40.6 C
Phnom Penh

រដ្ឋសភា​​ដែល​មានតែ​​​​គណបក្ស​ប្រជាជន​កម្ពុជា​នឹងបើក​កិច្ច​ប្រជុំ​ពេញ​អង្គ​ដំបូង​​នៅ​ថ្ងៃ​ព្រហស្បតិ៍​

ដោយ ឌឹ ខេមបូឌា ដេលី

បទវិភាគ

បើ​ទោះ​បី​ជា​​​គណប​ក្ស​សង្គ្រោះ​ជាតិ​​​នៅ​តែ​​បដិ​សេធ​មិន​ទទួល​​យក​​អាសនៈទាំង​៥៥​របស់​ខ្លួន​​ក៏​ដោយ ក៏​រដ្ឋ​សភា​​នឹង​​បើក​សម័យ​ប្រជុំពេញ​អង្គ​នៅ​ក្នុង​ថ្ងៃ​ព្រហ​ស្បតិ៍​​នេះ​ជា​លើក​ដំបូង​​​​ ​​​ចាប់​​តាំង​ពី​​សមាជិក​សភា​ទាំង​៦៨​រូប​​របស់​គណបក្ស​ប្រជាជន​​ បាន​បោះ​ឆ្នោត​​​ជ្រើស​រើស​​ប្រធាន​រដ្ឋ​សភា​ និង​​ប្រធាន​គណៈ​កម្មាធិការ​ទាំង​ប្រាំបួន​របស់​ស្ថាប័ន​នេះ​ កាល​ពី​ខែ​មុន​​មក​។

ប្រធាន​នៃ​គណៈកម្មាធិការ​ទាំង​ប្រាំ​បួន​​ ដែល​រួម​បញ្ចូល​គ្នា​បង្កើត​បាន​ជា​គណៈកម្មាធិ​ការ​អចិន្ត្រៃយ៍​របស់​រដ្ឋ​សភា​ ហើយ​ត្រូវ​បាន​បោះ​ឆ្នោត​​គាំទ្រ​​ជា​ឯកច្ឆន្ទ​ ដោយ​សមាជិក​សភា​​ទាំង​៦៨​រូប​របស់​គណបក្ស​ប្រជាជន​កម្ពុជា​​ កាល​ពី​ថ្ងៃ​ទី​២៤ ខែ​កញ្ញា​​​នេះ​ ក៏​នឹង​​បើក​កិច្ច​​ប្រជុំ​ដំបូង​របស់​ខ្លួន​នៅ​ថ្ងៃ​ស្អែក​នេះ​ផង​​ដែរ​។

លោក​ ឈាង វុន ជា​អ្នក​នាំ​ពាក្យ​រដ្ឋ​សភា​ និង​​ជា​សមាជិក​សភានៃ​​គណបក្ស​ប្រជាជន​កម្ពុជា​​បាន​មាន​ប្រសាសន៍​ថា “គណៈកម្មាធិ​ការ​អចិន្ត្រៃយ៍​នឹង​​បើក​​កិច្ច​ប្រជុំ​របស់​ខ្លួន​នៅថ្ងៃ​ទី​៨ ខែ​តុលា  នា​ពេល​​រសៀល​ ចំណែក​​​សម័យ​ប្រជុំ​ពេញ​អង្គ​នៃ​រដ្ឋ​សភា ​នឹង​ធ្វើ​នៅ​​ពេល​ក្រោយ​” ដោយ​បាន​បញ្ជាក់​ថា សម័យ​ប្រជុំ​​ពេញ​អង្គ​នឹង​ធ្វើ​នៅ​ថ្ងៃ​ព្រហស្បតិ៍​។

ទាំង​​លោក​ ឈាង វុន​ និង​លោក​ គាំ កុសល​ នាយក​​ខុទ្ទកាល័យ​​របស់​លោក​ ហេង​ សំរិន​ ប្រធាន​រដ្ឋ​សភា​​បាន​បដិសេធ​មិន​ប្រាប់​អំ​ពី​របៀប​វារៈ​នៃ​សម័យ​ប្រជុំ​នេះទេ​​។

គេហទំព័​រ​ព័ត៌មាន​ CEN ​បាន​​ដក​ស្រង់​សម្ដី​លោក​ ជាម យៀប​ ​សមា​ជិក​សភា​គណ​បក្ស​ប្រជាជន​កម្ពុជា​​​កាល​ពី​ថ្ងៃ​សុក្រ​ថា រដ្ឋ​សភា​​នឹង​បោះ​ឆ្នោត​​សម្រេច​លើ​​​សមាជិក​ភាព​ នៃ​​គណៈ​កម្មាធិការ​​​ទាំង​​ប្រាំបួន​ ដែល​គណៈ​កម្មា​ធិការ​​ទាំងនេះ​​ មាន​សមាជិក​​យ៉ាង​តិច​​ប្រាំ​ពីរ​រូប​។ លោក​ ជាម យៀប​ ត្រូវ​បាន​​ស្រង់​សម្ដី​​ថា “សម័យ​ប្រជុំ​​ពេញ​អង្គ​ដំបូង​ នឹង​ត្រូវ​បើក​នៅ​ថ្ងៃ​ទី​១០ ខែ​តុលា​ ដើម្បី​​បោះឆ្នោត​​ជ្រើស​​រើស​​សមាជិក​​សមាជិកា​នៃ​គណៈកម្មាធិការ​ជំនាញ​​ទាំង​ប្រាំ​បួន​របស់​រដ្ឋ​សភា​”។

កាល​ពី​ថ្ងៃ​ទី​២៣ ខែ​កញ្ញា​ សមាជិក​សភា​ទាំង​​៦៨​រូប​​របស់​គណបក្ស​ប្រជាជន​កម្ពុជា​ បាន​​បើក​សម័យ​ប្រជុំ​សភា​លើ​ក​ដំបូង​​ចាប់​​តាំង​ពី​​មាន​​ការ​បោះឆ្នោត​ជាតិ​ដ៏​សែន​ចម្រូង​ចម្រាស​កាល​ពី​ខែ​កក្កដា​ ដែល​គណបក្ស​ប្រឆាំង​នៅ​តែ​អះអាង​ថា ខ្លួន​ជា​អ្នក​ទទួល​បាន​ជ័យ​ជម្នះ​មក​។ អំឡុង​សម័យ​ប្រជុំ​សភា​ដំបូង​នោះ​ សមា​ជិក​សភា​របស់​គណបក្ស​ប្រជាជន​កម្ពុជា​​បាន​បោះឆ្នោត​​ជ្រើស​តាំង​​លោក​ ហេង​ សំរិន​ ធ្វើ​​​ជា​ប្រធាន​រដ្ឋសភា​មួយ​អាណត្តិ​ទៀត និង​​បាន​​​បោះ​ឆ្នោត​ជ្រើសរើស​​​ប្រធាន​ និង​អនុ​ប្រធាន​​គណៈកម្មាធិការ​​​ជំនាញ​ទាំង​ប្រាំ​បួន​ និងបាន​​អនុ​ម័ត​​​លើ​ការ​បង្កើត​គណៈរដ្ឋ​មន្ត្រី​ថ្មី​របស់​លោក​នាយក​រដ្ឋ​ ហ៊ុន សែន​ នៅ​​ថ្ងៃ​បន្ទាប់​។ គណបក្ស​សង្គ្រោះ​​ជាតិ​​​បាន​ចាត់​ទុក​រដ្ឋ​សភា​ឯក​បក្ស​​​បច្ចុប្បន្ន​ ដែល​មាន​​តែ​គណបក្ស​ប្រជា​ជន​កម្ពុជា​ទទួល​យក​អាសនៈ​របស់​ខ្លួន​​ថា ជា​សភា​មិន​ស្រប​តាម​​រដ្ឋ​ធម្ម​នុញ្ញ​ និងមិន​ស្រប​ទៅ​តាម​​ច្បាប់​។

លោក​ យឹម​ សុវណ្ណ​ សមាជិក​សភា​ជាប់​ឆ្នោត​​ និង​​ជា​អ្នក​នាំពាក្យ​គណបក្សសង្គ្រោះ​ជាតិ​ បាន​មាន​ប្រសាសន៍​កាល​ពី​ម្សិល​មិញ​ថា គណបក្ស​ប្រឆាំង ​​​មិន​ត្រូវ​បាន​​អញ្ជើញ​ឲ្យ​ចូល​​រួម​នៅ​ក្នុង​ការ​ជ្រើស​តាំង​​​​សមាជិក​​​សមាជិ​កា​នៃ​គណៈកម្មាធិការ​ទាំង​ប្រាំបួន​​របស់​​​រដ្ឋ​សភា​ នេះ​ទេ ហើយ​បាន​បដិសេធ​​មិន​ទទួល​ស្គាល់​សម័យ​ប្រជុំ​នា​ពេល​ខាង​មុខ​នេះ​ឡើយ​។

លោក​បាន​មានប្រសាសន៍​ថា “យើង​​មិន​​យក​ចិត្ត​ទុក​ដាក់​នឹង​​​រឿង​នេះ​ទេ ហើយ​​ម្ចាស់​​ឆ្នោត​​ក៏​មិន​យក​ចិត្ត​ទុក​ដាក់​​នឹង​រឿង​នេះ ដែរ ព្រោះរាជ​រដ្ឋាភិបាល​​ដែល​បង្កើត​​ឡើង​​ក្រោយ​​ថ្ងៃ​ទី​​២៣ ខែ​​កញ្ញា​ គឺ​​មិន​ស្រប​ច្បាប់ ទេ​ហើយ​រដ្ឋ​សភា​​ក៏​មិន​ស្រប​ច្បាប់​ដែរ​”។ លោក​​បាន​​មាន​ប្រសាសន៍​ថា គណបក្ស​ប្រជាជន​កម្ពុជា​គួរ​​រង់​ចាំ​រហូត​ដល់​​គណបក្ស​ទាំង​ពីរ​​រក​ឃើញ​ដំណោះ​ស្រាយមួយ​​​តាម​រយៈ​ការ​​ចរចា​​សម្រាប់​ជម្លោះ​ជុំ​វិញ​​ការ​បោះ​ឆ្នោត​​ និង​ចាំ​​ឲ្យ​​គណបក្ស​ប្រឆាំង​​ទទួល​យក​​អាសនៈ​របស់​ខ្លួន​សិន​ មុន​នឹង​​បំពេញ​តំណែង​​​ក្នុង​ជួរ​គណៈ​កម្មាធិការ​​ទាំង​នេះ​។

ការ​ចរចា​រវាង​គណបក្ស​ទាំង​ពីរ​​បាន​បរា​ជ័យ​​ចាប់​តាំ​ង​ពីការ​ចរចា​បិទ​ទ្វារ​រយៈ​ពេល​ពីរ​ថ្ងៃ​រវាង​លោក​​ ហ៊ុន សែន និង​​លោក​ សម រង្ស៊ី ប្រធាន​គណបក្ស​ប្រឆាំង ​បាន​ជាប់​គាំង​​កាល​ពី​ពាក់​កណ្ដាល​ខែ​​កញ្ញា​មក​។ ក្រោយ​មក​ លោ​ក ហ៊ុន សែន​ អះអាង​​ថា លោក​​ព្រម​ផ្ដល់​តំណែង​ប្រធាន​គណៈកម្មា​ធិការ​ចំនួន​បួន​​ក្នុង​ចំណោម​គណៈ​កម្មា​ធិ​ការ​​ជំនាញ​ទាំង​ប្រាំបួន​របស់​រដ្ឋ​សភា​ ប៉ុន្តែ​បាន​ច្រាន​ចោល​​ការ​ទាម​ទារ​​តំណែង​​ប្រធាន​សភា​​​របស់​គណបក្ស​សង្គ្រោះ​ជាតិ​។

លោក​ យឹម សុវណ្ណ បាន​បដិសេធ​មិន​ធ្វើ​អត្ថាធិប្បាយ​ជុំ​វិញ​​ការ​​ផ្ដល់​ជូន​របស់​លោក​នាយក​រដ្ឋ​មន្ត្រី​​ ហ៊ុន​ សែន​ ឬ​ការ​ទាមទារ​របស់​គណបក្ស​ប្រឆាំង ​​អំឡុង​ការ​ចរចា​នោះ​ទេ​។​ លោក​​​បាន​មាន​ប្រសាសន៍​ដោយ​មិន​បរិយាយ​​​លម្អិត​ថា “​យើង​​ចង់​បាន​តុល្យភាព​​អំណាច​…​ ដើម្បី​​ធ្វើ​ការ​ផ្លាស់​ប្ដូរ​​ឲ្យ​បាន​ឆាប់​រហ័ស​”។ លោក​ក៏​បាន​ឲ្យ​ដឹង​ផង​ដែរ​ថា គណបក្ស​សង្គ្រោះជាតិ​​មិន​ទាន់​មាន​គម្រោង​​​ចូល​រួម​ប្រជុំ​សភា​នៅ​ឡើយ​ទេ​​ ហើយ​ថា គណបក្ស​ទាំង​ពីរ​​ក៏​មិន​ទាន់​មើល​ឃើញ​សញ្ញា​នៃ​ការ​​​​​​វិល​​​ទៅ​កាន់​តុ​ចរចា​​វិញ​នា​ពេល​ឆាប់​ៗ​ដែរ៕

(រាយការណ៍​បន្ថែម​ដោយ Zsombor Peter)
ប្រែសម្រួលដោយ អ៊ូច សូនី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស