30 C
Phnom Penh

អ្នក​ភូមិ​ពាក់​ព័ន្ធ​ក្នុង​វិវាទ​ដី​ធ្លី​ជាមួយ​អ្នក​មាន​ខ្នង​ក្រាស់រង​ការ​គំរាម​សម្លាប់​

ដោយ ឌឹ ខេមបូឌា ដេលី

បទវិភាគ

តំណាង​​បួន​នាក់​​​​របស់​​​អ្នក​ភូមិ​​​ដែល​ជាប់​ផុង​​​ក្នុង​វិវាទ​ដី​ធ្លី​ជាមួយ​ក្រុមហ៊ុន​ KDC ដែល​មាន​ខ្នង​ក្រាស់​ បាន​ដាក់​ពាក្យ​បណ្តឹង​ទៅ​សាលា​​ដំបូងខេត្ត​កំពង់​ឆ្នាំង បន្ទាប់​ពី​ពួក​គាត់​រង​​​ការ​​​គំរាម​សម្លាប់​។

លោក រាជ សីមា ដែល​​​ស្ថិត​​​ក្នុង​​​ចំណោម​​​អ្នក​​​តំណាង​ទាំង​​​បួន​​​នាក់ ក៏​បាន​និយាយ​​​​ថា “លិខិត​អនាមិក​នេះ គឺ​ជា​ការ​គំរាម​ដល់​អាយុ​ជីវិត​របស់​ពួក​យើង​”។
លោក​បានបន្ថែម​ថា ខ្លួន​​​បាន​ឃើញ​លិខិត​នេះ​ក្នុង​ថង់​ប្លាស្ទិក​មួយ​​ជាប់​របង​ផ្ទះ​របស់​លោក​ដែលស្ថិត​នៅ​ក្នុង​ឃុំ​តាជេស ស្រុក​កំពង់​ត្រឡាច​ ពេល​លោកទៅ​ធ្វើ​​​ស្រែ កាល​ពី​ថ្ងៃ​អាទិត្យ។

លោក រាជ សីមា បាន​ពន្យល់​ថា លិខិត​ដែលគេ​​ថត​ចម្លងតែ​​​​មួយ​ច្បាប់​យក​ទៅ​ទម្លាក់​ចោលនៅ​ក្បែរ​ផ្ទះ​របស់​លោកនេះ​​​ មាន​​​ការ​​​ព្រមាន​យ៉ាង​ច្បាស់​ដល់​រូប​លោក និង​សកម្ម​ជន​សិទ្ធិ​ដី​ធ្លី​​និយាយ​ឥត​សំចៃ​ចំនួន​​​បី​​​រូប​​​ទៀត ​មិន​​​ឲ្យ​ចូល​រួម​នៅក្នុង​ការ​ជួប​ជុំ​គ្នារឿង​នយោ​បាយ ដែល​រៀបចំ​ឡើងដោយ​គណ​បក្ស​សង្គ្រោះជាតិ។

លិខិត​ដែល​ផ្ញើ​ទៅ​លោក រាជ សីមា លោក​​​​ ពេញ រុំ លោក​​​ ស្ងួន យឿន និង​ប្រពន្ធ​របស់​លោក​ឈ្មោះ គង់ សុភី នេះ​​​ សរសេរ​​​ថា “ពួក​​​​ហ្អែង​​​​កុំនាំ​​​​មនុស្ស​ទៅ​ចូល​រួម​មហា​បាតុកម្ម​ឲ្យ​សោះ ចាំ​​​អញ​​​​​​​ផ្តល់​តំណែង​​​ [ក្នុង​រដ្ឋា​ភិបាល​] ​ឲ្យ​​​។  ប្រសិន​បើ​ពួក​​​ហ្អែង​​​ហ៊ាន​នាំ​​​មនុស្សទៅ​​​​ ពួក​​​ហ្អែង​​​គ្មាន​​​ថ្ងៃ​​​វិល​​​មក​វិញ​​​​ទេ​​​។ កុំ​ចង់​​​សាក​ បើ​មិន​អ៊ីចឹង​​​​ទេ ពួក​​​ហ្អែង​​​នឹង​ត្រូវ​ស្លាប់ ហើយ​​កូន​របស់​​​ពួក​​​ហ្អែង​​​នឹង​ត្រូវ​កំព្រា”។

លិខិត​អនាមិក​នេះ​​​​ត្រូវ​គេ​សរសេរ​ដោយ​​ដៃ ហើយ​មាន​គូររូប​ខ្នោះ​ដៃនិង​កាំ​ភ្លើងខ្លី​ទៀត​ផង។ លោក រាជ សីមា បាន​ឲ្យ​​​ដឹង​​​​ថា លិខិត​នេះ​​គ្មានន័យ​អ្វី​ផ្សេង​ក្រៅពីការ​គំរាម​សម្លាប់​ឡើយ​ ហើយ​ថា លោក​ជឿ​ថា អ្នក​ភូមិ​ទទួល​បាន​លិខិត​នេះ​ ដោយ​សារ​តែរឿង​​​​​វិវាទ​ដី​ធ្លី​​​​​​​អូស​​​បន្លាយ​​​ជាមួយ​ក្រុម​ហ៊ុន KDC របស់​​​​ភរិយា​​លោក ស៊ុយ សែម អតីត​រដ្ឋ​មន្ត្រី​ក្រសួង​ឧស្សា​ហកម្ម​ រ៉ែ និង​ថាម​ពល​​​ ​។

គួរ​​​រំឭក​​​ថា​​​ អ្នក​ភូមិ​ចំនួន​​​៦០​គ្រួសារ​នៅ​ក្នុង​ភូមិ​ឡពាង កំពុង​តស៊ូ​ទាមទារ​ដី​ស្រែ​ជាង​១៤៥​ហិកតា ដែល​ក្រុម​ហ៊ុន KDC របស់​អ្នក​ស្រី ជា ខេង បាន​បណ្តេញ​ពួក​គាត់​ចេញ​កាល​​ពី​ឆ្នាំ​២០០៧។

លោក ជួប ចាន់​ធឿន នាយ​ប៉ុស្តិ៍​​​​នគរបាល​​​ឃុំំតាជេស បាន​ឲ្យ​​​ដឹង​​​​ថា លោក​នឹង​ស៊ើប​អង្កេត​ពីការ​គំរាម​សម្លាប់​សកម្ម​ជន​ទាំង​បួន​នាក់​នេះ។ លោក​បាន​មាន​ប្រសាសន៍​ថា “យើង​នឹង​ចាប់ផ្តើម​ធ្វើការ​ស៊ើបអង្កេត​បន្ទាប់​ពី​ទទួល​បាន​ពាក្យ​បណ្តឹង​​​នេះ​​​ [នៅ​ថ្ងៃ​នេះ]”។ លោក​បាន​បន្ថែម​ថា គេ​​​​​មិន​​​ទាន់​​​អាច​​​​សន្និ​ដ្ឋាន​​​​បាន​​​ថា លិខិត​អនាមិក​នេះ​ពាក់​ព័ន្ធ​រឿង​​នយោ​បាយទេ​​​។

លោក សំ ចាន់គា ជាអ្នក​សម្រប​សម្រួល​របស់​អង្គការ​សិទ្ធិ​មនុស្ស​អាដហុក​ ប្រចាំ​ខេត្ត​នេះ​​​​បាន​លើកឡើង​​​ថា ការ​គំរាម​នេះគួរ​​​​ទទួល​​​​បាន​​​ការ​​​យក​​​ចិត្ត​​​ទុកដាក់​​​​។ លោក​បាន​មាន​ប្រសាសន៍ថា “វា​ជា​ការ​រំលោភ​សិទ្ធិ​មនុស្ស​ដ៏​ធ្ងន់។ គួរ​​​​មាន​​​ការ​​​ចាប់​ខ្លួនជន​ល្មើស​​មក​ផ្តន្ទា​ទោស​”៕

ប្រែ​សម្រួល​ដោយ សោម សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស