32 C
Phnom Penh

ជន​ជាតិ​ម៉ាឡេស៊ី​ និង​ស្រីលង្កាត្រូវ​បានតុលាការ​​​​ចោទ​ប្រកាន់​ពី​បទ​រៀប​ចំ​គ្រោង​ការ​ទុច្ចរិត​

ដោយ ឌឹ ខេមបូឌា ដេលី

បទវិភាគ

សាលា​ដំបូង​រាជធានី​ភ្នំពេញ​ កាលពី​ម្សិល​មិញ បាន​បើក​សវនាការ​សម្រាប់​ករណី​ជន​ជាតិ​ម៉ាឡេស៊ីម្នាក់ និង​ជន​ជាតិ​ស្រីលង្កាម្នាក់​ ដែល​ត្រូវ​បាន​ចោទ​ប្រកាន់​ពី​បទ​ប្រើ​ប្រាស់កាត​ធនាគារ​ក្លែង​ក្លាយ​ ដើម្បី​ដក​យក​ប្រាក់​រហូត​ដល់​៥០.០០០ដុល្លារ​ពី​ម៉ាស៊ីន​ដក​ប្រាក់​ស្វ័យ​ប្រវត្តិ អំឡុង​​ពិធី​បុណ្យ​ចូល​ឆ្នាំ​ខ្មែរ​ឆ្នាំ​​​​មុន។

យោង​តាម​ព្រះ​រាជអាជ្ញា​រង​ ហៀង សុភ័ក្រ បាន​ឲ្យ​ដឹង​ថា ឈ្មោះ​ ដេលវីន ចូសេព (Delvin Joshap) អាយុ​៣០ឆ្នាំ ជន​ជាតិ​ម៉ាឡេស៊ី បាន​ធ្វើ​ជា​មេគំនិត​ប្រព្រឹត្ត​បទ​ល្មើស​នេះ ហើយ​ក៏​ជា​ប្រភព​នៃ​កាត​ក្លែង​ក្លាយ​ទាំង​នេះ​ផង​ដែរ​ ខណៈ​ដែល​ឈ្មោះ អារូណា សាឡាម វីនណូ រ៉ាច (Aruna Salam Vinorajh) អាយុ​៣៤ឆ្នាំ​ ជន​ជាតិ​ស្រីលង្កា​ ត្រូវ​បាន​បញ្ជូន​ឲ្យ​ទៅ​ដកយក​​ប្រាក់ពី​ម៉ាស៊ីន​ដក​ប្រាក់​ស្វ័យ​ប្រវត្តិ​របស់​ធនាគារ​សាជីវកម្ម​ធនាគារ​សិង្ហបុរី​ ដែល​មាន​នៅ​ទូ​ទាំង​រាជធានី​ភ្នំពេញ។

លោក ហៀង សុភ័ក្រ បាន​មាន​ប្រសាសន៍​ ថា “ឈ្មោះ ដេល​វីន​ ចូសេព បាន​បញ្ជា​ឲ្យ​ឈ្មោះ​ អារូណា សាឡាម វីនណូរ៉ាច ប្រើ​ប្រាស់​វីហ្សាខាតក្លែង​ក្លាយ​នៅ​តាម​ម៉ាស៊ីន​ អេធី​​​អឹម បី​លើក​។ ឈ្មោះ​ទាំង​នេះជាប់​ទោស​បី​បទ​ល្មើស​នេះ​”។

ឈ្មោះ​ សាឡាម វីនណូរ៉ាច បាន​និយាយ​ថា ខ្លួន​បាន​ជួប​ឈ្មោះ ចូសេព ក្នុង​រាជ​​​ធានី​​​ភ្នំពេញ មួយ​ខែ​មុន​ពេល​ខ្លួន​ត្រូវ​បាន​ចាប់​ខ្លួន​ ពោល​គឺ​នៅ​ថ្ងៃ​ទី១២ ខែមេសា ឆ្នាំ២០១២ ហើយ​បាន​សារភាព​ថា ខ្លួន​បាន​ដក​យក​ប្រាក់​ពី​ម៉ាស៊ីដក​ប្រាក់​ស្វ័យ​ប្រវត្តិ​របស់​ធនាគារ​សាជីវកម្ម​ធនាគារ​សិង្ហបុរី ក៏​ប៉ុន្តែ ឈ្មោះ​នេះ​បាន​អះ​អាង​ថា ខ្លួន​មិន​បាន​ដឹង​ថា កាត​ធនាគារ​​​​ទាំង​នេះ​ជាកាត​ក្លែង​ក្លាយ​ទេ​។

ឈ្មោះ សាឡាម​ វីនណូរ៉ាច ​បាន​និយាយ​ថា “ ការ​ពី​ដំបូង​ គេ​បាន​ឲ្យ​ខ្ញុំ​ទៅ​ដក​ប្រាក់​ក្នុង​ចន្លោះពី​២.០០០ទៅ​៣.៦០០ដុល្លារ​ បី​លើក​”។ ឈ្មោះ​នេះ​បាន​និយាយ​បន្ត​ទៀត​ថា ខ្លួន​បាន​​​ប្រើ​ប្រាស់​វីហ្សាខាត​ជាច្រើន​ នៅ​ម៉ាស៊ីន​ដក​ប្រាក់​ស្វ័យ​ប្រវត្តិ​របស់​ធនាគារ​សាជីវកម្ម​សិង្ហបុរី​ ដើម្បី​ដក​ប្រាក់​សរុប​ចំនួន​ប្រហែល​១៥.០០០​ដុល្លារ​ ក្នុង​រយៈ​ពេល​ពីរ​​ថ្ងៃ​។

ឈ្មោះ​នេះ​បាន​និយាយ​ថា “លុយ​ទាំង​អស់​នោះ​គឺ​ជា​របស់​ឈ្មោះ​ ចូសេព។ គាត់​ឲ្យ​កាត​ធនាគារ​ចំនួន​៣៦មក​ខ្ញុំ ហើយ​បន្ទាប់​មក​បាន​ឲ្យ​១០ភាគរយ​នៃ​ចំនួន​ទឹក​ប្រាក់​សរុប​មក​ខ្ញុំ​។​ ​តើ​ខ្ញុំ​ធ្វើ​ម៉េច​ដឹង​ថា កាត​នោះ​ជា​កាត​ក្លែង​ក្លាយ​ទៅ​ បើ​[សន្តិសុខ​នៅ​ម៉ាស៊ីន​ដក​ប្រាក់​ស្វ័យ​ប្រវត្តិ​] មិន​ចាប់​ខ្ញុំ​ ហើយ​ម៉ាស៊ីន​នោះ​បាន​បញ្ចេញ​លុយ​ឲ្យ​ខ្ញុំ​យក​នោះ​?”

ចំណែក​ឯ​ឈ្មោះ ចូសេព បាន​សារភាព​ថា ខ្លួន​បាន​យក​ប្រាក់​ប្រហែល​១៥.០០០​​​ដុល្លារ​ពី​ធនាគារ​សាជីវកម្ម​សិង្ហបុរី​។ ឈ្មោះ​នេះ​បាន​និយាយ​ថា “ខ្ញុំ​សា​រភាព​​​ថា ខ្ញុំ​បាន​ប្រព្រឹត្ត​បទ​ល្មើស​នេះ​ នៅ​ពេល​នគរបាល​ចាប់​ខ្ញុំ​ ប៉ុន្តែ ពួកគេ​ចោទ​ថា ខ្ញុំ​យក​ប្រាក់​៤០.០០០​​​ដុល្លារ​ឬ ៥០.០០០ដុល្លារ។ នេះ​មិន​ពិត​ទេ​”។​​​ធនាគារ​សាជីវកម្ម​សិង្ហបុរី​ កំពុង​​​​ទាម​ទារ​ប្រាក់​សរុប​ចំនួន​ជាង​១៣៣.០០​០​ដុល្លារ​​​មក​វិញ​។ ចៅក្រម​ តែ សំអាង បាន​ឲ្យ​ដឹង​ថា តុលាការ​ និង​ចេញ​សាលក្រម​នៅ​ថ្ងៃ​ទី១១ ​ខែ​​​ក្រោយ៕

ប្រែសម្រួលដោយ កង សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស