យោងតាមតួលេខដែលក្រសួងពាណិជ្ជកម្មដែលចេញផ្សាយកាលពីម្សិលមិញ បានបង្ហាញថា បរិមាណនាំចេញដំឡូងមី បានធ្លាក់ចុះ៥៦ភាគរយ មកនៅប្រហែល២៨៨.០០០តោន ក្នុងរយៈពេលប្រាំបីខែ ដើមឆ្នាំនេះបើធៀបនឹងរយៈពេលដូចគ្នាកាលពីឆ្នាំមុន។ មន្ត្រីនានាបានស្តីបន្ទោសថា បញ្ហាធ្លាក់ចុះយ៉ាងគំហុកនេះ គឺបណ្តាលមកពីការដាំដំណាំដំឡូងមីច្រើនលើសពីតម្រូវការកាលពីឆ្នាំ២០១១។
លោក រុន សុខផាណារ៉ា ប្រធានការិយាល័យក្សេត្រសាស្ត្រនៃមន្ទីរកសិកម្មខេត្តបន្ទាយមានជ័យ ដែលមានសកម្មភាពដាំដំឡូងមីច្រើន បានមានប្រសាសន៍ថា “កាលពីឆ្នាំ២០១២ បរិមាណនាំចេញដំឡូងមី បានកើនឡើង ដោយសារតែមានដំឡូងមីច្រើនលើសធម្មតាក្នុងឆ្នាំ២០១១។ ឥឡូវនេះ កសិករថៃនៅតែសល់ ដំឡូងមីសម្រាប់លក់”។
ក្នុងឆ្នាំ២០១២ បរិមាណនាំចេញដំឡូងមីបានកើនឡើង៧២២.២៧៣តោន ហើយមានតម្លៃប្រហែល៣៨,៧លានដុល្លារ ពោលគឺបានកើនឡើង១៦០ភាគរយ បើធៀបនឹងឆ្នាំ២០១១។ តម្លៃនៃបរិមាណនាំចេញដំឡូងមីគិតពីខែមករា ដល់ខែកក្កដា ឆ្នាំនេះ ក៏បានធ្លាក់ចុះពាក់កណ្តាល ពោលគឺធ្លាក់ពី៣៥លានដុល្លារ ក្នុងរយៈពេលប្រាំពីរខែដំបូងនៃឆ្នាំ២០១២ មក១៥,១លានដុល្លារសម្រាប់ឆ្នាំនេះ។
កសិករបានឲ្យដឹងកាលពីម្សិលមិញថា តម្លៃនេះប្រហែលជាធ្លាក់ចុះបន្តទៀត ដោយសារតែដីរាប់រយហិកតាបន្តរងគ្រោះដោយសារទឹកជំនន់កើតមកពីទឹកភ្លៀង។ លោក គួ សុងហ៊ីង កសិករដាំដំឡូងមីនៅស្រុកថ្មពួក ខេត្តបន្ទាយមានជ័យ បាននិយាយឲ្យដឹងថា “យើងមិនបានចាប់ផ្ដើមប្រមូលផលនៅឡើយទេ។ យើងនឹងប្រមូលផលបានច្រើនចាប់ពីខែមករា ដល់ខែមីនា”។
លោក សុផាណារ៉ា បានឲ្យដឹងថា ដីជាង៧០០ហិកតា ត្រូវបានទឹកជន់លិច បើគិតត្រឹមពេលនេះ ឆ្នាំនេះ សម្រាប់ខេត្តនេះ ហើយ ក្នុងខេត្តបន្ទាយមានជ័យ ដី៤៧.០០០ហិកតា ត្រូវបានប្រើប្រាស់សម្រាប់ដាំដំណាំដំឡូងមី ។ កសិករកម្ពុជាពឹងផ្អែកទៅលើទីផ្សាររបស់ប្រទេសថៃ ដើម្បីនាំដំឡូងមីទៅផ្គត់ផ្គង់លើទីផ្សារប្រទេសចិន។ លោក សុផាណារ៉ា បានបន្តថា “ ដំឡូងមីរបស់យើងត្រូវបាននាំចេញជាសំខាន់ទៅប្រទេសចិន តាមរយៈឈ្មួញកណ្តាលថៃ ដែលមកទិញដំឡូងមីពីកសិករយើង។ ប្រទេសចិនប្រើដំឡូងមី ដើម្បីផលិតអាហារសត្វ និងអេតាណុល”៕
ប្រែសម្រួលដោយ កង សុធា