កាលពីម្សិលមិញ សាលាឧទ្ធរណ៍បានចាប់ផ្តើមបើកសវនាការ លើបណ្តឹងឧទ្ធរណ៍ពីបុរសចំនួនប្រាំមួយនាក់ ដែលត្រូវបានផ្តន្ទាទោសឲ្យជាប់ពន្ធនាគាររយៈពេលពី១៥ឆ្នាំដល់១៧ឆ្នាំកាលពីឆ្នាំ២០១១ ពីបទបង្កើតកងកម្លាំងប្រឆាំងរដ្ឋាភិបាលប្រដាប់អាវុធមួយ ដែលមានឈ្មោះថា សុវណ្ណភូមិ ឬ ភូមិមាស ក្នុងឆ្នាំ២០០៦។
បុរសឈ្មោះ ជា សារ៉ន អាយុ៥១ឆ្នាំ លី សុខសុវណ្ណ អាយុ៥១ឆ្នាំ ផ្លត រី អាយុ៦២ឆ្នាំ ជុំ វិជ័យ អាយុ៤៤ឆ្នាំ យ៉ម ហេវ អាយុ៤៣ឆ្នាំ និងឈ្មោះ ប៉ត ផ អាយុ៤៨ឆ្នាំ ត្រូវបានចាប់ខ្លួនកាលពីខែមីនាឆ្នាំ២០១១ និងត្រូវបានចោទប្រកាន់តាមមាត្រា៤៦៣នៃក្រមព្រហ្មទណ្ឌថា បានបង្កើតកងកម្លាំងប្រឆាំងរដ្ឋាភិបាលដោយខុសច្បាប់។
សាលាដំបូងរាជធានីភ្នំពេញបានរកឃើញថា ក្រុមនេះមានពិរុទ្ធភាពកាលពីខែធ្នូឆ្នាំ២០១១និងបានផ្តន្ទាទោសលោក សារ៉ន ដែលជាមេដឹកនាំឲ្យជាប់ពន្ធនាគាររយៈពេល១៧ឆ្នាំនិងបន្ថយទោសអ្នកឯទៀតក្នុងក្រុមនេះត្រឹម១៥ឆ្នាំ។ អំឡុងពេលបើកសវនាការកាលពីម្សិលមិញ លោក សារ៉ន បានសារភាពថា ខ្លួនពិតជាបានបង្កើតចលនា សុវណ្ណភូមិកាលពីឆ្នាំ២០០៦មែន ខណៈដែលលោកកំពុងធ្វើការជាសន្តិសុខឲ្យគណបក្ស សម រង្ស៊ី ប៉ុន្តែបានលើកឡើងថា ខ្លួនគ្រាន់តែធ្វើដូច្នេះ បន្ទាប់ពីបុរសម្នាក់ឈ្មោះ ថាប់ ថៃ បានសន្យាឲ្យប្រាក់២០លានដុល្លារ។
បុរសឈ្មោះ សារ៉ន បាននិយាយថា “ខ្ញុំបានប្តឹងឧទ្ធរណ៍ ពីព្រោះខ្ញុំមិនពេញចិត្តនឹងទោសធ្ងន់ធ្ងរបំផុតនេះ ហើយខ្ញុំមិនបានធ្វើអ្វីខុសនោះទេ”។ បុរសរូបនេះបានលើកឡើងម្តងហើយម្តងទៀតអំពីការបដិសេធកន្លងមករបស់គាត់ថា ចលនានេះគ្មានបំណងផ្តួលរំលំរដ្ឋាភិបាលទេ។បុរសរូបនេះបានបន្តថា “ខ្ញុំគ្មានបំណងផ្តួលរំលំរដ្ឋាភិបាលទេពីព្រោះខ្ញុំគ្មានអាវុធទេ”។
ទោះជាយ៉ាងណា បុរសឈ្មោះ ផ្លត រី បានស្នើតុលាការលើកលែងការចោទប្រកាន់ដោយសារពាក់ព័ន្ធក្នុងស្ថានភាពយល់ច្រឡំ។ បុរសនេះនិយាយថា “ខ្ញុំមិនដឹងថា ហេតុអ្វីខ្ញុំត្រូវបានផ្តន្ទាទោសនោះទេ។ ខ្ញុំគ្រាន់តែធ្វើជាអ្នកយកការណ៍ដែលរដ្ឋាភិបាលបញ្ជូនឲ្យស៊ើបអង្កេតអំពីចលនានោះប៉ុណ្ណោះ ” លោកបានអង្វរករថា “សូមលោកចៅក្រមលើកលែកការចោទប្រកាន់ខ្ញុំទៅ”។
លោក លី ឫទ្ធី មេធាវីរបស់បុរសឈ្មោះ វិជ័យ លើកឡើងថា វេជ្ជបណ្ឌិតបានបញ្ជាក់ថា កូនក្តីរបស់លោកមានជំងឺសរសៃប្រាសាទ បន្ទាប់ពីបានធ្លាក់ពីលើប្រាសាទព្រះវិហារក្នុងឆ្នាំ២០០៦ ហើយបោកទង្គិចត្រូវក្បាលរបស់គាត់ ហើយបន្ទាប់មកបានជាប់ពាក់ព័ន្ធក្នុងគ្រោះថ្នាក់ចរាចរជាបន្តបន្ទាប់។ លោកបានថ្លែងថា “ វេជ្ជបណ្ឌិតជាច្រើន និងអ្នកជិតខាងបួននាក់ បានបញ្ជាក់ថា កូនក្តីរបស់ខ្ញុំមានជំងឺសរសៃប្រាសាទ។ សូមចៅ ក្រមដោះលែងគាត់ទៅ”។
លោក អ៊ឹម សុផាន ព្រះរាជអាជ្ញាអមសាលាឧទ្ធរណ៍ បានឲ្យដឹងថា លោកគ្រាន់តែប្រឹងប្រែងឲ្យមានការលើកលែងការចោទប្រកាន់សម្រាប់បុរសឈ្មោះ ហេវ និងលោក ប៉ត ផ ដែលត្រូវបានអះអាងថា ជាកសិករមិនដឹងអំពីចលនានេះទេ។ លោកបានមានប្រសាសន៍ថា “ព្រះរាជអាជ្ញាគិតថា ឈ្មោះ យ៉ម ហេវ និង ប៉ត ផ មិនពាក់ព័ន្ធក្នុងរឿងក្តីនេះទេ”។
បុរសឈ្មោះ សារ៉ន ដែលជាមេដឹកនាំចលនានេះបានប្រាប់តុលាការនេះថា ខ្លួនមិនដែលបានជួបបុរសទាំងពីរនាក់នេះទេ។ លោក ផ្លាង សំណាង ប្រធានចៅក្រមបានឲ្យដឹងថា សាលដីកានឹងត្រូវប្រកាសនៅថ្ងៃទី១៦ ខែតុលា។ រយៈពេលជាច្រើនឆ្នាំហើយ រដ្ឋាភិបាលបានចោទប្រកាន់និងផ្តន្ទាទោសក្រុមនេះជា សាធារណៈថា ជាក្រុមគំរាមកំហែងដល់សន្តិសុខជាតិ។ ក៏ប៉ុន្តែ ក្នុងករណីពិសេសនៃអ្នកប្រយុទ្ធដើម្បីសេរីភាពកម្ពុជា ដែលបានឆ្នក់ចូលទីស្នាក់ការរបស់គណបក្សប្រជាជនកម្ពុជា ដែលបានបណ្តាលឲ្យមានការបង្ហូរឈាម ជាហេតុបណ្តាលឲ្យមនុស្សប្រាំបីនាក់ស្លាប់កាលពីឆ្នាំ២០០០នោះ គ្មាននរណាម្នាក់ពាក់ព័ន្ធក្នុងចំណោមបុរសទាំងនេះ ធ្លាប់ពាក់ព័ន្ធក្នុងការប្រើអិពើហិង្សាទេ។
ក៏ប៉ុន្តែ ជាច្រើននាក់ក្នុងចំណោមបុរសទាំងនេះត្រូវបានចាប់ខ្លួនពីបទធ្វើសកម្មភាពអហិង្សាដូចជាការចែកចាយព័ត៌មានរិះគន់រដ្ឋបាលរបស់លោកនាយករដ្ឋមន្ត្រី ហ៊ុន សែន ជាដើម៕
ប្រែសម្រួលដោយ ចេវ ប៊ុននី