នគរបាលនិងមន្ត្រីអង្គភាពប្រឆាំងអំពើពុករលួយបានលើកឡើងថា ក្រឡាបញ្ជីម្នាក់នៅសាលាដំបូងខេត្តបន្ទាយមានជ័យត្រូវបានចាប់ខ្លួនកាលពីថ្ងៃអង្គារពាក់ព័ន្ធនឹងការសង្ស័យពីបទប្រព្រឹត្តអំពើពុករលួយ និងទទួលប្រាក់សំណូក ប៉ុន្តែអង្គការសិទ្ធិមនុស្សបានលើកឡើងថា ក្រឡាបញ្ជីតែមួយផ្នែកនោះមិនអាចសម្រេចសំណុំរឿងតុលាការបានទេ ហេតុដូច្នេះចាំបាច់ត្រូវតែមានការស៊ើបអង្កេតបន្ថែមលើការប្រព្រឹត្តអំពើពុករលួយពាក់ព័ន្ធនឹងមន្ត្រីតុលាការថ្នាក់លើ។
លោក ចាន់ កុសល ស្នងការរងនគរបាលខេត្តបន្ទាយមានជ័យបានមានប្រសាសន៍ថា អង្គភាពប្រឆាំងអំពើពុករលួយបានធ្វើការជាមួយនគរបាលមូលដ្ឋាន ដើម្បីចាប់ខ្លួនលោក សួង សុខហេង អាយុ២០ឆ្នាំ ដែលជាក្រឡាបញ្ជីផ្ទាល់របស់លោក ផាន វណ្ណរ័ត្ន ព្រះរាជអាជ្ញាអមសាលាដំបូងខេត្ត។ លោក ចាន់ កុសល បានលើកឡើងថា លោក សុខ ហេង ត្រូវបានចាប់ខ្លួនកាលពីថ្ងៃអង្គារនៅម៉ោងប្រហែល១១ព្រឹក ហើយបន្ទាប់មកអង្គភាពប្រឆាំងអំពើពុករលួយបានបញ្ជូនគាត់មករាជធានីភ្នំពេញ ដើម្បីសាកសួរកាលពីម្សិលមិញ”។
លោកស្នងការរងនគរបាល ចាន់ កុសល បានបដិសេធមិនធ្វើអត្ថាធិប្បាយពីការចោទប្រកាន់លោក សុខ ហេង ឲ្យបានជាក់លាក់នោះឡើយ ប៉ុន្តែលោកបានមានប្រសាសន៍ថា ជនសង្ស័យត្រូវបានចោទប្រកាន់ពីបទទទួលប្រាក់សំណូកពីជនដែលគេសង្ស័យថា បានរកស៊ីឈើគ្រញូងដោយខុសច្បាប់។
លោកបានមានប្រសាសន៍ថា “ មនុស្សជាច្រើនបាននិយាយរិះគន់គាត់ ថា គាត់បានដោះលែងជនល្មើស បន្ទាប់ពីទទួលប្រាក់សំណូករួច”។
មន្ត្រីអង្គភាពប្រឆាំងអំពើពុករលួយមួយរូបដែលនិយាយក្នុងលក្ខខណ្ឌអនាមិកបានបញ្ជាក់ថា លោក សុខ ហេង កំពុងត្រូវបានឃុំខ្លួននៅរាជធានីភ្នំពេញ ហើយនឹងត្រូវបញ្ជូនទៅសាលាដំបូងរាជធានីភ្នំពេញ ដើម្បីសាកសួរនៅព្រឹកនេះ។ ទាំងលោក វណ្ណរ័ត្ន និងលោក អាំង មៀលតី មិនអាចទាក់ទងសុំការពន្យល់បានឡើយ។
លោក ចាន់ សុវេ៉ត អនុប្រធានផ្នែកឃ្លាំមើលនៅអង្គការអាដហុកបានមានប្រសាសន៍ថា ចាំបាច់ត្រូវតែមានការខិតខំបន្ថែម ដើម្បីប្រយុទ្ធប្រឆាំងនឹងការប្រព្រឹត្តអំពើពុករលួយនៅក្នុងចំណោមមន្ត្រីជាន់ខ្ពស់ក្នុងជួររដ្ឋាភិបាល និងនៅតុលាការ។ លោកបានលើកឡើងថា “យើងស្វាគមន៍ចំពោះការចាប់ខ្លួនក្រឡាបញ្ជីខេត្ត ប៉ុន្តែខ្ញុំសូមអំពាវនាវឲ្យរដ្ឋាភិបាលចាត់វិធានការបន្ថែម ពីព្រោះមន្ត្រីជាច្រើនបានប្រព្រឹត្តអំពើពុករលួយ”។
លោក ព្រាប កុល នាយកប្រតិបត្តិនៅអង្គការតម្លាភាពកម្ពុជាបានលើកឡើងថា ក្រឡាបញ្ជីតែងតែជាអ្នកប្រព្រឹត្តអំពើពុករលួយនៅក្នុងតុលាការ។
លោកបានមានប្រសាសន៍ថា “ខ្ញុំគិតថា ក្រឡាបញ្ជីតែមួយផ្នែកនោះមិនអាចធ្វើការដោះស្រាយ ឬក៏សម្រេចរឿងក្ដីបានឡើយ”។ លោកបានបន្តថា “ ហេតុដូច្នេះខ្ញុំសូមអំពាវនាវឲ្យអង្គភាពប្រឆាំងអំពើពុករលួយ និងអាជ្ញាធរពាក់ព័ន្ធធ្វើការស៊ើបអង្កេតបន្ថែមទៀត ដោយយកក្រឡាបញ្ជីធ្វើជាសាក្សី”។
កាលពីខែកក្កដា តុលាការកំពូលបានបដិសេធការសុំនៅក្រៅឃុំរបស់ក្រឡាបញ្ជីសាលាដំបូងរាជធានីភ្នំពេញម្នាក់ ដែលត្រូវបានចោទប្រកាន់ពីបទរំលោភសេចក្ដីទុកចិត្តដោយបានយកប្រាក់២៥០.០០០ដុល្លារពីអ្នកជំនួញម្នាក់ ដែលចង់ឲ្យតុលាការលើកលែងការចោទប្រកាន់នោះ។ ក្រឡាបញ្ជីរូបនេះបានអះអាងថា លុយភាគច្រើនត្រូវបានប្រគល់ទៅឲ្យលោកចៅក្រម កែ សាខន ដែលគាត់ធ្វើការឲ្យ៕
(រាយការណ៍បន្ថែមដោយ Lauren Crothers)
ប្រែសម្រួលដោយ ស៊ា ស៊ុយឈាង