្លើង​ទាំង​ពីរ​នាក់​។ ពួក​គេ​បាន​ត្រៀម​បាញ់​មក​លើ​ពួក​គាត់​។ ខ្ញុំ​អាច​មើល​ឃើញ​ទឹក​មុខ​ដ៏​មាំ​របស់​ពួក​គេ​”។ លោក ឡ បាន​និយាយ​អំពី​ការ​បាញ់​ដ៏​ឃោរ​ឃៅ​នេះ​ថា “ដូច្នេះ ខ្ញុំ​គ្រាន់​តែ​បាន​ប្រាប់​ពួក​គេ​ថា កុំប៉ះ​ពាល់ប្រពន្ធ​ខ្ញុំ​! កុំប៉ះ​ពាល់​ប្រពន្ធ​​ខ្ញុំ​! ហើយ​ពួក​គេ​បាន​យក​កាបូប​​ប្រពន្ធ​ខ្ញុំ​ ហើយ​ឡើង​ជិះ​ម៉ូតូ​ចេញ​ទៅ​។ នៅ​ពេល​ដែល​ពួកគេ​ជិះ​ម៉ូតូ​ចេញ ពួក​គេ​បាន​បាញ់​ខ្ញុំ​តែ​ម្តង”។

លោក ឡ បាន​និយាយ​ថា បន្ទាប់​មក​គាត់​ត្រូវ​បាន​គេ​ដឹក​តាម​រ៉ឺម៉ក​ម៉ូតូ​ទៅ​មន្ទីរ​ពេទ្យ​កាល់​ម៉ែត ដែល​នៅ​ទីនោះ​គាត់​ត្រូវ​បាន​វះ​កាត់​ភ្លាមៗ​។ គ្រាប់​កាំភ្លើង​បាន​ចូល​តាម​ក្រលៀន​​លើ​ ហើយ​ធ្លាយ​តាម​ក្រលៀន​ក្រោម​ ​និង​​​ហួស​​មក​ត្រូវ​ភ្លៅ​របស់​គាត់​ទៀត ដោយ​ធ្វើ​ឲ្យ​មាន​ស្នាម​របួស​កន្លែង​គ្រាប់​ចេញ​យ៉ាង​ធំ”។

គ្រួសារ​នេះ​បាន​មក​រស់​នៅ​ក្នុង​ប្រទេស​កម្ពុជា​តាំង​ពី​ឆ្នាំ​២០០៨ ដោយ​ផ្លាស់​ទៅ​ផ្លាស់​មក​រវាង​រាជ​ធានី​ភ្នំ​ពេញ​​ និង​រដ្ឋ​ហាវ៉ៃ។ លោក ឡ ធ្វើ​ការ​ជា​អ្នក​ពិគ្រោះ​យោបល់​ផ្នែក​សំណង់ ចំណែក​ឯ​ប្រពន្ធ​របស់​គាត់​ជា​អ្នក​ស្ម័គ្រ​ចិត្ត​នៅ​មណ្ឌ​ល​កុមារ​កំព្រា​មួយ។

ការ​បាញ់​ប្លន់​ពី​សំណាក់​មនុស្ស​ពីរនាក់​ជិះ​ម៉ូតូ​មួយ​គ្រឿង​នេះ ​កើត​មាន​ឡើង​បន្ទាប់​ពី​ការ​វាយ​ប្រហារ​ដោយ​មនុស្ស​ពាក់​ម៉ាស់​មុខ​ស្លៀក​ពាក់​​ស៊ីវិល​ទៅ​លើ​អ្នក​កាសែត​បរទេស​ និង​អ្នក​តវ៉ា​អហិង្សា​នៅ​វត្ត​ភ្នំ​ កាល​ពី​ថ្ងៃ​ទី​២២​ ខែ​កញ្ញា។ មិន​ទាន់​មាន​នរណា​ម្នាក់​ត្រូវ​បាន​ចាប់​ខ្លួន​ឲ្យ​ទទួល​ខុស​ត្រូវ​ចំពោះ​ការ​វាយ​ប្រហារ​ដែល​បាន​កើត​ឡើង​នៅ​ពេល​យប់​ ក្រោម​ការ​ឃ្លាំ​មើល​ពី​នគរ​បាល​ប្រឆាំង​កុប​កម្ម​នេះ​ទេ។

លោក មុំ ស៊ីថា នាយការិយាល័យ​​នគរ​បាល​​ជន​បរ​ទេស​រាជ​ធានី បាន​មាន​ប្រសាសន៍​កាល​​​ពី​ម្សិល​មិញ​ថា “ ​នគរ​បាល​មិន​ទាន់​ស្គាល់​ជន​ល្មើស​ក្នុង​អំពើ​ប្លន់​កាល​ពី​ថ្ងៃ​សុក្រ​នេះនៅ​ឡើយ​ទេ។ លោក​បាន​មាន​ប្រសា​សន៍​​ថា នគរ​បាល​រាជ​ធានី​កំពុង​សហ​ការ​ជាមួយ​កង​កម្លាំង​ផ្សេង​ទៀត​ ដើម្បី​ស្វែង​រក​ចោរ​ប្លន់​ទាំង​នេះ​ ប៉ុន្តែ រក​ពួក​គេ​មិន​ទាន់​ឃើញទេ”។

លោក​បាន​បន្ថែម​ថា ចោរ​ប្លន់​ប្រដាប់​អាវុធ​ពីរ​នាក់​ស្រដៀង​គ្នា​នេះ បាន​បាញ់​ប្លន់​អ្នក​ស្រី​ តាកាយាណាជី ជា​ទេសចរ​ជនជាតិជប៉ុន​នៅ​ម៉ោង​ប្រហែល​៨​យប់​ កាល​ពី​ថ្ងៃ​សៅរ៍។ លោកបានមាន​ប្រសាសន៍ថា “ សកម្ម​ភាព​របស់​ពួក​គេ​ស្រដៀង​គ្នា​នឹង​ជន​ល្មើស​ដែល​បាន​​បាញ់​ប្លន់​កាល​ពីថ្ងៃ​សុក្រ។ ពួក​គេ​បាន​ប្លន់​​ជន​ជាតិ​ជប៉ុន​ម្នាក់​នៅកាច់​ជ្រុង​ផ្លូវ​លេខ​១១០ និង​ផ្លូវ​លេខ​១៣”។ លោក​​បន្ថែម​ថា នគរ​បាល​មិន​ទាន់​មាន​តម្រុយ​នៅ​ក្នុង​អំពើ​ប្លន់​ដែល​បាន​​កើត​ឡើង​កាល​ពី​ថ្ងៃ​សៅរ៍​នេះ​ទេ។

លោក យូស៊ីហ៊ីរ៉ូ ហ៊ីគូជី អនុ​ប្រធាន​បេស​ក​កម្ម​ស្ថាន​ទូត​ជប៉ុន​ប្រចាំ​រាជ​ធានី​ភ្នំ​ពេញ​បាន​មាន​ប្រសាសន៍​តាម​ទូរស័ព្ទ​កាល​ពី ម្សិល​មិញ​ថា អ្នក​ស្រី​ តាកាយាណាជី កំពុង​ដើរ​ម្នាក់​ឯង​នៅ​ជិត​ផ្សារ​រាត្រី​ជាតំបន់​​ទេសចរណ៍​ដ៏​ពេញ​និយម​ ស្រាប់​តែ​នៅ​ពេល​នោះ​អ្នក​ស្រី​ត្រូវ​បាន​​​គេ​បាញ់​ចំ​ភ្លៅ​ឆ្វេង​។

លោក ហីុគូជី បាន​មាន​ប្រសាសន៍ថា “ ជន​ល្មើស​​បាន​ចូល​មក​ព្យាយាម​​ឆក់​កាបូប​អ្នកស្រី​ ហើយ​អ្នក​ស្រី​មិនព្រម​ឲ្យ​ ដូច្នេះ​ពួក​គេ​ក៏​បាន​បាញ់​មួយ​គ្រាប់​ចំ​ភ្លៅ​អ្នក​ស្រី ហើយ​អ្នក​ស្រី​ត្រូវ​បាន​នាំ​ទៅ​មន្ទីរ​ពេទ្យ​​”។ ប៉ុន្តែ លោក​បដិសេធ​មិន​ប្រាប់​ថា អ្នក​ស្រី​ តាកា​យា​ណាជី កំពុង​សម្រាក​ព្យាបាល​នៅ​ទីណា​ទេ​។

លោក ហីុគូជី បាន​មាន​ប្រសាសន៍​ថា “ ខ្ញុំ​បាន​ឮថា អ្នក​ស្រី​មិន​អី​ទេ។ អ្នក​ស្រីមិន​មាន​ស្ថាន​ភាព​ធ្ងន់​ធ្ងរ​ឡើយ​”។ លោក​បាន​បន្ថែម​ថា ក្បាល​គ្រាប់​ដែល​បៀម​ជាប់​នៅ​ក្នុង​ជើង​ជនរង​គ្រោះ​នោះ គ្រោង​​វះ​យក​ចេញ​កាល​ពីម្សិល​មិញ​។

លោក​បាន​មាន​ប្រសាសន៍​ថា ​នៅសប្តាហ៍​​ក្រោយស្ថាន​ទូត​ជប៉ុន​នឹង​ចេញ​សេចក្តី​ប្រកាស​​​ជូន​ដំណឹង​ប្រាប់​់​ប្រ​ជា​ពល​រដ្ឋ​ជប៉ុន​ដែល​រស់​នៅ​ក្នុង​រាជ​ធានី​ភ្នំ​ពេញេ​អំពី​គ្រោះ​ថ្នាក់​នៃ​ការ​រស់​នៅ​ក្នុង​ប្រទេស​កម្ពុជា​។

កាល​ពីខែ​មីនា​ ពាណិជ្ជករ​ជន​ជាតិ​ជប៉ុន ឈ្មោះ គីតាគុរ៉ា កូសេ ត្រូវ​បានបាញ់​ស្លាប់​នៅ​ខាង​ក្រៅ​ផ្ទះ​របស់​គាត់​នៅ​សង្កាត់​បឹង​កេង​កង​១ ដោយ​ជន​ប្រដាប់​អាវុធ​ពី​រនាក់​ជិះ​ម៉ូតូ​មួយ​គ្រឿង​ ដែល​បាន​ប្លន់​គាត់​យក​លុយ​ដែល​គាត់​បាន​លេង​ល្បែង​ឈ្នះ​នៅ​កាស៊ីណូ ណា​ហ្គាវើល អស់​ចំនួន​១០.០០០ដុល្លារ។

លោក​បាន​មាន​ប្រសាសន៍​ថា “យើង​មិន​អាចរារាំ​ង​ប្រជា​ពល​រដ្ឋ​ជប៉ុនមិន​ឲ្យ​មក​ប្រទេស​កម្ពុជា​បាន​ទេ ប៉ុន្តែ យើង​នឹង​ជូន​ដំណឹង​ពួក​គេ​ឲ្យ​បាន​ច្បាស់​លាស់​ថា ប្រសិន​​បើ​បង​ប្អូន​ចង់​មក​ប្រទេស​កម្ពុជា បង​ប្អូន​ត្រូវ​តែ​ប្រុង​ប្រយ័ត្ន​ជានិច្ច​។ ខ្ញុំ​មិន​អាច ​[ធានា​] ស្ថាន​ទូត​មិន​អាច​ធានា​ថា មាន​សុវត្ថិ​ភាព​១០០​​ភាគ​រយ​ទេ​”។

លោក ហ៊ីគូជី បាន​មាន​ប្រសាសន៍ថា ស្ថាន​ទូត​ជប៉ុន​ ក៏កំពុង​ពិចារណា​ថា តើ​ការ​បាញ់​អ្នក​ស្រី​ តាកាយាណាជី បង្ហាញពី​អស្ថិ​រភាព​នៅ​ក្នុង​ប្រទេស​កម្ពុជា​ ដោយ​សារ​ការ​ជាប់​គាំង​ផ្នែក​នយោ​បាយ​នា​ពេល​ថ្មីៗ​នេះ​ រវាង​គណប​ក្ស​ប្រជាជន​កម្ពុជា និង​គណ​បក្ស​សង្គ្រោះជាតិ​ឬយ៉ាងណា​។ លោក​បាន​មាន​ប្រសាសន៍​ថា “ យើង​ត្រូវ​វិភាគ​ដោយ​ប្រុង​ប្រយ័ត្ន​ថា តើ​ហេតុការណ៍​នេះ​ពាក់​ព័ន្ធ​នឹង​ស្ថាន​ភាព​នយោ​បាយ​ឬ​មិន​ពាក់​ព័ន្ធ​”។

លោក ហូ វណ្ឌី សហ​ប្រធាន​ក្រុម​ការ​ងារ​វិស័យ​រដ្ឋ​ និង​ឯក​ជនទទួល​បន្ទុក​គោល​នយោ​បាយ​ទេស​ចរណ៍​ ក៏​បាន​មាន​ប្រសាសន៍​ដែរ​ថា ការ​បាញ់​ប្លន់​កាល​ពី​ចុង​សប្តាហ៍​នេះ​ ដែល​ត្រូវ​បាន​ចុះ​ផ្សាយ​នៅ​ក្នុង​ប្រព័ន្ធ​ផ្សព្វ​ផ្សាយ​ក្នុង​ស្រុក​ គឺ​ជា​កង្វល់​។ លោក​បាន​មាន​ប្រសា​សន៍​ថា “បទ​ល្មើស​ទាំង​នេះ​កើត​ឡើង​ក្រោយ​ពី ការ​បោះ​ឆ្នោត យើង​ចង់​ឲ្យ​មាន​សុវត្ថិ​ភាព និងសន្តិ​សុខ​ដូច​ពីមុន​អ៊ីចឹង។ យើង​សូម​ស្នើ​ឲ្យ​នគរ​បាល​ពង្រឹង​សន្តិ​សុខ និង​សុវត្ថិ​ភាព​របស់​ទេសចរ​ទាំងអស់​”។

លោក ចន ស៊ីម៉ុន ជំនួយ​ការ​មន្ត្រី​ទំនាក់​ទំនងកិច្ច​ការ​សាធារណៈ​នៅ​ស្ថានទូត​អាមេ​រិក​​ប្រចាំ​រាជ​ធានី​ភ្នំពេញ បាន​បដិសេធ​មិន​ធ្វើ​អត្ថា​​ធិប្បាយ​អំពី​ការ​បាញ់​លោក ឡ កាលពី​ម្សិល​មិញ​នេះទេ។ លោក​បាន​លើក​ឡើង​នៅក្នុង​អីុម៉េល​ថា “យើង​​កំពុង​ឃ្លាំ​មើល​ស្ថាន​ភាព​សន្តិ​សុខ​ក្នុង​ប្រទេស​កម្ពុជា ហើយ​យើង​ជំរុញ​​ឲ្យ​ជន​ជាតិ​អាមេរិក​ស្វែង​រក​ព័ត៌​មាន​សន្តិ​សុខ​នៅ​តាម​វិបសាយ​របស់​យើង​”។

កាល​ពីខែ​មករា ឆ្នាំ​២០១២ លោក​ រីឆាដ អាស័រ ជន​ជាតិ​អាមេរិក​ អាយុ២៤​ឆ្នាំ​ត្រូវ​បាន​អង្គរក្ស​ម្នាក់​បាញ់​ចំគូទនៅ​តាម​ផ្លូវ​លេខ​៥១ នៅ​ពេល​អង្គរក្ស​រូប​នោះ​ប៉ុនប៉ង​រារាំង​ជន​រង​គ្រោះរូប​នេះ​មិន​ឲ្យ​វាយ​ប្រហារ​ទៅ​លើ​រថយន្ត​ដែល​ចៅហ្វាយ​របស់​គេ​កំពុង​ជិះ​។

លោក ឡ ដែល​កំពុង​សម្រាក​ព្យា​បាល​នៅ​ក្នុង​មន្ទីរ​ពេទ្យ​កាលពីម្សិល​មិញ​បាន​និយាយ​ថា ទោះបី​ជា​លោក​មិនមានការ​ស្អប់​ខ្ពើម​ចំពោះ​ប្រជា​ពល​រដ្ឋ​ខ្មែរ​ក៏​ដោយ​ ក៏​​​ការ​ចាប់​អារម្មណ៍​​របស់​លោក​ចំពោះ​ប្រទេស​នេះ​ទាំង​មូល​បាន​​​ធ្វើ​ឲ្យ​មានការ​ផ្លាស់​ប្តូរ​យ៉ាង​ខ្លាំង។

គាត់​បាន​និយាយ​ថា “យើង​មិន​មាន​កំហឹង​ចំពោះ​នរណា​ម្នាក់​ទេ​ យើង​គ្រាន់​តែ​មាន​ការ​សោក​ស្តាយ​ដែល​មនុស្ស​ពី​រនាក់​អាច​ធ្វើ​ឲ្យ​ខូច​កេរ្តិ៍​ឈ្មោះ​របស់​ប្រទេស​មួយ។​ ឥឡូវ​នេះ​ភ្នំពេញ​ខុស​ពី​មុន​”។ កាល​ពី​ម្សិល​មិញ​ គេ​មិន​អាច​ទាក់​ទង​លោក​ឧត្តម​សេនីយ៍ឯក គៀត ច័ន្ទថារិទ្ធិ អ្នក​នាំ​ពាក្យ​នគរ​បាល​ជាតិ​បាន​ទេ៕

ប្រែ​សម្រួល​ដោយ មូល គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស