កាលពីថ្ងៃម្សិលមិញ នគរបាលបានចោទប្រកាន់បុរសជាឪពុក និងកូនពីរនាក់ពីបទបំផ្លាញស្លាកសញ្ញាគណបក្សប្រជាជនកម្ពុជាដោយចេតនានៅខេត្តកំពង់ចាម បន្ទាប់ពីកើតមានជម្លោះមួយជាមួយបុរសមួយក្រុមផ្សេងទៀត ដែលបានចូលរួមអបអរពិធីបុណ្យភ្ជុំបិណ្ឌ។
ឈ្មោះ ស៊ាន ប៊ុនលាង អាយុ១៩ឆ្នាំ និង ឪពុករបស់ខ្លួនឈ្មោះ ស៊ាន ប៊ុនលី អាយុ៤១ឆ្នាំ ត្រូវបានចាប់ខ្លួនកាលពីថ្ងៃអង្គារ ពីបទប្រើចប និងដំបងវាយកម្ទេចស្លាកសញ្ញាគណបក្សប្រជាជនកម្ពុជា ចំនួនបីនៅក្នុងឃុំស្វាប៉ោ ស្រុកស្រីសន្ធរ។
លោក ហួត វុឌ្ឍី ព្រះរាជអាជ្ញាអមសាលាដំបូងខេត្តកំពង់ចាម បានមានប្រសាសន៍ថា “តុលាការបានសម្រេចឃុំខ្លួនពួកគេរង់ចាំការកាត់ក្ដី។ ពួកគេត្រូវបានចោទប្រកាន់ពីបទបំផ្លិចបំផ្លាញទ្រព្យសម្បត្តិដោយចេតនា”។
លោក ខេង ស្រេង អធិការនគរបាលស្រុកស្រីសន្ធរ បានឲ្យដឹងថា ឈ្មោះ ប៊ុនលាង អាយុ១៩ឆ្នាំ រស់នៅភូមិជីពរ បានទៅចូលរួមក្នុងពិធីជប់លៀងរាំរែកមួយកាលពីយប់ថ្ងៃច័ន្ទ នៅក្នុងភូមិទាហៀជាមួយមិត្តភក្តិមួយក្រុម រួចក៏កើតមានជម្លោះជាមួយអ្នកភូមិដែលកំពុងធ្វើពិធីជប់លៀងអបអរថ្ងៃភ្ជុំបិណ្ឌ។
ក្រោយពីមានជម្លោះនេះ យុវជនមកពីភូមិជីពររូបនេះ រួមជាមួយនឹងឪពុករបស់ខ្លួនបានបំផ្លាញស្លាកសញ្ញារបស់គណបក្សប្រជាជនចំនួនបីនៅក្នុងភូមិនេះ។
លោក ស្រេង បានឲ្យដឹងថា នគរបាលបានចាប់ខ្លួនឈ្មោះ ប៊ុនលាង និងឪពុករបស់គេ គឺលោក ប៊ុនលី នៅព្រឹកថ្ងៃបន្ទាប់ ព្រោះពួកគេស្ថិតនៅក្នុងចំណោមមនុស្សមួយក្រុមមានគ្នា១០នាក់ ដែលបានបិទផ្លូវដែលអ្នកភូមិទាហៀប្រើសម្រាប់ធ្វើដំណើរទៅវត្តនៅក្នុងភូមិជីពរ ដើម្បីអបអរបុណ្យភ្ជុំបិណ្ឌ។
លោក ស្រេង មានប្រសាសន៍ថា “ បុរសទាំងនេះស្រវឹងជោគ ហើយពួកគេបានរារាំងអ្នកភូមិទាហៀ មិនឲ្យធ្វើដំណើរទៅវត្តនោះ បន្ទាប់ពីបានបង្កបញ្ហាដោយបានបំផ្លាញស្លាកសញ្ញាចំនួនបីរបស់គណបក្សប្រជាជន” ដោយលោកបានបន្ថែមថា បញ្ហានេះមិនមែនជារឿងនយោបាយទេ មូលហេតុគឺមកពីពួកគេស្រវឹងខ្លាំងពេក។
លោកបានបន្ថែមថា នគរបាលបានមកដល់ ហើយជម្លោះពាក្យសម្ដីបានបន្ត ដោយ “ ពួកគេបានជេរប្រមាថនគរបាលរបស់យើង ដោយហៅពួកយើងថា នគរបាលយួន ហើយបាននិយាយថា ម៉េចបានជាពួកហ្អែងមិនចុះពីអំណាច អាយួន”។
ពូរបស់លោក ប៊ុនលី គឺលោក ជុំ ផន បានឲ្យដឹងកាលពីថ្ងៃពុធថា ក្មួយ និងកូនរបស់ក្មួយលោកត្រូវបានចាប់ខ្លួននៅព្រឹកក្រោយថ្ងៃមានពិធីជប់លៀងនោះ ប៉ុន្តែបានបដិសេធថា ពួកគេគ្មានការជាប់ពាក់ព័ន្ធទេ។
លោកបាននិយាយថា “ នៅយប់នោះ មានអ្នកបំផ្លាញស្លាកសញ្ញាគណបក្សប្រជាជន ប៉ុន្តែក្មួយរបស់ខ្ញុំមិនជាប់ពាក់ព័ន្ធទេ”៕
ប្រែសម្រួលដោយ កង សុធា