សាលារាជធានីបានលើកឡើងនៅក្នុងសេចក្ដីប្រកាសមួយថា ចាប់ពីថ្ងៃនេះរហូតដល់ថ្ងៃអាទិត្យ ក្រុមហ៊ុនស៊ិនទ្រី ដែលជាក្រុមហ៊ុនប្រមូលសំរាមតែមួយគត់ក្នុងរាជធានីភ្នំពេញ នឹងមិនអាចប្រមូលសំរាមបានទេ ដោយសារតែ៧៧ភាគរយនៃកម្មកររបស់ក្រុមហ៊ុននេះត្រូវបានឈប់សម្រាករយៈពេលបីថ្ងៃ។
ប្រជាពលរដ្ឋរស់នៅរាជធានីភ្នំពេញក៏ត្រូវបានជូនដំណឹងដែរថា រយៈពេលពីរថ្ងៃបន្ថែមពីលើនេះ សេវាប្រមូលសំរាមក្នុងរាជធានីភ្នំពេញនឹងវិលទៅរកសភាពធម្មតាវិញ ពីព្រោះកម្មករប្រមូលសំរាមត្រូវធ្វើដំណើរទៅតាមបណ្ដាខេត្ត ដើម្បីជួបជុំគ្រួសារ។ សេចក្ដីជូនដំណឹងនេះមានខ្លឹមសារថា “ពាក់ព័ន្ធនឹងបញ្ហានេះ យើងសូមជូនដំណឹងដល់ប្រជាពលរដ្ឋទាំងអស់ សូមមេត្តាវិចខ្ចប់ និងរក្សាទុកសំរាមរបស់ខ្លួននៅក្នុងផ្ទះ ហើយកុំយកបោះចោលនៅតាមទីសាធារណៈ ដែលធ្វើឲ្យប៉ះពាល់ដល់សណ្ដាប់ធ្នាប់សាធារណៈ សោភ័ណភាព អនាម័យ និងបរិស្ថាន”។
ការអំពាវនាវឲ្យសាធារណជនចូលរួមចំណែកនៅក្នុងកិច្ចការនេះ គឺជាសំណើសមហេតុផលក្រោមកាលៈទេសៈនេះ ប៉ុន្តែត្រឹមរសៀលថ្ងៃម្សិលមិញ មុនពេលថ្ងៃឈប់សំរាករបស់ក្រុមហ៊ុនស៊ិនទ្រី បានចាប់ផ្ដើមសំរាមបានគរយ៉ាងច្រើនរួចទៅហើយនៅលើផ្លូវនានាក្នុងរាជធានីភ្នំពេញ ហើយធ្វើឲ្យមានទិដ្ឋភាពអាក្រក់សម្រាប់ប្រជាពលរដ្ឋក្នុងមូលដ្ឋាន ក៏ដូចជាភ្ញៀវទេសចរដែរ។
នៅឯចំណុចកាច់ជ្រុងនៃផ្លូវលេខ១៣ និងផ្លូវលេខ១១៤ អាជីវករម្នាក់ ដែលលក់បង្អែម និងនំខ្មែរ បានសម្លឹងមើលគំនរសំរាមនៅចំកណ្ដាលនៃចំណុចផ្លូវប្រសព្វ ពេលគាត់ដើរទៅជិតអតិថិជនរបស់គាត់។
យុវជន ឃៀន សាពូន អាយុ២៤ឆ្នាំ ដែលជាអាជីវករលក់ដូរបាននិយាយថា “វានឹងធុំក្លិនស្អុយខ្លាំងអំឡុងរយៈពេលបីថ្ងៃនេះ ហើយសំរាមទាំងអស់នេះនឹងជះផលប៉ះពាល់ដល់អាហារ និងអតិថិជនរបស់ខ្ញុំ។ ប៉ុន្តែវាជាស្ថានភាពពិបាក ពីព្រោះកម្មករប្រមូលសំរាមក៏គួរតែអាចទៅស្រុកកំណើត ដើម្បី ចូលរួមពិធីបុណ្យភ្ជុំបិណ្ឌដែរ”។
សេចក្ដីប្រកាសសុំឲ្យមានការយោគយល់នេះត្រូវបានចែករំលែកដល់អាជីវករផ្សេងៗទៀតនៅក្នុងរាជធានីភ្នំពេញ។ អ្នកស្រី សោម ឡាង អាយុ៤២ឆ្នាំបានបើកអាហារដ្ឋានលក់អាហារសមុទ្ររបស់គាត់នៅតាមចិញ្ចើមផ្លូវស្ថិតនៅលើកំណាត់ផ្លូវលេខ៥១នៅក្បែរថង់សំរាមពណ៌ខ្មៅបែកធ្លាយដែលមិនត្រូវបានប្រមូលកាលពីមួយយប់មុននោះដែលជះក្លិនស្អុយអាក្រក់។
អ្នកស្រីនិយាយថា “យើងលក់អាហារសមុទ្រ ដូច្នេះវាធុំក្លិនអាក្រក់ណាស់ ប៉ុន្តែមានកម្មករ [ប្រមូលសំរាម] តិចតួចណាស់នៅចុងសប្ដាហ៍នេះ។ ខ្ញុំមិនអាចទ្រាំមើលរហូតដល់ [អ្នកប្រមូលសម្រាម] មកដល់ទេ ដូច្នេះខ្ញុំនឹងប្រមូលសំរាមនេះទៅចាក់ចោលដោយខ្លួនឯង ម្យ៉ាងទៀតក៏នឹងគ្មានអតិថិជនមកដែរ”។ អ្នកស្រីបានបន្ថែមថា វាជាការប្រសើរដែលកម្មករត្រូវបានអនុញ្ញាតឲ្យវិលត្រឡប់ទៅស្រុកកំណើតដើម្បីប្រារព្ធពិធីបុណ្យភ្ជុំបិណ្ឌជាមួយក្រុមគ្រួសាររបស់ខ្លួន។អ្នកស្រីបាននិយាយថា “ពួកគេក៏ជាប្រជាពលរដ្ឋខ្មែរដែរ”។
លោក សេង ចំរើន នាយករងក្រុមហ៊ុនស៊ិនទ្រី បានមានប្រសាសន៍ថា ដោយនៅសល់កម្មករតិចតួចត្រឹមតែ៤០០នាក់ក្នុងចំណោមកម្មករ១.០៥០នាក់នៅធ្វើការនៅចុងសប្តាហ៍នេះ សេវាប្រមូលសំរាមពេលយប់់នឹងផ្អាកជាបណ្តោះអាសន្ន ហើយបុគ្គលិកដែលនៅសេសសល់នឹងត្រូវបញ្ជូនឲ្យទៅប្រមូលសំរាមតាមផ្លូវនៅពេលថ្ងៃ។ លោកបានមានប្រសាសន៍ថា “យើងឲ្យថ្លៃឈ្នួលដល់បុគ្គលិកដែលនៅធ្វើការចន្លោះពី១៥.០០០រៀលទៅ២០.០០០រៀលបន្ថែមទៀតដែលមានចំនួនទ្វេដងនៃប្រាក់កម្លាំងប្រចាំថ្ងៃរបស់ពួកគេ”។
ប៉ុន្តែប្រាក់លើកទឹកចិត្តបន្ថែមនេះមិនគ្រប់គ្រាន់នឹងអាចរារាំងកម្មករមិនត្រឡប់ទៅស្រុកកំណើតបានទេ។ លោក អឹម អន អ្នកបើកបររថយន្តប្រមូលសំរាមវ័យ៣១ឆ្នាំមកពីខេត្តកំពង់ចាម បាននិយាថា “ខ្ញុំនឹងទៅស្រុក [នៅថ្ងៃនេះ] ដើម្បីជួបជុំក្រុមគ្រួសាររបស់ខ្ញុំអំឡុងពិធីបុណ្យភ្ជុំបិណ្ឌ ទោះបីជាក្រុមហ៊ុនផ្ដល់ប្រាក់ឈ្នួលទ្វេដងដល់ខ្ញុំក៏ដោយ ក៏ខ្ញុំនៅតែត្រូវទៅដដែល”។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានមានប្រសាសន៍ថា ប្រជាពលរដ្ឋ និងអាជីវករនានាត្រូវបានជូនដំណឹងអំពីស្ថានភាពនេះ ហើយគួរខិតខំអស់ពីសមត្ថភាពរបស់ខ្លួន ដើម្បីធ្វើឲ្យទីក្រុងស្អាត។ លោកមានប្រសាសន៍ថា “កម្មករក្រុមហ៊ុនស៊ិនទ្រីក៏ជាប្រជាពលរដ្ឋខ្មែរដែរ ដូច្នេះពួកគេមានសិទ្ធិវិលត្រឡប់ទៅស្រុកកំណើត ដើម្បីចូលរួមក្នុងពីធីបុណ្យភ្ជុំបិណ្ឌ”៕
ប្រែសម្រួលដោយ តែម សុខុម