យោងតាមនគរបាលរាជធានី និងរបាយការណ៍ស្តីពីការចាប់ខ្លួនបង្ហាញថា អតីតអ្នកគ្រប់គ្រងម្នាក់នៅធនាគារកាណាឌីយ៉ា និងអតីតបុគ្គលិកពីរនាក់ទៀតនៃធនាគារនេះ ត្រូវបានចាប់ខ្លួនកាលពីថ្ងៃច័ន្ទ ចំពោះការប្រើប័ណ្ណឥណទានដើម្បីលួចបន្លំយកលុយចំនួន២,៣លានដុល្លារពីគណនីនៅធនាគារ ABA និងធនាគារ SBC។
ត្រឹមល្ងាចម្សិលមិញនេះ សាលាដំបូងរាជធានីភ្នំពេញមិនទាន់បានចោទប្រកាន់មនុស្សទាំងបីនាក់នេះពីបទល្មើសណាមួយទេ រីឯមេធាវីរបស់ជនដែលត្រូវបានឃាត់ខ្លួនម្នាក់បានបដិសេធថា កូនក្តីរបស់គាត់មិនជាប់ពាក់ព័ន្ធនឹងការចោទប្រកាន់នេះទេ។
លោក ជួន ណារិន ស្នងការរងនគរបាលរាជធានីភ្នំពេញបានមានប្រសាសន៍ថា មន្ត្រីនគរបាលបានចាប់ខ្លួនឈ្មោះ យ៉េត សុភក្ត្រា អាយុ៣០ឆ្នាំ ជាអតីតអ្នកគ្រប់គ្រងម្នាក់នៅធនាគារកាណាឌីយ៉ា រួមជាមួយនិងមិត្តប្រុសរបស់នាង ឈ្មោះ ស៊ុន សៅនិន អាយុ៣៣ឆ្នាំ ក៏ជាអតីតបុគ្គលិកធនាគារនេះផងដែរ ពីបទលួចដកយកលុយពីគណនីនៅធនាគារ ABA និង SBC ហើយបន្ទាប់មកយកលុយនោះទៅដាក់នៅធនាគារកាណាឌីយ៉ា។ ជនសង្ស័យទី៣ឈ្មោះ ឡេង ស៊ុនទ្រី ត្រូវបានសាកសួរពាក់ព័ន្ធនឹងរឿងក្តីនេះ ហើយត្រូវបានឃាត់ខ្លួនតែម្តង។ លោក ជួន ណារិន បានមានប្រសាសន៍ថា “ នគរបាលបានចាប់ខ្លួនពួកគេ បន្ទាប់ពីបានទទួលពាក្យបណ្តឹងប្តឹងចោទពួកគេពីបទលួចលុយប្រហែល២,៣លានដុល្លារ”។
លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងបានមានប្រសាសន៍ថា កញ្ញា សុភក្ត្រា និងលោក សៅនិន ត្រូវបានចាប់ខ្លួនកាលពីថ្ងៃច័ន្ទ ហើយនាំមកសាកសួរនៅសាលាដំបូងរាជធានីភ្នំពេញកាលពីម្សិលមិញ ប៉ុន្តែ មិនទាន់ត្រូវបានចោទប្រកាន់ទេ។ លោក ច័ន្ទពិសិដ្ឋ បានមានប្រសាសន៍ថា “ ខ្ញុំមិនទាន់បានចោទប្រកាន់ពួកគេទេ ពីព្រោះខ្ញុំសាកសួរពួកគេមិនទាន់ចប់ ហើយនឹងបន្តសាកសួរនៅថ្ងៃព្រហស្បតិ៍ទៀត”។
យោងតាមរបាយការណ៍នគរបាលបង្ហាញថា ដើមបណ្តឹងឈ្មោះ ជួង អឹុងហេង បានរាយការណ៍ប្រាប់នគរបាលថា កញ្ញា សុភក្ត្រា បានយកលុយចំនួន២,៣លានដុល្លារដាក់បញ្ចូលទៅក្នុងគណនីនៅធនាគារកាណាឌីយ៉ាចាប់តាំងពីគាត់ឈប់ធ្វើការឲ្យធនាគារនេះ កាលពីខែមីនា។ របាយការណ៍នគរបាលបង្ហាញថា កញ្ញា សុភក្ត្រា និងគូកនរបស់នាងបានលួចបន្លំប្រើប័ណ្ណឥណទានចំនួនប្រាំ ដើម្បីដកយកលុយពីម៉ាស៊ីនអេធីអឹម របស់ធនាគារ ABA និងធនាគារ SBC មុនពេលយកលុយនោះទៅដាក់ចូលក្នុងគណនីដែលគាត់បានបង្កើតនៅធនាគារកាណាឌីយ៉ា។
មេធាវីរបស់ កញ្ញា សុភក្ត្រា និងលោក សៅនិន មិនអាចទាក់ទងសុំការបំភ្លឺបានទេ កាលពីម្សិលមិញ។ លោកស្រី ម៉េង សុភារី មេធាវីរបស់លោក ស៊ុនទ្រី បាននិយាយថា កូនក្តីរបស់លោកស្រីមិនជាប់ពាក់ព័ន្ធនឹងគម្រោងលួចបន្លំលុយនេះទេ។ លោកស្រីបាននិយាយថា “កូនក្តីខ្ញុំមិនបានរួមគំនិតជាមួយអ្នកទាំងពីរនាក់នេះទេ”៕
ប្រែសម្រួលដោយ មូល គឹមហឿន