31 C
Phnom Penh

លោក​ កឹម សុខា ត្រូវបាន​ចោទប្រកាន់​ថា មិន​ផ្តល់​ជំនួយ​ទឹក​ជំនន់ទៅឲ្យ​​​​អ្នក​គាំទ្រ​បក្ស​ប្រជាជន​

ដោយ ឌឹ ខេមបូឌា ដេលី

បទវិភាគ

មេភូមិម្នាក់​ក្នុង​​ឃុំ​ទន្លេបិទ​​​​ខេត្ត​​កំពង់​​​ចាម​ កាលពីម្សិលមិញ​បាន​ចោទ​ប្រកាន់​ លោក កឹម​ សុខា​ អនុ​ប្រធាន​គណ​បក្ស​សង្គ្រោះជាតិ​ថា មិន​បាន​​ផ្តល់​ជំនួយ​បន្ទាន់​​ទៅឲ្យ​អ្នកគាំទ្រ​គណបក្ស​​ប្រជាជន​កម្ពុជា​ឡើយ​ អំឡុង​ពេល​ចុះ​​​ផ្ដល់​​​ជំនួយ​​​​​​កាល​ពីថ្ងៃអង្គារ​។

លោក សា បូរ៉ា​ មេភូមិព្រែក​តូច​​ បាន​លើក​​​​​​​​​​​​ឡើងថា លោក កឹម សុខា បាន​ផ្តល់​ជំនួយ​ទៅ​ឲ្យ​ប្រជាពលរដ្ឋ​ចំនួន​១២០​គ្រួសារ​នៅក្នុង​​​ភូមិ​ក្បែរនោះ​ គឺភូមិ​ យាយស ប៉ុន្តែ​លោក​​​បាន​​​​​​​ផ្តល់​ទៅ​ឲ្យ​តែ​អ្នក​ដែល​គាំទ្រ​គណបក្ស​សង្គ្រោះ​តែ​ប៉ុណ្ណោះ។​

លោកបានមានប្រសាសន៍ថា “ គណ​បក្ស​​​នេះ​បាន​ផ្តល់ជំនួយ​ទៅ​ឲ្យអ្នកដែល​គាំទ្រ​ខ្លួន​តែ​ប៉ុណ្ណោះ​ មិន​មែន​សម្រាប់​ជន​រង​គ្រោះ​ទូទៅ​នោះ​ទេ​​”។​

លោក បូរ៉ា បានលើកឡើងថា សមា​ជិក​មួយ​​​​​​​​​​ក្រុម​មក​ពី​គណបក្ស​ប្រជាជន​កម្ពុជា​បាន​ទៅ​​​ដល់​​កន្លែង​មាន​សុវត្ថិភាព​ក្បែរ​ភូមិ​យាយ​ស តាម​ក្រោយកាលពី​ថ្ងៃ​អង្គារ​ ហើយ​បាន​ផ្តល់​ជំនួយអង្ករ​​​ដោយ​​​គ្មាន​ការ​រើស​អើងទៅ​ឲ្យ​ប្រជា​ពលរ​ដ្ឋ​ចំនួន​១០២​គ្រួសារ​ ដែល​រង​ផល​​​​​​​ប៉ះ​ពាល់​ដោយ​សារ​ទឹក​ជំនន់​។

លោកបាន​បន្ថែម​ថា អង្គការ​ផ្តល់​ជំនួយ​កាតូលិក ការីតាស់ ក៏​បាន​​ផ្តល់​ជំនួយ​ទៅ​ឲ្យ​ប្រជាពលរដ្ឋ​ជាង​១០០​គ្រួសារ​នៅ​ទី​នោះ​ផង​ដែរ​ ប៉ុន្តែ អង្គការ​ផ្តល់​ជំនួយ​ផ្សេង​ៗទៀត​​​នៅ​មិន​ទាន់​ឃើញ​​​ទៅ​​​ផ្តល់​ជំនួយ​ឡើយ​។

លោក​បាន​មាន​ប្រសាសន៍​ថា “ ខ្ញុំ​មិន​ទាន់​ឃើញ​អង្គការ​ណាមួយ​ក្រៅ​ពី​អង្គការ​ការីតាស​​​​​​​​​មក​ផ្តល់​ជំនួយ​នេះ​ឡើយ​ ចាប់​តាំងពី​​​​ខ្ញុំ​បាន​មក​នៅ​កន្លែង​មាន​សុវត្ថិភាព​នេះ​”។

លោក ម៉ៅ មុនីវណ្ណ ដែល​បាន​មក​ជាមួយ​លោក​ កឹម សុខា  និង​​​ដែល​​​ត្រូវ​បាន​ជ្រើស​រើស​ជា​​​តំណាង​​​​​​​រាស្ត្រ​របស់​គណបក្ស​សង្គ្រោះជាតិ​នៅ​មណ្ឌល​​​​​​​កំពង់ចាម​​ នៅ​ក្នុង​ការ​បោះ​ឆ្នោត​ជាតិ​កាលពី​ថ្ងៃទី​២៨ ខែ​កក្កដា បាន​បញ្ជាក់​ថា លោក​ កឹម សុខា​ បាន​មក​សួរ​សុខ​ទុក្ខ​នៅ​តំបន់​មាន​សុវត្ថិ​​​ភាព​នេះ​​​កាល​ពី​ព្រឹក​ថ្ងៃ​អង្គារ​ ប៉ុន្តែ បាន​​​​​​​​​​បដិសេធ​ថា មេដឹក​នាំ​គណបក្ស​សង្គ្រោះ​ជាតិ​រូប​នេះ​មិន​មែន​ផ្ដល់​​​ជំនួយ​​​ទៅ​​​ឲ្យ​​​តែ​​​អ្នក​​​គាំទ្រ​​​គណបក្ស​​​សង្គ្រោះ​​​ជាតិ​​​នោះ​ទេ​។
លោក មុនីវណ្ណ បាន​លើក​ឡើង​ថា លោក កឹម សុខា បាន​ចែក​អង្ករ​ចំនួន​២០គីឡូក្រាម​ មីមួយ​កេះ ទឹក​ស៊ីអុីវ​មួយ​ដប និង​ថ្នាំ​ផ្តាសាយ​ចំនួន​២០គ្រាប់​ ទៅ​ឲ្យ​ប្រជាពលរដ្ឋ​ជាង​១៥០​​​​​​​​​គ្រួសារ​ដែល​មក​ពី​ភូមិ​យាយ​ស ដោយ​មិន​ប្រកាន់អ្នក​គាំទ្រ​គណបក្ស​​នយោបាយ​ណាមួយ​ឡើយ​។

លោក​បាន​មាន​ប្រសាសន៍​ថា “ យើង​បាន​នាំ​ជំនួយ​ដែល​អ្នក​មាន​ចិត្ត​សប្បុរស​នៅ​សហ​​​រដ្ឋ​អាមេរិក​ និង​អូស្ត្រាលី​បាន​ផ្តល់​យក​ទៅ​ជួយ​ជន​រង​គ្រោះ​ដោយ​សារ​ទឹក​ជំនន់​។ យើង​​​​​​​​​​បាន​ផ្តល់​ជំនួយ​ទៅ​ឲ្យ​ជន​រង​គ្រោះ​ទូទៅ​ដោយ​​​​​​​មិន​ប្រកាន់​អ្នក​គាំទ្រ​គណបក្ស​នយោបាយ​ណាមួយ​ឡើយ​ ដូច​ជា​នៅ​ភូមិ​ព្រែក​តូច​ ដែល​​​​​​​​​​លោក​មេភូមិ​បាន​ចោទ​ប្រកាន់ជាដើម​។

លោក មុនីវណ្ណ បាន​បន្ថែម​ថា លោក កឹម សុខា ក៏​បាន​ផ្តល់​ជំនួយ​ស្រដៀង​គ្នា​នេះ​ទៅ​ឲ្យ​ប្រជាពលរដ្ឋ​ជាង​១០០គ្រួសារ​នៅ​ក្នុង​ស្រុក​កោះ​សូទិន​ ក៏​ដូច​ជា​ប្រជាពលរដ្ឋ​១៣០​គ្រួសារ​ទៀត​នៅ​ក្នុង​ស្រុក​ពាម​រក៍ ខេត្ត​ព្រៃវែង នៅ​ក្នុង​ថ្ងៃតែមួយ​នោះ​ផង​ដែរ។

លោក​បាន​លើក​ឡើង​ថា “ នេះ​គឺ​ជា​លើក​ទី​១ ហើយ​ដែល​លោក កឹម សុខា អនុប្រធាន​គណបក្ស​បាន​មក​សួរ​សុខ​ទុក្ខ​ជន​រង​គ្រោះ​នៅ​តំបន់​មាន​ទឹក​ជំនន់​ក្នុង​ខេត្ត​កំពង់​ចាម និង​ខេត្ត​ព្រៃវែង ហើយ​ក៏​មាន​គម្រោង​ចុះ​ទៅ​សួរ​​​​​​​​​​​​សុខ​ទុក្ខ​តំបន់​មាន​ទឹក​ជំនន់​ផ្សេង​ៗទៀត​ បន្ទាប់​ពី​រដូវ​បុណ្យ​ភ្ជុំ​បិណ្ឌ​ផង​ដែរ”។

គណបក្ស​សង្គ្រោះ​ជាតិ​កាលពីថ្ងៃ​អង្គារ​ បានចេញ​សេចក្តី​ប្រកាស​ព័ត៌មាន​មួយ​ដោយ​អំពាវ​នាវ​ឲ្យ​ប្រជាពលរដ្ឋ​ទាំង​ក្នុង​ប្រទេស​ និង​ក្រៅ​ប្រទេស​បន្ត​ផ្តល់​ជំនួយ​ជា​សម្ភារ​​​ផ្សេងៗ​ និង​លុយ​ដល់​ជន​រង​គ្រោះ​ដោយ​សារ​ទឹក​ជំនន់​​បន្ត​ទៀត៕

ប្រែសម្រួលដោយ ស៊ា ស៊ុយ​ឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស