នគរបាលបានឲ្យដឹងកាលពីម្សិលមិញថា មនុស្សចំនួន២៤នាក់បានស្លាប់ និងមនុស្សចំនួន១៦៩នាក់ផ្សេងទៀតរងរបួសក្នុងគ្រោះថ្នាក់ចរាចរណ៍នៅអំឡុងពេលឈប់សម្រាកពិធីបុណ្យភ្ជុំបិណ្ឌរយៈពេលបីថ្ងៃ។
លោក សុខ ណុប ប្រធានការិយាល័យផ្នែកច្បាប់ចរាចរណ៍ នៃនាយកដ្ឋានចរាចរណ៍សាធារណៈបានលើកឡើងថា តួលេខនេះបង្ហាញថា ចំនួនអ្នករងរបួសបានកើនឡើង បើធៀបនឹងពិធីបុណ្យកាលពីឆ្នាំមុន ក៏ប៉ុន្តែ ចំនួនអ្នកស្លាប់ថយចុះ។ លោកបន្តថា “ចំនួនមនុស្សស្លាប់២៤នាក់ដោយសារគ្រោះថ្នាក់ចរាចរណ៍ឆ្នាំនេះគឺជាចំនួនថយចុះ បើយើងប្រៀបធៀបទៅឆ្នាំ២០១២ ដែលមានមនុស្សស្លាប់ចំនួន២៦នាក់” ។ លោកបានកត់សម្គាល់ផងដែរថា មនុស្សចំនួន១៣៩នាក់បានរងរបួសក្នុងគ្រោះថ្នាក់ចរាចរណ៍ក្នុងឆ្នាំ២០១២ បើធៀបនឹងឆ្នាំនេះមានចំនួន១៦៩នាក់។
លោក សុខ ណុប បានបន្ថែមថា ៣៥ភាគរយនៃចំនួនគ្រោះថ្នាក់សរុបក្នុងឆ្នាំនេះ កើតឡើងដោយតែអ្នកបើកបរយានយន្តហួសល្បឿនកំណត់ ២២ភាគរយដោយសារការបើកបរក្នុងស្ថានភាពស្រវឹង និង១១ភាគរយដោយសារការមិនគោរពសិទ្ធិលើដងផ្លូវ។ នៅខេត្តកណ្តាល មានចំនួនអ្នកស្លាប់ច្រើនជាងគេនៅអំឡុងបុណ្យភ្ជុំបិណ្ឌ ពោលគឺមានមនុស្សប្រាំនាក់បានស្លាប់ដោយសារគ្រោះថ្នាក់ចរាចរណ៍ប្រាំពីរករណី រីឯខេត្តកំពង់ចាមវិញមានមនុស្សបួននាក់ស្លាប់ដោយសារគ្រោះថ្នាក់ចរាចរណ៍ប្រាំបីករណី។
លោក ហេង ចាន់ធារី ប្រធាននគរបាលចរាចរណ៍រាជធានីភ្នំពេញ បានឲ្យដឹងផងដែរថា មានគ្រោះថ្នាក់ចរាចរណ៍បួនករណីអំឡុងថ្ងៃបុណ្យភ្ជុំបិណ្ឌ ក្នុងរាជធានីភ្នំពេញ ក៏ប៉ុន្តែថា ចំនួនអ្នកស្លាប់មានតែម្នាក់ប៉ុណ្ណោះ៕
ប្រែសម្រួលដោយ ចេវ ប៊ុននី