30 C
Phnom Penh

របាយការណ៍​មួយ​លើក​ឡើង​ថា គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយត្រូវការ​កែ​ទម្រង់​

ដោយ ឌឹ ខេមបូឌា ដេលី

បទវិភាគ

យោង​តាម​របាយការណ៍​មួយ​ដែល​ធនា​គារ​អភិវឌ្ឍន៍​អាស៊ី​ចេញកាល​ពី​ខែ​មីនា បាន​ឲ្យ​ដឹង​ថា គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​របស់​រដ្ឋា​ភិបាល​មិន​បាន​ឆ្លើយ​តប​ជា​ប្រចាំ​ទេ ហើយ​​ខ្វះ​ថវិកា​ប្រចាំ​ឆ្នាំ​សម្រាប់​ចំណាយ​លើ​ប្រតិបតិ្តការ​របស់​ខ្លួន ចំណែកឯ​បុគ្គលិក​ភាគ​ច្រើន​មិន​បាន​ដឹង​ទាល់​តែ​សោះ​ថា ខ្លួន​ត្រូវ​ធ្វើ​ការ​ងារ​អ្វី​ខ្លះ​នោះ​ទេ។

របាយការណ៍​ដែល​​​និយាយ​អំ​ពី​កិច្ច​ការ​​ផ្ទៃ​ក្នុង​របស់​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្ត​រាយ និង​សរសេរ​ដោយ​លោក​ ចេរ៉ូម ខាសសាល (Jerome Casals) ជា​អ្នក​ឯក​ទេស​ផ្នែក​គ្រប់​គ្រង​គ្រោះ​មហន្តរាយ​បាន​សម្ភាសមន្ត្រី​ដែល​ធ្វើ​ការ​នៅ​ស្ថា​ប័ន​នេះ​ ដែល​បាន​និយាយ​ថា​ អំឡុង​ពេល​មាន​គ្រោះ​មហន្ត​រាយ​ថ្នាក់​ជាតិ​ដូចជា​ទឹក​ជំនន់​ ស្ថាប័ន​នេះ​ខ្វះ​ទាំង​មូល​និធិ និង​សម្ភារ​ផ្សេងៗ​ ដើម្បី​អនុវត្ត​ប្រតិបត្តិការ​ផ្តល់​ជំនួយ​របស់​ខ្លួន​នៅ​​តាម​តំបន់​ដាច់​ស្រយាល។

របាយ​ការណ៍​នេះ​បាន​លើក​ឡើង​ថា “សម្រាប់​រយៈ​ពេល​ប៉ុន្មាន​ឆ្នាំ​មក​នេះ​ ទាំង​អគ្គ​លេខា​ធិការ​ដ្ឋាន​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្ត​រាយ និង​នាយក​ដ្ឋាន​ប្រតិ​​​បត្តិការ​របស់​ខ្លួន​ទាំង​អស់​​មិន​បាន​បង្កើត​ផែន​ការ​​​​ប្រចាំ​ឆ្នាំ​ ឬ​មាន​​ប្រាក់​កម្ចី​សម្រាប់​ប្រតិ​​​បត្តិ​​​ការ​​​​​​​ទេ ហើយ​មិន​មាន​ផ្នែក​ណា​មួយ​ក្នុង​ចំណោម​​​​ផ្នែក​ទាំង​អស់​នេះ​បាន​ទទួល​ថវិកា​​សម្រាប់​ប្រតិបត្តិការ​ប្រចាំ​ឆ្នាំ​ទេ”។ “នាយក​ដ្ឋាន​ភាគ​ច្រើន​មិន​មាន​សម្ភារ​ការិយាល័យ​សម្រាប់​ប្រើ​ប្រាស់​ជា​ប្រចាំ​ទេ​ ហើយ​​បុគ្គលិក​ភាគ​ច្រើន​មិន​មាន​ ឬ​មិន​ដឹង​ពី​ការ​ងារ​ដែល​ខ្លួន​ត្រូវ​ធ្វើ​ឡើយ​”។

គណៈ​កម្មា​ធិការ​ជាតិ​គ្រប់​គ្រង​គ្រោះ​មហ​ន្តរាយ​ដែល​ទទួល​បន្ទុ​ក​គ្រប់​គ្រង​ការ​ងារ​​​​​គ្រោះ​មហន្តរាយ​ និង​ការ​កាត់​បន្ថយ​ហានិភ័យ​សម្រាប់​ទឹក​ជំនន់ គ្រោះ​រាំង​ស្ងួត និង​ជំងឺ​រាត​​​ត្បាត​ទូ​ទាំង​ប្រទេស​កម្ពុជា​នោះ ត្រូវ​ជួបប្រជុំពីរ​ដង​ក្នុង​មួយ​ឆ្នាំ។ របាយការណ៍​នេះ​លើក​ឡើង​ថា “ កិច្ច​ប្រជុំ​​ពីរ​ដង​ក្នុង​មួយ​ឆ្នាំ​​នេះ​មិន​បាន​ធ្វើ​ជា​ប្រចាំ​ទេ​”។ ហើយ​របាយ​ការណ៍​នេះ​​បាន​លើក​ឡើង​ទៀត​ថា ជាទូ​ទៅ​កិច្ច​ប្រជុំ​​​​ទាំង​នោះ​ធ្វើ​ឡើង​រាប់​ខែ​បន្ទាប់​ពី​មាន​គ្រោះ​មហន្ត​រាយ​ធំៗ​។

កាល​ពី​ឆ្នាំ​២០១២ គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​រៀប​ចំ​កិច្ច​ប្រជុំ​តែ​ម្តង​ប៉ុណ្ណោះ​ ហើយ​កិច្ច​ប្រជុំ​នោះ​គឺ​ដើម្បី​ពិភាក្សា​ពី​បញ្ហា​ទឹក​ជំនន់​ដែល​បាន​ធ្វើ​ឲ្យ​ប៉ះ​ពាល់​ទូទាំង​ប្រទេស​ កាល​ពី​ឆ្នាំ​២០១១ គឺ​មាន​​​​រយៈ​ពេល​ពេញ​ប្រាំ​ខែ​ បន្ទាប់​ពី​ទឹក​ជំនន់​នោះ​បាន​ស្រក​ចុះ។ កាលពី​ឆ្នាំ​២០១១ ប្រជា​ពល​រដ្ឋ​ប្រហែល​២៥០​នាក់​បាន​ស្លាប់ និង​ជាង​១​លាន​នាក់​ទៀត​បាន​រង​ផល​ប៉ះ​ពាល់​ ដោយ​សារ​ទឹក​ជំនន់​ដ៏​ធំ​ដែល​បាន​ញំាញី​ប្រទេស​កម្ពុជា​ក្នុង​រយៈ​ពេល​មួយ​ទសវត្សរ៍​មក​នោះ​។ ​នៅ​​ពេល​នោះ ​រដ្ឋា​​​​​​​ភិបាល​បាន​ទទួល​រង​ការរិះ​គន់​ពី​អង្គការ​ផ្តល់​ជំនួយ​ដែល​បាន​លើក​ឡើង​ថា រដ្ឋា​ភិបាល​យឺត​​​​យ៉ាវ​ក្នុង​ការ​ឆ្លើយ​តប​ និង​ចែក​អំណោយ​​​​មិន​បាន​គ្រប់​គ្រាន់​។

អង្គការ​ អុកស្វាម នៅ​កម្ពុជាបាន​អំពាវ​នាវ​ជា​សាធារណៈ​ឲ្យ​មាន​ការ​​ចូល​​រួម​ពី​រដ្ឋា​ភិបាល​​​​ថែម​ទៀត ដើម្បី​សម្រប​សម្រួល​ដល់​កិច្ច​ខំ​ប្រឹង​ប្រែង​ជួយ​សម្រួល​​ដល់​​គ្រោះ​មហន្ត​រាយ​​​​ពី​សំណាក់​ក្រសួង​ផ្សេងៗ​ អ្នក​ផ្តល់​ជំនួយ​ និង​អង្គការ​មិន​មែន​រដ្ឋា​ភិបាល​។ ពេល​ឆ្លើយ​តប​ទៅ​នឹង​គ្រោះ​មហន្ត​រាយ​ បុគ្គលិក​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​ដែល​ត្រូវ​បាន​សម្ភាសសម្រាប់​ធ្វើ​របាយការណ៍​នេះបាន​លើក​ឡើង​ពី​បញ្ហា​ជុំវិញ​​ការ​ខ្វះ​ធន​ធាន​ហិរញ្ញ​វត្ថុ និង​សម្ភារ​ផ្សេងៗ ដើម្បី​បញ្ជូន​ទៅ​ឲ្យ​ក្រុម​អ្នក​ជួយ​សង្គ្រោះ​ដើម្បី​​​អនុវត្ត​ប្រតិបត្តិការ​របស់​ខ្លួន។

របាយការណ៍​នេះ​លើក​ឡើង​ថា ការ​​ស្វែង​​​​យល់​​អំ​ពី​ស្ថាន​ភាព​បច្ចុ​ប្បន្ន​ព្រម​ទាំង​ការ​សន្និ​​​ដ្ឋាន​នានា​ពី​ការ​វាយ​តម្លៃ​​លើក​មុនៗ​ទាំង​អស់​​​​​បង្ហាញ​យ៉ាង​ច្បាស់​ពី​ភាព​ទន់​ខ្សោយ ​ និង​​ត្រូវ​មាន​​​​ការ​ពង្រឹង​សមត្ថ​ភាព​ជា​ច្រើន​ទៀត​​សម្រាប់​​​​សម្រប​​សម្រួល​នៅ​ក្នុង​គ្រោះ​មហន្តរាយ​”។ ទោះ​បីជា​បុគ្គលិក​នៅ​ខាង​ក្នុង​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​បន្ទោស​ទៅ​លើ​ការ​ខ្វះ​មូល​និធិ និង​ធនធាន​នានា​ ចំពោះ​​​​ការ​មិន​អាច​បំពេញ​ការ​ងារ​ឲ្យ​បាន​ល្អ​ប្រសើ​រក៏​ដោយ​ ក៏​របាយការណ៍​នេះ​លើក​ឡើង​ថា នេះ​គ្រាន់​តែ​ជា​លេស​ប៉ុណ្ណោះ។

យោង​តាម​របាយការណ៍​នេះ​ឲ្យ​ដឹង​ថា “ដូច្នេះ ធនធាន​ដែល​មាន​តិចតួច​នា​ពេល​បច្ចុប្បន្ន​ដែល​មាន​សារៈសំខាន់​នោះ មិន​មែន​ជា​ហេតុ​ផល​ដែល​អាច​ទទួល​យក​បាន​​ចំពោះ​ការ​មិន​មាន​ផែនការ​សកម្ម​ភាព​​សម្រាប់​ប្រតិ​បត្តិការ និង​ថវិកា​របស់​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​នោះទេ”។ “សរុប​ទៅ​ របាយ​ការណ៍​នេះ​រក​ឃើញ​ថា មិន​មាន​មូល​ដ្ឋាន​រឹង​មាំ​​សម្រាប់​អនុវត្ត​ការ​គ្រប់​គ្រង​គ្រោះ​មហន្ត​រាយ​នៅ​ក្នុង​ប្រទេស​កម្ពុជា​នោះ​ទេ ព្រោះ​ឯក​សារ​គតិយុត្តិ និង​គោល​នយោ​បាយ​សំខាន់ៗ​ កំពុង​ស្ថិត​នៅ​ក្នុង​ដំណើរ​ការ​បង្កើត​​ ហើយ​មិនទាន់​មាន​ការ​អនុម័ត​យល់​ព្រម​នៅ​ឡើយ​ទេ។ នៅ​ថ្នាក់​ក្រោម​ជាតិ ​ឬ​ថ្នាក់​ខេត្ត​ មិន​មាន​ការ​បង្កើត​គោល​នយោ​បាយ​ទេ​ ព្រោះ​ពួក​គេ​ពឹង​ផ្អែក​ទាំង​ស្រុង​លើ​ថ្នាក់​ជាតិ​ សម្រាប់​ការ​បង្កើត​គោល​នយោ​បាយនានា”។

លោក ញឹម វណ្ណដា អនុ​ប្រធាន​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ និង​ជា​ទេស​រដ្ឋ​មន្ត្រី​គ្មាន​មុខងារ​ច្បាស់​លាស់​មក​ពី​គណបក្ស​ប្រជា​ជន​កម្ពុជា បាន​មាន​ប្រសាសន៍​ថា ស្ថាប័ន​នេះ​គ្មាន​ថវិកា​ប្រចាំ​ឆ្នាំ​ទេ ពី​ព្រោះ​ខ្លួន​មិន​ត្រូវ​ការ​ធន​ធាន​ហិរញ្ញ​វត្ថុ​ ហើយ​ថា ភារកិច្ច​របស់​ខ្លួ​ន​គឺ​ជា​អ្នក​សម្រប​សម្រួល​ មិន​មែន​ជា​ទី​ភ្នាក់​ងារ​ផ្តល់​ជំនួយ​ដោយ​ផ្ទាល់​ទេ។ លោក វណ្ណដា ក៏​បាន​មាន​ប្រសាសន៍​ដែរ​ថា គណៈ​កម្មា​​ធិការ​ជាតិ​គ្រប់​គ្រង​គ្រោះ​មហន្ត​រាយ​តែង​តែធ្វើ​ការ​ជាមួយ​កាកបាទក្រហម​កម្ពុជា ដែល​មាន​លោក​ស្រី ប៊ុន រ៉ានី ភរិយា​របស់​លោក​នាយក​រដ្ឋ​មន្ត្រី ហ៊ុន សែន ជា​ប្រធាន​ នៅ​ពេល​ដោះ​ស្រាយ​បញ្ហា​គ្រោះ​មហន្ត​រាយ​។

លោក វណ្ណដា បាន​មាន​ប្រសាសន៍​ថា គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្ត​រាយ​មិន​មាន​ថវិកា​ទេ ហើយ​គណៈ​កម្មា​ធិការ​នេះ​ក៏មិន​ទទួល​បាន​ជំនួយ​ដែរ។ គណៈ​កម្មា​ធិការ​នេះគឺ​ជាផ្នែក​មួយ​របស់​រដ្ឋា​ភិបាល​ និង​មាន​តួនាទី​ជា​អ្នក​សម្រប​សម្រួល​”។ លោក​បាន​មាន​ប្រសាសន៍​ថា របាយ​ការណ៍​របស់​ធនាគារ​អភិវឌ្ឍន៍​អាស៊ី​នេះ​មិន​ពិត​ទេ​។​ ប្រសិន​បើ​ធនាគារ​អភិវឌ្ឍន៍​អាស៊ី​មិន​សប្បាយ​ចិត្ត​ជាមួយ​គណៈ​កម្មា​ធិការ​ជាតិ​គ្រប់​គ្រង​គ្រោះ​​មហន្តរាយ​ទេ សូម​ធនាគារ​នេះ​កុំធ្វើ​ការ​​ជាមួយ​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​​អី​”។

លោក ផៃ ស៊ីផាន អ្នកនាំពាក្យ​ទី​ស្តីការ​គណៈ​រដ្ឋ​មន្ត្រី​បាន​មាន​ប្រសាសន៍​កាលពី​ម្សិល​មិញ​ថា លោក​មិន​ដឹង​ថា តើ​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​ត្រូវ​បាន​​រៀប​ចំ​ដូច​ម្តេច​ទេ​។ លោក​បាន​មាន​ប្រសាសន៍​ថា “ ខ្ញុំ​មិន​ដឹង​ថាហេតុ​អ្វី​បាន​ជា​គ្មាន​ថវិកា​ទេ​។ ប៉ុន្តែ ខ្ញុំ​គិត​ថាពួកគេ​ធ្លាប់​មាន​ថវិកា​សម្រាប់​គ្រប់​គ្រង​គ្រោះ​​មហន្តរាយ​ ប៉ុន្តែ គណៈ​កម្មា​ធិការ​នេះ​បាន​បោះ​បង់​ចោល​ ហើយ​ពួក​គេ​ប្រហែល​ជា​មិន​ទទួល​បាន​ថវិកា​ថ្មី​ទេ​”។

លោក​បាន​បន្ថែម​ថា កាកបាទ​ក្រហម​កម្ពុជា ទទួល​បន្ទុក​គាំ​ពារ​ជន​រង​គ្រោះ​ដោយ​សារ​ទឹក​ជំនន់​។ លោក​បាន​មាន​ប្រសាសន៍​ថា “កាកបាទ​ក្រហម​កម្ពុជា​ ​ដោះ​ស្រាយ​​គ្រោះ​មហន្តរាយ​ភាគ​ច្រើន​ ហើយ​ក៏​អាច​ជា​ការ​ងារ​របស់​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្ត​រាយ​ដែរ។ ចំពោះ​ទឹក​ជំនន់​វិញ​ កាកបាទ​ក្រហម​មាន​កម្ម​វិធី​ល្អ​មួយ​ ដែល​បង្កើត​ឡើង​ដើម្បី​ជួយ​ប្រជា​ពល​រដ្ឋ។ ខ្ញុំ​មិន​ដឹង​ទេ​អំពី​គណៈ​កម្មា​ធិការ​ជាតិ​​គ្រប់​គ្រង​គ្រោះ​មហន្តរាយ​ ពួក​គេ​មាន​គោ​ល​​នយោ​បាយ​ផ្ទាល់​ខ្លួន”។

លោក​ស្រី ម៉ែន នារីសុភ័គ អនុ​ប្រធាន​​កាក​បាទក្រហម​កម្ពុជា​បាន​បដិ​សេធ​មិន​ធ្វើ​អត្ថា​ធិប្បាយ​អំពី​​របៀប​ដែល​កាក​បាទ​ក្រហម​ធ្វើ​ការ​ជាមួយ​គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្តរាយ​ទេ ប៉ុន្តែ បាន​មាន​ប្រសាសន៍​ថា កាក​បាទ​ក្រហម​របស់​លោក​ស្រី​ទទួ​ល​ខុស​ត្រូវ​ចំពោះ​ការ​ងារ​មនុស្ស​ធម៌​ភាគ​ច្រើន​បំផុត​នៅក្នុង​ប្រទេស​កម្ពុជា។

លោក​ស្រី​បាន​មាន​ប្រសាសន៍ថា “គណៈ​កម្មា​ធិការ​ជាតិ​គ្រប់​គ្រង​គ្រោះ​មហន្ត​រាយ​ ពួក​គេ​សម្រប​សម្រួល។ ប៉ុន្តែ យើង​មាន​បុគ្គ​លិក​ផ្ទាល់​ខ្លួន​នៅ​តាម​សាខា​របស់​យើង​នៅ​ទូទាំង​ប្រទេស​”។ លោក​ស្រី​បាន​បន្ថែម​ថា បុគ្គលិក​១៥០​នាក់​ធ្វើ​ការ​ឲ្យ​កាកបាទ​ក្រហម​នៅ​ក្នុង​រាជ​ធានី​ភ្នំ​ពេញ រីឯ​បុគ្គលិក​ប្រហែល​១៥០​នាក់​ទៀត​ធ្វើ​ការ​នៅតាម​ខេត្ត​។

ទឹក​ជំនន់​បាន​កើត​ឡើង​ម្តង​ទៀត​នៅ​កម្ពុជា​​អំឡុង​រដូវ​វស្សា​ឆ្នាំ​នេះ ហើយ​ប្រជា​ពល​រដ្ឋ​រាប់​ពាន់​គ្រួសារ​ត្រូវ​បាន​ជម្លៀស​ទៅ​កាន់​ទីទួល​សុវត្ថិភាព។
កាល​ពី​ម្សិល​មិញ​ ទីភ្នាក់​ងារ​ផ្តល់​ជំនួយ​នានា​បាន​និយាយថា ខណៈ​ដែល​​​កម្រិត​ទឹក​ជំនន់​នៅ​ឆ្នាំនេះ​ទាប​ជាង​ឆ្នាំ​២០១១​​នោះ ​ការ​ឆ្លើយ​តប​ពិត​ជា​បាន​ប្រសើរ​ជាង​មុន​ ប៉ុន្តែ​ ប្រជា​ពល​រដ្ឋ​រាប់​រយ​នាក់ដែល​បាន​​រង​គ្រោះ​ដោយ​សារ​ទឹក​ជំនន់​នៅ​ជាយ​រាជ​ធានី​ភ្នំ​ពេញ បាន​ត្អូញ​ត្អែ​រកាល​ពីម្សិល​មិញ​ថា ពួក​គេ​មិន​ទាន់​ទទួល​បាន​ជំនួយ​ណា​មួយ​ពី​រដ្ឋា​ភិបាល​នៅ​ឡើយ​ទេ៕

(រាយការណ៍​បន្ថែម​ដោយ ឃួន ណារីម)
ប្រែ​សម្រួល​ដោយ មូល គឹមហឿន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស