25 C
Phnom Penh

ការ​ស៊ើប​អង្កេត​ពី​ករណី​ប្លន់​ប្រដាប់​អាវុធមិន​ទាន់​កំណត់​​អត្ត​សញ្ញាណ​ជន​សង្ស័យ​ឡើយ

ដោយ ឌឹ ខេមបូឌា ដេលី

បទវិភាគ

នគរ​បាល​បានឲ្យ​​​ដឹង​​​កាល​ពី​ម្សិល​មិញ​ថា ខ្លួ​ន​មិន​ទាន់​កំណត់​បាន​អត្ត​សញ្ញា​ណ​​ជន​សង្ស័យ​ណាម្នាក់​​ក្នុង​ករណី​ប្លន់​ប្រដាប់​អាវុធពីរ​លើក​នៅ​រាជ​ធានី​ភ្នំ​ពេញ​កាល​ពី​ចុង​ខែ​មុន​​​ ដែល​​​បណ្តាលឲ្យ​​ភ្ញៀវទេសចរជនជាតិ​អាមេរិក​ម្នាក់​ និង​ជន​ជាតិ​ជប៉ុន​ម្នាក់​រង​របួស​​​​ទេ​​​។

គួរ​​​រំឭក​​​ថា​​​ នៅ​វេលា​​​ម៉ោង​ប្រហែល​៧​យប់​ ថ្ងៃ​ទី​២៧ ខែ​កញ្ញា លោក មូរីស ឡ (Maurice​ Law) អាយុ​៥៧​ឆ្នាំ ជា​​​អ្នក​ពិគ្រោះ​យោបល់​ផ្នែក​សំណង់​ជន​ជាតិ​អាមេរិក និងអ្នកស្រី ឌែបប៊ី (Debbie) ជា​ប្រពន្ធ​របស់​​​​លោក​​​បាន​ដើរ​​​សំដៅ​​​​ទៅ​​​​ផ្ទះ​របស់​ខ្លួន​​ក្នុង​ខណ្ឌ​ចំការ​មន ស្រាប់​តែ​មាន​​​បុរស​ពីរ​នាក់​ជិះម៉ូតូ​មួយ​​​គ្រឿង​មក​ក្បែរ​ ហើយ​ដក​កាំ​ភ្លើង​​ភ្ជង់​​​​ក្នុង​​​បំណង​​​ប្លន់​​​ រួច​​​បាន​​​បាញ់​លោក ឡ ចំ​ក្រលៀន មុន​ពេល​​ជិះ​ម៉ូតូ​គេច​​​ខ្លួន​​​​​​។

នៅ​​​ល្ងាច​​​ថ្ងៃ​​​បន្ទាប់​​​​ វេលា​​​​ម៉ោង​ប្រហែល​​៨​យប់ អ្នក​ស្រី សាគិកូ តាកាយ៉ាណាគី (Sakiko ​Takayanagi) ជា​ភ្ញៀវ​ទេស​ចរ​ជន​ជាតិ​ជប៉ុន​ត្រូវ​ចោរ​ប្លន់​បាញ់​មួយ​គ្រាប់​ចំ​​​ជើងនៅ​ពេល​អ្នក​ស្រី​តដៃ​ជាមួយ​ពួក​​​វា​​​ ដែលមាន​គ្នា​ពីរ​នាក់​​ជិះ​ម៉ូតូ​មួយ​គ្រឿង ខណៈ​​អ្នក​ស្រី​កំពុង​ដើរ​នៅ​ជិត​ផ្សារ​រាត្រី​ក្នុង​ខណ្ឌ​ដូន​ពេញ​។

ឧត្តម​សេនីយ៍​ត្រី ខេង ទីតូ អ្នក​នាំ​ពាក្យ​កង​​រាជ​អាវុធ​ហត្ថ​បាន​មាន​ប្រសា​សន៍​ថា “ចាប់​តាំង​ពី​មាន​​​អំពើ​ប្លន់ប្រដាប់អាវុធ​នេះ​​​​មក កង​រាជ​អាវុធ​ហត្ថ​បានសហ​ការ​ជាមួយ​នគរ​បាល​រាជ​ធានី​ដើម្បី​វែក​​​មុខ​​​​ជន​សង្ស័យ… ប៉ុន្តែ ខ្មាន់​កាំភ្លើង​​​​នៅ​​​មិន​​​ទាន់​​​ចាប់​​​ខ្លួន​​​បាន​​​ទេ​​​”។

លោក អ៊ុច សុខុន អធិការ​នគរ​បាល​ខណ្ឌ​ចំការ​មនមាន​ប្រសាសន៍​ថា “ យើង​កំពុង​បន្ត​ពិនិត្យ​មើល​​កាមេរ៉ា​សុវត្ថិ​ភាព​ ប៉ុន្តែ នៅ​​​មិន​​ទាន់​​ដឹង​​​ច្បាស់ថា តើ​ជន​សង្ស័យ​​ជា​នរណាទេ”។ លោក អ៊ុច សុខុន បាន​បន្ថែម​ថា “ប្រសិន​បើ​យើង​​រក​ពួក​គេ​ឃើញ​ យើង​នឹង​ប្រកាស​ជា​សាធារណៈ​”។

ទាំង​​ឧត្តម​សេនីយ៍ត្រី ខេង ទីតូ និង​លោក អ៊ុច សុខុន មិន​បាន​ផ្តល់​ព័ត៌​មាន​លម្អិត​ពី​ការ​ស៊ើប​អង្កេត​នេះ​​​ឡើយ ហើយ​​​ បាន​បដិសេធ​មិន​និយាយ​ថា តើ​នគរ​បាល​សង្ស័យ​ថា អំពើ​​​ប្លន់​​​ទាំងពីរ​​​ករណី​​​​នេះ​​​ត្រូវបាន​​​​ប្រព្រឹត្ត​ដោយ​​​​ជន​​​ល្មើស​​​តែ​​​មួយ​​​ក្រុម​​​​ ឬ​​ជន​ល្មើស​​​​មួយ​​​ក្រុម​​​​ផ្សេង​ទៀត​ឬ​យ៉ាង​ណា​ទេ​​​។ ក្រោយ​​​មាន​​​ករណី​​​បាញ់​ប្រហារ​​​​​​ លោក ឡ និង​អ្នក​ស្រី តាកាយ៉ាណាគី នេះ​​​ តំណាង​ស្ថាន​ទូត​ជប៉ុនប្រចាំ​​​ប្រទេស​​​កម្ពុជា​​​បាន​ឲ្យ​​​ដឹង​​​ថា លោក គូម៉ា​ម៉ារូ យូជី (Kummaru Yuji) ឯក​អគ្គ​រាជ​ទូត​ជប៉ុន​ នឹង​ជួប​ជាមួយ​មន្ត្រី​នគរ​បាល​ជាន់​ខ្ពស់ ដើម្បី​លើក​ឡើង​ពី​កង្វល់​របស់​ខ្លួន​​​ចំពោះ​​​​សុវត្ថិ​ភាព​របស់​ជន​ជាតិ​ជប៉ុន​នៅ​ក្នុង​ប្រទេស​កម្ពុជា​។

លោក យ៉ូស៊ីហ៊ីរ៉ូ អាបេ (Yoshihiro Abe) លេខា​ទី២ នៅ​ស្ថាន​ទូត​ជប៉ុន​បានឲ្យ​​​ដឹង​​​កាល​ពី​ម្សិល​មិញ​ថា លោក យូជី មិន​ទាន់​បាន​ជួប​ជាមួយ​មន្ត្រី​នគរ​បាល​នៅ​ឡើយទេ ប៉ុន្តែ​​​ថា​​​ លោក​នៅ​​​តែ​​​មាន​​​​បំណងធ្វើ​​​ដូច្នេះ​​​​​​នៅ​​​ពេល​​​ណា​​​មួយ​​​​​​។ លោក អាបេ បាន​បដិសេធ​មិន​បញ្ជាក់​​​ពី​​​​ស្ថាន​ភាពរបួស​​​ ឬកន្លែង​ស្នាក់​នៅ​របស់​អ្នក​ស្រី ​តាកាយ៉ាណាគី ឡើយ។

លោក ឡ ដែល​កំពុង​សម្រាក​ព្យាបាល​នៅ​មន្ទីរ​ពេទ្យ​កាល់​ម៉ែត ចាប់​តាំង​ពី​ពេល​​​វះ​កាត់​នៅ​យប់​ដែល​លោក​រង​របួស​ដោយ​គ្រាប់​កាំភ្លើង​នោះ បានបញ្ជាក់​ឲ្យ​​​ដឹង​​​កាលពី​ម្សិល​មិញ​ថា របួសបួ​ន​កន្លែង​ត្រង់​ក្រលៀន​​និងត្រង់​​ភ្លៅ​ខាង​ឆ្វេង​របស់លោក​​​ជិត​​​ជា​​​សះ​ស្បើយ​​​​ហើយ។ លោក ឡ បាន​មាន​ប្រសាសន៍​ថា “ យើង​មិនអីទេ” ដោយ​​​បាន​បន្ថែម​ថា លោក​មិន​ទាន់​​​ប្រាកដ​ថា តើ​ខ្លួន​​​នឹង​​ចេញ​ពី​មន្ទីរ​ពេទ្យ​នៅ​ពេល​ណា​ឡើយ​​​៕

ប្រែ​សម្រួល​ដោយ សោម សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស