ក្រុមមន្ត្រីបានឲ្យដឹងកាលពីម្សិលមិញថា អាជ្ញាធរនៅពន្ធនាគារក្នុងខេត្តសៀមរាបនិងខេត្តបន្ទាយមានជ័យ ខិតខំប្រឹងប្រែងទប់ស្កាត់ទឹកជំនន់មិនឲ្យចូលដល់ពន្ធនាគារ ដោយដាក់បាវខ្សាច់នៅជុំវិញអគារពន្ធនាគារ។
ខេត្តទាំងពីរនេះកំពុងតែត្រូវបានទឹកជន់លិចដោយសារភ្លៀងធ្លាក់ខ្លាំងអស់រយៈពេលជាច្រើនសប្តាហ៍ ហើយប្រជាពលរដ្ឋជាច្រើនពាន់គ្រួសារត្រូវបានជម្លៀសចេញពីលំនៅដ្ឋានរបស់ខ្លួន ក៏ប៉ុន្តែពេលនេះគ្មានផែនការជម្លៀសអ្នកទោសជាច្រើនពាន់នាក់ចេញពីពន្ធនាគារទេ។
លោក ហ៊ិន សុផល ប្រធានពន្ធនាគារបានឲ្យដឹងថា នៅក្នុងពន្ធនាគារខេត្តបន្ទាយមានជ័យ ដែលបច្ចុប្បន្នមានអ្នកទោសចំនួន៨៤២នាក់ និងប្រឈមនឹងហានិភ័យទឹកជំនន់ធំបំផុតប្រចាំឆ្នាំ សម្រាប់ពន្ធនាគារនានានៅក្នុងប្រទេសកម្ពុជា កំពុងតែមានសកម្មភាពយ៉ាងមមាញឹកក្នុងការទប់ស្កាត់ទឹកជំនន់មិនឲ្យហូរ
ចូលទៅក្នុងពន្ធនាគារ។
លោកមានប្រសាសន៍ថា “ទឹកឡើងខ្លាំង[កាលពីសប្តាហ៍មុននេះ] និងឡើងទ្វេដង បើធៀបនឹងកម្ពស់ទឹកកាលពីឆ្នាំមុន ប៉ុន្តែ យើងគ្មានផែនការជម្លៀសអ្នកទោសទេពីព្រោះទឹកមិនបានចូលក្នុងអគារពន្ធនាគារទេ” ។លោកបានមានប្រសាសន៍បន្ថែមទៀតថា បាវខ្សាច់កម្ពស់មួយម៉ែត្រត្រូវបានដាក់តម្រៀបដើម្បីការពារច្រកចូលខណៈដែលម៉ាស៊ីនបូមទឹកចំនួនបួនគ្រឿងកំពុងបូមទឹកចេញពីអគារពន្ធនាគារ។
នៅក្នុងខេត្តសៀមរាប លោក ចែម សាវុធ ប្រធានពន្ធនាគារខេត្ត បានឲ្យដឹងថា ទឹកជំនន់មិនប៉ះពាល់ពន្ធនាគារទេ។ លោកបានមានប្រសាសន៍ថា “គ្មានបញ្ហានៅទីនេះទេ។ យើងបានលើកទំនប់កម្ពស់មួយម៉ែត្រ ដើម្បីទប់ស្កាត់ការជន់លិច និងបាននិងកំពុងតាមដានកម្ពស់ទឹក” ។ លោកបានឲ្យដឹងទៀតថា បច្ចុប្បន្ន ពន្ធនាគារនេះមានអ្នកទោស១.២០០នាក់៕
ប្រែសម្រួលដោយ ចេវ ប៊ុននី