គណបក្សសង្គ្រោះជាតិបានបដិសេធសេចក្តីរាយការណ៍នៅតាមគេហទំព័រជាភាសាខ្មែរកាលពីម្សិលមិញដែលថា លោក សម រង្ស៊ី មេដឹកនាំគណបក្សប្រឆាំង បានធ្វើដំណើរតាមយន្តហោះទៅអឺរ៉ុប និងអាមេរិក ដើម្បីស្វែងរកការធ្វើអន្តរាគមន៍ពីអន្តរជាតិ ក្នុងបញ្ហាជាប់គាំងដែលកំពុងបន្តកើតឡើងចំពោះការបោះឆ្នោតដ៏ចម្រូងចម្រាសកាលពីខែកក្កដា។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានឲ្យដឹងថា លោក សម រង្ស៊ី គ្រាន់តែបំពេញបេសកកម្មការទូតរយៈពេលមួយថ្ងៃទៅក្រៅប្រទេសប៉ុណ្ណោះ។ លោក សុវណ្ណ បានមានប្រសាសន៍ថា “គាត់កំពុងចេញក្រៅប្រទេសដើម្បីធ្វើកិច្ចការការទូត។ ខ្ញុំមិនដឹងថា គាត់នៅទីណាទេ ប៉ុន្តែគាត់នឹងត្រឡប់មកវិញនៅថ្ងៃស្អែក [ថ្ងៃនេះ]”។
ក៏ប៉ុន្តែ លោកស្រី មូរ សុខហួរ បានលើកឡើងថា សមាជិកសភាគណបក្សសង្គ្រោះជាតិបានមានប្រសាសន៍ថា លោក រង្ស៊ី ស្ថិតក្នុងប្រទេសសិង្ហបុរី ដើម្បីពិនិត្យសុខភាព។ លោកស្រី សុខហួរ បានឲ្យដឹងទៀតថាមេដឹកនាំមួយចំនួនរបស់គណបក្សសង្គ្រោះជាតិ បច្ចុប្បន្នកំពុងចុះតាមខេត្តដែលរងផលប៉ះពាល់ដោយសារទឹកជំនន់ក្នុងរយៈពេលពីរសប្តាហ៍មកនេះ ក៏ប៉ុន្តែនឹងមកចូលរួម “សមាជមហាជន” របស់គណបក្សប្រឆាំងនៅក្នុងរាជធានីភ្នំពេញនៅថ្ងៃអាទិត្យ៕
ប្រែសម្រួលដោយ ចេវ ប៊ុននី