ជារៀងរាល់ឆ្នាំ ប្រជាពលរដ្ឋរាប់ម៉ឺននាក់ឆ្លងទន្លេមេគង្គពីខេត្តកណ្តាលទៅខេត្តព្រៃវែងដើម្បីទៅចូលរួមពិធីបុណ្យភ្ជុំបិណ្ឌជាមួយក្រុមគ្រួសាររបស់ខ្លួន។ អ្នកធ្វើដំណើរមួយចំនួនដែលតម្រង់ជួរនៅកំពង់ចម្លងអ្នកលឿង និងដកដង្ហើមស្រូបផ្សែងរថយន្តរាប់ពាន់គ្រឿងនោះ ទ្រាំរង់ចាំរហូតដល់មួយថ្ងៃ។ ប៉ុន្តែសម្រាប់អ្នកមានលុយវិញអាចឆ្លងបានក្នុងរយៈពេលមិនដល់មួយម៉ោងផង។
អ្នកដែលបានតម្រង់ជួរនៅមុខគេចម្ងាយពីរគីឡូម៉ែត្រកាលពីម្សិលមិញ នៅទល់នឹងច្រវាក់បិទផ្លូវចូលស្រឡាងនោះ គឺអ្នកដែលបានមកដល់មុនគេតាំងពីមុនថ្ងៃរះ។ ទោះជាយ៉ាងណា មនុស្សមួយក្រុមទៀតដែលស្ថិតនៅជួរមុខដែរនោះ គឺជាអ្នកដែលបានសូកប៉ាន់ឲ្យមន្ត្រីនគរបាលប្រហែល៥ដុល្លារ ដើម្បីឆាប់បានឆ្លងចូលទៅស្រឡាងតាមផ្លូវកាត់។ ទៅហួសពីកន្លែងកកស្ទះចរាចរណ៍នោះ មន្ត្រីនគរបាលចរាចរពីរនាក់បានឈរយាមផ្លូវចេញចូលដោយសេរីមួយនៅខាងស្តាំផ្លូវជាតិលេខ១។
មន្ត្រីម្នាក់ដែលនិយាយក្នុងលក្ខខណ្ឌអនាមិកបាននិយាយថា “ ប្រសិនបើពួកគេចង់ទៅត្រង់វាមិនអីទេ។ ប៉ុន្តែ ផ្លូវនេះជិតហើយលឿនជាង”។ មន្ត្រី រូបនេះបានចង្អុលប្រាប់ទៅផ្លូវវាងដែលមិនកកស្ទះ ហើយភ្ជាប់មកផ្លូវជាតិលេខ១វិញតែប៉ុន្មានម៉ែត្រប៉ុណ្ណោះពីច្រវាក់ឃាំងផ្លូវមិនឲ្យមនុស្សដើរចូលក្នុងស្រឡាង។
គាត់បានឲ្យដឹងទៀតថា “យើងមានការយោគយល់ចំពោះប្រជាពលរដ្ឋ។ ប្រសិនបើពួកគេចង់ចូលតាមផ្លូវកាត់ គេត្រូវឲ្យលុយយើងខ្លះ។ ប្រសិនបើមិនដូច្នោះទេ ពួកគេត្រូវទៅត្រង់”។
នៅពេលសួរថា តើគាត់ដឹងថា អ្វីដែលគាត់កំពុងធ្វើជាការខុសច្បាប់ ឬយ៉ាងណានោះ មន្ត្រីរូបនេះបាននិយាយថា “ប្រសិនបើលោកចង់ដឹងបន្ថែមទៀត លោកសួរមេធំទៅ”។ ចម្ងាយប្រហែលពីរបីរយម៉ែត្រពីកំពង់ចម្លងនេះ មានផ្លូវកាត់ទី២ដែលមានមន្ត្រីនគរបាលឈរយាមដោយទុកសម្រាប់តែរថយន្តក្រុង និងរថយន្តដឹកទំនិញធំៗប៉ុណ្ណោះ។
ពេលរង់ចាំនៅក្នុងជួរនោះ បុគ្គលិកក្រុមហ៊ុនដឹកអ្នកដំណើរ ខៃណាំ អាយុ២៤ឆ្នាំម្នាក់បាននិយាយថា គាត់បានឲ្យលុយនគរបាលចំនួន៧០ដុល្លារ ដើម្បីចូលតាមផ្លូវកាត់នោះនិងបានទៅដល់ស្រឡាងមុនគេបង្អស់។ គាត់បាននិយាយថា “ខ្ញុំបានចំណាយលុយ៧០ដុល្លារដើម្បីចូលតាមផ្លូវកាត់នេះ។ យើងចំណេញពេលបួនទៅប្រាំម៉ោង ព្រោះចរាចរណ៍មានស្ថានភាពបែបនេះនៅថ្ងៃបុណ្យ។ យើងតែងតែចំណាយលុយដើម្បីធ្វើឲ្យអតិថិជនរបស់យើងសប្បាយចិត្ត”។
នៅត្រង់ចំណុចដដែលនេះ បុគ្គលិកក្រុមហ៊ុនដឹកអ្នកដំណើរ ភ្នំពេញសូរិយា ម្នាក់ ដែលសុំមិនឲ្យបញ្ចេញឈ្មោះបាននិយាយថា គាត់មិនបានឲ្យលុយនគរបាលទេ ហើយគាត់សុខចិត្តរង់ចាំច្រើនម៉ោង ពីព្រោះក្រុមហ៊ុន សូរិយា មិនសូកប៉ាន់ទេ។
លោក រស់ ចន្ថា អធិការនគរបាលស្រុកលើកដែកបានបដិសេធថា មន្ត្រីរបស់លោកមិនបានយកលុយពីអ្នកធ្វើដំណើរឆ្លងកាត់ស្រឡាងនេះទេ។
លោកបានមានប្រសាសន៍ដោយមិនបញ្ជាក់ច្បាស់ថា “នគរបាលរបស់យើងមិនអាចយកលុយបានទេ ពីព្រោះមានផ្លូវតែមួយប៉ុណ្ណោះទៅកាន់ស្រឡាងនេះ”។
នៅពាក់កណ្តាលផ្លូវកាត់មួយ គេឃើញមន្ត្រីកងរាជអាវុធហត្ថម្នាក់រាប់លុយយ៉ាងច្រើនដែលបានយកពីអ្នកធ្វើដំណើរ។ មនុស្សមួយចំនួនដែលបានសូកប៉ាន់ឲ្យនគរបាលបានចោទនគរបាលថា បានជំរិតយកលុយដោយផ្ទាល់។
លោក សេក ធី អាយុ៣២ឆ្នាំ ដែលបានចេញតាមផ្លូវផ្សេងជាមួយគ្រួសាររបស់គាត់នោះបាននិយាយថា “ខ្ញុំដឹងថា វាជាការងារធម្មតារបស់ពួកគេក្នុងការយកលុយពីយើង ប៉ុន្តែ ពួកគេបានយកលុយពីខ្ញុំបីកន្លែងផ្ សេងគ្នានៅថ្ងៃនេះ វាច្រើនពេកហើយ”។ គាត់បាននិយាយថា “ប្រសិនបើពួកគេគ្រាន់តែយកលុយផឹកកាហ្វេនោះ វាមិនអីទេ ប៉ុន្តែ ខ្ញុំបានឲ្យលុយគេអស់២០.០០០រៀលរួចហើយ ហើយខ្ញុំនៅតែមិនទាន់ទៅដល់ស្រឡាងទៀត”។ គាត់បានបន្ថែមថា គាត់បានមកដល់អ្នកលឿងមួយម៉ោងមុននោះ។
អ្នកផ្សេងទៀត ដែលមិនមានលុយ ឬមិនព្រមចំណាយលុយសូកប៉ាន់នោះបានរង់ចាំយ៉ាងយូរ។ បុរសអាយុ៥៤ឆ្នាំ ម្នាក់ដែលគ្រាន់តែប្រាប់ថា គាត់ឈ្មោះ សុខា និងនៅចម្ងាយប្រហែល៥០០ម៉ែត្រពីកំពង់ចម្លងនៅម៉ោងប្រហែល១១ព្រឹក បាននិយាយថា “យើងបានមកដល់មុនម៉ោង៧ព្រឹក។ មានមន្ត្រីពុករលួយច្រើនណាស់ដែលអនុញ្ញាតឲ្យគេចូលតាមផ្លូវផ្សេង៕
ប្រែសម្រួលដោយ មូល គឹមហឿន