គេហទំព័រព័ត៌មានដ៏ពេញនិយម Cambodia Express News (CEN) បានរាយការណ៍កាលពីម្សិលមិញថា លោក ហ្សង់ហ្រង់ស័រ កូតាំង (Jean-Francois Cautain) ឯកអគ្គរដ្ឋទូតសហភាពអឺរ៉ុបបានប្រាប់លោក សុខ អាន ឧបនាយករដ្ឋមន្ត្រីមកពីគណបក្សប្រជាជនកម្ពុជាថា សហភាពអឺរ៉ុបចង់ឃើញគណបក្សសង្គ្រោះជាតិទទួលយកអាសនៈរបស់ខ្លួននៅរដ្ឋសភា។
គេហទំព័រព័ត៌មាន CEN បានរាយការណ៍ថា ប្រសាសន៍របស់លោក កូតាំង លើកឡើងអំឡុងកិច្ចប្រជុំជាមួយលោកឧបនាយករដ្ឋមន្ត្រីនៅទីស្តីការគណៈរដ្ឋមន្ត្រី កាលពីព្រឹកម្សិលមិញ។ គេហទំព័រនេះបានរាយការណ៍ទៀតថា “លោក ហ្សង់ហ្រង់ស័រ កូតាំង ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា បានបង្ហាញថា ជំហរបស់លោកគឺចង់ឃើញគណបក្សឈ្នះឆ្នោតទាំងពីរអង្គុយនៅក្នុងរដ្ឋសភា ដើម្បីធ្វើឲ្យលទ្ធិប្រជាធិបតេយ្យនៅក្នុងប្រទេសកម្ពុជាកាន់តែប្រសើរឡើង”។
រដ្ឋសភាដែលមាន១២៣អាសនៈនេះ បានកោះប្រជុំកាលពីថ្ងៃទី២៣ ខែកញ្ញា ដោយមានវត្តមានសមាជិកសភាគណបក្សប្រជាជនកម្ពុជា៦៨រូបរបស់លោកនាយករដ្ឋមន្ត្រី ហ៊ុន សែន តែប៉ុណ្ណោះ។ គណបក្សសង្គ្រោះជាតិបានប្តេជ្ញាធ្វើពហិការមិនចូលរួមប្រជុំរដ្ឋសភា លុះត្រាតែ គណបក្សប្រជាជនកម្ពុជាយល់ព្រមធ្វើកំណែទម្រង់មួយចំនួន និងធ្វើការស៊ើបអង្កេតឯករាជ្យអំពីភាពមិនប្រក្រតីអំឡុងការបោះឆ្នោតជាតិ កាលពីខែកក្កដាសិន។
លោកស្រី ប៉ោក ពូន មន្ត្រីព័ត៌មានរបស់គណៈប្រតិភូសហភាពអឺរ៉ុបបានអះអាងថា លោក កូតាំង និងលោក សុខ អានបានជួបគ្នា។ លោកស្រី ប៉ោក ពូន បានលើកឡើងតាមអីុម៉េលថា “ ឯកអគ្គរដ្ឋទូតសហភាពអឺរ៉ុបបានសង្កត់ធ្ងន់ថា រដ្ឋសភាមិនអាចបម្រើឲ្យគោលបំណងរបស់ខ្លួន ដោយមិនមានការចូលរួមពីគណបក្សជាប់់ឆ្នោតឡើយ ហើយថា គណបក្សជាប់ឆ្នោតគួរសហការគ្នាបំពេញតួនាទីនៅក្នុងរដ្ឋសភាដែលប្រជាពលរដ្ឋកម្ពុជាបានផ្តល់ឲ្យ”។
លោក សុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិបានមានប្រសាសន៍ថា ការចរចាបន្ថែមទៀតជាមួយគណបក្សកាន់អំណាច និងការសម្របសម្រួលពីគណបក្សប្រជាជនកម្ពុជា គឺជាការចាំបាច់ណាស់ មុនពេលគណបក្សសង្គ្រោះជាតិពិចារណាទទួលយកអាសនៈរបស់ខ្លួន។ លោកបានមានប្រសាសន៍ថា “ យើងចង់ឃើញគណបក្សប្រជាជនកម្ពុជាដោះស្រាយបញ្ហានេះ។ តួនាទីនេះមិនមែនសម្រាប់ពួកយើងទេ។ វាជាតួនាទីរបស់សហភាពអឺរ៉ុប និងសហរដ្ឋអាមេរិក។ យើងមានឆន្ទៈចូលរួមក្នុងជំនួបទាំងនោះ ប៉ុន្តែ ការសម្របសម្រួលត្រូវធ្វើមុនពេលយើងចូលរួម បើមិនដូច្នោះទេ បញ្ហានឹងនៅតែកើតមានដដែល”។ លោកបានមានប្រសាសន៍ថា “ប្រសិនបើគណបក្សប្រជាជនកម្ពុជាមិនចង់សើុបអង្កេតអំពីការលួចបន្លំសន្លឹកឆ្នោតទេនោះ ពួកគេគួរដោះស្រាយបញ្ហានេះ ដោយផ្តល់តួនាទីមួយចំនួនដល់ពួកយើងដើម្បីបែងចែកអំណាចឲ្យមានតុល្យភាព”។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានមានប្រសាសន៍ថា ឯកអគ្គរដ្ឋទូតសហភាពអឺរ៉ុប “ចង់ឃើញគណបក្សប្រឆាំងទទួលយកអាសនៈរបស់ខ្លួន ហើយធ្វើការសម្រុះសម្រួលរវាងគណបក្សទាំងពីរ”៕
ប្រែសម្រួលដោយ សោម សារុន