32.1 C
Phnom Penh

លោក​ ស ខេង​ សរសើរ​កង​​​កម្លាំង​សន្តិ​សុខចំពោះ​​​ការ​​​​ការ​ពារសុវត្ថិភាព​​អំឡុង​ការ​បោះ​ឆ្នោត​​​​ជាតិ​​​

ដោយ ឌឹ ខេមបូឌា ដេលី

បទវិភាគ

យោង​តាម​លិខិត​មួយ​ច្បាប់​ដែល​ទទួល​បាន​​​កាលពី​ម្សិលមិញបានឲ្យ​ដឹង​ថា លោក​ ស ខេង រដ្ឋមន្ត្រី​ក្រសួង​មហាផ្ទៃ​បាន​សរសើរ​កម្លាំង​សន្តិ​សុខ​ដែល​បាន​ការពារ​សុវត្ថិភាព​ អំឡុង​ការ​បោះ​ឆ្នោត​កាលពី​ថ្ងៃ​ទី​២៨ ខែកក្កដា និង​ក្រោយ​ថ្ងៃ​បោះ​ឆ្នោត​រហូត​ដល់​ថ្ងៃ​កោះ​ប្រជុំ​​​​សភា​លើក​ដំបូង​កាលពី​សប្ដាហ៍​មុន។

នៅ​ក្នុង​ “លិខិត​សរសើរ​​” របស់​លោក លោក​ ស ខេង ដែល​ជា​ប្រធាន​គណៈ​បញ្ជា​​​ការ​សន្តិ​សុខ​អចិន្ត្រៃយ៍​សម្រាប់​ការ​បោះ​ឆ្នោត​បាន​មាន​ប្រសាសន៍​ថា កម្លាំង​ប្រដាប់​អាវុធ​បាន​ការពារ​ “សន្តិ​សុខ សុវត្ថិភាព សណ្ដាប់​ធ្នាប់​សាធារណៈ​សម្រាប់​ការ​បោះ​ឆ្នោត​អាណត្តិ​​​​ទី៥ឲ្យ​ប្រព្រឹត្ត​ទៅ​ដោយ​រលូន​” និង​ប្រកប​ដោយ​ភាព​ជោគជ័យ។

លោក ស ខេង បាន​សរសេរ​ថា “មតិ​សាធារណៈ​ជាតិ និង​អន្តរជាតិ​បាន​វាយ​តម្លៃ​ថា ការ​បោះ​ឆ្នោត​ប្រព្រឹត្ត​ទៅ​ដោយ​យុត្តិ​ធម៌​ សេរី សុវត្ថិភាព គ្មាន​អំពើ​ហិង្សា និង​ការ​បំភិត​​​​បំភ័យ​ឡើយ​”។ ​លោក​បាន​បន្ថែម​ថា កម្លាំង​សន្តិ​សុខ​បាន​ការពារ​ “សម័យ​ប្រជុំ​សភា​លើក​ដំបូងបាន​យ៉ាង​ជោគ​ជ័យ​”។

ប៉ុន្តែ​ចាប់​តាំង​ពី​ការ​បោះឆ្នោត​កាលពី​ថ្ងៃ​ទី​២៨ ខែកក្កដា​មក អ្នក​គាំទ្រ​គណបក្ស​ប្រឆាំង​បាន​មក​ជួប​ជុំគ្នា​ក្នុង​រាជធានី​ភ្នំពេញ​រាប់​ម៉ឺន​នាក់​ ដើម្បី​តវ៉ាឲ្យ​មាន​ការ​ស៊ើប​អង្កេ​ត​​​ដោយ​ឯករាជ្យ​ពាក់ព័ន្ធ​ការ​បោះ​ឆ្នោត​នោះ ដែល​ការ​អំពាវ​នាវ​នោះ​ត្រូវ​បាន​គាំទ្រ​ពី​សំណាក់​អង្គការ​សហ​ប្រជា​ជាតិ​ និង​ក្រសួង​ការ​បរទេស​អា​មេរិក។

លិខិត​របស់​លោក ស ខេង ដែល​ចុះ​កាល​​​បរិច្ឆេទ​ថ្ងៃ​ព្រហស្បតិ៍ មិន​បាន​លើក​ឡើង​ពីការ​ប៉ះទង្គិច​គ្នា​កាលពី​ថ្ងៃ​ទី​១៥ ខែ​កញ្ញា រវាង​យុវជន​ដែលប្រដាប់ ដោយ​ដុំថ្ម  ជាមួយ​​នគរ​បាល និង​កង​រាជ​អាវុធ​ហត្ថ​ ​​នៅ​ក្បែ​រ​​​ស្ពាន​ព្រះ​មុនីវង្ស ដែល​បាន​បណ្ដាល​ឲ្យ​អ្នក​ឈរ​មើល​ម្នាក់​ស្លាប់ និង​យ៉ាង​ហោច​ណាស់​មនុស្ស​​​​១០​នាក់​ទៀត​រង​របួស​ដោយគ្រាប់​កាំ​ភ្លើង​នោះទេ​​។

លិខិត​នេះ​ក៏​មិន​បាន​លើក​ឡើ​ង​អំពី​ការ​ប៉ះទង្គិច​គ្នា​ដ៏ហិង្សាកាលពី​ថ្ងៃ​ទី​២២ ខែ​កញ្ញា នៅ​វត្ត​ភ្នំ ដែល​បង្ក​ឡើង​ដោយ​បុរស​​មួយ​ក្រុម​ស្លៀក​ពាក់​ស៊ីវិល និង​ប្រដាប់​​ដោយ​អាវុធ​ ហើយ​មាន​ការ​គាំទ្រ​ពី​​​កង​កម្លាំង​នគរ​បាល​ និង​កង​រាជ​អាវុធ​ហត្ត​ទៅ​លើ​អ្នក​តវ៉ា​ដោយ​សន្តិវិធី​ អ្នក​កាសែត និង​អ្នក​ឃ្លាំមើល​សិទ្ធិ​​​មនុស្ស​នោះដែរ​។

មន្ត្រី​ក្រសួង​មហាផ្ទៃ​ និង​អាជ្ញាធរ​ខណ្ឌ​ដូន​ពេញ បាន​បដិសេធ​ថា ពួកគេ​មិន​បាន​ឃុប​​​​ឃិត​ជាមួយ​ក្រុម​ដែល​ប្រើ​ដំបង​ឆក់ ​និង​​បាញ់​ចំពាម​កៅស៊ូទៅ​លើ​អ្នក​តវ៉ា​ជាស្ត្រី​​ អ្នក​កាសែត​ និង​អ្នក​ឃ្លាំ​មើល​សិទ្ធិ​មនុស្សឡើយ​។

លោក​ឧត្តម​សេនីយ៏ត្រី ខេង ទីតូ អ្នក​នាំ​​​ពាក្យ​កង​រាជ​អាវុធ​ហត្ថ​បាន​មាន​ប្រសា​សន៍​ថា ​កម្លាំង​ប្រដាប់​អាវុធ​សម​នឹង​ទទួល​ការ​​កោត​សរ​សើរ​​ពី​លោក​ ស ខេង ព្រោះ​កម្លាំង​សន្តិ​សុខ​ មាន​ “ វិន័យ​ល្អ​ គោរព​ច្បាប់​ និង​មាន​សីលធម៌​​​ល្អ”។ លោក​ឧត្តមសេនីយ៍​ត្រី ខេង ទីតូ បាន​សន្និ​ដ្ឋាន​ថា “ករណី​បុរស​ម្នាក់​ស្លាប់​​ [នៅ​ក្បែ​រ​​​ស្ពាន​ព្រះ​មុនី​វង្ស] គឺ​ដោយសារតែ​ការ​ប៉ះ​​​ទង្គិច​គ្នា​ប៉ុណ្ណោះ​។ ករណីនេះ​មិន​មែន​ជា​ចេត​នា​របស់​អាជ្ញាធរ​ឡើយ​”។ លោក​បាន​បន្ថែម​ថា លោក​មិន​ដឹង​ពីការ​ស៊ើប​អង្កេត​ពាក់​ព័ន្ធ​ការ​ស្លាប់​នេះ​ឡើយ។ បន្ទាប់​មក​លោក​បាន​បដិសេធ​មិន​ធ្វើ​អត្ថា​​​ធិប្បាយ​ពី​មូល​ហេតុ​ដែល​នគរ​បាល និង​កង​រាជ​អាវុធ​ហត្ថឈរមើល​​​​អំឡុង​​ពេល​មាន​ការ​វាយ​ប្រហារ​ពី​​​ក្រុម​មនុស្ស​នៅ​វត្តភ្នំ​នោះ​ឡើយ​៕

ប្រែសម្រួលដោយ សោម សារុន​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស