27 C
Phnom Penh

ធ្វើ​​​បត្យា​​​ប័ន​​​ជន​​​ជាតិ​​​អង់​​​គ្លេស​​​ជា​​​ជន​​​រួម​​​ភេទ​​​ជាមួយ​​​កុមារ​​​ពី​​​ប្រទេស​​​ថៃ​​​មក​​​ប្រទេស​​​កម្ពុជា​​​វិញ

ដោយ ឌឹ ខេមបូឌា ដេលី

បទវិភាគ

បន្ទាប់​ពី​ការ​ធ្វើ​បត្យាប័ន​ពី​ប្រទេស​ថៃ​មក​កាន់​ប្រទេស​កម្ពុជា​វិញ​កាល​ពី​ថ្ងៃ​ពុធ​ ជន​ជាតិ​អង់​គ្លេស​ដែល​ជា​ជន​រួម​ភេទ​ជាមួយ​កុមារ​ ដេវីដ ផ្លិចឈ័រ អាយុ​៦៧​ឆ្នាំ ត្រូវ​បាន​បញ្ជូន​ទៅ​​​​ពន្ធនាគារ​ព្រៃ​ស​ក្នុង​រាជ​ធានី​ភ្នំ​ពេញ កាល​ពី​ម្សិល​មិញ ដើម្បី​អនុ​វត្ត​ទោស​ជាប់​ពន្ធនាគារ​រយៈ​ពេល​១០​ឆ្នាំ​ ពី​បទ​ចាប់​រំលោភ​​​​ក្មេង​ស្រី​អាយុ​១៦​ឆ្នាំ​ម្នាក់​ កាល​ពី​ឆ្នាំ​២០០៩។

លោក ហ៊ិន សុផល ប្រធាន​ពន្ធនាគារ​ខេត្ត​​​​បន្ទាយ​មាន​ជ័យ​បាន​មានប្រសាសន៍​ថា “ នៅ​ព្រឹក​មិញ​នេះ ជន​ជាតិ​អង់​គ្លេស​ជា​ជន​រួម​ភេទ​ជាមួយ​កុមារ​រូប​នេះ ត្រូវ​បាន​បញ្ជូន​ទៅ​មណ្ឌល​កែ​ប្រែ​១នៅ​ពន្ធនាគារ​ព្រៃ​ស​ក្នុង​រាជ​ធានី​ភ្នំពេញ​ហើយ”។ លោក​ ហ៊ិន សុផល បាន​មាន​ប្រសាសន៍​ថា ផ្លិចឈ័រ បាន​ឆ្លង​ដែន​ពី​ប្រទេស​ថៃចូល​ក្នុង​ប្រទេស​កម្ពុជា​តាម​ច្រក​ព្រំ​ដែន​ប៉ោយ​ប៉ែត កាល​ពី​ល្ងាច​ថ្ងៃ​ពុធ ហើយ​ត្រូវ​បាន​ឃុំ​ខ្លួន​​មួយ​យប់​នៅ​ពន្ធនាគារ​ខេត្ត។

លោក​ឧត្តម​សេនីយ៍ឯក កែវ វណ្ណថន ប្រធាន​ការិយាល័យ​នគរ​បាល​អាំងទែ​ប៉ូល ក្នុង​ប្រទេស​កម្ពុជា​បាន​អះ​អាង​កាល​ពី​ល្ងាច​ថ្ងៃ​ម្សិល​មិញ​ថា ឥឡូវ​នេះ​​លោក​ ផ្លិចឈ័រ ត្រូវ​ឃំុ​ខ្លួន​នៅ​ពន្ធនាគារ​ព្រៃ​ស។

កាល​ពី​ខែ​ឧសភា ឆ្នាំ​២០១១ សាលា​ដំបូង​​​​រាជ​ធានី​ភ្នំ​ពេញ​បាន​ផ្តន្ទា​ទោស​ ផ្លិច​ឈ័រ កំបាំង​មុខ​ឲ្យ​ជាប់​ពន្ធនាគារ​រយៈ​ពេល​១០​ឆ្នាំ ពីបទ​ចាប់​រំលោភ​ក្មេង​ស្រី​អាយុ​១៦​ឆ្នាំ​ម្នាក់ កាល​ពី​ឆ្នាំ​២០០៩។ ផ្លិចឈ័រ ដែល​ធ្លាប់​គ្រប់​គ្រង​អង្គការ​​មនុស្ស​​ធម៌​ដែល​មិន​បាន​ចុះ​បញ្ជី​ត្រឹម​ត្រូវ និង​ភោជនីយ​ដ្ឋាន​​មួយនៅ​តាម​មាត់​ទន្លេ​ ក្នុង​រាជ​ធានី​ភ្នំ​ពេញ​នោះ បាន​គេច​ខ្លួន​ទៅ​ប្រទេស​ថៃ កាល​ពី​ឆ្នាំ​២០១០ បន្ទាប់​ពី​កាសែត​អង់​គ្លេស​មួយ​បាន​អះ​អាង​ថា គាត់​បាន​ប្រើ​ប្រាស់​​​​អង្គការ​ក្រៅ​រដ្ឋា​ភិបាល​នេះ ដើម្បី​ធ្វើ​ការ​បណ្តុះ​បណ្តាល​ជន​រង​គ្រោះ​ជា​អនីតិជន​ទុក​សម្រាប់​រួម​ភេទ។

នៅ​ពេល​ ផ្លិចឈ័រ ត្រូវ​បាន​ចាប់​ខ្លួន​ក្នុង​ប្រទេស​ថៃ អាជ្ញាធរ​កម្ពុជា​បាន​ស្នើ​សំុ​ធ្វើ​បត្យា​​​​ប័ន​ជន​នេះ ប៉ុន្តែ ផ្លិចឈ័រ បាន​ប្តឹង​ឧទ្ធរណ៍។ កាល​ពី​ខែ​កក្កដា សាលា​ឧទ្ធរណ៍​ថៃ​បាន​​​ធ្វើ​​​តាម​សំណើរបស់​ប្រទេស​កម្ពុជា ហើយ​បញ្ជូន​​​​​​​ជន​រួម​ភេទ​ជាមួយ​កុមារ​នេះ​មក​ប្រទេស​កម្ពុជា។

ប៊ីរូនី ម៉ាតធ្យូ (Byrony Mathew) អនុ​ប្រធាន​​​​បេសកកម្ម​នៅ​ស្ថាន​​ទូត​អង់​គ្លេស​ប្រចាំ​រាជ​ធានី​​​ភ្នំពេញ​បាន​មាន​ប្រសាសន៍​ថា ស្ថាន​ទូត​បាន​ដឹង​ថា ផ្លិចឈ័រ​ បាន​ត្រឡប់​មក​ដល់​ប្រទេស​កម្ពុជា​វិញ​ហើយ ហើយ​ស្ថាន​ទូត​នឹង​ផ្តល់​ “ជំនួយ​​ផ្នែក​​កុងស៊ុល”។

លោក សំលៀង សិលា នាយក​ប្រចាំ​ប្រទេស​នៃ​អង្គការ​សកម្ម​ភាព​ដើម្បីកុមារ​ ជា​អង្គការ​ក្រៅ​រដ្ឋា​ភិបាល​ប្រឆាំង​ជន​រួម​ភេទ​ជាមួយ​កុមារ​បាន​សរសើ​រអាជ្ញា​ធរ​ដែល​បាន​ធ្វើ​តាម​សំណើរបស់​ខ្លួន សំុ​ឲ្យ​ធ្វើ​បត្យាប័ន​បុរស​ឈ្មោះ​ ផ្លិចឈ័រ​ នេះ។ លោក​ សំលៀង សិលា បាន​មាន​ប្រសា​​​សន៍​​​​ថា “ យើង​ពេញ​ចិត្ត​ចំពោះ​​ការ​ធ្វើ​បត្យា​ប័ន​នេះ​ណាស់។ បើ​ទោះ​ណា​ជា​វា​​ស៊ី​ពេល​ច្រើន​ក៏​ដោយ ក៏​យើង​សប្បាយ​ចិត្ត​ដែរ​”។

ផ្លិចឈ័រ គឺ​ជា​ជន​រួម​ភេទ​ជាមួយ​កុមារ​ដំបូង​ ដែល​​ត្រូវ​បាន​បញ្ជូន​មក​ប្រទេស​កម្ពុជា​វិញ​ដើម្បី​អនុវត្ត​ទោស។ លោក អេនឌ្រូ ឌ្រុមម៉ុន (Andrew Drummond) អ្នក​កាសែត​ជន​ជាតិ​អង់​គ្លេស​ដែល​មិន​​ជាប់​​កិច្ច​សន្យា​​នៅ​ទីក្រុង​បាងកក បាន​ធ្វើ​ដំណើរ​មក​ប្រទេស​កម្ពុជា​កាលពី​ឆ្នាំ​២០១០ ដើម្បី​ស៊ើប​អង្កេត​ករណី​របស់​ ផ្លិចឈ័រ ហើយ​​​​បន្ទាប់​មក​បាន​​បើក​ “ គម្រោង​ចាក់​សំរាម” ដែល​បាន​ចិញ្ចឹម​បីបាច់ និង​ផ្តល់​ទី​ជម្រក​ដល់​កុមារ​ដែល​រស់​នៅ​តាម​តំបន់​ចាក់​សំរាម​ នៅ​ស្ទឹង​មាន​ជ័យ កាល​ពី​ម្សិល​មិញ​បានរៀប​រាប់​ថា បានជួបជន​រួម​ភេទ​​កុមារ​រូប​នេះ​​នៅ​ក្នុង​រាជ​ធានី​ភ្នំពេញ។

លោក ឌ្រុមម៉ុន បាន​មាន​ប្រសាសន៍​តាម​ទូរស័ព្ទ​ពី​ប្រទេស​ថៃ​ថា ផ្លិចឈ័រ ហាក់​ដូច​ជា​ “ មាន​សុខ​ភាព​មិន​ល្អ​សោះ​ ប៉ុន្តែ​​រៀប​ចំ​គម្រោង​សម្ងាត់​ឆ្លាត​ណាស់”។ នៅ​ក្នុង​អត្ថ​បទ​ដែល​លោក​បាន​សរ​សេរ​ចុះ​ផ្សាយ​ក្នុង​កាសែត​ British Sunday Mirror លោក ឌ្រុមម៉ុន បាន​ចោទ​ប្រកាន់​ ផ្លិចឈ័រ ថា បានប្រើ​ប្រាស់​អង្គការ​មនុស្ស​ធម៌​របស់​ខ្លួន ដើម្បី​បណ្តុះ​បណ្តាល​ក្មេង​ស្រី និង​ជួយ​ដល់​ក្រុម​គ្រួសារ​របស់​ពួក​គេ ដើម្បី​គោ​ល​បំណង​រំលោភ​ផ្លូវ​ភេទ​ ហើយ​​កាលពី​ឆ្នាំ​១៩៩៧​ ជន​នេះ​ត្រូវ​បាន​តុលាការ​ចក្រ​ភព​អង់​គ្លេស​ផ្តន្ទា​ទោស​ឲ្យជាប់​ពន្ធនាគារ​រយៈ​ពេល​១៨​ខែ​ពី​បទ​រំលោភ​ក្មេ​ងស្រី​អាយុ​១៥​ឆ្នាំ​ម្នាក់​។

អត្ថ​បទ​ដក​ស្រង់​សម្តី​របស់​ម្តាយ​ក្មេង​ស្រី​រង​គ្រោះ​ម្នាក់​ដែល​បាន​សារភាព​ថា  គាត់​បាន​ប្រគល់​កូន​ស្រី​របស់​ខ្លួន​ទៅ​ឲ្យ​ ផ្លិចឈ័រ ជា​ថ្នូរ​នឹង​ប្រាក់​ ២០០​ដុល្លារ  “ ដើម្បី​ដោះ​បំណុល​របស់​គាត់”។ បន្ទាប់​ពី​អត្ថ​បទ​នេះ​ត្រូវ​បាន​​ចុះ​​ផ្សាយ​ លោក ឌ្រុមម៉ុន បាន​មាន​ប្រសាសន៍​ថា  “ ខ្ញុំ​បាន​​​​ទទួលការ​ហៅ​ទូរស័ព្ទ​ពី​ជន​រង​គ្រោះ​បី​នាក់ ក្នុង​ចំណោម​ជន​រង​គ្រោះជា​ច្រើន​ទៀត។​​​ពួក​គេ​​ក្តុក​ក្តួល​ចិត្ត​​ខ្លាំង​ណាស់​”៕

ប្រែ​សម្រួល​ដោយ​ សោម សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស