កាលពីម្សិលមិញ គណៈកម្មាធិការជាតិគ្រប់គ្រងគ្រោះមហន្តរាយបានបង្កើនតួលេខអ្នកស្លាប់ដោយសារទឹកជំនន់នៅទូទាំងប្រទេសពី៣៩នាក់ ដល់៨៣នាក់ ខណៈព្យុះភ្លៀងបានធ្វើឲ្យទំនប់មានទឹកហូរហៀរ ដែលជាហេតុធ្វើឲ្យល្បឿនទឹកឡើងជាកំហុក ហើយបានជន់លិចផ្លូវ និងភូមិនានានៅតាមបណ្តាខេត្តជុំវិញបឹងទន្លេសាប។
លោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ព្យុះភ្លៀង ដែលជាហេតុបណ្តាលឲ្យកំរិតទឹកបន្តឡើងជាកំហុករ ហើយបានវាយលុកខេត្តសៀមរាប ប៉ៃលិន បាត់ដំបង ពោធិ៍សាត់ និងខេត្តបន្ទាយមានជ័យ ធ្វើឲ្យចំនួនខេត្តដែលបានរងគ្រោះដោយទឹកជំនន់កើនដល់១៦ខេត្តចាប់តាំងពីគ្រោះមហន្តរាយធម្មជាតិនេះបានចាប់ផ្តើម កាលពីមួយខែមុនមក។
លោក កែវ វី មានប្រសាសន៍ថា “មនុស្សយ៉ាងតិច៨៣នាក់ រាប់ទាំងកុមារ៣៤នាក់ ដែលមានអាយុពី១ឆ្នាំទៅ២ឆ្នាំផង បានស្លាប់ដោយសារទឹកជំនន់ក្នុងរយៈពេលបីសប្តាហ៍ចុងក្រោយនេះ ធ្វើឲ្យចំនួនអ្នកស្លាប់សរុបដោយសារទឹកជំនន់កើនដល់៩៦នាក់ហើយគិតរហូតមកទល់នឹងពេលនេះ”។ លោកបានបន្ថែមថា “នៅទូទាំងប្រទេសប្រជាពលរដ្ឋជាង១០.០០០គ្រួសារត្រូវបានជម្លៀសចេញ ហើយប្រជាពលរដ្ឋចំនួន៨០.០០០គ្រួសារបានរងការប៉ះពាល់” ដោយបន្តថា សាលារៀនចំនួន៦៧០កន្លែង វត្តចំនួន៣៧០កន្លែង និងមណ្ឌលសុខភាពចំនួន៤៧កន្លែងបានរងការជន់លិច។
លោក អ៊ុយ វី អភិបាលរងខេត្តបាត់ដំបងបានឲ្យដឹងថា ក្នុងខេត្តដែលទឹកជំនន់បានវាយលុកស្ទើរតែគ្រប់ស្រុកនេះ មនុស្សប្រាំមួយនាក់បានស្លាប់ ចាប់តាំងពីថ្ងៃសៅរ៍មក ខណៈភ្លៀងធ្លាក់ខ្លាំងគួបផ្សំជាមួយនឹងទឹកជំនន់នៅក្នុងប្រទេសថៃ បានធ្វើឲ្យកម្រិតទឹកស្ទឹងសង្កែ កើនឡើងលើសកម្រិតប្រកាសអាសន្នត្រឹម១៣,៨២ម៉ែត្រ ដល់១៤,០២ម៉ែត្រ ។
លោកបានមានប្រសាសន៍ថា “គិតត្រឹមថ្ងៃច័ន្ទ ស្ទើរតែគ្រប់ស្រុកទាំងអស់នៅក្នុងខេត្តបាត់ដំបងបានរងការប៉ះពាល់ដោយទឹកជំនន់ គឺលើកលែងតែស្រុកថ្មគោលប៉ុណ្ណោះ ខណៈប្រជាជនយ៉ាងតិច១.០០០គ្រួសារត្រូវបានជម្លៀសទៅកាន់ទីទួល ហើយដីស្រែជាង៥០.០០០ហិកតា និងដំណាំជាង១៥.០០០ហិកតាបានរងការលិចលង់”។
លោក ហុង ផាត ជាមន្ត្រីមួយរូបនៅមន្ទីរសេដ្ឋកិច្ច និងសង្គមកិច្ចខេត្តបាត់ដំបងបានឲ្យដឹងថា ខេត្តនេះមានជនរងគ្រោះបាត់បង់ជីវិតថ្មីបំផុតកាលពីម្សិលមិញ ពេលកុមារពីរនាក់ គឺក្មេងស្រីអាយុ៨ឆ្នាំម្នាក់ និងក្មេងប្រុសអាយុ៧ឆ្នាំម្នាក់បានលង់ទឹកស្លាប់នៅក្នុងឃុំកកោះ ស្រុកមោងប្ញស្សី បន្ទាប់ពីពួកគេនាំគ្នាហែលទឹកលេងក្នុងទឹកជំនន់ជុំវិញផ្ទះរបស់ខ្លួន។
លោកបានមានប្រសាសន៍ថា “កាលពីថ្ងៃសៅរ៍ កសិករអាយុ៥០ឆ្នាំម្នាក់បានលង់ទឹកស្លាប់នៅក្នុងឃុំតាសែន ស្រុកកំរៀង បន្ទាប់ពីបានធ្លាក់ក្នុងប្រឡាយទឹកមួយកន្លែង ខណៈបុរសអាយុ៥០ឆ្នាំម្នាក់ទៀត នៅក្នុងឃុំអន្លង់វិល ស្រុកសង្កែ បានស្លាប់បន្ទាប់ពីត្រូវទឹកជំនន់កួចយកទៅជាមួយ” ដោយបានបន្ថែមថា ក្មេងស្រីអាយុ២ឆ្នាំម្នាក់ ក្នុងឃុំតាលាស់ ស្រុកមោងប្ញស្សី និងក្មេងស្រីអាយុ១០ឆ្នាំម្នាក់ទៀតក្នុងភូមិស្រែត្រែង ឃុំគោកឃ្មុំ ស្រុកថ្មគោល ក៏បានបាត់បង់ជីវិតកាលពីថ្ងៃអាទិត្យ។
ផ្លូវនានានៅក្នុង និងជុំវិញក្រុងបាត់ដំបងបានលិចលង់កាលពីម្សិលមិញ ជាហេតុធ្វើឲ្យចរាចរណ៍មានភាពច្របូកច្របល់ និងធ្វើឲ្យអាជីវកម្មជាច្រើនផ្អាកដំណើរការ។
លោក សាធែល ហ្វា (Shathel Fahs) អាយុ៣៤ឆ្នាំ ជាមន្ត្រីផ្នែកបច្ចេកទេសរបស់អង្គការ ក្រៅរដ្ឋាភិបាល Mine Action Group បានមានប្រសាសន៍ថា “វាគឺជាទឹកជំនន់អាក្រក់បំផុតក្នុងរយៈពេលប្រាំឆ្នាំដែលខ្ញុំបានរស់នៅទីនេះ។ យើងស្មានថា ម្សិលមិញ ជាថ្ងៃអាក្រក់បំផុត ប៉ុន្តែ ថ្ងៃនេះទឹកជំនន់បានឡើងម្តងទៀត ធ្វើឲ្យផ្លូវសំខាន់ៗទាំងប៉ុន្មាននៅក្នុងទីក្រុង និងតំបន់ពាណិជ្ជកម្មនៅក្នុងក្រុងនេះរងការលិចលង់ទាំងស្រុង”។
លោក អ៊ុក កែវរតនៈ មន្ត្រីរដ្ឋបាលខេត្តបន្ទាយមានជ័យ បានឲ្យដឹងថា នៅក្នុងខេត្ត ដែលនគរបាល និងកងទ័ពបាននិងកំពុងទប់ស្កាត់ទំនប់ត្រពាំងថ្មសម័យខ្មែរក្រហមប្រវែង ២គីឡូម៉ែត្រ នៅក្នុងឃុំប៉ោយចារ ស្រុកភ្នំស្រុក មិនឲ្យបាក់នេះ កិច្ចប្រឹងប្រែងកំពុងបន្តធ្វើយ៉ាងណាមិនឲ្យមានគ្រោះមហន្តរាយកើតឡើង”។
លោកបានមានប្រសាសន៍បន្តថា “នគរបាល និងកងទ័ពជាង៦០០នាក់ បាននិងកំពុងព្យាយាមប្រើដី និងបាវខ្សាច់រាល់ថ្ងៃដើម្បីទប់ទំនប់នេះកុំឲ្យបាក់”។
លោកបានបន្ថែមថា នៅពេលបើកទ្វារទឹក ប្រជាជនរាប់រយគ្រួសារនៅក្នុងឃុំចំនួនប្រាំបី ចាំបាច់ត្រូវជម្លៀសចេញ ដើម្បីគេចពីទឹកដែលត្រូវរំដោះ ប៉ុន្តែ បើទំនប់បាក់នោះវាអាចបង្កជាគ្រោះមហន្តរាយសម្រាប់ប្រជាជនក្នុងតំបន់នេះ។លោកបានមានប្រសាសន៍ថា “យើងមិនអាចជៀសផុតពីទឹកជំនន់នៅក្នុងតំបន់នេះបានទេ ពេលយើងបើកទ្វារទឹកនៅទំនប់ត្រពាំងថ្ម នេះជាអ្វីដែលយើងចាំបាច់ត្រូវតែធ្វើ”។
នៅឯខេត្តសៀមរាប ដែលប្រជាជនរាប់រយគ្រួសារបានរងការប៉ះពាល់ដោយសារទឹកជំនន់នោះ អាជ្ញាធរអប្សរាដែលទទួលបន្ទុកគ្រប់គ្រងបរិវេណប្រាសាទអង្គរវត្ត និងទំនប់ ព្រមទាំងអាងស្តុកទឹកនៅជុំវិញ កំពុងធ្វើការជួសជុលកំណាត់ផ្លូវមួយកន្លែងដែលនៅជាប់ស្នាមភ្លោះមួយកន្លែងក្បែរប្រាសាទអង្គរធំ ដែលបានរងការខូចខាតដោយសារសម្ពាធទឹក។
លោក អ៊ឹម សុខរិទ្ធី ប្រធានផ្នែកព័ត៌មាននិងអាជ្ញាធរអប្សរា បានមានប្រសាសន៍ថា “នគរបាល និងកងយោធពលខេមរភូមិន្ទជាង២០០នាក់ កំពុងស្តារកំណាត់ផ្លូវប្រវែង២០ម៉ែត្រនេះ ហើយសង្ឃឹមថា នឹងបញ្ចប់រួចរាល់នៅត្រឹមថ្ងៃនេះ”។
កាលពីម្សិលមិញ មន្ត្រីមូលដ្ឋានមួយចំនួននៅតែបន្តជឿថា ទឹកជំនន់នេះគឺបង្កឡើងដោយសារការសម្រេចចិត្តមិនបើកទ្វារទឹករហូតទាល់តែប្រាសាទមួយនៅបារាយណ៍ខាងលិចត្រូវបានស្តាររួចសិន ប៉ុន្តែ អាជ្ញាធរអប្សរាបានទទូចថា ពួកគេមានការយល់ច្រឡំ។
លោក អ៊ឹម សុខរិទ្ធី បានមានប្រសាសន៍ ថា “យើងបានរំដោះទឹកឲ្យហូរពីទំនប់ទៅបារាយណ៍ខាងលិច ដែលបានពេញព្រៀបលើសកម្រិតកំណត់៥៦លានម៉ែត្រគូប ដល់៦០លានម៉ែត្រគូប ដូច្នេះយើងបានរំដោះទឹកឲ្យហូរចូលក្នុងប្រព័ន្ធប្រឡាយពីបុរាណឲ្យហូរធ្លាក់ទៅទន្លេសាប”៕
ប្រែសម្រួលដោយ កង សុធា